ಜ್ಞಾನತ್‌ರ ಪಡಿಮ 23
23
1ನೀನ್‌ ಒರ್‌ ಅದಿಪತಿರ ಕೂಡೆ ಉಂಬಕ್‌ ಅಳ್‌ತ್‌ತೇಂಗಿ, ನೀಡ ಮಿಂಞತ್‌ ಉಳ್ಳದ್‌ನ ಎಚ್ಚರತ್‌ಲ್‌ ನೋಟ್.
2ನೀನ್‌ ಹೊಟ್ಟೆಬಾಕೆನಾಯಿತ್‌ ಇಂಜತೇಂಗಿ, ನೀಡ ತೊಂಡೆಲ್‌ ಚಾಕ್‌ನ ಇಡ್.
3ಅಂವೊಂಡ ರಸವುಳ್ಳ ಆಹಾರ ವಸ್ತುನ ಆಸೆ ಪಡತೆ. ಅದ್‌ ನಿನ್ನ ವಂಚನೆ ಮಾಡುವ ಆಹಾರ ಆಯಿತಿಕ್ಕು.
4ಐಶ್ವರ್ಯವಂತನಾಂಡೂಂದ್‌ ನಯಿಚಿತ್‌ ಪ್ರಯತ್‌ನ ಪಡತೆ; ನೀಡ ಸ್ವಂತ ಬುದ್ದಿರ ಮೇಲೆ ನಂಬಿಕೆ ಇಡತೆ.
5ಕಾಂಗತೆ ಆಯಿ ಪೋಪ ವಸ್ತುರ ಮೇಲೆ ನೀಡ ದೃಷ್ಟಿ ಪಾರುವೋ? ಅದ್‌ ಇಂಜನೆಕೆ, ರೆಕ್ಕೆ ಬಪ್ಪಕ್‌ ಮಾಡಿತ್‌ ಗರುಡಪಕ್ಷಿರನೆಕೆ ಬಾನತ್‌ ಪಾರಿಯಂಡ್‌ ಪೋಪ.
6ಕೀಂಜ ಬುದ್ದಿ ಉಳ್ಳಂವೊಂಡ ಆಹಾರತ್‌ನ ಉಂಗತೆ. ಅಂವೊಂಡ ರಸವುಳ್ಳ ಆಹಾರಕ್‌ ಆಸೆ ಪಡತೆ.
7ಅಂವೊಂಡ ಹೃದಯತ್‌ರ ಗೇನ ಎಂತೋ, ಅನ್ನನೆ ಅಂವೊನು ಉಂಡ್. ಉಣ್ಣ್, ಕೂಡೀಂದ್‌ ನೀಕ್‌ ಎಣ್ಣ್‌ಚೇಂಗಿಯ, ಅಂವೊಂಡ ಗೇನ ಬೋರೆ.
8ನೀನ್‌ ಉಂಡ ಚೆನ್ನದ್‌ನ ಸಹ ಕಕ್ಕ್‌ವಿಯ. ಅಕ್ಕ ನೀಡ ವರ್ಣನೆಯೆಲ್ಲಾ ಪ್ರಯೋಜನೆ ಇಲ್ಲತೆ ಆಪ.
9ಮೂಡಂಡ ಕೆಮಿ ಕ್‍ೕಪನೆಕೆ ಪರಿಯತೆ. ಅಂವೊ ನೀಡ ಜ್ಞಾನತ್‌ರ ತಕ್ಕ್‌ನ ತ್‌ಕ್ಕಾರ ಮಾಡುವ.
10ನೀಡ ಮುತ್ತಜ್ಜಂಗ ಪೂರ್ವ ಕಾಲತ್‌ ಇಟ್ಟ ಅದ್ದ್ ಕಲ್ಲ್‌ನ ಅನ್‌ಂಗತೆ, ಅನಾತ ಮಕ್ಕಡ ಬೂಮಿನ ಬಲಿಕತೆ.
11ಅಯಿಂಗಡ ರಕ್ಷಕ ಶಕ್ಷಿವಂತಂವೊ. ಅಯಿಂಗಕಾಯಿತ್‌ ಅಂವೊ ನೀಡ ಕೂಡೆ ವಾದ ಮಾಡುವ.
12ಬುದ್ದಿತಕ್ಕ್‌ನ ನೀಡ ಮನಸ್ಸ್‌ಕ್ ಎಡ್‌ತ, ಅರಿವುರ ತಕ್ಕ್‌ಕ್‌ ಕೆಮಿಕೊಡ್.
13ಕುಂಞಿಕ್‌ ಶಿಕ್ಷೆ ಕೊಡ್‌ಕತೆ ಇರತೆ. ಕೋಲ್‌ಲ್‌ ಪೊಜ್ಜತೇಂಗಿ ಅಂವೊ ಚತ್ತ್‌ ಪೋಪುಲೆ.
14ಕೋಲ್‌ಲ್‌ ಪೊಯ್ಯಿ, ಅಂವೊಂಡ ಜೀವತ್‌ನ ಪಾತಾಳತ್‌ಂಜ ಕಾಪಾಡುವಿಯ.
15ನಾಡ ಮೋನೇ, ನೀಡ ಹೃದಯ ಜ್ಞಾನವುಳ್ಳದಾಯಿತ್‌ ಇಂಜಚೇಂಗಿ, ನಾಡ ಹೃದಯವು ಕುಶಿ ಪಡುವ.
16ನೀಡ ಕಿರಿ ಸೆರಿಯಾನದ್‌ನ ತಕ್ಕ್‌ ಪರ್‌ಂದ್‌ತೇಂಗಿ, ನಾಡ ಆಳವಾನ ಮನಸ್ಸ್‌ ಕುಶಿಪಡುವ.
17ಪಾಪಿಯಳ ನೋಟಿತ್‌ ಹೊಟ್ಟೆಕಿಚ್ಚ್‌ ಪಡಂಡ. ಆಚೇಂಗಿ ಎಲ್ಲಾ ದಿವಸವು ಯೆಹೋವಂಗ್‌ ಬೊತ್ತಿತ್‌ ನಡೆ.
18ಕಂಡಿತವಾಯಿತ್‌ ನೀಕ್‌ ಒರ್‌ ನಲ್ಲ ಮಿಂಞತ್‌ರ ಬದುಕ್‌ ಉಂಡ್; ನೀಡ ನಿರೀಕ್ಷೆ ಪಾಳಾಪುಲೆ.
19ನಾಡ ಮೋನೇ, ಕೆಮಿಕೊಡ್‌ತ್‌ ಕ್‍ೕಟಿತ್‌ ಜ್ಞಾನವುಳ್ಳಂವನಾಯಿತ್‌ ಇರ್, ನೀಡ ಹೃದಯತ್‌ನ ಸೆರಿಯಾನ ಬಟ್ಟೆಲ್‌ ನಡ್‌ತ್.
20ಕುಡುಕಂಗಡ ಕೂಡೆಯು, ದುಂಬ ಯರ್ಚಿ ತಿಂಬಯಿಂಗಡ ಕೂಡೆಯು ಸಹವಾಸ ಬೆಚ್ಚೊತೆ.
21ಎನ್ನಂಗೆಣ್ಣ್‌ಚೇಂಗಿ ಕುಡುಕನು ಹೊಟ್ಟೆಬಾಕೆನು ಗರಿಬಂಗಳಾಪ. ಕಣ್ಣೊರ್‌ಕ್‌ ಕೀತ್‌ನ ಬಟ್ಟೆನ ಉಡ್‌ಪನೆಕೆ ಮಾಡುವ.
22ನೀಕ್‌ ಜೀವ ತಂದ ನೀಡ ಅಪ್ಪಂಗ್‌ ಕೆಮಿಕೊಡ್. ನೀಡ ಅವ್ವಂಗ್‌ ವಯಸ್ಸಾಪಕ ಅವಳ ತ್‌ಕ್ಕಾರ ಮಾಡಂಡ.
23ಸತ್ಯತ್‌ನ ಕ್ರಯಕ್‌ ಎಡ್‌ತ, ಅದ್‌ನ ಮಾರತೆ. ಅನ್ನನೆ ಜ್ಞಾನತ್‌ನ, ಬೋದನೆನ ಪಿಂಞ ಬುದ್ದಿನ ಕ್ರಯಕ್‌ ಎಡ್‌ತ.
24ನೀತಿವಂತಂವೊಂಡ ಅಪ್ಪ ದುಂಬ ಕುಶಿಪಡುವ. ಜ್ಞಾನವುಳ್ಳ ಕುಂಞಿನ ಪೆತ್ತಂವೊ ಅಂವೊನಗುಂಡ್‌ ಸಂತೋಷ ಪಡುವ.
25ನೀಡ ಅಪ್ಪವ್ವ ಕುಶಿ ಪಡಡ್, ನಿನ್ನ ಪೆತ್ತವ ಸಂತೋಷವಾಯಿತಿರಡ್.
26ನಾಡ ಮೋನೇ, ನೀಡ ಹೃದಯತ್‌ನ ನಾಕ್‍ ತಾ. ನೀಡ ಕಣ್ಣ್ ನಾಡ ಬಟ್ಟೆಲ್‌ ಪೋಪಕ್‌ ಕುಶಿ ಪಡಡ್.
27ವ್ಯಬಿಚಾರಿ ಆಳವಾನ ಕುಂಡ್; ವೇಶಿ ಇರ್‌ಂಗ್‌ನ ಕಣತರೆರನೆಕೆ.
28ಅವ ಕಳ್ಳಂಡನೆಕೆ ದಾರ್‌ಕು ಗೊತ್ತಿಲ್ಲತ ಪದ್‌ಂಗಿ, ಆಣಾಳುವಡಡೆಲ್‌ ಕಳ್ಳತ್ತನ ಮಾಡುವ ಆಣಾಳ್‌ವಳ ಜಾಸ್ತಿ ಮಾಡುವ.
29ಅಯ್ಯೋ ಎಣ್ಣ್‌ವಯಿಂಗ ದಾರ್? ದಾರ್‌ಕ್‌ ನೊಂಬಲ? ದಾರ್‌ಕ್‌ ಬೇಜಾರ್? ದಾರ್ ಜಗಳ ಮಾಡುವ? ದಾರ್ ಗೋಳಾಡುವ? ದಾರ್‌ಕ್‌ ಕಾರಣಯಿಲ್ಲತ ಗಾಯ? ದಾರ್‌ಕ್‌ ಚೋಂದ್‌ ಪೋನ ಕಣ್ಣ್?
30ಕಳ್ಳ್‌ನ ಮಿತಿಮೀರಿತ್‌ ಕುಡಿಪಯಿಂಗಳು, ಮಿಶ್ರ ಮಾಡ್‌ನ ಕಳ್ಳ್‌ನ ಕೂಟಿತ್‌ ಕುಡಿಪಯಿಂಗಳು ತಾನೇ.
31ಕಳ್ಳ್, ಪಾತ್‌ರತ್‌ಲ್‌ ಚೋಂದ ರಂಗ್‌ಲ್‌ ಪಳಪಳಾಂದ್‌ ಕಾಂಬಕ, ಅದ್‌ನ ನೀನ್‌ ನೋಟಂಡ. ಅದ್‌ ನಯಿಂಗನೆ ಇಳಿಯುವ.
32ಕಡೇಕ್‌ ಅದ್‌ ಪಾಂಬ್ರನೆಕೆ ಕಡಿಪ, ಅಕ್ಕು, ವಿಷ ಪಾಂಬ್ರನೆಕೆ ಕಡಿಪ.
33ನೀಡ ಕಣ್ಣ್ ವಿಚಿತ್‌ರವಾನದ್‌ನೆಲ್ಲಾ ಕಾಂಬ. ನೀಡ ಮನಸ್ಸ್‌ ತಾರಮಾರ ತಕ್ಕ್‌ನ ಪರಿಯುವ.
34ನೀನ್‌ ಕಡಲ್‌ರ ಮದ್ಯತ್‌ ವರಿಯಂಡಿಪ್ಪಂವೊನೆಕೆಯು, ಬೀಜುವ ಗಾಳಿಲ್‌ ಹಡಗ್‌ರ ಕಂಬತ್‌ರ ತುದಿಲ್‌ ವರಿಯಂಡಿಪ್ಪನೆಕೆಯು ಇಪ್ಪಿಯ.
35ಅಯಿಂಗ ನನ್ನ ಪೊಜ್ಜತ್, ನಾಕ್‍ ನೊಂಬಲ ಆಯಿತ್‌ಲ್ಲೆ. ನನ್ನ ಬಡ್‌ಚತ್‌ ನಾಕ್‍ ಗೊತ್ತಾಯಿತ್‌ಲ್ಲೆ, ಇಕ್ಕ ನಾಕ್‍ ಎಚ್ಚರ ಆಪುಲೆ. ನಾಕ್‍ ಇಂಞು ಕುಡಿಪಕ್ ಬೋಂಡೂಂದ್ ಎಣ್ಣ್‌ವಿಯ.
Currently Selected:
ಜ್ಞಾನತ್‌ರ ಪಡಿಮ 23: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
