ರೋಮ್ 10
10
1ನಾಡ ಅಣ್ಣತಮ್ಮಣಂಗಳೇ, ನಾಡ ಜನಕ್ ರಕ್ಷಣೆ ಕ್‍ಟ್ಟಂಡೂಂದ್ ಉಳ್ಳದೇ ನಾಡ ಹೃದಯತ್‍ರ ಆಸೆಯು, ನಾನ್ ದೇವಡ ಪಕ್ಕ ಮಾಡ್‌ವ ಪ್ರಾರ್ಥನೆಯುವಾಯಿತ್ ಉಂಡ್. 2ದೇವಡ ಮೇಲೆ ಅಯಿಂಗಕ್ ಬಾರಿ ಬಕ್ತಿ ಉಂಡ್‍ೕಂದ್ ನಾನ್ ಅಯಿಂಗಡ ವಿಷಯತ್ ಸಾಕ್ಷಿ ಎಣ್ಣ್‌ವಿ; ಆಚೇಂಗಿ ಅದ್ ಬುದ್ದಿವಂತ ಬಕ್ತಿ ಅಲ್ಲ. 3ಅಯಿಂಗ ದೇವಡಗುಂಡ್ ಕ್‍ಟ್ಟ್‌ವ ನೀತಿನ ತ್‍ೕಡತೆ, ಅಯಿಂಗಡ ಕ್ರಿಯೇರಗುಂಡ್ ಬಪ್ಪ ನೀತಿನ ಸ್ತಾಪನೆ ಮಾಡ್‌ವಕ್ ಪ್ರಯತ್ನ ಪಟ್ಟಂಡುಳ್ಳಾಂಗ್, ಅಯಿಂಗ ಅಯಿಂಗಳ ದೇವಡ ನೀತಿಕ್ ತಗ್ಗಿತ್ ಕೊಡ್‍ತಂಡಿಲ್ಲೆ. 4ನಂಬುವ ಏದ್ ಮನುಷ್ಯಂಗು, ನೀತಿ ಉಳ್ಳಯಿಂಗಳಾಪಕ್, ಕ್ರಿಸ್ತ ನ್ಯಾಯಪ್ರಮಾಣತ್‍ರ ಅಂತ್ಯವಾಯಿತುಂಡ್.
5 ನ್ಯಾಯಪ್ರಮಾಣತ್‍ರಗುಂಡ್ ಕ್‍ಟ್ಟುವ ನೀತಿರ ವಿಷಯತ್: ನ್ಯಾಯಪ್ರಮಾಣತ್‍ಲ್ ಎಣ್ಣಿತುಳ್ಳನೆಕೆ ನಡ್‍ಪಯಿಂಗ ಅದ್ಂಡ ಮೂಲಕ ಬದ್‌ಕ್‌ವಾಂದ್ ಮೋಶೆ ಒಳ್‍ದಿ ಬೆಚ್ಚಿತುಂಡ್.#10.5 ಯಾಜಕ ಪುಸ್ತಕ 18.5 6ಆಚೇಂಗಿ, ನಂಬಿಕೇರ ಮೂಲಕ ಕ್‍ಟ್ಟುವ ನೀತಿ ಇನ್ನನೆ ಎಣ್ಣಿಯಂಡುಂಡ್: ಕ್ರಿಸ್ತನ, ಅಡಿಕ್ ಕೊಂಡ್ ಬಪ್ಪಕಾಯಿತ್ ಪರಲೋಕಕ್ ಪತ್ತಿತ್ ಪೋಪಂವೊ ದಾರ್?#10.6 ದರ್ಮಶಾಸ್ತ್ರ 30.13 7ಅಥವ, ಕ್ರಿಸ್ತನ ಚತ್ತಯಿಂಗಡ ಮದ್ಯತ್ಂಜ ಎದ್ದಿತ್ ಬಪ್ಪನೆಕೆ ಮಾಡ್‌ವಕ್ ಪಾತಾಳಕ್ ಇಳಿಂಜಿ ಪೋಪಂವೊ ದಾರ್‍ೕಂದ್ ನೀಡ ಹೃದಯತ್‍ಲ್ ಗೇನ ಮಾಡ್‌ವಕ್ಕಾಗ.#10.7 ದರ್ಮಶಾಸ್ತ್ರ 30.13 8ಆಚೇಂಗಿ ಅದ್ ಎಂತ ಎಣ್ಣಿಯಂಡ್ ಉಂಡ್? ದೇವಡ ವಾಕ್ಯ ನೀಡ ಪಕ್ಕತ್‍ಲ್, ನೀಡ ಬಾಯಿಲ್ ಪಿಂಞ ನೀಡ ಹೃದಯತ್‍ಲ್ ಉಂಡ್‍ೕಂದ್ ಎಣ್ಣಿಯಂಡುಂಡ್, ಅದ್ ನಂಗ ಬೋದನೆ ಮಾಡ್‌ವ ನಂಬಿಕೇರ ವಾಕ್ಯವೇ.#10.8 ದರ್ಮಶಾಸ್ತ್ರ 30.14 9ನೀನ್ ಒಡೆಯನಾನ ಯೇಸುನ, ನೀಡ ಬಾಯಿಲ್ ಅರಿಕೆ ಮಾಡಿತ್, ದೇವ ಅಂವೊನ ಚತ್ತಯಿಂಗಡ ಮದ್ಯತ್ಂಜ ಜೀವವಾಯಿತ್ ಎಪ್ಪ್‌ಚೀಂದ್ ನೀಡ ಹೃದಯತ್‍ಲ್ ನಂಬ್‍ಚೇಂಗಿ, ನೀಕ್ ರಕ್ಷಣೆ ಕ್‍ಟ್ಟುವ. 10ದಾರಾಯಿತ್ ಇಂಜತೇಂಗಿಯು, ನೀತಿ ಕ್‍ಟ್ಟುವಕಾಯಿತ್ ಹೃದಯತ್‍ಲ್ ನಂಬಂಡು; ರಕ್ಷಣೆ ಕ್‍ಟ್ಟ್‌ವಕ್ ಬಾಯಿಂಜ ಅರಿಕೆ ಮಾಡಂಡು.
11ಅಂವೊಂಡ ಮೇಲೆ ನಂಬಿಕೆ ಬೆಪ್ಪಂವೊ ದಾರಾಯಿತ್ ಇಂಜತೇಂಗಿಯು ಅಂವೊಂಗ್ ಞಾಣ ಆಪುಲೇಂದ್ ದೇವಡ ವಾಕ್ಯ ಎಣ್ಣಿಯಂಡುಂಡ್.#10.11 ಯೆಶಾಯ 28.16 12ಯೆಹೂದ್ಯಂಗಾಂದು, ಯೆಹೂದ್ಯ ಅಲ್ಲತಯಿಂಗಾಂದು ವೆತ್ಯಾಸ ಇಲ್ಲೆ, ಎಲ್ಲಾರ್‌ಕು ಒಡೆಯನಾಯಿತ್ ಉಳ್ಳ ಅಂವೊ, ಅಂವೊನ ಆರಾದನೆ ಮಾಡ್‌ವಯಿಂಗಕೆಲ್ಲಾ ದಾರಾಳವಾಯಿತ್ ಆಶೀರ್ವಾದ ಮಾಡ್‌ವಂವೊನಾಯಿತುಂಡ್. 13ಆನಗುಂಡ್ ಒಡೆಯಂಡ ಪೆದತ್‍ನ ಕಾಕ್‌ವಯಿಂಗೆಲ್ಲ ಬಚಾವಾಪ.#10.13 ಯೋವೇಲ 2.32 14ಅಕ್ಕ, ಅಂವೊನ ನಂಬತಯಿಂಗ ಎನ್ನನೆ ಅಂವೊನ ಕಾಕುವ? ಅಂವೊಂಡ ವಿಷಯತ್‍ನ ಇಲ್ಲಿಕತ್ತನೆ ಕ್‍ೕಕತಯಿಂಗ ಎನ್ನನೆ ನಂಬುವ? ದೇವಡ ನಲ್ಲ ಸುದ್ದಿನ ಎಣ್ಣ್‌ವಯಿಂಗ ಇಲ್ಲತಪೋಚೇಂಗಿ, ಎನ್ನನೆ ಅಯಿಂಗಡ ಕೆಮಿಕ್ ಅಂವೊಂಡ ವಿಷಯ ಪೋಪ? 15ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಯಿಂಗಳ ಅಯಿಂಗಡ ಪಕ್ಕ ಅಯಿಕತೆ ಪೋಚೇಂಗಿ ದಾರ್ ಎಣ್ಣುವ? ಅದ್ಂಗೇ, ಸಮಾದಾನತ್‍ರ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಯಿಂಗಡ ಪಾದ ಎಚ್ಚಕ್ ಚಾಯಿ ಉಂಡ್‍ೕಂದ್ ಒಳ್‍ದಿ ಬೆಚ್ಚಿತುಂಡಲ್ಲ?#10.15 ಯೆಶಾಯ 52.7
16ಆಚೇಂಗಿಯು ಎಲ್ಲಾರು ದೇವಡ ನಲ್ಲ ಸುದ್ದಿಕ್ ಬಗ್ಗಿಚಿಟ್ಟಿತ್‌ಲ್ಲೆ. ಅದ್ಂಡ ವಿಷಯತ್ ಯೆಶಾಯ ಪ್ರವಾದಿ: ಒಡೆಯನೇ, ನಂಗಡ ಮೂಲಕ ಕ್‍ೕಟದ್‍ನ ನಂಬ್‍ನಯಿಂಗ ದಾರ್‍ೕಂದ್ ಎಣ್ಣಿಯಂಡುಂಡ್.#10.16 ಯೆಶಾಯ 53.1 17ಆನಗುಂಡ್ ನಂಬಿಕೆ, ದೇವಡ ವಾಕ್ಯತ್‍ನ ಕ್‍ೕಪಗುಂಡ್ ಬಪ್ಪ, ಅಯಿಂಗ ಕ್‍ೕಪದ್, ದೇವಡ ವಾಕ್ಯತ್‍ನ ಬೋದನೆ ಮಾಡ್‌ವಗುಂಡ್ ಬಪ್ಪ.
18ಆಚೇಂಗಿ, ಇಸ್ರಾಯೇಲ್ ಜನ ಇದ್‍ನ ಕ್‍ೕಟಿತ್‌ಲ್ಲೆಯಾಂದ್ ನಾನ್ ಕ್‍ೕಪಿ;
ಅಯಿಂಗ ಕ್‍ೕಟತ್;
ಅಯಿಂಗ ಎಣ್ಣ್‌ನ ವಾಕ್ಯತ್‍ರ ವಾಣಿ ಲೋಕತ್‍ಲ್ ಎಲ್ಲೆಲ್ಲಿಕು ಪೋಚಿ,
ಪಿಂಞ ಲೋಕತ್‍ರ ಆಕೀರ್‍ಕತ್ತನೆ ಪೋಚೀಂದ್ ಉಂಡ್.#10.18 ದೇವಡ ಪಾಟ್ 19.4
19ಇಸ್ರಾಯೇಲ್ ಜನ ಇದ್‍ನ ಅರ್ಥ ಮಾಡಿತ್‌ಲ್ಲೆಯಾಂದ್ ಪುನಃ ಕ್‍ೕಪಿ. ಅಯಿಂಗಕ್ ಅರ್ಥ ಆಚಿ. ಆದ್ಯವಾಯಿತ್ ಮೋಶೆ:
ನಾಡ ಜನ ಅಲ್ಲತಯಿಂಗಡ ಮೂಲಕ ನಿಂಗಕ್ ಒಟ್ಟೆಕಿಚ್ಚ್ ಬಪ್ಪನೆಕೆ ನಾನ್ ಮಾಡ್‌ವಿ;
ಬುದ್ದಿ ಇಲ್ಲತ ಜನತ್‍ರಗುಂಡ್ ನಾನ್ ನಿಂಗಕ್ ಚೆಡಿ ಬಪ್ಪನೆಕೆ ಮಾಡ್‌ವೀಂದ್ ಎಣ್ಣ್‌ಚಿ.#10.19 ದರ್ಮಶಾಸ್ತ್ರ 32.21
20ಯೆಶಾಯ ಪ್ರವಾದಿ:
ನನ್ನ ತ್‍ೕಡತಯಿಂಗ ನನ್ನ ಕಂಡ್‌ಪುಡ್‌ಚತ್,
ನಾಡ ವಿಷಯತ್‍ನ ಕ್‍ೕಕತಯಿಂಗಕ್ ನಾನ್ ದಾರ್‍ೕಂದ್ ಗೊತ್ತಾಚೀಂದ್ ದೈರ್ಯವಾಯಿತ್ ಎಣ್ಣ್‌ಚಿ.#10.20 ಯೆಶಾಯ 65.1
21ಆಚೇಂಗಿ, ಇಸ್ರಾಯೇಲ್ ಜನಡ ವಿಷಯತ್:
ದೇವಕ್ ಬಗ್ಗ್‌ಚಿಡತಯಿಂಗಳು, ಎದ್‍ರ್ ತಕ್ಕ್ ಪರಿಯುವಯಿಂಗಳಾಯಿತ್ ಉಳ್ಳ ಅಯಿಂಗಕಾಯಿತ್, ಅಯಿಂಗಳ ಸ್ವೀಕಾರ ಮಾಡ್‌ವಕಾಯಿತ್,
ದಿನ ಪೂರ್ತಿ ನಾಡ ಕೈಯಿನ ನ್‍ೕಟಿತ್ ಪಾರಕಾತಂಡ್ ಇಂಜಿಯೇಂದ್ ಅಂವೊ ಇಂಞು ಎಣ್ಣ್‌ಚಿ.#10.21 ಯೆಶಾಯ 65.2
Currently Selected:
ರೋಮ್ 10: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
