1 Samiyɛli 16
16
Ala la Dauda masubɛ koe mansa nama la
1Alatala ka a fɔ Samiyɛli ye, a ko: «I be suunula Sayulu la ko la han muntuma? Nde bata a aɲɛ, a te ma Isirayila mansa la bitugun. Kɔtɛ, i la bina lafa tule la, i ni taga Betilɛmu, n be i kiila Jese le bata, bayi n bata mansa masubɛ a la den kayireŋɛnu tɛma.» 2Samiyɛli ko: «Ee, n be tagala kama le? Sayulu tini lɔn sɔtɔ a ma, a si n faga le!» Alatala ka a fɔ a ye: «I be ningi yɛrɛ do le donila i fɛ, i ni a fɔ: ‹N be nala kɛ-lɛ bɔɔdula Alatala ye sarika la.› 3I ni Jese kele wo sarika tɔ, n si i lalɔn wo tuma i bɛnta i ni min ma. N si naa le mɔgɛ yitala i la, i si tule bɔn wo tigi kuŋɛ tɔ a yita koe la min si ma mansa la.» 4Samiyɛli ka a ma iko Alatala ka a fɔ a ye ki min na, a tagata Betilɛmu. Ɲɔ saa kayibanu tagata a labɛn anu kilandeŋɛ la, anu ka a maɲininka: «I be naren hɛra le la ba?» 5A ka anu jaabi, a ko: «Iyon, hɛra le. N be naren sarika do le bɔɔdula Alatala ye. Wo ni wo lasaniyan, wo mɔ ni naa sarika bɔɔ.» A ka a fɔ Jese nun a la deŋɛnu tugun ye, anu ni na, a ni anu lasaniyan, ande tugun ni naa bɛn sarika ma.
6Anu to be nala, Samiyɛli ka Jese la den Eliyabu yen. A ka a fɔ a yɛtɛ ma, a ko: «Sikkɛ bele, kaye min be sɔren Alatala ɲakɔtɔ ka, a be wolo masubɛren.» 7Kɔnɔ, Alatala ka a fɔ Samiyɛli ye: «I kana a bale le fɛlɛ de, ka wo ma a la kayanya. Bayi nde bele ale le masubɛren. Nde la mamasubɛ bele toren de iko mɔgɛnu. Mɔgɛnu ɲa be min yenden, anu be wolo makiitila. Alatala kan ɲa be sɔren mɔgɛ juse le la.»
8Jese ka a la den Abinadabi kele, a ka a latanbi Samiyɛli ɲa kɔtɔ, Samiyɛli ka a fɔ, a ko: «Alatala bele kɛ tugun masubɛren.» 9Jese ka Samma tugun natanbi, Samiyɛli mɛn ko: «Alatala ma kɛ tugun masubɛ.» 10Wo butɔ, Jese ka a la den wɔrɔwila le latanbi Samiyɛli ɲa kɔtɔ dɔndɔ dɔndɔ, a ka a fɔ Jese ye, a ko: «Alatala ma hali dɔndɔ masubɛ anu tɔ.»
11Samiyɛli ka a maɲininka, a ko: «Kamaren yo bele i bolo bitugun ba?» Jese ka a jaabi, a ko: «Anu dɔgɔ tɔɛ le be toren, kɔnɔ wo kan be kolofeŋɛnu kantadula.» Samiyɛli ka a fɔ Jese ye: «Awa, kiilá kii a kɔma a ni na, bayi wo mɔ te sigi sarika bɔɔ dula fanni a ma na.» 12Wo kɔma, Jese ka kiilá kii, anu ka a nati. A kunsige wulenma le mu nun, a ɲa kolenu majabuta, a kɛɲa kaɲin. Alatala ka a fɔ Samiyɛli ye: «Wuli, i ni tule bɔn a kuŋɛ tɔ, alako a ni ma mansa la.» 13Wo butɔ, Samiyɛli ka a la bina jigan min be lafaren tule la, a ka a bɔn Dauda kuŋɛ tɔ a kɔtɔnu bɛ ɲala. Ala Hakkili saniyandeŋɛ jigita Dauda ma, bɔɔla wo lun, a nun wolo tota. Wo kɔma, Samiyɛli bɔɔta ɲɔ, a saagita a bata Rama.
Dauda sɔ koe Sayulu la wale la
14Alatala Hakkile bɔɔta Sayulu ma, Alatala ka hakkili koroŋɛ do lasanba a ma, wo ka a mafu. 15Sayulu la walilanu ka a fɔ a ye: «Hakkili koroŋɛ le be i mafula ka, min be fatanden Ala la. 16Mɔ marige, i ni yamɔre sa tun, mɔle i la walilanu mɔ be i sagoe tɔ. Ka i be diren, mɔ si nɔ mɔgɔ do ɲinila min kusan kɔra botegela, alako ka wo hakkili koroŋɛ nata i ma, wo kɔra botegelá ni tolon i kɛnna, i juse ni diya i ye.» 17Sayulu ka sago dii a fɔ koe la: «Wo taga, wo ni mɔgɛ ɲini n ɲɛ min kusan koola, wo ni a nati.»
18A la walilá lanma dɔndɔ ka kuma labita, a ko: «N bata Jese Betilɛmu kaa la den kayireŋɛ do yen, min kusan kɔra botegela a ɲinma la. Kɛlɛ malá yati le mu a la, a sɛnbɛ kolo. A be hakkilimaya kumanu le fɔla. A bɛnta, Alatala mɛn be a fɛ.» 19Sayulu ka kiilanu lasanba Jese ma, anu ni a fɔ a ye, a ni a la den Dauda don a bolo, min be saakanu nun baanu kantala. 20Kiila to fɔta Jese ye, a ka sofale dɔndɔ jigan, a ka dɛgɛ sa a kunma, anun beere luulu dɔndɔ, anun baa den dɔndɔ, a ka a sa Dauda kunma a biliya ni Sayulu masɔtɔ. 21Dauda nata Sayulu dula, a sɔta a la wale la. Sayulu ka a ladiya koola, a ka a ma a la kɛlɛmafeŋɛ mayadɛlá la. 22Sayulu mɛn ka kiilá kii Jese ma a fɔ koe la a ye: «Yandi, Dauda to n bolo, a la ko bata diya n ɲɛ.» 23Wo hakkili koroŋɛ min be fatanna Ala la, a tini na Sayulu ma tun, Dauda ni a la kɔra jigan a ni a botege. Sayulu juse ni diya a ye, a juse ni sa, wo hakkili koroŋɛ ni bɔɔ a ma betunna.
Currently Selected:
1 Samiyɛli 16: MOG
Highlight
Share
Copy
Want to have your highlights saved across all your devices? Sign up or sign in
1 Samiyɛli 16
16
Ala la Dauda masubɛ koe mansa nama la
1Alatala ka a fɔ Samiyɛli ye, a ko: «I be suunula Sayulu la ko la han muntuma? Nde bata a aɲɛ, a te ma Isirayila mansa la bitugun. Kɔtɛ, i la bina lafa tule la, i ni taga Betilɛmu, n be i kiila Jese le bata, bayi n bata mansa masubɛ a la den kayireŋɛnu tɛma.» 2Samiyɛli ko: «Ee, n be tagala kama le? Sayulu tini lɔn sɔtɔ a ma, a si n faga le!» Alatala ka a fɔ a ye: «I be ningi yɛrɛ do le donila i fɛ, i ni a fɔ: ‹N be nala kɛ-lɛ bɔɔdula Alatala ye sarika la.› 3I ni Jese kele wo sarika tɔ, n si i lalɔn wo tuma i bɛnta i ni min ma. N si naa le mɔgɛ yitala i la, i si tule bɔn wo tigi kuŋɛ tɔ a yita koe la min si ma mansa la.» 4Samiyɛli ka a ma iko Alatala ka a fɔ a ye ki min na, a tagata Betilɛmu. Ɲɔ saa kayibanu tagata a labɛn anu kilandeŋɛ la, anu ka a maɲininka: «I be naren hɛra le la ba?» 5A ka anu jaabi, a ko: «Iyon, hɛra le. N be naren sarika do le bɔɔdula Alatala ye. Wo ni wo lasaniyan, wo mɔ ni naa sarika bɔɔ.» A ka a fɔ Jese nun a la deŋɛnu tugun ye, anu ni na, a ni anu lasaniyan, ande tugun ni naa bɛn sarika ma.
6Anu to be nala, Samiyɛli ka Jese la den Eliyabu yen. A ka a fɔ a yɛtɛ ma, a ko: «Sikkɛ bele, kaye min be sɔren Alatala ɲakɔtɔ ka, a be wolo masubɛren.» 7Kɔnɔ, Alatala ka a fɔ Samiyɛli ye: «I kana a bale le fɛlɛ de, ka wo ma a la kayanya. Bayi nde bele ale le masubɛren. Nde la mamasubɛ bele toren de iko mɔgɛnu. Mɔgɛnu ɲa be min yenden, anu be wolo makiitila. Alatala kan ɲa be sɔren mɔgɛ juse le la.»
8Jese ka a la den Abinadabi kele, a ka a latanbi Samiyɛli ɲa kɔtɔ, Samiyɛli ka a fɔ, a ko: «Alatala bele kɛ tugun masubɛren.» 9Jese ka Samma tugun natanbi, Samiyɛli mɛn ko: «Alatala ma kɛ tugun masubɛ.» 10Wo butɔ, Jese ka a la den wɔrɔwila le latanbi Samiyɛli ɲa kɔtɔ dɔndɔ dɔndɔ, a ka a fɔ Jese ye, a ko: «Alatala ma hali dɔndɔ masubɛ anu tɔ.»
11Samiyɛli ka a maɲininka, a ko: «Kamaren yo bele i bolo bitugun ba?» Jese ka a jaabi, a ko: «Anu dɔgɔ tɔɛ le be toren, kɔnɔ wo kan be kolofeŋɛnu kantadula.» Samiyɛli ka a fɔ Jese ye: «Awa, kiilá kii a kɔma a ni na, bayi wo mɔ te sigi sarika bɔɔ dula fanni a ma na.» 12Wo kɔma, Jese ka kiilá kii, anu ka a nati. A kunsige wulenma le mu nun, a ɲa kolenu majabuta, a kɛɲa kaɲin. Alatala ka a fɔ Samiyɛli ye: «Wuli, i ni tule bɔn a kuŋɛ tɔ, alako a ni ma mansa la.» 13Wo butɔ, Samiyɛli ka a la bina jigan min be lafaren tule la, a ka a bɔn Dauda kuŋɛ tɔ a kɔtɔnu bɛ ɲala. Ala Hakkili saniyandeŋɛ jigita Dauda ma, bɔɔla wo lun, a nun wolo tota. Wo kɔma, Samiyɛli bɔɔta ɲɔ, a saagita a bata Rama.
Dauda sɔ koe Sayulu la wale la
14Alatala Hakkile bɔɔta Sayulu ma, Alatala ka hakkili koroŋɛ do lasanba a ma, wo ka a mafu. 15Sayulu la walilanu ka a fɔ a ye: «Hakkili koroŋɛ le be i mafula ka, min be fatanden Ala la. 16Mɔ marige, i ni yamɔre sa tun, mɔle i la walilanu mɔ be i sagoe tɔ. Ka i be diren, mɔ si nɔ mɔgɔ do ɲinila min kusan kɔra botegela, alako ka wo hakkili koroŋɛ nata i ma, wo kɔra botegelá ni tolon i kɛnna, i juse ni diya i ye.» 17Sayulu ka sago dii a fɔ koe la: «Wo taga, wo ni mɔgɛ ɲini n ɲɛ min kusan koola, wo ni a nati.»
18A la walilá lanma dɔndɔ ka kuma labita, a ko: «N bata Jese Betilɛmu kaa la den kayireŋɛ do yen, min kusan kɔra botegela a ɲinma la. Kɛlɛ malá yati le mu a la, a sɛnbɛ kolo. A be hakkilimaya kumanu le fɔla. A bɛnta, Alatala mɛn be a fɛ.» 19Sayulu ka kiilanu lasanba Jese ma, anu ni a fɔ a ye, a ni a la den Dauda don a bolo, min be saakanu nun baanu kantala. 20Kiila to fɔta Jese ye, a ka sofale dɔndɔ jigan, a ka dɛgɛ sa a kunma, anun beere luulu dɔndɔ, anun baa den dɔndɔ, a ka a sa Dauda kunma a biliya ni Sayulu masɔtɔ. 21Dauda nata Sayulu dula, a sɔta a la wale la. Sayulu ka a ladiya koola, a ka a ma a la kɛlɛmafeŋɛ mayadɛlá la. 22Sayulu mɛn ka kiilá kii Jese ma a fɔ koe la a ye: «Yandi, Dauda to n bolo, a la ko bata diya n ɲɛ.» 23Wo hakkili koroŋɛ min be fatanna Ala la, a tini na Sayulu ma tun, Dauda ni a la kɔra jigan a ni a botege. Sayulu juse ni diya a ye, a juse ni sa, wo hakkili koroŋɛ ni bɔɔ a ma betunna.
Currently Selected:
:
Highlight
Share
Copy
Want to have your highlights saved across all your devices? Sign up or sign in