Kiilanu 3

Namata lakendeya koe

1Lun do, salifana tanbi kɔma, Piyɛri nun Yaya be yɛlɛla tagala Ala batudula, Ala batu bon banba tɔ, bayi Ala batu wagate le mu. 2Wo ka a taran, kaye do be ɲɔ, mɔgɛnu be kɛnɛ min natila ɲɔ min mu namata la bɔɔla a sɔtɔ tɛmuɛ. Anu be a jiganna lun go lun, ka taga a sigi Ala batu bon banba bonda dala, min tɔgɔ Bonda Majabureŋɛ, alako minnu be donna Ala batu bon banba tɔ, a ni wonu táran nɛgɛ la. 3A to ka Piyɛri nun Yaya yen donna Ala batu bon banba butɔ, a tota wonu táranna nɛgɛ la. 4Piyɛri nun Yaya ka anu ɲanu sɔ a la. Piyɛri ka a fɔ: «Mɔ fɛlɛ!» 5A tota anu fɛlɛla, bayi a yili be a ma, a si fondo sɔtɔ anu la. 6Kɔnɔ Piyɛri ka a fɔ a ye, a ko: «Nɛgɛ bele n bolo feu, kɔnɔ min be n bolo, n be wolo diila i ma: Ala la mɔgɔ masubɛreŋɛ Isa Nasarɛti kaa tɔgɛ la, wuli, i ni tagaman!» 7Wo butɔ, Piyɛri ka a bita a bolo ɲinma bole ma, a ka a lawuli. A tɛppɛrɛnu anun a wɔlɔkɛnu ka sɛnbɛ sɔtɔ kisanna. 8A wulita teriya la, a sɔta, a ka tagamaŋɛ fɔlɔ. A nun kiilanu donta ɲɔgɔn na Ala batu bon banba butɔ, a be tagamanna, a be tunna a be sɔrɔnna, a tota Ala tantula. 9Jama bɛ ka a yen tagamanna, a be Ala tantula. 10Anu be a lɔnden ale le be kɛnɛ sigila tarili mala, Ala batu bon banba Bonda Majabureŋɛ dala. Koe min mata a ye, wo ka anu mafu, a ka anu makaabɛ koola.

Piyɛri la kawande jama ye

11Kaye to bele saagila Piyɛri nun Yaya kɔma, jama bɛ borita tagala anu dula Ala batu bon banba ɲinbe kɔtɔ min be tɔgɔ saren Sulemani la, anu be kaabɛren koola. 12Piyɛri to ka wo yen, a ka kuma da bita, a ko jama ma: «Wole bani Isirayila kaanu, wo be kaabɛla kɛ koe ma fenna? Wo be wo ɲanu sɔren mɔ la fenna iko kɛ kaye tagamanta mɔ yɛtɛ sɛnbɛ le la, ka wo ma mɔ la Ala ɲalakilaŋɛ 13Ade, Iburahima nun Isiyaka nun Yaguba la Ala, mɔ benbanu la Ala, wolo bata a la jondeŋɛ Isa kunnawuli, wole ka min to mansa Pilati sagoe tɔ. Wo tanbi kɔma, a boloka sɔgɛ be Pilati la wagate min tɔ, wole nɔn ka a aɲɛ a ɲala. 14Iyon, wole bata Saniyanbaga nun Telenbaga aɲɛ, wo mɛn naata Pilati mataran, a ni mɔgɔ fagalá do labɔɔ wo ye geele tɔ. 15Wo butɔ, wo bata Malakisi tige faga, kɔnɔ Ala ka a lawuli fagabaganu tɛma; mɔle mu wo seede la. 16Wo be kaye min yenden kɛ la, wo ka min lɔn, a bata sɛnbɛ sɔtɔ tagamaŋɛ la a la dɛnkɛnɛya sabu la Isa tɔgɛ la. Iyon, a la dɛnkɛnɛya min be fatanden Isa la, wolo ka a lakendeya ken wo bɛ ɲala.

17Awa, n bareŋɛnu, n ka a lɔn wo ka min ma Isa la, wo ka a ma a fahamubaliya le la, iko wo la kuntigenu. 18Kɔnɔ, Ala ka kuma min yita wagati tanbireŋɛ tɔ, a la nabiyonmɛnu bɛ sabu la, a fɔ koe la, aa a la mɔgɔ masubɛreŋɛ si naa ɲagankata le, a ka wo kuma lakamali le. 19Wolo mu, wo ni tuubɛ, wo ni wo yɛtɛ lasaagi Ala ma, alako wo la junubenu ni kafari, 20alako Marige ni jususa wagate nati, a ni a la mɔgɔ masubɛreŋɛ Isa kii, a bata min sɔ wo ye nun. 21Kɔnɔ fɔ Isa ni to saŋɛ tɔ, han wagate tini ke, koenu bɛ be taɲiɲala tɛmuɛ min tɔ, iko Ala ka a yita ki min na a la nabiyonmɛ saniyandeŋɛnu sabu la bɔɔla hau. 22Annabi Musa yati ka a fɔ le:

‹Wo Marige Ala si nabiyonmɛ do kii le wo ma, min si to iko nde, wo be bɔɔla wo bɔnsɛ le tɛma. A be min bɛ fɔla wo ye, wo ni a bita.

23 Mɔgɔ yo ma wo nabiyonmɛ kulɛ bita, wo tigi si bɔɔ le Ala la jama ɲaama, a ni faga.› # 3:23 Taureta Musa, kitabu looluɲɔgɛ, sora 18, haaya 15 han 19 fɛlɛ.

24Ka bɔɔ annabi Samiyɛli ma, ka sigi a kɔma nabiyonmɛnu la, anu bɛ kumata, ande tugun ka kɛ wagate tele la ko fɔ. 25Awa, nabiyonmɛnu la deŋɛnu le mu wole la. Ala ka lahire min nakoti anun wo benbanu tɛma, a ka a lakiti wole tugun ye a to ka a fɔ Iburahima ye, a ko:

‹Dunuya see bɛ si hɛra sɔtɔ le i bɔnsɛ sabu la.› # 3:25 Taureta Musa, kitabu fɔlɛ, sora 22, haaya 18 fɛlɛ.

26Ala bata a la jondeŋɛ Isa lawuli, a ka a kii wo fɔlɔ le ma, alako a ni hɛra ma wo ye, a ni wo bɛ dɔndɔ dɔndɔ bɔɔ wo la kila koroŋɛ kɔma.»

Currently Selected:

Kiilanu 3: MOG

Highlight

Copy