1 Samiyɛli 13
13
Isirayila nun Filisiti kaanu la kɛlɛ sabue
1Sayulu la simaya la kereŋɛ kan do, a sɔta mansa la bani Isirayila jama kunma. A la mansaya san filaɲɔgɛ, 2Sayulu ka bani Isirayila jama madɛn, a ka kayi wulu saba masubɛ anu tɔ. Mɔgɔ wulu fila tota a bolo Mikimasi anun Betɛli kɔnkɛ kunma, mɔgɔ wulu dɔndɔ tota a la den Yonatan bolo Gibeya saa tɔ, Bunyamin bɔnsɛ la duge tɔ. A ka jama tɔmanu lasaagi anu bata.
3Lun do, Yonatan ka Filisiti kaanu la gali mansa faga, min be nun Geba saa tɔ.#13:3 Yonatan ka Filisiti kaanu la gali mansa faga, min be nun Geba saa tɔ. Min be sɛbɛren Hebure kuma tɔ yan, a si nɔ mayɛlɛmanna Mɔgɔfin kuma tɔ ka le tugun: Yonatan ka Filisitinu la sɔɔri gale kɛlɛ min be Geba saa tɔ, a ka nɔ sɔtɔ anu kunma. Filisiti kaanu ka wo mɔɛ. Sayulu ka yamɔre sa bina ni fe Isirayila duge bɛ butɔ, bayi a ko: «Fɔ n na jama Hebure kaa bɛ ni a lamɔɛ.» 4Isirayila bɛ ka a mɔɛ, anu be a fɔla aa Sayulu bata Filisiti kaanu la gali mansa faga,#13:4 Sayulu bata Filisiti kaanu la gali mansa faga Min be sɛbɛren Hebure kuma tɔ yan, a si nɔ mayɛlɛmanna Mɔgɔfin kuma tɔ ka le tugun: Sayulu ka Filisitinu la sɔɔri gale kɛlɛ, a ka nɔ sɔtɔ anu kunma. Isirayila bɔnsɛ bata a yɛtɛ lasɛɛya Filisiti kaanu ye wo la. Wo butɔ, kiila tagata Isirayila duge tɔ, a fɔ koe la jama bɛ ni madɛn Giligali saa tɔ Sayulu kɛnna, wo kɔma anu madɛnta ɲɔ.
5Filisiti kaanu madɛnta Isirayila kɛlɛ koe la. Sarɛti kɛlɛ mafeŋɛ wulu bi saba le be anu bolo nun, soo tige kɛlɛ malanu mɔgɔ wulu wɔɔrɔ. Wo jama siyata iko mɛɲɛn kole minnu be ba dala. Anu nata daaka Mikimasi, Beti-Aweni tele bɔɛ tɔ. 6Bani Isirayila kaanu juse maɲakuta anu ma, bayi anu ka a yen anu bata lakɛtɛn. Wo butɔ, anu tagata dogon. Donu dogonta kɔnkɛnu tɛma, donu dogonta fanmɛnu tɔ, donu dogonta fatanu tɛma, donu dogonta dinkanu butɔ, donu dogonta dogondula mɔɔle doenu tɔ. 7Hebure donu ka Yurudɛn kɔɛɛ tɛgɛ, anu tagata Gadi anun Galadi dugenu tɔ. Kɔnɔ han bi Sayulu kan be Giligali. Jama min bɛ tota a kɛnna, wonu bɛ be sɛrɛnna kilaŋɛ la.
Sayulu la tantaŋɛ sarika bɔɔ koe la
8Sayulu ka Samiyɛli kɔnɔn han a ka tele wɔrɔwila luŋɛ min na ko fɔ a ye. Kɔnɔ Samiyɛli ma na Giligali, jama lansanta a kunma, anu yanfayata a la. 9Awa, Sayulu ka a fɔ, a ko: «Wo ni sarika bintannɛŋɛ nati n ɲɛ, anun kanunteya sarika!» Anu to ka a nati, a ka wo sarika bintannɛŋɛ bɔɔ betun. 10A be wo banna bɔɔla wagate min tɔ, Samiyɛli nata. Sayulu tagata a labɛndula, a ni taga a kɔntɔn. 11Samiyɛli ka a fɔ, a ko: «I be fen de maren?» Sayulu ka a jaabi, a ko: «N to ka a yen jama be malansanna n kunma, adun i ma na a wagate, Filisiti kaanu tugun bata na madɛn Mikimasi, 12wo butɔ n ka a mira n ko: ‹Filisiti kaanu si jigi le n ma Giligali yan, n nun bele Alatala mataranden!› Wolo mu n ka a fɔ n ko n te nɔ kɔnɔŋɛ mala bitugun, a fɛrɛ bele fɔ n ni sarika bintannɛŋɛ bɔɔ n yɛtɛ la.» 13Samiyɛli ka a fɔ Sayulu ye, «I bata hakkilibɔnɔya wale ma. I Marige Alatala ka i yamɔri i ni koe min ma, i ma a labatu. Alatala be i la mansaya lasabatila le nun Isirayila kunma kudai, 14kɔnɔ kɔtɛ, i la mansaya te sabati bitugun. Alatala bata mɔgɔ do masubɛ a be diren min ye, a ni wo tigi ma a la jama latagamanná la, bayi i bele i hakkile toren yamɔre ma, a ka min don i bolo.»
15Wo butɔ, Samiyɛli wulita, a bɔɔta Giligali, a tagata Gibeya saa tɔ, Bunyamin bɔnsɛ la duge tɔ.
Filisiti kaanu la matabɛŋɛ kɛlɛ ma koe la
Sayulu ka kɛlɛ malanu kɔnti minnu be a kɛnna. Fayida kayi mɔgɔ kɛmɛ wɔɔrɔ le be ɲɔ. 16Sayulu yo, a la den kayiren Yonatan yo, anun jama tɔɛ, wonu sɔta a kɛlɛ ma kɛɲa ma Geba, Bunyamin bɔnsɛ la duge tɔ. Filisiti kaanu tugun tagata daaka Mikimasi. 17Filisiti kaanu la kɛlɛ malá ɲinma kuruŋɛ do bɔɔta anu la daaka tɔ ka taga tiɲare madula. Anu ka wo kuruŋɛ tafatan sigi saba la, wonu dɔndɔ dɔndɔ bɛ ni taga tugu Isirayila saanu la. Kurun fɔlɛ ka a kun sɔ Ofira kila ye, Suwali duge mafanna. 18Doe tagata Beti-Horon kila mafanna. A sabaɲɔgɛ tagata naaniŋɛ mafanna, min be jigila Seboyimu fole dula, janfue kɛnna.
19Wo wagate nun, numu yo te yen Isirayila duge bɛ tɔ, bayi Filisiti kaanu ka a fɔ le, aa Hebure kaanu kana kɛlɛmafeŋɛnu ɲiɲa, iko faŋɛ ka wo ma tanba. 20Wo butɔ, Isirayila kaanu bɛ be kɛnɛ tagala nun Filisiti kaanu le dula, anu la nɛgɛmafeŋɛnu ladiyadula, iko sarin, tɛgɛraŋɛ, kere anun nɛgɛmafen gbɛtɛnu. 21Filisiti numɛnu be sɔn bɛlɛŋɛ le sala nɛgɛ latugu sɔŋɛ la: sarin nun kere latugu sɔŋɛ be maren kaalise giramu sagin de la, tɛgɛraŋɛ nun nɛgɛmafen gbɛtɛnu latugu sɔŋɛ be maren kaalise giramu naani le la. 22Wolo ka a ma kɛlɛ ma luŋɛ, jama bɛ min tota Sayulu kɛnna, faŋɛ nun tanba ma to anu bolo. Fɔ ale nun a la den kayireŋɛ Yonatan, kɛlɛmafeŋɛ be ande len bolo.
23Awa, Filisiti kaanu la gale do bɔɔta anu la daaka banba tɔ. Kila min be tagala Mikimasi kɔnkɛnu tɛma, anu tagata daaka ɲɔ kunma, anu ni a kanta.
Currently Selected:
1 Samiyɛli 13: MOG
Highlight
Share
Compare
Copy
Want to have your highlights saved across all your devices? Sign up or sign in
