1 Samiyɛli 8
8
Isirayila kaanu la mansa ɲini koe
1Samiyɛli to bata kayibaya, a ka a la den kayireŋɛnu ma kiiti salanu la Isirayila kunma. 2A la den kayiren fɔlɛ tɔgɔ le Yoweli, a filaɲɔgɛ tɔgɔ Abiya. Ande le mu kiiti salanu la Bɛri-Seba. 3Kɔnɔ Samiyɛli la den kayireŋɛnu ma tagaman iko ale, anu sɔta anu la munanfaŋɛ le kɔma. Mɔgɛnu tota je sigila anu ye, ka kiite laɲɛngɛn.
4Lun do, Isirayila kayibanu bɛ madɛnta, anu tagata Samiyɛli yendula Rama saa tɔ. 5Anu ka a fɔ a ye, anu ko: «A fɛlɛ, i bata kayibaya, i la den kayireŋɛnu bele tagamanna iko ile. Awa mansa sɔ mɔ kunma, wo ni ma mɔ bɛ la kuntige la. Mansa ni to mɔ ye iko jamanɛ doenu.» 6A fɔ koe, «mansa don mɔ bolo, ale ni ma mɔ la kuntige la», a bele diyaren Samiyɛli kan ye. Wo butɔ, a ka Alatala mataran. 7Kɔnɔ Alatala ka a fɔ Samiyɛli ye, a ko: «Jama kulɛ lamɔɛ de! Ka anu ka min yo fɔ i ye, i ni wo bita, bayi anu bele ile le aɲɛren, anu be nde le aɲɛren, alako n kana ma mansa la anu kunma bitugun. 8Anu be min mala i la ka, anu be wolo mala nde tugun na nun: bɔɔla n ka anu labɔɔ Misira butɔ han bi, anu be n bolokaren ka ala gbɛtɛnu batu. 9Awa kɔtɛ, i tolomasɔ anu kulɛ la. Kɔnɔ, kɛ mansa min be nala sigila anu kunma, yamɔre min si naa to a bolo, min be ladagɛren a ni a ma, i ni anu lasogi wo la a ɲinma la ka a ɲatabɔ anu ye.»
Samiyɛli la jama lasogi koe mansa la yamɔri kɛɲa la
10Samiyɛli ka Alatala la kuma bɛ matanbi jama ma, minnu be mansa la ko ɲininkare maren nun a ma. 11A ko: «Mansa min be nala wo yamɔrila, kɛ-lɛ be ladagɛren a ye a ni a ma: a si wo la den kayireŋɛnu jigan de, a ni anu ma a la sɔɔrenu la anu ni a la soeenu nun a la kɛlɛ mafen sarɛtinu labori, anu ni sɔ a tɛn sarɛti ɲatɔ ka to borila tagala kɛlɛ madula. 12A si donu jigan anu ni ma gali kuŋɛ la, mɔgɔ wulu dɔndɔ kuruŋɛ kunma, ka wo ma mɔgɔ bi loolu. A si donu tugun jigan anu ni a la sɛnɛnu wɔtɔ, a ni donu jigan anu ni a la sɛnɛnu tɛgɛ. A si donu jigan anu ni a la kɛlɛ mafeŋɛnu ɲiɲa, ka wo ma a la sarɛtinu. 13A si wo la den musereŋɛnu tugun jigan, anu ni tabare ma a ye, ka dɛgɛ bintan, ka labundɛ tugun ɲiɲa a ye. 14Tɔnɛ min be wo la sɛnɛnu tɔ, wo la rɛsɛn suntenu tɔ anun wo la oliwiye suntenu tɔ, a si a bɛ jigan de, a ni a don a la walilanu bolo. 15A si wo la kifen wole tanɲɔgɛ yo tanɲɔgɛ jigan, a ni a dii a la walilanu nun a la mansa mɛsɛŋɛnu ma. 16A si wo la walilá ɲinmanu jigan de, a kayimanu nun a musumanu. Wo la fonikenu, anun wo la sofalenu, a ni anu ɲusu a la walenu la, a dita a ye ki min na. 17Wo la baa nun saakanu tɛma, a si a tanɲɔgɛ bɛ jigan a ni a ma a tɛŋɛ la. A si wole tugun ma le a la joŋɛnu la. 18Wo si belebele le wo lun, wo la mansa la ko sabu la, wo ka min masubɛ wo yɛtɛ ye, kɔnɔ Alatala te wo jaabi wo lun.»
19Kɔnɔ jama ma sɔn a tolomasɔla Samiyɛli la. Anu ko: «Ade, mansa ká sɔ mɔ kunma tun, 20mɔle tugun ni to iko jamanɛ doenu bɛ be ki min na, mɔ la mansa si ma mɔ la kuntige la, a ni sɔ mɔ ɲatɔ kɛlɛ madula.» 21Samiyɛli ka jama la wo kuma bɛ lamɔɛ, a ka a bɛ matanbi Alatala ma. 22Alatala ka a fɔ Samiyɛli ye: «I tolomasɔ anu la. I si mansa sɔ le anu kunma.» Wo tanbi kɔma, Samiyɛli ka a fɔ Isirayila jama ye: «Bɛ ni saagi a bata saa tɔ.»
Currently Selected:
1 Samiyɛli 8: MOG
Highlight
Share
Compare
Copy
Want to have your highlights saved across all your devices? Sign up or sign in
