1 Samiyɛli 5
5
Alatala la Filisiti kaanu ɲagankata koe a la kankira la ko la
1Filisiti kaanu ka Ala la lahiri seedeɲɔgɔya kankira jigan Ebɛn-Eseri, anu ka a doni anu bata saa tɔ ka min tɔgɔ Asidɔdi. 2Anu ka Ala la lahiri seedeɲɔgɔya kankira jigan, anu ka a doni anu la kuye banba min tɔgɔ Dagɔn la boŋɛ tɔ, anu ka a sigi wo kuye kɛnna. 3Wo tabantaka, Asidɔdi kaanu wulita saguma piri, anu ka a taran Dagɔn be boeren a ɲakɔtɔ ma, Alatala la lahiri seedeɲɔgɔya kankira kɛnna. Anu mɛn saagita a jiganna, anu ka a sigi a sigi dula tɔ. 4Wo tabantaka tugun, anu wulita saguma piri, anu ka Dagɔn taran a be boeren duge tɔ Alatala la lahiri seedeɲɔgɔya kankira ɲatɔ. A bali wunde tun de be toren ɲɔ. Kɔnɔ a kuŋɛ nun a bolo filanu bɛ be pagatiren a bale wunde ma, anu be saren Dagɔn na boŋɛ bonda bɔrɔngale tɔ. 5Wolo be a maren han kɔtɛ Dagɔn kuye la sarika lakelanu anun minnu bɛ be donna Dagɔn batu dula Asidɔdi, anu te anu kɛŋɛ sɔ bonda bɔrɔngale tɔ.
6Alatala ka a la nɔɛ digin Asidɔdi kaanu ma, a ka kasara siyama ma anu tɛma. A ka yiti bandiya latugu Asidɔdi saa la, anun a be duge min bɛ yamɔrila. 7Anu to ka wo koe yen, anu ka a fɔ: «Isirayila la Ala la kankira te nɔ tola wo mɔ bata bitugun, bayi a la nɔɛ bata bɛlɛya mɔ nun mɔ la kuye Dagɔn kunma.»
8Anu ka Filisiti kuntigenu bɛ madɛn, anu ka a fɔ anu ye: «Wo mɔ be fen de mala Isirayila la Ala la kɛ kankira la?» Anu nata a fɔ anu ko anu ni a latanbi Gati saa tɔ. Wo butɔ, anu ka Isirayila la Ala la kankira latanbi Gati. 9Kɔnɔ wo kankira latanbi kɔma Gati saa tɔ, Alatala ka a la nɔɛ digin anu ma. Wo mata anu ye kilaŋɛ banba la. Kabɔɔ dendeŋɛnu ma, han ka ke kayibanu ma, yiti bandiya tuguta anu bɛ la. 10Wo butɔ, anu ka kankira doni Ekirɔn saa tɔ. A to donta Ekirɔn saa tɔ, ɲɔ kaanu belebeleta, anu ka a fɔ: «Anu bata Isirayila kaanu la Ala la kankira layirindi mɔ bata, alako a ni mɔ nun mɔ la jama bɛ faga.»
11Anu nata Filisiti kaanu la kuntigenu makele, anu ka anu bɛ madɛn. Anu ka a fɔ anu ye: «Wo mɛn ká saagi Isirayila kaanu la Ala la kankira fɛ, wo ni taga a sigi a be ka min na nun. A kana mɔ nun jama tɔɛ bɛ faga.» Wo wagate, saa bɛ bata kɔntɔfili, kilaŋɛ banba be anu ma anu faga koe la. Alatala la nɔɛ be diginden anu ma koola. 12Ka minnu kisita faga ma, yiti bandiya ni wonu bita. Ɲɔ kaanu ka anu kulɛ mayɛlɛ dɛmare koe la han a keta saŋɛ tɔ.
Currently Selected:
1 Samiyɛli 5: MOG
Highlight
Share
Compare
Copy
Want to have your highlights saved across all your devices? Sign up or sign in
