1 Samiyɛli 3
3
Alatala la Samiyɛli kele koe
1Wo wagate, Samiyɛli kamarendeŋɛ be Alatala la wale mala Eli bolo. Alatala la kuma koe mɔgɛ la, a ma siya nun. Ko yendeŋɛnu iko kiboe wonu tugun ma siya.
2Lun do, Eli be saren a la dula kɔtɛ tɔ. Wo ka a taran, a ɲanu sɛnbɛ bata dɔgɔya, fayida a bata di mala ɲabɔnɛ la. 3Ala la lanpue#3:3 Ala la lanpue Lanpu wɔrɔwila le mu anu la, minnu labɛndeŋɛ be sigiren lanpu sigifeŋɛ tɔ hɔrɔma dingira tanta butɔ. Alatala ka bani Isirayila kaanu yamɔri le, lanpue ni to bitaren su muru hɔrɔma dingira tɔ. Taureta Musa kitabu filaɲɔgɛ fɛlɛ, sora 27 haaya 20 anun 21; anun a kitabu sabaɲɔgɛ, sora 24 haaya 2 anun 3 (Hɔrɔya 27:20-21; Lewi bɔnsɛnu la sariya 24:2-3). bele dufenden nun betunna, Samiyɛli kan be saren Alatala be batula dula min tɔ, lahiri seedeɲɔgɔya kankira be ka min na nun.
4Awa, Alatala ka Samiyɛli kele. A ka a labita, a ko: «Naamu, n be yan.» 5A tagata borila Eli dula, a ka a fɔ: «I to ka n kele, n bata na.» Eli ka a jaabi, a ko: «Ade, n ma i kele, taga i ni sa.» A tagata sa.
6Alatala mɛn ka Samiyɛli kele. A wulita, a tagata Eli dula, a ka a fɔ a ye: «Ile le ka n kele, n bata na.» Eli ka a jaabi, a ko: «N na den, n ma i kele. Saagi, i ni sa.» 7Samiyɛli bele a lɔnden betunna, ka a fɔla Alatala le be a kelela. A fɔlɔ ma Alatala kulɛ mɔɛ nun.
8Alatala mɛn ka Samiyɛli kele a kunɲama sabaɲɔgɛ la. A wulita, a tagata Eli dula, a ka a fɔ a ye, a ko: «Ile le ka n kele, n bata na.» Eli nata lɔn sɔtɔ a ma, ka a fɔla Alatala le be deŋɛ kelela. 9Eli ka a fɔ Samiyɛli ye, a ko: «Saagi, i ni sa. Awa ka i ka keleri kulɛ mɔɛ bitugun, i be a fɔla le, i ko: ‹Alatala, i la jondeŋɛ be a tolomasɔren i la, i ni kuma.›» Samiyɛli tagata sa a darita sala ka min na nun. 10Alatala nata a dula iko wo fɔlɛ doe, a ka a kele, a ko: «Samiyɛli, Samiyɛli.» Samiyɛli ka a labita, a ko: «I la jondeŋɛ be a tolomasɔren i la, i ni kuma.» 11Alatala ka a fɔ Samiyɛli ye, a ko: «N be nala ko do le mala Isirayila, min bɛ tolo fila tini wo koe mɔɛ, a si ma wo tiginu ye tɛrɛnna la. 12Wo lun, n be min bɛ fɔren Eli la denbaya la ko tɔ, n si a lakamali le. Ka n ka a fɔlɔ, fɔ n ni a laban feu. 13N ka a fɔ le a ye, n ko, nde le yati be nala a la denbayanu makiitila anu la junubenu la ko la kudai, bayi a ka a lɔn a la den kayireŋɛnu be n fɛɛyala, kɔnɔ a ma anu latɔn. 14Wolo mu n bata n kali Eli la fɔgɛ la ko la: fenfen te Eli la denbaya la junube kafari. Sarika te a bɔɔ, hadiya tugun te a bɔɔ muku.»
15Samiyɛli sata han saguma, a nata Alatala batu dula bondanu laka. Alatala ka min yita Samiyɛli la, a be kilanden wo koe ɲamakaranna Eli ye. 16Kɔnɔ Eli ka a kele, a ko: «Samiyɛli, n na den!» A ka a labita, a ko: «Naamu!» 17Eli ka a fɔ a ye, a ko: «Alatala be kuma miniman yitaren i la? I kana fenfen dogon n na. A be min bɛ fɔren i ye, ka i tagata wo hali dɔndɔ dogon n na, Ala ni i bita a bɛlɛma la.» 18Wo butɔ, Samiyɛli ka Ala la kuma bɛ latanbi Eli ma, a ma fenfen to. Wo tanbi kɔma, Eli ka a fɔ, a ko: «Alatala le mu, a be diren min ye, wo ni ma.»
19Samiyɛli tota koloyala, Alatala tugun be a fɛ nun. A ka kuma min bɛ fɔ Samiyɛli ye, wo hali dɔndɔ bele a ma min nakamali. 20Isirayila bɛ, kabɔɔ Dan han Bɛri-Seba, bɛ ka a lɔn de, ka a fɔla Alatala bata Samiyɛli ma a la nabiyonmɛ la. 21Wo wagate, Alatala si to le a yɛtɛ labɔɔla Silo, bayi a tota a yɛtɛ yitala Samiyɛli la ɲɔ le a la kuma tɔ.
Currently Selected:
1 Samiyɛli 3: MOG
Highlight
Share
Compare
Copy
Want to have your highlights saved across all your devices? Sign up or sign in
