1 Tesaloniki 3
3
Timote kii koe Tesaloniki dɛnkɛnɛyabaganu ma
1Wo butɔ, mɔ juse to bele saren nun wo la ko la, mɔ ka a hanige mɔle dɔrɔn ni to Atɛni saa tɔ, 2mɔ ni wo mɔ nɛɛnɛdɔndɛ Timote kii wo ma. ⸂Ala la walila do le mu a la,⸃ mɔ nun ale le be walila Ala la mɔgɔ masubɛreŋɛ la kibaru ɲinma lake koe tɔ. Mɔ ka a kii le nun, alako a ni wo sɛnbɛ sa, a ni wo lalimaniya wo la dɛnkɛnɛya butɔ, 3alako wo la mɔgɔ yo kana hanmɛ wo la ɲagankata tɔ wo be min tɔ ka. Wole yati ka a lɔn, wo ɲagankata le be lagiriren wo mɔ ma. 4Kaa, mɔ ɲan ma a fɔ le nun wo ye mɔ be wo ɲaama tɛmuɛ min tɔ nun, mɔ ko mɔgɛnu si naa le wo mɔ ɲagankatadula? Awa, wo bata a yen kɔtɛ, wolo bata naa ma. 5Wolo mu, n ɲan juse to bele saren betunna nun, n ka Timote kii ɲɔ alako a ni a lɔn, wo la dɛnkɛnɛya be ki min na. Bayi n be a kiila wagate min tɔ, fen min kilaŋɛ tota n ɲɛ, n ko ka Sentanɛ mɔgɔ latantanná ma wo latantan nun... Wo tɛmuɛ mɔ la wale bata ma wali fufafue la!
6Kɔnɔ Timote to be bɔɔren saagila mɔ dula bɔɔla wo bata, a bata kibaru ɲinma le fɔ mɔ ye wo la dɛnkɛnɛya nun wo la kanunteya la ko la. A ko, aa tɛmuɛ yo tɛmuɛ ka mɔ la ko mira tota wo ye, a be mala wo ye sɛɛwa le la. A ko, aa mɔ yen sɔgɛ be wo la, iko wole tugun tayen sɔgɛ to be mɔ la. 7Wo butɔ, n nɛɛnɛdɔndɛnu, hali mɔ to be ɲagankata nun tɔɔrɛ tɔ, mɔ bata limaniya wo la ko la, wo la dɛnkɛnɛya sabu la. 8Mɔ juse bata sa kɔtɛ yati yati, bayi mɔ bata a lɔn ka a fɔla wo la dɛnkɛnɛya be kunden Marige tɔ.
9Ee kɔnɔ, mɔ si nɔ Ala tantula kama le wo la ko la bitugun? Sɛɛwa min be mɔ ye mɔ Marige Ala mafanna wo la ko sabu la, dan bele a la. 10Sue nun tele mɔ be a mataranna sɔɔbɛ la, mɔ ni nɔ wo tayenna, mɔ mɛn ni karaŋɛ da lafa wo ye, ka wo la dɛnkɛnɛya lasabati.
11Awa, wo mɔ Baaba Ala yɛtɛ, anun wo mɔ Marige Isa ni kila lafara mɔ ye, alako mɔ ni wo dula masɔtɔ. 12Kanunteya min be wo ye wo doro tɛma, anun wo nun mɔgɛ bɛ tɛma, Marige ni wo kunmasa koola, iko mɔle tugun be wo kanuren ki min na. 13Wo butɔ, Ala ni wo sɛnbɛ sa, alako wo mɔ Marige Isa tini tana lun min na anun a la saniyanbaganu bɛ la, wo ni nɔ sɔla wo mɔ Baaba Ala ɲakɔtɔ saniyaŋɛ butɔ malakɔrɔsi yo bele wo ma.
Currently Selected:
1 Tesaloniki 3: MOG
Highlight
Share
Copy
Want to have your highlights saved across all your devices? Sign up or sign in
