Hɔrɔya 29

Sarika lakelanu kɛrɛkɛrɛ koe

1«I tini be Harona nun a la deŋɛnu kɛrɛkɛrɛla, anu ni sarika lake wale ma n ɲɛ, i be kɛ-lɛ mala: tuura lanma dɔndɔ jigan, anun saaka konton fila, kɔnɔ yo bele minnu la. 2I mɛn ni dɛgɛ jigan, anun lɛɛki min be lamulanden tule la, anun gato tule be saren min ma, wo bɛ ni ma lɛbinibɔnɛ la, a bɛ be ɲiɲala farin buntendeŋɛ le la. 3I be wo bɛ sala boroŋɛ le butɔ, i ni a doni hɔrɔma dingira tɔ, anun wo tuuradeŋɛ nun wo saaka konton fila.

4I mɛn si Harona nun a la deŋɛnu doni le bɛndula boŋɛ dondula tɔ, i ni anu saniyan je la. 5I ni Harona la donfeŋɛnu lajigi a ma: a la doroki banba kɔtɔnɛŋɛ a masɔgɔreŋɛ yo, a la doroki banba bolo wutuma yo, a la doroki kunmanɛŋɛ bolobɔnɛ yo anun a la jusukun mabutinfeŋɛ. I be wo dorokenu bɛ kitila doroki kunmanɛŋɛ la tɛtakitiraŋɛ le la. 6I si kufunɛ don de a kuŋɛ tɔ, i ni naa wo wala lanma saniyandeŋɛ kiti wo kufunɛ la. 7I si tulu saniyandeŋɛ do jigan de i ni a bɔn a kuŋɛ ma, alako a ni lɔn mɔgɔ masubɛreŋɛ le mu a la. 8I si a la deŋɛnu tugun madon de, i ni anu la doroki banba masɔgɔreŋɛ lajigi anu ma, 9i ni naa kufunɛ don anu ye. I mɛn be Harona nun a la deŋɛnu tɛ kitila tɛtakitiraŋɛ le la. Wo butɔ, anu be mala sarika lakela la ɲɔgɔnna le, wo ni ma sariya banbale la.

Awa, i tini be sɔdula diila Harona nun a la deŋɛnu ma, i be kɛ-lɛ mala:

10I ni wo tuura lanma sɔ hɔrɔma dingira dala, Harona nun a la deŋɛnu si naa anu bole sa a kuŋɛ tɔ.#29:10 Taureta Musa kitabu sabaɲɔgɛ, sora 8 haaya 14 fɛlɛ. 11I ni wo tuura lanma kannatɛgɛ nde Alatala ɲala, hɔrɔma dingira dondula tɔ. 12I ni a base do jigan, i ni a sa i bolo soliŋɛ la sarika bintandula binanu ma, i ni naa basi tɔɛ bɔn sarika bintandula kɛn kɔtɔ. 13Wo kɔma, i si kɛ́ŋɛ jigan min bɛ be bu butɔ feŋɛnu ma, anun laare min be a juse mabutinden, anun kɔkelenu anun kɛ́ŋɛ min be anu ma; i si wo bɛ bintan sarika bintandula tɔ han a siise ni yɛlɛ. 14Kɔnɔ tuura sube nun a bole nun a jaaɲɛ, i be wonu bintanna daaka kɔma la le: junubu kafari sarika le mu.

15Wo saaka kontoŋɛ fila tɔ, i ni dɔndɔ jigan, Harona nun a la deŋɛnu ni naa anu bole sa a kuŋɛ ma. 16I ni a kannatɛgɛ, i ni a base jigan i ni a punpun sarika bintandula lamiliŋɛ tɔ. 17I be a sube kuntula a kuntu kunte le la, i ni a bu butɔ feŋɛnu nun a kɛŋɛnu lako, i ni anu sa wo kuntenu nun a kuŋɛ kunma sarika bintandula kunma. 18I ni a sube bɛ bintan sarika bintandula kunma. Sarika bintannɛŋɛ le mu wo la nde Alatala ye, ta be min bintanna, a kuɲɛ diyama ni yɛlɛ nde Alatala ma.

19Wo kɔma, i ni saaka kontoŋɛ doe tugun jigan, Harona nun a la deŋɛnu ni naa anu bole sa a kuŋɛ ma. 20I ni a kannatɛgɛ, i ni a base do jigan, i ni a sa Harona nun a la deŋɛnu bolo ɲinma tolo kɔtɔ ma, anun anu bolo ɲinma kunkuruba nun anu bolo ɲinma kɛnsolin kunkuruba ma; i ni naa wo basi tɔɛ punpun sarika bintandula lamiliŋɛ tɔ. 21Base min be sarika bintandula kunma, i ni a do jigan anun tulu saniyandeŋɛ do, i ni a punpun Harona ma anun a la kutanu, i ni anu punpun a la deŋɛnu tugun nun anu la kutanu ma. Wo butɔ, Harona nun a la deŋɛnu bata kɛrɛkɛrɛ, anun anu la kutanu.

22Wo saaka kontoŋɛ mu sarika le la min si sɔdula dii mɔgɛ ma sarika lake wale la. Wolo mu, i ni a kɛ́ŋɛ jigan: a fɔɲɛ, anun kɛ́ŋɛ min be a bu butɔ feŋɛnu ma, laare min be a juse mabutinden, kɔkelenu anun kɛ́ŋɛ min be anu mabutinden, anun a bolo ɲinma wote. 23I mɛn ni boroŋɛ jigan dɛgɛ lɛbinibɔnɛnu be min tɔ, min be sigiren nde Alatala ɲakɔtɔ: i ni dɛgɛ tigilindeŋɛ dɔndɔ jigan anu tɔ, anun lɛɛki dɔndɔ min be lamulanden tule la, anun gato dɔndɔ. 24I si wo dɛgɛnu nun wo sube bɛ sa le Harona nun a la deŋɛnu bole tɔ, anu ni wonu bɔɔ sarika la, anu ni anu dantɛgɛ nde Alatala ye. 25Wo kɔma, i ni naa anu bɔɔ anu bole tɔ, i ni anu sa sarika bintandeŋɛ doenu kunma sarika bintandula kunma, i ni naa anu bintan. Sarika le mu, ta be min bintanna, a kuɲɛ diyama ni yɛlɛ nde Alatala ma. 26I mɛn ni saaka kontoŋɛ jusukuŋɛ tugun jigan min be maren Harona sɔfeŋɛ la, i ni a dantɛgɛ nde Alatala ye, wo kɔma a si ma ile Musa tɛŋɛ la, i ni a dɔmɔ.

27Wo saaka kontoŋɛ min be maren Harona nun a la den kayireŋɛnu sɔfeŋɛ la, i be a jusukuŋɛ anun a wote minnu dantɛgɛren nde Alatala ye, i be wondelen kɛrɛkɛrɛla: 28bani Isirayila kaanu tini be kɛnɛ kanunteya sarika bɔɔla nde Alatala ye, anu bɛnta le anu ni wo kuntu fila dii Harona nun a bɔnsɛ ma anu ni anu dɔmɔ. Wo be mala sariya banbale le la bani Isirayila kaanu ye.

29Harona tanbi kɔma, a la donfen saniyandeŋɛnu be donna a la den kayireŋɛnu le bolo; anu be anu donna anu tini be kɛrɛkɛrɛla sɔ koe la wale la lun min na. 30A la deŋɛ min be tola a gbaa tɔ, a ni ma sarika lakela banba la, wo donfeŋɛnu be lajigila wolo ma han tele wɔrɔwila, jɔnɔn a ni naa don hɔrɔma dingira butɔ, wali madula dula saniyandeŋɛ tɔ.

31Awa, i si saaka kontoŋɛ subu kuntu fila jigan de, i ni naa anu taba dula do tɔ ka min be saniyanden. 32Harona nun a la den kayireŋɛnu be wo sube dɔmɔla bɛndula boŋɛ dondula le tɔ, anun dɛgɛ tɔɛ min be boroŋɛ butɔ. 33Anu dɔrɔn de si kɛ dɔmɛnu dɔmɔ a ni ma anu la junubu kafarifeŋɛ la, anu mɛn ni ma anu sɔfeŋɛ la, anu ni anu kɛrɛkɛrɛ tugun; mɔgɔ gbɛtɛ yo te anu dɔmɔ, bayi fondo saniyandeŋɛ le mu anu la. 34Ka dɔmɛ do tota han saguma, i ni wo dɔmɔ tɔɛ bintan ta la han a ni keremun, a ma bɛn dɔmɔla bitugun, bayi fondo saniyandeŋɛ le mu a la.

35Awa, i be a mala Harona nun a la den kayireŋɛnu ye ɲɔgɔnna le, iko n ka yamɔre min bɛ dii i ma: i be anu sɔla sarika lake wale la tele wɔrɔwila le kɔtɔ. 36Lun go lun, i be tuura lanma le bɔɔla junubu kafarifeŋɛ la, i mɛn ni sarika bintandula lasaniyan. I mɛn ni tulu saniyandeŋɛ sa sarika bintandula ma a saniyan koe la. 37Tele wɔrɔwila kɔtɔ, i be wo koe bɛ mala sarika bintandula kunma le, alako a ni to a dana ma: wo tɛmuɛ a bata ma fondo saniyandeŋɛ fisamante la, ka fenfen magata a la, a bata saniyan.

Sarika banbale min be mala lun go lun

38I be kɛnɛ kɛ-lɛ bɔɔla sarika bintandula kunma wagate bɛ: lun go lun, saaka konton fila minnu bata san dɔndɔ dɔndɔ sɔtɔ. 39I ni saaka konton dɔndɛ bɔɔ saguma, i ni doe bɔɔ fitiri warawara ma. 40Saaka konton dɔndɛ, i be farin buntendeŋɛ kilo saba le sala a kunma, anun oliwiye tulu ɲinma litari dɔndɔ anun a tɛma, anun rɛsɛn je litari dɔndɔ. 41Saaka kontoŋɛ doe, fitiri manɛŋɛ, i be farin nun tule nun rɛsɛn je sala wo tugun kunma iko sagumanɛŋɛ. I ni a bintan, a kuɲɛ diyama ni yɛlɛ nde Alatala ma. 42Sarika bintannɛŋɛ le mu, min bɔɔ koe be wajibiyaren wo bɔnsɛnu ma tɛmuɛ bɛ tɔ. A be bɔɔla bɛndula boŋɛ dondula le tɔ sarika bintandula kunma, nde Alatala ɲala. Nde nun wole be bɛnna ɲɔ le, n be kumala i ye ɲɔ le.

43Nde nun bani Isirayila kaanu be bɛnna ɲɔ le, n nɔɔra mɛn si naa ɲɔ kɛrɛkɛrɛ. 44N si bɛndula boŋɛ kɛrɛkɛrɛ le, anun sarika bintandula. N mɛn si Harona nun a la den kayireŋɛnu kɛrɛkɛrɛ le, alako anu ni sarika lake wale ma n ɲɛ. 45N si sabati le bani Isirayila kaanu tɛma, n mɛn si ma le anu la Ala la. 46Wo butɔ, anu si a lɔn de nde le mu Alatala la, anu la Ala, min ka anu labɔɔ Misira duge tɔ, alako n ni sabati anu tɛma. Alatala mu nde le la, anu la Ala.»

Currently Selected:

Hɔrɔya 29: MOG

Highlight

Compare

Copy