ಜ್ಞಾನತ್‌ರ ಪಡಿಮ 24
24
1ದುಷ್ಟಂಗಡ ವಿಷಯತ್‌ ಹೊಟ್ಟೆಕಿಚ್ಚ್‌ ಪಡಂಡ. ಅಯಿಂಗಡ ಕೂಡೆ ಇಪ್ಪಕು ಕುಶಿ ಪಡಂಡ.
2ಅಯಿಂಗಡ ಮನಸ್ಸ್‌ ಹಿಂಸೆ ಮಾಡ್‌ವಕ್‌ ಗೇನ ಮಾಡಿಯಂಡಿಪ್ಪ. ಅಯಿಂಗಡ ಕಿರಿ ಕ್‍ೕಡ್‌ನ ಪರಿವ.
3ಜ್ಞಾನತ್‌ರಗುಂಡ್‌ ಒರ್‌ ಮನೆನ ಕೆಟ್ಟುವ. ವಿವೇಕತ್‌ರಗುಂಡ್‌ ಅದ್‌ ನೆಲೆನಿಪ್ಪ.
4ಅರಿವುಯಿಂಜ ಕೋಂಬರೆಲೆಲ್ಲಾ ಬೆಲೆಯುಳ್ಳ ಪಿಂಞ ಚಾಯಿಯುಳ್ಳ ಎಲ್ಲಾ ತರತ್‌ರ ಐಷ್ವರ್ಯತ್‌ಂಜ ದುಂಬಿತ್‌ಪ್ಪ.
5ಜ್ಞಾನ ಉಳ್ಳಂವೊನೇ ಶಕ್ತಿ ಉಳ್ಳಂವೊ. ಅರಿವು ಉಳ್ಳಂವೊ ತಾಂಡ ಬಲತ್‌ನ ಜಾಸ್ತಿ ಮಾಡುವ.
6ನಲ್ಲ ಆಲೋಚನೆನ ಕ್‍ೕಟಿತ್‌ ಯುದ್ದ ಮಾಡ್. ದುಂಬ ಆಲೋಚನೆಕಾರಂಗ ಇಂಜತೇಂಗಿ ಜಯ ಕ್‌ಟ್ಟುವ.
7ಜ್ಞಾನ ಮೂಡಂಗ್‌ ಎತ್ತುವಕಯ್ಯತ ಎತ್ತ್‌ರತ್‌ಲ್‌ ಉಂಡ್. ನ್ಯಾಯ ತ್‍ೕಪ ಜಾಗತ್‌ಲ್‌ ಅಂವೊ ಬಾಯಿ ತೊರ್ಪುಲೆ.
8ಕ್‍ೕಡ್‌ನ ಮಾಡ್‌ವಕ್‌ ಗೇನ ಮಾಡ್‌ವಂವೊಂನ ಜನ ದುಷ್ಟಾಂದ್‌ ಕಾಕುವ.
9ಮೂಡತನತ್‌ರ ಯೋಜನೆಯೆಲ್ಲಾ ಪಾಪವೇ. ಪರಿಹಾಸ ಮಾಡ್‌ವಂವೊನ ಜನ ಅಸಹ್ಯ ಪಡುವ.
10ಇಕ್ಕಟ್‌ರ ಸಮಯತ್‌ ನೀನ್‌ ಕುಂದಿಪೋನಕ, ನೀನ್‌ ನೇರಾಯಿತು ಬಲಹೀನನೇ.
11ಚಾವ್‌ಕ್‌ ಒಪ್ಪ್‌ಚಿಟ್ಟಯಿಂಗಳ ಪಿಂಞ ಕೊಲ್ಲ್‌ವಕ್‌ ಗೊತ್ತ್‌ ಮಾಡ್‌ನಯಿಂಗಳ ತಪ್ಪ್‌ಚಿಡ್‌ವಕ್‌ ಕಯ್ಯುವದಾಚೇಂಗಿ ಅದ್‌ನ ಮಾಡ್.
12ಇದ್‌ಂಡ ವಿಷಯ ನಂಗಕ್‌ ಒಂದು ಗೊತ್ತ್‌ಲ್ಲೇಂದ್‌ ಎಣ್ಣ್‌ಚೇಂಗಿ, ಹೃದಯತ್‌ನೆಲ್ಲಾ ಪರೀಕ್ಷೆ ಮಾಡ್‌ವಂವೊಂಗ್‌ ಅರಿಯತೆ ಇಪ್ಪೊ? ನೀಡ ಆತ್ಮತ್‌ನ ಕಾಪಂವೊಂಗ್‌ ಗೊತ್ತಿಲ್ಲತೆ ಇಪ್ಪೊ? ಒಬ್ಬೊಬ್ಬನು ಮಾಡುವ ಕಾರ್ಯಕ್‌ ತಕ್ಕಂತ ಪ್ರತಿಫಲ ಕೊಡ್‌ಕತೆ ಇಪ್ಪೊ?
13ನಾಡ ಮೋನೇ, ತೇನ್ನ ತಿನ್ನ್, ಅದ್‌ ನಲ್ಲದ್. ತೇನೆರಿಯಿಂಜ ಚೋರುವ ತೇನ್‌ ನೀಡ ಬಾಯಿಕ್‌ ಮೊದ್ರವಾಯಿತ್‌ ಇಪ್ಪ.
14ಅನ್ನನೆ ಜ್ಞಾನವು ನೀಡ ಆತ್ಮಕ್‌ ಸುಕವಾಯಿತ್‌ ಇಪ್ಪಾಂದ್‌ ಗೊತ್ತಿರಡ್. ಅದ್‌ನ ಪಡ್‌ಂದತೇಂಗಿ ಮಿಂಞತ್‌ರ ಬದ್‌ಕ್‌ ನೀಕ್‌ ಸಹಾಯ ಆಪ. ನೀಡ ನಿರೀಕ್ಷೆ ಪಾಳಾಪುಲೆ.
15ದುಷ್ಟನೇ, ನೀತಿವಂತಂವೊಂಡ ಮನೆಕ್‌ ವಿರೋದವಾಯಿತ್‌ ಪದ್‌ಂಗಿ ಇರತೆ. ಅಂವೊ ವಾಸಮಾಡುವ ಜಾಗತ್‌ನ ಪಾಳ್ಮಾಡತೆ.
16ಎನ್ನಂಗೆಣ್ಣ್‌ಚೇಂಗಿ ನೀತಿವಂತಂವೊ ಏಳ್‌ ಕುರಿ ಬುದ್ದತೇಂಗಿಯು ಪುನಃ ಎದ್ದಿತ್‌ ನಿಪ್ಪ. ಆಚೇಂಗಿ ದುಷ್ಟಂಗ ಕ್‍ೕಡ್‌ಲ್‌ ಬುದ್ದಿತ್‌ ಅನ್ನೆನ ಇಪ್ಪ.
17ನೀಡ ವಿರೋದಿ ಬೂವಕ ಕುಶಿ ಪಡತೆ. ಅಂವೊ ತಡ್‌ಕಿತ್‌ ಬೂವಕ ಸಂತೋಷ ಪಡತೆ.
18ಯೆಹೋವ ನೀನ್‌ ಸಂತೋಷಪಡುವದ್‌ನ ಕಂಡಿತ್, ಅದ್‌ನ ಕುಶಿಪಡುಲೆ. ಅಕ್ಕ ವಿರೋದಿಯಡ ಮೇಲೆ ಉಳ್ಳ ಚೆಡಿನ ನೀಕಿರುವ.
19ಕ್‍ೕಡ್‌ ಮಾಡ್‌ವಯಿಂಗಡ ವಿಷಯತ್‌ ಚೆಡಿ ಮಾಡಿಯೊತೆ. ದುಷ್ಟಂಗಡ ಮೇಲೆ ಹೊಟ್ಟೆಕಿಚ್ಚ್‌ ಪಡತೆ.
20ಕ್‍ೕಡ್‌ ಮಾಡ್‌ವಯಿಂಗಕ್‌ ಮಿಂಞಕ್‌ ಬದ್‌ಕ್‌ ಒಂದು ಇಲ್ಲೆ. ದುಷ್ಟಂಗಡ ಬೊಳ್‌ಚ ಆರಿ ಪೋಪ.
21ನಾಡ ಮೋನೇ, ಯೆಹೋವಂಗು, ರಾಜಂಗು ಬೊತ್ತಿತ್‌ ನಡೆ. ಅಯಿಂಗ ದಂಡಾಳ್‌ನ ವಿರೋದಿಚಿಡುವ ಜನಡ ಕೂಡೆ ಕೂಡತೆ.
22ಎನ್ನಂಗೆಣ್ಣ್‌ಚೇಂಗಿ ಅಯಿಂಗಕ್‌ ಇಂಜನೆಕೆ ಅಪಾಯ ಬಪ್ಪ, ಅಯಿಂಗಡಿಂಜ ಬಪ್ಪ ಕ್‍ೕಡ್‌ ದಾರ್‌ಕ್‌ ಗೊತ್ತೊಂಡ್?
ಬೋರೆ ಚೆನ್ನ ಜ್ಞಾನವುಳ್ಳಯಿಂಗಡ ಪಡಿಮ
23ಇಂಞು ಚೆನ್ನ ಜ್ಞಾನವುಳ್ಳಂವೊಂಡ ತಕ್ಕ್: ನ್ಯಾಯತೀರ್‌ಪ್‌ ಕೊಡ್‌ಪಕ ಪಕ್ಷಪಾತ ನಲ್ಲದಿಲ್ಲೆ.
24ದುಷ್ಟನ ನೋಟಿತ್: ನೀನ್‌ ಒರ್‌ ಕುತ್ತವು ಮಾಡಿತ್‌ಲ್ಲೆಂದ್‌ ಎಣ್ಣ್‌ವಂವೊಂಗ್‌ ಜನ ಶಾಪ ಇಡುವ. ಜನಾಂಗ ಅಂವೊನ ದ್ವೇಷ ಮಾಡುವ.
25ಆಚೇಂಗಿ ಅಪರಾದಿನ ದಂಡ್‌ಚಿಡುವಂವೊನ ಮೆಚ್ಚುವ. ಅಂವೊಂಗ್‌ ಉತ್ತಮವಾನ ಆಶೀರ್ವಾದ ಕ್‌ಟ್ಟುವ.
26ನೇರಾನ ಉತ್ತರ ತುಟಿಕ್‌ ಮುತ್ತ್‌ ಕೊಡ್‌ತನೆಕೆ.
27ಸುರುಲ್‌ ಪೊರಮೆ ಉಳ್ಳ ಪಣಿನ ಮಾಡ್, ಬಯ್ಯ ಬೇಲ್‌ನ ತಯಾರ್‌ ಮಾಡ್, ಅಲ್ಲಿಂಜ ನೀಡ ಮನೆನ ಕೆಟ್ಟ್.
28ಕಾರಣಯಿಲ್ಲತೆ ಒಬ್ಬಂಗ್‌ ವಿರೋದವಾಯಿತ್‌ ಸಾಕ್ಷಿ ಎಣ್ಣ್‌ತೆ, ನೀಡ ತಕ್ಕ್‌ಯಿಂಜ ವಂಚನೆ ಮಾಡತೆ.
29ಅಂವೊ ನಾಕ್‍ ಕ್‍ೕಡ್‌ ಮಾಡ್‌ನನೆಕೆ ನಾನು ಅಂವೊಂಗ್‌ ಮಾಡುವಿ, ಅಂವೊ ಮಾಡ್‌ನ ಕ್‍ೕಡ್‌ಕ್‌ ಸೆರಿಯಾಯಿತ್‌ ಪಗೆ ತ್‍ೕಪೀಂದ್‌ ಎಣ್ಣತೆ.
30ಸೋಮಾರಿರ ಬೇಲ್‌ರ ಕಡೆಯು, ದಡ್ಡಂಡ ದ್ರಾಕ್ಷಿತೋಟತ್‌ರ ಪಕ್ಕವು ನಡ್‌ಂದ್‌ ಪೋನ.
31ಅದಾ, ಆ ಬೇಲ್‌ಲ್‌ ಮುಳ್ಳ್‌ಗಿಡವು ಕಚಡವು ಬೊಳ್‌ಂದಿತಿಂಜತ್. ಅದ್‌ಂಡ ಕಲ್ಲ್‌ರ ಗೋಡೆ ಬುದ್ದ್‌ಪೋಯಿತ್ತಿಂಜತ್.
32ಅದ್‌ನ ಕಂಡಿತ್ ಗೇನ ಮಾಡ್‌ನ. ಅದ್‌ನ ನೋಟಿತ್ ಪಾಠ ಪಡ್‌ಚಂಡ:
33ಇಂಞು ಚೆನ್ನ ನೇರ ವರ್ವಿ, ಇಂಞು ಚೆನ್ನ ನೇರ ಆರಾಮ್‌ ಮಾಡುವಿ, ಇಂಞು ಚೆನ್ನ ನೇರ ಕೈಯಿನ ಮಡ್‌ಕಿತ್‌ ವರಿಯೊವೀಂದ್‌ ಎಣ್ಣುವಿಯಾ?
34ಅಕ್ಕ, ಬಡತನ ದರೋಡೆಕಾರಂಡನೆಕೆ ಇಂಜನೆಕೆ ಬಪ್ಪ. ಅಂವೊಂಡ ಸ್ತಿತಿಗತಿ#24.34 ಕೊರವು ದರೋಡೆಕಾರ ಬಂದಿತ್‌ ಉಳ್ಳದ್‌ನೆಲ್ಲ ಎಡ್‌ತಂಡ್‌ ಪೋನನೆಕೆ ಇಪ್.
Currently Selected:
ಜ್ಞಾನತ್‌ರ ಪಡಿಮ 24: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
