ರೋಮ್ 16
16
ಆಕೀರ್ ವಂದನೆ
1ನಂಗಡ ತಂಗೆಯು, ಕೆಂಕ್ರೆಯ ಪಟ್ಟಣತ್‍ರ ಸಬೇಲ್ ಸೇವೆ ಮಾಡ್‌ವ ಫೊಯಿಬೆನ ದೇವಡ ಮಕ್ಕಕ್ ಯೋಗ್ಯವಾನ ರೀತಿಲ್ ನಿಂಗ ಸ್ವೀಕಾರ ಮಾಡಂಡು. 2ಏದ್ ವಿಷಯತ್‍ಲ್ ಅವಕ್ ಸಹಾಯ ಬೋಂಡ್‌ವೋ ಅದ್‍ನ ಅವಕ್ ನಿಂಗ ಮಾಡಂಡೂಂದ್ ನಿಂಗಡ ಪಕ್ಕ ಅವಳ ನಾನ್ ಒಪ್ಪ್‌ಚಿಡುವಿ; ಅವ ದುಂಬ ಜನಕ್ ಪಿಂಞ ನಾಕ್ ಸಹ ಸಹಾಯ ಮಾಡಿತುಂಡ್.
3 ಕ್ರಿಸ್ತ ಯೇಸುರಲ್ಲಿ ಕೂಡೆ ಉಳ್ಳ ಐಕ್ಯತ್‍ಲ್ ನಾಡ ಕೂಡೆ ಸೇವ ಮಾಡ್‍ನ ಪ್ರಿಸ್ಕಿಲ್ಲ ಪಿಂಞ ಅಕ್ವಿಲಂಗು ನಾಡ ವಂದನೆ ಎಣ್ಣಿ.
4ಅಯಿಂಗ ನನ್ನ ಕಾಪಾಡ್‌ವಕಾಯಿತ್ ಅಯಿಂಗಡ ಜೀವತ್‍ನ ಕೊಡ್‍ಪನೆಕೆ ಬೋಳೆನ ಕೊಡ್‍ತತ್; ಅಯಿಂಗಡ ವಿಷಯತ್ ನಾನ್ ಮಾತ್ರ ಅಲ್ಲ, ಯೆಹೂದ್ಯಂಗ ಅಲ್ಲತಯಿಂಗಡ ಮದ್ಯತ್‍ಲ್ ಉಳ್ಳ ಎಲ್ಲಾ ಸಬೇಕಾರಳು ನಲ್ಲರಿಕೆರ ಚಾಯಿ ತಕ್ಕ್ ಎಣ್ಣಿಯಂಡುಂಡ್.
5ಅಯಿಂಗಡ ಮನೆಲ್ ಕೂಡಿ ಬಪ್ಪ ಸಬೇಕು ವಂದನೆ ಎಣ್ಣಿ. ಆಸ್ಯ ಪ್ರಾಂತ್ಯತ್‍ಲ್ ನಾಡ ಸೇವೇರ ಆದ್ಯ ಪಣ್ಣಾಯಿತುಳ್ಳ ನಾಡ ಪ್ರೀತಿರ ಎಪೈನೆತ ಎಣ್ಣ್‌ವಂವೊಂಗು ವಂದನೆ ಎಣ್ಣಿ.
6ನಂಗಕಾಯಿತ್ ದುಂಬ ಕಷ್ಟಪಟ್ಟ ಮರಿಯಕ್ ವಂದನೆ ಎಣ್ಣಿ.
7 ಅಪೊಸ್ತಲಂಗಡಡೆಲ್ ಚಾಯಿ ಗೊತ್ತುಳ್ಳಯಿಂಗಳು, ನಾಕಿಂಜ ಮಿಂಞ ಕ್ರಿಸ್ತಂಡ ಪಕ್ಕ ಬಂದಯಿಂಗಳು, ನಾಡ ಬೆಂದ್‌ವಳುವಾನ ನಾಡ ಕೂಡೆ ಸೆರಮನೇಲ್ ಕೈದಿಯಾಯಿತ್ ಇಂಜ ಅಂದ್ರೋನಿಕ ಎಣ್ಣ್‌ವಂವೊಂಗು ಯೂನ್ಯ ಎಣ್ಣ್‌ವಂವೊಂಗು ವಂದನೆ ಎಣ್ಣಿ.
8ಒಡೆಯಂಡ ಕೂಡೆ ಉಳ್ಳ ಐಕ್ಯತ್‍ಲ್ ನಾಡ ಪ್ರೀತಿರ ಅಂಪ್ಲಿಯ ಎಣ್ಣ್‌ವಂವೊಂಗ್ ವಂದನೆ ಎಣ್ಣಿ.
9 ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ನಂಗಡ ಕೂಡೆ ಸೇವೆ ಮಾಡ್‍ನ ಉರ್ಬಾ ಎಣ್ಣ್‌ವಂವೊಂಗು, ನಾಡ ಪ್ರೀತಿರ ಸ್ತಾಖು ಎಣ್ಣ್‌ವಂವೊಂಗು ವಂದನೆ ಎಣ್ಣಿ.
10 ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ನಂಬಿಕಸ್ತಾಂದ್ ಪೆದ ಕ್‍ಟ್ಟ್‌ನ ಉತ್ತಮ ಮನುಷ್ಯನಾನ ಅಪೆಲ್ಲ ಎಣ್ಣ್‌ವಂವೊಂಗ್ ವಂದನೆ ಎಣ್ಣಿ; ಅರಿಸ್ತೊಬೂಲಂಡ ಮನೆಕಾರಂಗಕ್ ವಂದನೆ ಎಣ್ಣಿ.
11ನಾಡ ಬೆಂದ್‌ಕನಾನ ಹೆರೊಡಿಯೋ ಎಣ್ಣ್‌ವಂವೊಂಗ್ ವಂದನೆ ಎಣ್ಣಿ. ನಾರ್ಕಿಸ್ಸಂಡ ಮನೆಲ್ ಒಡೆಯಂಡ ಜನಕ್ ವಂದನೆ ಎಣ್ಣಿ.
12ಒಡೆಯಂಡಲ್ಲಿ ಕಷ್ಟಪಟ್ಟಿತ್ ಸೇವೆ ಮಾಡ್‌ವ ತ್ರುಫೈನ ಪಿಂಞ ತ್ರುಫೋಸಳಕು ವಂದನೆ ಎಣ್ಣಿ. ಒಡೆಯಂಡಲ್ಲಿ ದುಂಬ ಕಷ್ಟಪಟ್ಟಿತ್ ಸೇವೆ ಮಾಡ್‌ವ ಪ್ರೀತಿರ ಪೆರ್ಸೀಸ್‍ಕ್ ವಂದನೆ ಎಣ್ಣಿ.
13ಒಡೆಯಂಡಲ್ಲಿ ಗೊತ್ತ್ ಮಾಡಿತುಳ್ಳ ರೂಫಂಗು, ನಾಕ್ ಸಹ ಅವ್ವಂಡನೆಕೆ ಉಳ್ಳ ಅಂವೊಂಡ ಅವ್ವಕು ವಂದನೆ ಎಣ್ಣಿ.
14ಅಸುಂಕ್ರಿತಂಗು, ಪ್ಲೆಗೋನನಂಗು, ಹೆರ್ಮೇಯನಂಗು, ಪತ್ರೋಬನಂಗು, ಹೆರ್ಮಾನಂಗು ಪಿಂಞ ಅಯಿಂಗಡ ಕೂಡೆ ಉಳ್ಳ ಅಣ್ಣತಮ್ಮಣಂಗಕು ವಂದನೆ ಎಣ್ಣಿ.
15ಫಿಲೊಲೊಗನಂಗು, ಯೂಲ್ಯಳಂಗು, ನೇರ್ಯನಂಗು, ಅಂವೊಂಡ ತಂಗೆಕು, ಒಲುಂಪಂಗು ಪಿಂಞ ಅಯಿಂಗಡ ಕೂಡೆ ಉಳ್ಳ ದೇವಡ ಮಕ್ಕಕು ವಂದನೆ ಎಣ್ಣಿ.
16ಒಬ್ಬೊಬ್ಬಂಗಳ ಪವಿತ್ರವಾನ ಮುತ್ತ್ ಕೊಡ್‌ತಿತ್#16.16 ಆದ್ಯ ಸಬೇಲ್ ಒಬ್ಬೊಬ್ಬಂಗಡ ಕಪಾಲ್‍ಲ್ ಮುತ್ತ್ ಕೊಡ್‌ತಿತ್ ವಂದನೆ ಮಾಡ್‌ವ. ವಂದನೆ ಎಣ್ಣಿ. ಕ್ರಿಸ್ತಂಡ ಎಲ್ಲಾ ಸಬೆರ ಜನಳು ನಿಂಗಕ್ ವಂದನೆ ಎಣ್ಣಿಯಂಡುಂಡ್.
17ಅದಲ್ಲತೆ, ನಾಡ ಅಣ್ಣತಮ್ಮಣಂಗಳೇ, ನಿಂಗ ಪಡಿಚಿತುಳ್ಳ ಬೋದನೆಕ್ ವಿರೋದವಾಯಿತ್ ವಿಂಗಡ ಮಾಡ್‌ವಯಿಂಗಡ ಕೂಡೆಯು ಪಿಂಞ ಬೊಳ್‍ತ್‍ವಕ್ ತಡೆ ಮಾಡ್‌ವಯಿಂಗಡ ಕೂಡೆಯು ಎಚ್ಚರತ್‍ಲ್ ಇರೀಂದ್ ನಿಂಗಳ ಬೋಡುವಿ. ಅಯಿಂಗಳ ದೂರ ಮಾಡಂಡೂಂದ್ ನಿಂಗಳ ಬೋಡುವಿ. 18ಅನ್ನನೆ ಉಳ್ಳಯಿಂಗ, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಗ್ ಸೇವೆ ಮಾಡತೆ, ಅಯಿಂಗಡ ಕೆಲಕಾಯಿತ್ ಸೇವೆ ಮಾಡಿಯಂಡುಂಡ್. ಅಯಿಂಗ ಅಯಿಂಗಡ ಮದುರವಾನ ತಕ್ಕ್‌ನ ಪರ್ಂದಿತ್ ಪಿಂಞ ಕುಶಿಪಡ್‌ತ್‌ವನೆಕೆ ತಕ್ಕ್ ಪರ್ಂದಿತ್, ಒಂದು ಅರಿಯತ ಜನಡ ಹೃದಯತ್‍ನ ವಂಚನೆ ಮಾಡ್‌ವಯಿಂಗಳಾಯಿತುಂಡ್. 19ನಿಂಗ ತಗ್ಗಿತ್ ನಡ್‍ಪದ್ ಎಲ್ಲಾ ಜನಕು ಗೊತ್ತಾಯಿರ್‌ತ್. ಆನಗುಂಡ್, ನಿಂಗಡ ವಿಷಯತ್ ನಾನ್ ದುಂಬ ಕುಶಿಪಟ್ಟಂಡುಂಡ್; ಆಚೇಂಗಿಯು ನಿಂಗ ನಲ್ಲದ್ ಮಾಡ್‌ವಕ್ ಜ್ಞಾನ ಉಳ್ಳಯಿಂಗಳಾಯಿತು, ಕೆಟ್ಟದ್ ಮಾಡ್‌ವಕ್ ಗೊತ್ತ್‌ಲ್ಲತಯಿಂಗಳಾಯಿತು ಇರಂಡೂಂದ್ ನಾಡ ಆಸೆ.
20ಸಮಾದಾನತ್‍ರ ದೇವ ಬೆರಿಯ ಸೈತಾನನ ನಿಂಗಡ ಕಾಲ್‍ರ ಅಡಿಲ್ ಜಜ್ಜಿರ್‌ವ. ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ ನಿಂಗಡ ಕೂಡೆ ಇಕ್ಕಡ್. ಆಮೆನ್. 21ನಾಡ ಕೂಡೆ ಸೇವೆ ಮಾಡ್‌ವ ತಿಮೊಥೆಯನು ನಾಡ ಬೆಂದ್‌ವಳಾನ ಲೂಕ್ಯನು, ಯಾಸೋನ ಪಿಂಞ ಸೋಸಿಪತ್ರನು ನಿಂಗಕ್ ವಂದನೆ ಎಣ್ಣಿಯಂಡುಂಡ್. 22ಈ ಕಾಗದತ್‍ನ ಒಳ್‍ದ್‍ನ ತೆರ್ತ್ಯನಾನ ನಾನ್ ಒಡೆಯಂಡಲ್ಲಿ ನಿಂಗಕ್ ವಂದನೆ ಎಣ್ಣ್‌ವಿ.
23ನನ್ನ ಪಿಂಞ ಇಲ್ಲಿಯತ್‍ರ ಸಬೇನ ಚಾಯಿ ನೋಟಿಯಂಡುಳ್ಳ ಗಾಯನು ನಿಂಗಕ್ ವಂದನೆ ಎಣ್ಣಿಯಂಡುಂಡ್. ಈ ಪಟ್ಟಣತ್‍ರ ಖಜಾನತ್‍ರ ಕಣಕ್ ನೋಟುವ ಎರಸ್ತ ಪಿಂಞ ತಮ್ಮಣನಾನ ಕ್ವರ್ತ ಸಹ ನಿಂಗಕ್ ವಂದನೆ ಎಣ್ಣಿಯಂಡುಂಡ್. 24ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ ನಿಂಗ ಎಲ್ಲಾಡ ಕೂಡೆ ಇಕ್ಕಡ್. ಆಮೆನ್.#16.24 ಈ ವಾಕ್ಯ ಚೆನ್ನ ಮೂಲ ಪ್ರತಿಲ್ ಮಾತ್ರ ಉಳ್ಳ.
25ನಾಡ ದೇವಡ ನಲ್ಲ ಸುದ್ದಿ ಎಣ್ಣುವನೆಕೆ, ನಿಂಗಳ ಸ್ತಿರಪಡ್‌ತ್‍ವಕ್ ಶಕ್ತಿ ಉಳ್ಳಂವೊನಾಯಿತ್ತುಳ್ಳ ದೇವಕ್ ಎಲ್ಲಾ ಮಹಿಮೆಯು ಇರಡ್. ಯೇಸು ಕ್ರಿಸ್ತಂಡ ಈ ವಿಷಯತ್‍ರ ಮೂಲಕ ಯೆಹೂದ್ಯಂಗಲ್ಲತಯಿಂಗಕ್, ಪಂಡಿಂಜೇ ಗುಟ್ಟಾಯಿತ್ ಬೆಚ್ಚಿತ್ಂಜ ಮರ್ಮ, ಪ್ರಕಟನೆ ಆಚಿ. 26ಆಚೇಂಗಿ ಇಕ್ಕ ಪ್ರವಾದಿಯಂಗ ಒಳ್‍ದಿ ಬೆಚ್ಚಿತುಳ್ಳ ಮೂಲಕವು, ನಿತ್ಯವಾನ ದೇವ ಹುಕುಮ್ ಕೊಡ್‍ತನೆಕೆ, ಎಲ್ಲಾ ಯೆಹೂದ್ಯರಲ್ಲತಯಿಂಗಳು ಅಂವೊಂಡ ಮೇಲೆ ನಂಬಿಕೆ ಬೆಚ್ಚಿತ್ ಅಂವೊಂಗ್ ತಗ್ಗಿತ್ ನಡ್‍ಪನೆಕೆ, ಈ ಸುದ್ದಿ ಯೆಹೂದ್ಯ ಅಲ್ಲತ ಎಲ್ಲಾ ಜನತ್‍ರ ಗುಂಪ್‌ಕು ಗೊತ್ತ್ ಮಾಡ್‍ಚಿ. 27ತಾನ್ ಒಬ್ಬನೇ ಜ್ಞಾನಿಯಾಯಿತುಳ್ಳ ದೇವಕ್, ಯೇಸು ಕ್ರಿಸ್ತಂಡ ಮೂಲಕ ಎಕ್ಕಾಲು ಮಹಿಮೆ ಆಡ್. ಆಮೆನ್.
Currently Selected:
ರೋಮ್ 16: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
