1 Samiyɛli 11
11
Sayulu la kɛlɛ fɔlɛ
1Lun do, Amoni mansa Nahasi nata, anun a la sɔɔri gale, anu nata sɔ Yabesi saa ɲa tɔ, Galadi duge tɔ. Yabesi mɔgɛnu bɛ ka a fɔ Nahasi ye, anu ko: «Wo mɔ ni lahire kiti, mɔ si to le i sagoe tɔ.» 2Nahasi Amoni kaa ka anu jaabi, a ko: «Wo mɔ si nɔ lahirila, kɔnɔ fɔ n ni wo bolo ɲinma ɲakole bɛ layɛlɛ a butɔ betunna, wolo si a ma n ni maluya dusu Isirayila bɛ kunma.» 3Yabesi kayibanu ka a fɔ a ye: «Diɲa mɔ ye tele wɔrɔwila kɔtɔ, alako kiilá ni taga Isirayila duge bɛ tɔ. Ka a taranta dodo ma na mɔ dɛmandula, wo wagate mɔ si naa mɔ yɛtɛ to i sagoe tɔ.»
4Kiilanu tagata, anu keta Gibeya saa tɔ, Sayulu bata, anu ka kiila ɲatabɔ, jama bɛ ka a mɔɛ. Anu bɛ bakkuta dire la anu kulɛ mayɛlɛreŋɛ la. 5Wo wagate kɔtɔ le, Sayulu nata bɔɔla sɛnɛ tɔ, a nun a la ningenu. A to ka sɔnkɛ mɔɛ, a ka ɲininkare ma: «Bɔ, jama be dila fenna ka?» Anu ka Yabesi kaanu la kuma ɲatabɔ a ye. 6A la wo kumanu mɔɛreŋɛ kɔma le, Ala ka a Hakkile lajigi Sayulu ma. A dumɛnta han. 7A ka ningi fila jigan, a ka anu makuntu a kuntu kunte la. A ka anu lasanba Isirayila duge bɛ butɔ, anun kiilanu, ka a fɔla, ka mɔgɔ yo ma sɔ Sayulu nun Samiyɛli kɔma, wo tigi la ningenu tugun be mala kaa le. Alatala la kilaŋɛ jigita Isirayila kaanu ma, anu bɛ ka hanigi dɔndɔ jigan, anu bɔɔta kɛlɛ digii ma. 8Anu madɛndeŋɛ, Sayulu ka kɛlɛ malanu kɔnti ɲɔ Besɛki saa tɔ: Juda mɔgɔ wulu bi saba, Isirayila bɔnsɔ tɔɛnu mɔgɔ wulu kɛmɛ saba. 9Yabesi kaanu ka kiilanu minnu kii nun bɔɔla anu bata Galadi duge tɔ, anu ka a fɔ wonu ye, anu ko: «Wo be tagala kɛ-lɛ fɔla wo bata kaanu ye, wo ko: ‹Sinan, wo si wo la hɔrɔya sɔtɔ le tele bande tɔ.›» Kiilanu tagata wo kibare lake Yabesi jama ma, anu ɲagalinta wo koe la. 10Yabesi jama ka a fɔ Amoni kaanu ye: «Sinan mɔ si bɔɔ le mɔ la saa tɔ, ka ke wo ma. Min di wo ye, wo si a ma le mɔ la wo wagate.»
11Wo tabantaka, Sayulu ka jama tafatan saba la. Anu donta Amoni kaanu la daaka tɔ ɲɔlakɛnɛ kun fɔlɛ. Anu ka Amoni kaanu botege han tele bandita. Minnu kuŋɛ bɔɔta a tɔ, wonu malansanta; hali dɔndɔ ma to a filaɲɔgɛ kɛnna.
Sayulu la mansaya mabanban koe
12Jama ka a fɔ Samiyɛli ye: «Ɲɔmɔ le be a fɔla nun, aa Sayulu te nɔ mala mansa la mɔ kunma? Wo ni wo mɔgɛnu labɔɔ mɔ ni anu faga.» 13Kɔnɔ Sayulu ka a fɔ: «Mɔgɔ yo te faga bi luŋɛ, bayi Alatala bata Isirayila lakisi bi.» 14Samiyɛli ka a fɔ jama ye: «Wo mɔ ma Giligali, wo mɔ ni Sayulu la mansaya mabanban.» 15Jama bɛ ka a kun sɔ Giligali la, anu ka Sayulu tasigi mansa tintiŋɛ tɔ Alatala ɲakɔtɔ. Anu ka kanunteya sarikanu bɔɔ ɲɔ Alatala ye. Sayulu nun Isirayila jama ka ɲagaɲaga ma sɛɛwa belebele butɔ.
Currently Selected:
1 Samiyɛli 11: MOG
Highlight
Share
Compare
Copy
Want to have your highlights saved across all your devices? Sign up or sign in
