1 Samiyɛli 17
17
Jaluta la mɔnɛ don koe Isirayila sɔɔrenu ma
1Filisiti kaanu ka anu la kɛlɛ malanu madɛn kɛlɛ ma koe la. Anu tagata kunbɛn Soko, Juda duge tɔ, anu ka anu la daaka ɲiɲa Efesi-Damimu, dula min be Soko nun Aseka tɛma. 2Sayulu nun Isirayila kaanu tugun madɛnta, anu ka anu la daaka ɲiɲa Ela fole tɔ, anu tagata anu tabɛn kɛlɛ ma koe la anu nun Filisiti kaanu tɛma. 3Wo ka a taran, Filisiti kaanu be nun kɔnkɛ sɔngɔ dɔndɔ le la, Isirayila kaanu tugun be kɔnkɛ doe sɔngɔ dɔndɛ kunma, anu be anu ɲamatelenden ɲɔgɔn ma, fole be anu tɛma.
4Filisiti kaanu la koroba do bɔɔta anu la daaka tɔ, a ka a madon Isirayila kaanu la sɔɔrenu la. A tɔgɔ le Jaluta. Gati kaa le mu nun a la. A sɔdaŋɛ tabɛnden nɔngɔn ɲa wɔɔrɔ nun do le ma. 5Taasa kufunɛ kun makantafeŋɛ le be a kuŋɛ tɔ, jusukun mabutinfen taasanɛŋɛ be lajigiren a ma, a kobole nɛŋɛ, min na biliya be tabɛnden kilo bi wɔɔrɔ. 6A kɛŋɛnu tɔ, taasa le be maren a bɛlɛŋɛnu mabutinfeŋɛ la, tanba taasanɛŋɛ be banbaren a kɔɛ tɔ. 7A la tanba falaŋɛ tigiliŋɛ kolo iko mabɔ sɔgɔlá la walifeŋɛ. A la tanba suŋɛ la biliya, nɛgɛ kilo wɔrɔwila. Min be a la malatangafeŋɛ mayadɛla a ye nun, wo be tagamanna a ɲatɔ le.
8Wo koroba sɔta Isirayila sɔɔrenu ɲakɔtɔ, a kumata anu ma a kulɛ mayɛlɛreŋɛ la, a ko: «Wo be bɔɔla wo tabɛndeŋɛ la fenna kɛlɛ ma kɛɲa ma? Nde mu Filisiti kaa le la, wole kan mu Sayulu la joŋɛnu le la. Wo mɔgɔ dɔndɔ masubɛ wo ɲaama ba, a ni na mɔ ni naa kɛlɛ. 9Ka a nɔta n kɛlɛla han a ka n faga, mɔ si ma le wo la joŋɛnu la. Kɔnɔ ka nde le tugun ka nɔ sɔtɔ a ma, n ka a faga, wo si ma le mɔ la joŋɛnu la, wo ni wali mɔ ye.» 10Kɛ Filisiti kaa mɛn ka a fɔ, a ko: «N be kɛ mɔnɛ le donden Isirayila sɔɔri galenu ma bi luŋɛ. Wo mɔgɔ dɔndɔ masubɛ, mɔ ni naa kɛlɛ.» 11Sayulu nun Isirayila sɔɔrenu bɛ ka Filisiti kaa la kuma mɔɛ, anu kilanta koola.
Dauda na koe Isirayila sɔɔrenu la daaka tɔ
12Efarata kaa min tɔgɔ Jese, wo la deŋɛ le mu Dauda la. Jese be sabatiren Betilɛmu saa tɔ le, Juda duge tɔ. Den kayiren mɔgɔ sagin de be a bolo. Sayulu la wagate ka a taran de, kayiba do le mu a la ɲɔ kaanu tɛma. 13Jese la den kayiren kinamanu saba le be nun Sayulu la sɔɔrenu tɛma. Wo mɔgɔ saba tɔgɛ le ka. Den fɔlɛ, Eliyabu. A filaɲɔgɛ, Abinadabi. A sabaɲɔgɛ, Samma. 14Dauda le mu anu bɛ la dendeŋɛ la. Wo mɔgɔ saba to tagata Sayulu la sɔɔrenu tɛma, 15Dauda be tola tagala le Sayulu bata, a mɛn ni kɛnɛ saagila a baaba Jese bata, a ni wo la kolofeŋɛnu daɲini Betilɛmu. 16Kɛ Filisiti kaa be kɛnɛ bɔɔla le Isirayila la sɔɔrenu ɲatɔ saguma nun wura la han tele bi naani.
17Lun do, Jese ka a fɔ a la den Dauda ye, a ko: «Kɛ fondo kolo mayilandeŋɛnu bɔnfɛ jigan, anun kɛ dɛgɛ taŋɛ, i ni anu doni i kɔtɔnu ye teriya la anu la daaka tɔ. 18I be kɛ nɔnɔ kure taŋɛ kan donila anu la sɔɔri kuŋɛ le ye. I ni a fɛlɛ, ka tana yo bele anu ma, i mɛn ni seede do nati min mu anu la tɔnkuma la. 19Anu nun Sayulu nun Isirayila sɔɔrenu bɛ le be ɲɔla, Ela fole butɔ, Filisiti kaanu kɛlɛdula.»
20Awa, Dauda sorita saguma jonna. A ka kolofeŋɛnu taaku mɔgɔ do la, a ka a la kote jigan, a tagata a baaba la yamɔre la. A donta wagate min tɔ sɔɔrenu la daaka tɔ, a ka a taran de sɔɔrenu be bɔɔla anu ni anu tabɛn kɛlɛ ma koe la, anu be sɔnkɛ layɛlɛla kɛlɛ mamatɔgɛ la. 21Isirayila kaanu nun Filisiti kaanu bɛ be anu la sɔɔrenu sɔ ɲa ɲiɲala a kɛlɛ ma kɛɲa ma, kɛ kurun fila sɔta ɲɔgɔn ye. 22Dauda ka a la kote don koto kantalá bolo, a borita a tagata a kɔtɔnu la safa tɔ. A to keta anu ma, a ka anu kende masa. 23Anu be kumala wagate min tɔ, kɛ koroba mɛn tabɔɔta Filisiti kaanu la safa tɔ, min tɔgɔ Jaluta, Gati kaa. A mɛn ka a la wo kuma dɔndɛ tafɔ, Dauda ka wolo mɔɛ. 24Isirayila kaanu to ka kɛ kaye yen, anu bɛ borita a la, anu kilanta koola, 25anu tota a fɔla ɲɔgɔn ye: «Wo ka a yen nala, a be nala mɔnɛ dondula mɔle Isirayila sɔɔri gale ma. Mansa ko, ka min yo ka kɛ koroba faga, aa a si bannaya siyama dii wo tigi ma, a mɛn si a la den musereŋɛ dɔndɔ dii a ma, a si wo tigi baaba la juruya bɔɔ duute tɔ Isirayila duge tɔ.»
26Dauda ka kɛ mɔgɛnu maɲininka minnu be kumala nun a kɛnna, a ko: «Ka min ka kɛ Filisiti kaa faga, a ka mɔnɛ bɔɔ Isirayila ma a be min donden mɔ ma, anu be fen de mala wo tigi ye? Bɔ, ɲɔmɔ le ɲan mu kɛ Filisiti kaa la, kɛ bilakore, han a ni mɔnɛ don Ala la sɔɔrenu ma, Ala min be baluren?» 27Jama mɛn tasaagita ale kuma dɔndɛ ma, anu ka a ɲatabɔ a ye anu be min mala mɔgɛ ye min tini a faga. 28A kɔtɔ kinama Eliyabu ka Dauda kulɛ mɔɛ kumala wo mɔgɛnu ye, a dumɛnta a ma, a ko: «I be jigiren yan fenna? Wo kolofen wɔɔrɛ lanma go, i be a toren ɲɔmɔ le bolo janfue tɔ? Da takoloya nun mira koroŋɛ min be i juse tɔ, n ka wo lɔn go! I be naren de tun alako i ni kɛlɛ fɛlɛ.» 29Dauda ka a fɔ: «Bɔ, n be fen de koron maren? Ká, n ma ɲininkare le tun ma?» 30A ka a kɔ sɔ a kɔtɔ la, a ka a ɲamatelen mɔgɔ do tugun ma, a ka wo ɲininkari dɔndɛ ma. Anu mɛn ka wo jaabiri dɔndɛ le dii a ma, iko a fɔlɛ.
31Dauda tota kuma minnu fɔla, bɛ tagata a mɔɛla, han anu tagata a matanbi Sayulu ma. Sayulu la wo mɔɛreŋɛ, a ka a makele. 32Dauda la kereŋɛ Sayulu ma, a ko a ma: «Mɔgɔ yo juse kana faga kɛ Filisiti kaa la ko la. Nde i la walilá si taga le, mɔ nun a ni kɛlɛ!» 33Sayulu ka a fɔ Dauda ye, a ko: «I te nɔ kɛ Filisiti kaa kɛlɛla, bayi dendeŋɛ le mu i la. Ale bata dari kɛlɛ ma koe la, a be a tɔ bɔɔla a denden wagate.» 34Dauda ka Sayulu jaabi, a ko: «Nde i la walilá to be n baaba la kolofeŋɛnu damaɲinila wagate min tɔ nun, ka jata nata, ka wo ma wula butɔ sube do, a ni kolofen dɔndɔ bita, 35n si a bee le, n ni a botege, n ni kolofeŋɛ bɔɔ a da tɔ. Ka a ka a ɲamatelen n ma n kɛlɛ koe la, n be a bitala a bɔɔra te le ma, n ni a faga botegere ma. 36Mansa, n be jata nun wo wula butɔ sube botegela ɲɔgɔnna le, minnu be nala mɔ la kolofeŋɛnu kɔma. Awa, n be kɛ Filisiti kaa bilakore tugun na ko mala ɲɔgɔnna le, bayi a be mɔnɛ donna Ala la sɔɔrenu ma, Ala min be baluren.» 37Dauda mɛn ka a fɔ, a ko: «Alatala min ka n bɔɔ jata nun wula butɔ sube ŋansiŋɛnu ma, a mɛn si n nakisi le kɛ Filisiti kaa tugun ma.» Awa, Sayulu ka a fɔ Dauda ye: «Taga, Alatala mu tola i fɛ.»
38Wo butɔ, Sayulu ka a tɛn kutanu lajigi Dauda ma, a ka a la taasa kufunɛ kun makantafeŋɛ dusu a kuŋɛ tɔ, a ka jusukun mabutinfeŋɛ lajigi a ma. 39Dauda ka Sayulu la faŋɛ tugun soti a la bɛlɛte tɔ, kɔnɔ a ma nɔ tagamanna wo ɲaranu bɛ fɛ, bayi a bele dariren anu la. Awa, a ka a fɔ Sayulu ye: «N ɲan bele nɔla tagamanna mɔ nun kɛ ɲaranu la, n ma dari kɛnu latagamanna.» Wo butɔ, a ka wo ɲaranu bɔɔ a ma. 40A ka a la dɔkkɛ jigan, a ka kuru nungureŋɛ loolu masubɛ kɔɛɛ tɔ, a ka anu sa a la kolofen nabɛnbɛn bɔnfɛ nun a la jiiba butɔ, a nata naa a la lanpura bita a bole la, a ka a kun sɔ wo Filisiti koroba kɛlɛ koe la.
Dauda la Jaluta faga koe
41Filisiti koroba be tagamanna ka a madon Dauda la dɔyi dɔyi, a la malatangafeŋɛ mayadɛlá be sɔren a ɲatɔ. 42Filisiti kaa ka Dauda yen, a ka a fɛlɛ, denden tun de mu a la, a kunsige wulenta, a majabuta. Wo butɔ, a yota a ma. 43Filisiti kaa ka a fɔ Dauda ye, a ko: «Bɔ, wule le mu n na ba, i to be dɔkkɛnu jiganden nala n kɛlɛdula?» A ka Dauda danka a la kuyenu tɔgɛnu la, 44a mɛn ka a fɔ a ye: «Na n ma, n si i sube don kantɔ kondeŋɛnu bolo bi anun burun butɔ subenu.»
45Dauda ka a fɔ a ye, a ko: «I be nala n kɛlɛdula faŋɛ nun tanba be i bolo, anun kɛlɛmafeŋɛ do. Nde kan be naren i kɛlɛdula Alatala le tɔgɛ la, Isirayila sɔɔrenu la Ala, i be mɔnɛ donden min ma. 46Alatala si i sa le n sagoe tɔ bi, n ni i faga, n mɛn ni i kuŋɛ kuntu. Bi, n si Filisiti sɔɔrenu binde dii le kondeŋɛnu ma kantɔ, anun burun butɔ subenu. Wo wagate, dunuya bɛ si a lɔn de ka a fɔla, Ala be Isirayila bolo. 47Minnu bɛ be madɛnden yan, anu bɛ si a lɔn de ka a fɔla Alatala bele mɔgɛ lakisila faŋɛ le la, ka wo ma tanba. A si lɔn de bi aa Alatala le mu kɛlɛ mansa la, a si wo sa le bi mɔ sagoe tɔ.»
48Awa, Filisiti kaa ka a tabɛn na koe la Dauda digii ma. Wo butɔ, Dauda borita teriya la taga koe la Filisiti sɔɔri gale mafanna, alako a nun koroba ni bɛn. 49A ka a bole lajigi a la bɔnfɛ tɔ, a ka kuru dɔndɔ jigan a ka a fili a la lanpura la, a ka Filisiti kaa bun a tindɛ tɔ. Kure tagata don Filisiti kaa tindɛ tɔ, a boeta duge tɔ a ɲakɔtɔ ma. 50Wo butɔ, Dauda ka nɔɛ sɔtɔ wo Filisiti koroba kunma lanpura kuru dɔndɔ pɛti le la, a ka a botege han a ka a faga fan yo bele a bolo. 51Dauda borita a tagata sɔ Filisiti koroba kɛnna, a ka wo la faŋɛ futin a laa tɔ, a ka a kuŋɛ kuntu ka a la ko laban feu.
Isirayila kaanu la Filisiti kaanu bee koe
Filisiti kaanu to ka a yen anu la koroba bata faga, anu borita. 52Isirayila kaanu nun Juda kaanu wulita, anu ka sɔnkɛ layɛlɛ ɲagaliŋɛ butɔ, anu nata Filisiti kaanu bee han fole dala, han Ekirɔn saa dondula tɔ. Filisiti kaanu minnu mabata nun faga mamaba la, wonu tagata boela le Sarayimu kila kunma han Gati nun Ekirɔn saanu tɔ. 53Wo butɔ, Isirayila kaanu ka Filisiti kaanu bee a bɛlɛma la. Wo kɔma, anu naata saagi, anu tuguta Filisiti kaanu bolofeŋɛnu la anu ka minnu to anu la daaka tɔ. 54Dauda ka wo Filisiti kaa kun kunte jigan a ka a doni Darisalamu, a ka a la kɛlɛ mafeŋɛnu mandi a yɛtɛ la tanta butɔ.
Yonatan nun Dauda la lahire
55Sayulu to ka Dauda yen, a be tagala kɛ Filisiti kaa digii ma, a ka Abineri maɲininka, a la sɔɔri mansa, a ko: «Ɲɔmɔ le la deŋɛ mu kɛ dendeŋɛ la?» Abineri ka a jaabi, a ko: «A tɔɲa kɛɲa ma, mansa, n ma a lɔn feu.» 56Mansa ko: «Ɲininkare ma, n ni a lɔn min na deŋɛ mu kɛ kamareŋɛ la, i ni naa a fɔ n ɲɛ.» 57Dauda la saage bɔɔla wo Filisiti kaa fagadula, Abineri ka a jigan, a ka a doni Sayulu dula, wo ka a taran Filisiti kaa kun kunte be bitaren Dauda bole tɔ. 58Sayulu ka a fɔ a ye: «I baaba mu ɲɔmɔ la, n na den?» Dauda ka a jaabi, a ko: «I la joŋɛ Jese la deŋɛ le mu n na, min mu Betilɛmu kaa la.»
Currently Selected:
1 Samiyɛli 17: MOG
Highlight
Share
Copy
Want to have your highlights saved across all your devices? Sign up or sign in
1 Samiyɛli 17
17
Jaluta la mɔnɛ don koe Isirayila sɔɔrenu ma
1Filisiti kaanu ka anu la kɛlɛ malanu madɛn kɛlɛ ma koe la. Anu tagata kunbɛn Soko, Juda duge tɔ, anu ka anu la daaka ɲiɲa Efesi-Damimu, dula min be Soko nun Aseka tɛma. 2Sayulu nun Isirayila kaanu tugun madɛnta, anu ka anu la daaka ɲiɲa Ela fole tɔ, anu tagata anu tabɛn kɛlɛ ma koe la anu nun Filisiti kaanu tɛma. 3Wo ka a taran, Filisiti kaanu be nun kɔnkɛ sɔngɔ dɔndɔ le la, Isirayila kaanu tugun be kɔnkɛ doe sɔngɔ dɔndɛ kunma, anu be anu ɲamatelenden ɲɔgɔn ma, fole be anu tɛma.
4Filisiti kaanu la koroba do bɔɔta anu la daaka tɔ, a ka a madon Isirayila kaanu la sɔɔrenu la. A tɔgɔ le Jaluta. Gati kaa le mu nun a la. A sɔdaŋɛ tabɛnden nɔngɔn ɲa wɔɔrɔ nun do le ma. 5Taasa kufunɛ kun makantafeŋɛ le be a kuŋɛ tɔ, jusukun mabutinfen taasanɛŋɛ be lajigiren a ma, a kobole nɛŋɛ, min na biliya be tabɛnden kilo bi wɔɔrɔ. 6A kɛŋɛnu tɔ, taasa le be maren a bɛlɛŋɛnu mabutinfeŋɛ la, tanba taasanɛŋɛ be banbaren a kɔɛ tɔ. 7A la tanba falaŋɛ tigiliŋɛ kolo iko mabɔ sɔgɔlá la walifeŋɛ. A la tanba suŋɛ la biliya, nɛgɛ kilo wɔrɔwila. Min be a la malatangafeŋɛ mayadɛla a ye nun, wo be tagamanna a ɲatɔ le.
8Wo koroba sɔta Isirayila sɔɔrenu ɲakɔtɔ, a kumata anu ma a kulɛ mayɛlɛreŋɛ la, a ko: «Wo be bɔɔla wo tabɛndeŋɛ la fenna kɛlɛ ma kɛɲa ma? Nde mu Filisiti kaa le la, wole kan mu Sayulu la joŋɛnu le la. Wo mɔgɔ dɔndɔ masubɛ wo ɲaama ba, a ni na mɔ ni naa kɛlɛ. 9Ka a nɔta n kɛlɛla han a ka n faga, mɔ si ma le wo la joŋɛnu la. Kɔnɔ ka nde le tugun ka nɔ sɔtɔ a ma, n ka a faga, wo si ma le mɔ la joŋɛnu la, wo ni wali mɔ ye.» 10Kɛ Filisiti kaa mɛn ka a fɔ, a ko: «N be kɛ mɔnɛ le donden Isirayila sɔɔri galenu ma bi luŋɛ. Wo mɔgɔ dɔndɔ masubɛ, mɔ ni naa kɛlɛ.» 11Sayulu nun Isirayila sɔɔrenu bɛ ka Filisiti kaa la kuma mɔɛ, anu kilanta koola.
Dauda na koe Isirayila sɔɔrenu la daaka tɔ
12Efarata kaa min tɔgɔ Jese, wo la deŋɛ le mu Dauda la. Jese be sabatiren Betilɛmu saa tɔ le, Juda duge tɔ. Den kayiren mɔgɔ sagin de be a bolo. Sayulu la wagate ka a taran de, kayiba do le mu a la ɲɔ kaanu tɛma. 13Jese la den kayiren kinamanu saba le be nun Sayulu la sɔɔrenu tɛma. Wo mɔgɔ saba tɔgɛ le ka. Den fɔlɛ, Eliyabu. A filaɲɔgɛ, Abinadabi. A sabaɲɔgɛ, Samma. 14Dauda le mu anu bɛ la dendeŋɛ la. Wo mɔgɔ saba to tagata Sayulu la sɔɔrenu tɛma, 15Dauda be tola tagala le Sayulu bata, a mɛn ni kɛnɛ saagila a baaba Jese bata, a ni wo la kolofeŋɛnu daɲini Betilɛmu. 16Kɛ Filisiti kaa be kɛnɛ bɔɔla le Isirayila la sɔɔrenu ɲatɔ saguma nun wura la han tele bi naani.
17Lun do, Jese ka a fɔ a la den Dauda ye, a ko: «Kɛ fondo kolo mayilandeŋɛnu bɔnfɛ jigan, anun kɛ dɛgɛ taŋɛ, i ni anu doni i kɔtɔnu ye teriya la anu la daaka tɔ. 18I be kɛ nɔnɔ kure taŋɛ kan donila anu la sɔɔri kuŋɛ le ye. I ni a fɛlɛ, ka tana yo bele anu ma, i mɛn ni seede do nati min mu anu la tɔnkuma la. 19Anu nun Sayulu nun Isirayila sɔɔrenu bɛ le be ɲɔla, Ela fole butɔ, Filisiti kaanu kɛlɛdula.»
20Awa, Dauda sorita saguma jonna. A ka kolofeŋɛnu taaku mɔgɔ do la, a ka a la kote jigan, a tagata a baaba la yamɔre la. A donta wagate min tɔ sɔɔrenu la daaka tɔ, a ka a taran de sɔɔrenu be bɔɔla anu ni anu tabɛn kɛlɛ ma koe la, anu be sɔnkɛ layɛlɛla kɛlɛ mamatɔgɛ la. 21Isirayila kaanu nun Filisiti kaanu bɛ be anu la sɔɔrenu sɔ ɲa ɲiɲala a kɛlɛ ma kɛɲa ma, kɛ kurun fila sɔta ɲɔgɔn ye. 22Dauda ka a la kote don koto kantalá bolo, a borita a tagata a kɔtɔnu la safa tɔ. A to keta anu ma, a ka anu kende masa. 23Anu be kumala wagate min tɔ, kɛ koroba mɛn tabɔɔta Filisiti kaanu la safa tɔ, min tɔgɔ Jaluta, Gati kaa. A mɛn ka a la wo kuma dɔndɛ tafɔ, Dauda ka wolo mɔɛ. 24Isirayila kaanu to ka kɛ kaye yen, anu bɛ borita a la, anu kilanta koola, 25anu tota a fɔla ɲɔgɔn ye: «Wo ka a yen nala, a be nala mɔnɛ dondula mɔle Isirayila sɔɔri gale ma. Mansa ko, ka min yo ka kɛ koroba faga, aa a si bannaya siyama dii wo tigi ma, a mɛn si a la den musereŋɛ dɔndɔ dii a ma, a si wo tigi baaba la juruya bɔɔ duute tɔ Isirayila duge tɔ.»
26Dauda ka kɛ mɔgɛnu maɲininka minnu be kumala nun a kɛnna, a ko: «Ka min ka kɛ Filisiti kaa faga, a ka mɔnɛ bɔɔ Isirayila ma a be min donden mɔ ma, anu be fen de mala wo tigi ye? Bɔ, ɲɔmɔ le ɲan mu kɛ Filisiti kaa la, kɛ bilakore, han a ni mɔnɛ don Ala la sɔɔrenu ma, Ala min be baluren?» 27Jama mɛn tasaagita ale kuma dɔndɛ ma, anu ka a ɲatabɔ a ye anu be min mala mɔgɛ ye min tini a faga. 28A kɔtɔ kinama Eliyabu ka Dauda kulɛ mɔɛ kumala wo mɔgɛnu ye, a dumɛnta a ma, a ko: «I be jigiren yan fenna? Wo kolofen wɔɔrɛ lanma go, i be a toren ɲɔmɔ le bolo janfue tɔ? Da takoloya nun mira koroŋɛ min be i juse tɔ, n ka wo lɔn go! I be naren de tun alako i ni kɛlɛ fɛlɛ.» 29Dauda ka a fɔ: «Bɔ, n be fen de koron maren? Ká, n ma ɲininkare le tun ma?» 30A ka a kɔ sɔ a kɔtɔ la, a ka a ɲamatelen mɔgɔ do tugun ma, a ka wo ɲininkari dɔndɛ ma. Anu mɛn ka wo jaabiri dɔndɛ le dii a ma, iko a fɔlɛ.
31Dauda tota kuma minnu fɔla, bɛ tagata a mɔɛla, han anu tagata a matanbi Sayulu ma. Sayulu la wo mɔɛreŋɛ, a ka a makele. 32Dauda la kereŋɛ Sayulu ma, a ko a ma: «Mɔgɔ yo juse kana faga kɛ Filisiti kaa la ko la. Nde i la walilá si taga le, mɔ nun a ni kɛlɛ!» 33Sayulu ka a fɔ Dauda ye, a ko: «I te nɔ kɛ Filisiti kaa kɛlɛla, bayi dendeŋɛ le mu i la. Ale bata dari kɛlɛ ma koe la, a be a tɔ bɔɔla a denden wagate.» 34Dauda ka Sayulu jaabi, a ko: «Nde i la walilá to be n baaba la kolofeŋɛnu damaɲinila wagate min tɔ nun, ka jata nata, ka wo ma wula butɔ sube do, a ni kolofen dɔndɔ bita, 35n si a bee le, n ni a botege, n ni kolofeŋɛ bɔɔ a da tɔ. Ka a ka a ɲamatelen n ma n kɛlɛ koe la, n be a bitala a bɔɔra te le ma, n ni a faga botegere ma. 36Mansa, n be jata nun wo wula butɔ sube botegela ɲɔgɔnna le, minnu be nala mɔ la kolofeŋɛnu kɔma. Awa, n be kɛ Filisiti kaa bilakore tugun na ko mala ɲɔgɔnna le, bayi a be mɔnɛ donna Ala la sɔɔrenu ma, Ala min be baluren.» 37Dauda mɛn ka a fɔ, a ko: «Alatala min ka n bɔɔ jata nun wula butɔ sube ŋansiŋɛnu ma, a mɛn si n nakisi le kɛ Filisiti kaa tugun ma.» Awa, Sayulu ka a fɔ Dauda ye: «Taga, Alatala mu tola i fɛ.»
38Wo butɔ, Sayulu ka a tɛn kutanu lajigi Dauda ma, a ka a la taasa kufunɛ kun makantafeŋɛ dusu a kuŋɛ tɔ, a ka jusukun mabutinfeŋɛ lajigi a ma. 39Dauda ka Sayulu la faŋɛ tugun soti a la bɛlɛte tɔ, kɔnɔ a ma nɔ tagamanna wo ɲaranu bɛ fɛ, bayi a bele dariren anu la. Awa, a ka a fɔ Sayulu ye: «N ɲan bele nɔla tagamanna mɔ nun kɛ ɲaranu la, n ma dari kɛnu latagamanna.» Wo butɔ, a ka wo ɲaranu bɔɔ a ma. 40A ka a la dɔkkɛ jigan, a ka kuru nungureŋɛ loolu masubɛ kɔɛɛ tɔ, a ka anu sa a la kolofen nabɛnbɛn bɔnfɛ nun a la jiiba butɔ, a nata naa a la lanpura bita a bole la, a ka a kun sɔ wo Filisiti koroba kɛlɛ koe la.
Dauda la Jaluta faga koe
41Filisiti koroba be tagamanna ka a madon Dauda la dɔyi dɔyi, a la malatangafeŋɛ mayadɛlá be sɔren a ɲatɔ. 42Filisiti kaa ka Dauda yen, a ka a fɛlɛ, denden tun de mu a la, a kunsige wulenta, a majabuta. Wo butɔ, a yota a ma. 43Filisiti kaa ka a fɔ Dauda ye, a ko: «Bɔ, wule le mu n na ba, i to be dɔkkɛnu jiganden nala n kɛlɛdula?» A ka Dauda danka a la kuyenu tɔgɛnu la, 44a mɛn ka a fɔ a ye: «Na n ma, n si i sube don kantɔ kondeŋɛnu bolo bi anun burun butɔ subenu.»
45Dauda ka a fɔ a ye, a ko: «I be nala n kɛlɛdula faŋɛ nun tanba be i bolo, anun kɛlɛmafeŋɛ do. Nde kan be naren i kɛlɛdula Alatala le tɔgɛ la, Isirayila sɔɔrenu la Ala, i be mɔnɛ donden min ma. 46Alatala si i sa le n sagoe tɔ bi, n ni i faga, n mɛn ni i kuŋɛ kuntu. Bi, n si Filisiti sɔɔrenu binde dii le kondeŋɛnu ma kantɔ, anun burun butɔ subenu. Wo wagate, dunuya bɛ si a lɔn de ka a fɔla, Ala be Isirayila bolo. 47Minnu bɛ be madɛnden yan, anu bɛ si a lɔn de ka a fɔla Alatala bele mɔgɛ lakisila faŋɛ le la, ka wo ma tanba. A si lɔn de bi aa Alatala le mu kɛlɛ mansa la, a si wo sa le bi mɔ sagoe tɔ.»
48Awa, Filisiti kaa ka a tabɛn na koe la Dauda digii ma. Wo butɔ, Dauda borita teriya la taga koe la Filisiti sɔɔri gale mafanna, alako a nun koroba ni bɛn. 49A ka a bole lajigi a la bɔnfɛ tɔ, a ka kuru dɔndɔ jigan a ka a fili a la lanpura la, a ka Filisiti kaa bun a tindɛ tɔ. Kure tagata don Filisiti kaa tindɛ tɔ, a boeta duge tɔ a ɲakɔtɔ ma. 50Wo butɔ, Dauda ka nɔɛ sɔtɔ wo Filisiti koroba kunma lanpura kuru dɔndɔ pɛti le la, a ka a botege han a ka a faga fan yo bele a bolo. 51Dauda borita a tagata sɔ Filisiti koroba kɛnna, a ka wo la faŋɛ futin a laa tɔ, a ka a kuŋɛ kuntu ka a la ko laban feu.
Isirayila kaanu la Filisiti kaanu bee koe
Filisiti kaanu to ka a yen anu la koroba bata faga, anu borita. 52Isirayila kaanu nun Juda kaanu wulita, anu ka sɔnkɛ layɛlɛ ɲagaliŋɛ butɔ, anu nata Filisiti kaanu bee han fole dala, han Ekirɔn saa dondula tɔ. Filisiti kaanu minnu mabata nun faga mamaba la, wonu tagata boela le Sarayimu kila kunma han Gati nun Ekirɔn saanu tɔ. 53Wo butɔ, Isirayila kaanu ka Filisiti kaanu bee a bɛlɛma la. Wo kɔma, anu naata saagi, anu tuguta Filisiti kaanu bolofeŋɛnu la anu ka minnu to anu la daaka tɔ. 54Dauda ka wo Filisiti kaa kun kunte jigan a ka a doni Darisalamu, a ka a la kɛlɛ mafeŋɛnu mandi a yɛtɛ la tanta butɔ.
Yonatan nun Dauda la lahire
55Sayulu to ka Dauda yen, a be tagala kɛ Filisiti kaa digii ma, a ka Abineri maɲininka, a la sɔɔri mansa, a ko: «Ɲɔmɔ le la deŋɛ mu kɛ dendeŋɛ la?» Abineri ka a jaabi, a ko: «A tɔɲa kɛɲa ma, mansa, n ma a lɔn feu.» 56Mansa ko: «Ɲininkare ma, n ni a lɔn min na deŋɛ mu kɛ kamareŋɛ la, i ni naa a fɔ n ɲɛ.» 57Dauda la saage bɔɔla wo Filisiti kaa fagadula, Abineri ka a jigan, a ka a doni Sayulu dula, wo ka a taran Filisiti kaa kun kunte be bitaren Dauda bole tɔ. 58Sayulu ka a fɔ a ye: «I baaba mu ɲɔmɔ la, n na den?» Dauda ka a jaabi, a ko: «I la joŋɛ Jese la deŋɛ le mu n na, min mu Betilɛmu kaa la.»
Currently Selected:
:
Highlight
Share
Copy
Want to have your highlights saved across all your devices? Sign up or sign in