1 Samiyɛli 15

Sayulu la Amaleki kaanu kɛlɛ koe

1Lun do, Samiyɛli ka a fɔ Sayulu ye, a ko: «Alatala ka nde le kii n ni tule bɔn i kuŋɛ tɔ nun a yita koe la i bata ma Isirayila mansa la. Awa, i tolomasɔ kɔtɛ Alatala la kuma la n be min fɔla i ye. 2Alatala kulɛ le mu ka, dunuya bɛ da Mansa: ‹N be diren koe le sala Amaleki kaanu kɔɛ tɔ anu to ka kila kuntu Isirayila kaanu ma, Isirayila kaanu la bɔɛ Misira jamanɛ tɔ. 3Kɔtɛ, taga, i ni anu kɛlɛ, ka anu tugunsan, i kana fenfen to min mu anu tɛŋɛ la, i kana fenfen to a nɛ la. Muse nun kaye, dendeŋɛ nun bɔɔbɛ, ninge nun saaka, ɲɔgɔmɛ nun sofale, wo ni a bɛ faga.›»

4Wo butɔ, Sayulu ka a la jama madɛn Telayimu saa tɔ, a ka kɔnte ma ɲɔ, mɔgɔ wulu kɛmɛ fila le be tagamanna nun anu kɛŋɛ la, sa wo kunma Juda kaanu mɔgɔ wulu tan. 5Sayulu sɔta anu ɲatɔ tagala Amaleki kaanu bata, a ka yonge sa wonu ye fole butɔ. 6A ka kiilá kii Keni kaanu ma, ka naa a fɔ: «Wo bɔɔ Amaleki kaanu tɛma, n kana naa wo sɔntɔ anu fɛ. Bayi wo ka kanunteya yita le Isirayila kaanu bɛ la anu tanbi wagate bɔɔla Misira.» Awa, Keni kaanu bɔɔta Amaleki kaanu tɛma.

7Sayulu ka Amaleki kaanu botege, bɔɔla Hawila duge tɔ han Suuru janfue tɔ, ka min be ɲamatelenden Misira ma. 8A ka Agagi bita a kende le la, Amaleki mansa, a nata a la jama bɛ tugunsan faŋɛ la. 9Kɔnɔ, Sayulu nun a la jama bɛ ka Agagi to a nɛ la. Kolofen bɔrɔgɛreŋɛnu minnu be kolofen banbanu nun a lanmanu ɲaama, anu ma wonu tugun faga. Hali minnu la ɲinmaya ma ke wo doenu la, anu ka wo bɛ to le ɲɔ. Kolofeŋɛ min bɛ munanfaŋɛ be, anu ma sɔn anu fagala. Anu ka anu la fondo koroŋɛnu le kan tugunsan, anun min bɛ sɔdula bele.

Alatala la Sayulu aɲɛ koe

10Wo butɔ, Alatala ka kɛ kuma le fɔ Samiyɛli ye, a ko: 11«N be nimisaren de bi Sayulu ma koe la mansa la, bayi a bata a kɔ sɔ n na, a bele n kumari kulɛ jokkiren bitugun.» Samiyɛli dumɛnta, a belebeleta Alatala la sue bɛ. 12Samiyɛli wulita saguma piri, taga koe la Sayulu yendula. Anu ka a fɔ a ye, aa Sayulu bata taga Karimɛli saa tɔ, aa a ka kure sɔ ɲɔ kɛlɛ matalɔŋɛ tɔnkuma la a ni ma a yɛtɛ la biliya la, aa a naata tanbi pon, a jigita Giligali. 13Samiyɛli tagata Sayulu kɛnna, Sayulu ka a fɔ a ye: «Ala mu barikɛ sala i la ko tɔ! Alatala ka min fɔ n ɲɛ, n bata a ma.» 14Samiyɛli ka a fɔ a ye, a ko: «Bɔ, n be kolofen miniman diri kulɛ mɔɛla n tole la ka?» 15Sayulu ka a jaabi, a ko: «Anu be wonu le jiganden Amaleki kaanu bata. Minnu kaɲin kolofen lanma nun a banbanu tɛma, jama ka wonu to, alako anu ni anu bɔɔ sarika la Alatala ye, i la Ala. A tɔɛnu, mɔ ka wonu kan tugunsan.»

16Samiyɛli ka a fɔ Sayulu ye, a ko: «Awa, dan! N ni i lalɔn Alatala ka min fɔ n ɲɛ kɛ su tanbireŋɛ.» Sayulu ko: «Awa, kuma.» 17Samiyɛli ka a fɔ: «Fɔlɛ tɔ nun, i to be yoren i fan ma, i ma ma Isirayila bɔnsɛ bɛ la mansa la ba? Alatala ma i masubɛ ba, a ka i ma mansa la Isirayila kunma? 18Alatala ka kila sa le i kɛn kɔtɔ, a ka a fɔ i ye: ‹Taga, i ni kɛ junubutɔɛnu tugunsan, Amaleki kaanu. I be anu kɛlɛla le han anu bɛ ni ban feu.› 19Fenna i ma i tolomasɔ Alatala kulɛ la? Fenna i ka ko koroŋɛ ma Alatala ɲala giripɛ koe la kɛlɛ tɔnɛ ma?»

20Sayulu ka Samiyɛli jaabi, a ko: «N ka Alatala kulɛ lamɔɛ le a ɲinma la. N sɔta a la kila kɔma, a ka n sɔ min na. N bata Agagi nati, Amaleki mansa, n bata Amaleki jama bɛ tugunsan. 21Kɔnɔ ka jama ka kolofen ɲinmanu masubɛ mɔ jaguenu kɛɛ tɔ, minnu si tugunsan nun, anu ka wonu masubɛ le alako anu ni naa anu bɔɔ sarika la Giligali yan Alatala ye, i la Ala.»

22Samiyɛli ko:

«Bɔ, Alatala be ɲagalinna kolofen bɔɔ koe le la sarika la, ka a kulɛ biliya koe?

N ni a fɔ i ye, yamɔri labatu koe fisa sarika ko,

Ala sago ma koe tugun fisa saaka kontoŋɛ kɛndeŋɛ ko.

23Ala kulɛ sɔsɔ koe nun fɛrili ma koe bɛ si kan.

Kantabɛlɛya nun kuye batue bɛ si kan.

Awa, bayi i bata Alatala la kuma aɲɛ,

ale tugun bata i aɲɛ,

i bele maren mansa la bitugun a la jama kunma.»

24Awa, Sayulu ka a fɔ Samiyɛli ye, a ko: «N bata junube ma, bayi n bata Alatala la yamɔre tiɲa, n bata ile tugun kulɛ sɔsɔ. N be kilanden jama le la nun han n ka n tolomasɔ anu la. 25Kɔtɛ, yandi i ni diɲa n na junube ma, i mɛn ni sɔn mɔ ni taga ɲɔgɔn na n ni sujudu Alatala ye.» 26Samiyɛli ka a fɔ Sayulu ye, a ko: «N bele sɔnden tagala i ma mɔ ni taga ɲɔgɔn na, bayi i bata Alatala la kuma aɲɛ. Wolo mu Alatala tugun bata i aɲɛ, alako i te ma mansa la bitugun Isirayila jama kunma.» 27Samiyɛli to ka a kɔ sɔ a ni taga, Sayulu ka a bita a la burumuse kɔma ma, burumuse farata. 28Samiyɛli ka a fɔ a ye, a ko: «Alatala bata Isirayila mansaya fara i ma bi, a ni a bɔɔ i bolo, a ni a don mɔgɔ do bolo, min kaɲin ile ko. 29Alatala ɲan, Isirayila sɛnbɛ be min bolo, a te foniya fɔ, a mɛn te nimisa iko adamadeŋɛ.» 30Sayulu mɛn ka a fɔ: «N bata junube ma. Kɔtɛ, yandi, n sutura n na jama la kayibanu anun Isirayila jama bɛ ɲala. I mɛn ni sɔn mɔ ni taga ɲɔgɔn na, n ni sujudu Alatala ye, i la Ala.» 31Awa, Samiyɛli saagita Sayulu ma, a ka a jokki, Sayulu sujuduta Alatala ye.

32Wo kɔma, Samiyɛli ka a fɔ, a ko: «Wo Agagi nati n ɲɛ, Amaleki mansa.» Agagi nata a juse be saren.#15:32 a juse be saren. Min be sɛbɛren Hebure kuma tɔ yan, a si nɔ mayɛlɛmanna Mɔgɔfin kuma tɔ ka le tugun: a be jingijangala. Ka wo ma, a ni mayɛlɛman ka le: jɔlɔnkɔŋɛ be a bole la. A be a fɔla a fan ma: «Faga koe mira bata bɔɔ n ma.» 33Kɔnɔ Samiyɛli ko a ma: «I ka konbiranu yigitɛgɛ ki min na anu la deŋɛnu faga koe la, i nɛɛnɛ tugun be nala yigitɛgɛla ɲɔgɔnna le a la deŋɛ la ko la.» Samiyɛli ka a makuntukuntu Giligali ɲɔ Alatala ɲala.

34Wo kɔma, Samiyɛli saagita a bata Rama, Sayulu tugun tagata a bata Gibeya. 35Samiyɛli ma Sayulu yen bitugun han a faga luŋɛ. Samiyɛli tota Sayulu la ko suunɛ le tɔ, bayi Alatala bata nimisa nun Sayulu ma koe la mansa la Isirayila.

Currently Selected:

1 Samiyɛli 15: MOG

Highlight

Compare

Copy