ಯಾಕೋಬ 5
5
ಕರುಣೆಯಿಲ್ಲತ ಪಣಕಾರಂಗಕ್ ಎಚ್ಚರಿಕೆ
1ಪಣಕಾರಂಗಳೇ ಕ್‍ೕಳಿ, ನಿಂಗಕ್ ಬಪ್ಪಕುಳ್ಳ ದುಂಬ ಕಷ್ಟತ್‌ನಗುಂಡ್ ನಿಂಗ ಕಣ್ಣೀರ್ ಬುಡ್‍ವಿರ, ಗೋಳಾಡಿ ಮೊರಡ್‌ವಿರ. 2ನಿಂಗಡ ಸೊತ್ತ್ ಪಾಳಾಯಿ ಪೋಪ. ನಿಂಗಡ ಬಟ್ಟೆ ಬರೀನ ಪುಳ್ ತಿಂದ್‌ರ್‌ವ. 3ನಿಂಗಡ ಪೊನ್ನ್, ಬೊಳ್ಳಿ ಪ್ರಯೋಜನಯಿಲ್ಲತೆ ಆಯಿಪೋಪ; ನಿಂಗ ಕೂಟಿ ಬೆಚ್ಚಿತುಳ್ಳ ಆಸ್ತಿರ ಮೇಲೆ ಉಳ್ಳ ನಂಬಿಕೆ, ನಿಂಗಡ ತಡೀನ ತಿತ್ತ್ ತಿಂಬನೆಕೆ ತಿಂಬ. ನಿಂಗ ಕೂಟಿ ಬೆಚ್ಚಿತುಳ್ಳ ಆಸ್ತಿ ದೇವ ತೀರ್ಪ್ ಕೊಡ್‍ಪ ದಿನತ್‌ಲ್ ನಿಂಗಕ್ ವಿರೋದವಾಯಿತ್ ಸಾಕ್ಷಿ ತಪ್ಪ. 4ನಿಂಗಡ ಬೇಲ್‌ಲ್ ಕೆಲಸ ಮಾಡ್‍ನ ಆಳುವಡ ಸಂಬಳತ್‌ನ ಅನ್ಯಾಯವಾಯಿತ್ ನಿಂಗಳೇ ಬೆಚ್ಚಿತುಳ್ಳಗುಂಡ್ ಆ ಪಣ ನಿಂಗಕ್ ವಿರೋದವಾಯಿತ್ ಜೋರಾಯಿತ್ ಮೊರಟಂಡುಂಡ್; ಕೆಲಸ ಮಾಡ್‍ನಯಿಂಗಡ ಮೊರೆ ಪರಲೋಕತ್‍ರ ಸೇನೆಯಡ ಒಡೆಯಂಡ ಕೆಮಿಕ್ ಕ್‍ೕಟ್‍ಚಿ. 5ನಿಂಗ ಈ ಬೂಲೋಕತ್‍ಲ್ ಇಪ್ಪಕ, ನಿಂಗಡ ಕೆಲತ್‍ನ ದುಂಬ್‍ಚಿಡ್‍ವಕ್ ಪಿಂಞ ಆಡಿಕಳಿಪಕೇ ಗೇನಮಾಡಿಯಂಡಿಂಜಿರ. ಆಚೇಂಗಿ ಇಕ್ಕ ಗದ್ದಾಳ ದಿವಸಕಾಯಿತ್ ತಯಾರ್ ಮಾಡ್‍ನ ಬೊಳ್ಂದ ಎತ್ತ್‌ರನೆಕೆ ನಿಂಗ ಉಳ್ಳಿರ. 6ನೀತಿವಂತಯಿಂಗಳ ನಿಂಗ ಕಂಡನೆ ಮಾಡಿತ್ ಕೊಂದಿತುಳ್ಳಿರ; ಆಚೇಂಗಿಯು ಅಯಿಂಗ ದಾರೂ ನಿಂಗಕ್ ವಿರೋದವಾಯಿತ್ ನಿಂದಿತ್‌ಲ್ಲೆ.
ತಾಳ್ಮೆ ಪಿಂಞ ಪ್ರಾರ್ಥನೆ
7ಆನಗುಂಡ್, ನಾಡ ಅಣ್ಣತಮ್ಮಣಂಗಳೇ, ಒಡೆಯ ಬಪ್ಪಕತ್ತನೆ ನಿಂಗ ತಾಳ್ಮೆಯಾಯಿತ್ ಇಕ್ಕಂಡು. ನೋಟಿ, ಒರ್ ಮನುಷ್ಯ ಬೇಲ್‌ಲ್ ಕೆಲಸ ಮಾಡಿತ್ ಬೂಮಿರ ನಲ್ಲ ಪಸಲ್ ಕ್‍ಟ್ಟ್‌ವಕಾಯಿತ್, ಮಿಂಞತ್‍ರ ಪಿಂಞ ಬಯ್ಯತ್‌ರ ಮಳೆಕಾಯಿತ್ ಪಾರಕಾತಂಡ್ ಇಪ್ಪ. 8ನಿಂಗಳು ತಾಳ್ಮೆಯಾಯಿತ್, ಮನಸ್ಸ್ ಗಟ್ಟಿ‌ಮಾಡಿಯಂಡ್ ಇಕ್ಕಂಡು. ಎನ್ನಂಗೆಣ್ಣ್‌ಚೇಂಗಿ ದೇವ ಬಪ್ಪದ್ ಪೆರ್ತ್‌ ಪಕ್ಕ ಆಚಿ.
9ನಾಡ ಅಣ್ಣತಮ್ಮಣಂಗಳೇ, ನಿಂಗಕ್ ನ್ಯಾಯತೀರ್ಪ್ ಕ್‍ಟ್ಟತನೆಕೆ ಅಪ್ಪರ ಇಪ್ಪರ ಗೊಣಗಿಯಂಡ್ ಇಕ್ಕತಿ; ನೋಟಿ, ನ್ಯಾಯದಿಪತಿಯಾನ ಯೇಸು ಪಡಿರ ಪಕ್ಕ ನಿಂದಂಡ್ ಉಂಡ್. 10ನಾಡ ಅಣ್ಣತಮ್ಮಣಂಗಳೇ, ದೇವಡ ಪೆದತ್‍ಲ್ ತಕ್ಕ್ ಪರ್ಂದ ಅಂವೊಂಡ ಪಂಡತ ಪ್ರವಾದಿಯಂಗ ಅಯಿಂಗಡ ಕಷ್ಟತ್‍ಲ್ ತಾಳ್ಮೆಯಾಯಿತ್ ಇಂಜದ್‍ನ ಉದಾರಣೆಯಾಯಿತ್ ಬೆಚ್ಚೊಳಿ. 11ಕಷ್ಟತ್‍ಲ್ ತಾಳ್ಮೆಯಾಯಿತುಳ್ಳಯಿಂಗಳ ಆಶೀರ್ವಾದ ಪಡ್ಂದಯಿಂಗಾಂದ್ ನಂಗ ಎಣ್ಣ್‌ವಲ್ಲಾ? ಯೋಬ ಎಣ್ಣ್‌ವಂವೊಂಡ ತಾಳ್ಮೆನ ಕ್‍ೕಟಿತುಳ್ಳಿರಲ್ಲ? ಒಡೆಯಂಡ ಚಿತ್ತ ಎಂತ್‍ೕಂದ್ ಕಡೇಕ್ ಕಂಡಿತುಳ್ಳಿರಲ್ಲ? ಒಡೆಯ ದುಂಬ ದಯವಂತನು ಪಿಂಞ ಕರುಣೆ ಉಳ್ಳಂವೊ ಆಯಿತುಂಡ್.
12ನಾಡ ಅಣ್ಣತಮ್ಮಣಂಗಳೇ, ಮುಕ್ಯವಾಯಿತ್ ಇದ್ ನಿಂಗಕ್ ಗೊತ್ತಿರಡ್, ನಿಂಗ ಬೂಲೋಕ ಪಿಂಞ ಪರಲೋಕತ್‍ರ ಮೇಲೆ ಆಣೆ ಮಾಡತಿ, ನಿಂಗ ಬೋರೆ ಏದ್ ಪೆದತ್‍ಲು ಆಣೆ ಮಾಡತಿ. ನಿಂಗಡ ತಕ್ಕ್ ಅಕ್ಕೂಂದ್ ಎಣ್ಣ್‌ಚೇಂಗಿ ಅದ್ ಅಕ್ಕುವಾಯಿತಿರಡ್, ಇಲ್ಲೇಂದ್ ಎಣ್ಣ್‌ಚೇಂಗಿ ಇಲ್ಲೇಂದಿರಡ್. ಇಲ್ಲತಪೋನಕ ನಿಂಗಕ್ ನ್ಯಾಯತೀರ್ಪ್ ಕ್‍ಟ್ಟ್‌ವ.
13ನಿಂಗಡಲ್ಲಿ ದಾರೇಂಗಿಯು ಕಷ್ಟತ್‍ಲ್ ಉಂಡೇಂಗಿ ನಿಂಗ ಪ್ರಾರ್ಥನೆ ಮಾಡಂಡು. ನಿಂಗಡಲ್ಲಿ ದಾರೇಂಗಿಯು ಕುಶೀಲ್ ಉಂಡೇಂಗಿ ದೇವನ ತುದಿಚಂಡ್ ಪಾಟ್ ಪಾಡಂಡು. 14ನಿಂಗಡಲ್ಲಿ ದಾರ್‌ಕೇಂಗಿಯು ಸೌಕ್ಯ ಇಲ್ಲತೆ ಪೋಯಿತ್ಂಜತೇಂಗಿ, ಅಂವೊ ಸಬೆರ ಪೆರಿಯಯಿಂಗಳ ಕಾಕಡ್; ಅಯಿಂಗ ಒಡೆಯಂಡ ಪೆದತ್‍ಲ್ ಆ ಮನುಷ್ಯಂಗ್ ಎಣ್ಣೆ#5.14 ಇಸ್ರಾಯೇಲ್ ದೇಶತ್‍ಲ್ ಎಣ್ಣೆ ಉದ್ದುವದ್ ಸೌಕ್ಯತ್‌ರ ಗುರ್‌ತ್. ಉದ್ದುವಂಜಿ ಪ್ರಾರ್ಥನೆ ಮಾಡಡ್. 15ಅಕ್ಕ ದೇವಡ ಮೇಲೆ ನಂಬಿಕೆ ಬೆಚ್ಚಿತ್ ಮಾಡ್‌ವ ಪ್ರಾರ್ಥನೆ ಅಂವೊನ ವಾಸಿ ಮಾಡ್‌ವ; ದೇವ ಅಂವೊನ ಎಪ್ಪ್‌ವ; ಅಂವೊ ಪಾಪ ಮಾಡಿತುಂಡೇಂಗಿ ಅಂವೊಂಡ ಪಾಪತ್‍ನ ಮನ್ನಿಚಿಡ್‌ವ. 16ಆನಗುಂಡ್ ನಿಂಗಡ ಕಾಯಿಲೆ ವಾಸಿ ಆಪನೆಕೆ ನಿಂಗಡ ಪಾಪತ್‍ನ ಒಬ್ಬಂಗೊಬ್ಬ ಅರಿಕೆ ಮಾಡಿತ್, ಒಬ್ಬಂಗೊಬ್ಬ ಪ್ರಾರ್ಥನೆ ಮಾಡಂಡು. ನೀತಿವಂತಂವೊ ಮಾಡ್‌ವ ನಂಬಿಕೇರ ಪ್ರಾರ್ಥನೆ ದುಂಬ ಶಕ್ತಿ ಉಳ್ಳದಾಯಿತಿಪ್ಪ.
17ಪಂಡತ್‌ರ ಪ್ರವಾದಿಯಾನ ಎಲೀಯ, ನಂಗಡೆನೆಕೆ ಕಷ್ಟ ಉಳ್ಳ ಒರ್ ಮನುಷ್ಯನಾಯಿತ್ಂಜತ್. ಮಳೆ ಬಪ್ಪಕ್ಕಾಗಾಂದ್ ನಂಬಿಕೇಲ್ ಪ್ರಾರ್ಥನೆ ಮಾಡ್‍ಚಿ. ಅಕ್ಕ ಮೂಂದರೆ ಕಾಲ ಮಳೆ ಬಂದಿತ್‌ಲ್ಲೆ. 18ಪುನಃ ಅಂವೊ ಮಳೆ ಬರಂಡೂಂದ್ ಪ್ರಾರ್ಥನೆ ಮಾಡ್‍ಚಿ, ಅಕ್ಕ ಬಾನತ್ಂಜ ಮಳೆ ಬಾತ್, ಬೂಮಿಲ್ ಬೊಳೆ ಬೊಳ್ಂದತ್.
19ನಾಡ ಅಣ್ಣತಮ್ಮಣಂಗಳೇ, ನಿಂಗಡಲ್ಲಿ ಒಬ್ಬ ದೇವಡ ಸತ್ಯತ್ಂಜ ದೂರ ಪೋಯಿತ್ ಪಾಳಾಯಿಪೋಯಂಡಿಪ್ಪಕ, ಅಂವೊನ ಇಂಞೊಬ್ಬ ನಲ್ಲ ಬಟ್ಟೇಕ್ ಕಾಕಿಯಂಡ್ ಬಾತೇಂಗಿ, 20ಪಾಳ್ ಬಟ್ಟೆಯಿಂಜ ಪಾಪಿನ ಪುನಃ ಕಾಕಿಯಂಡ್ ಬಪ್ಪಂವೊ ಒರ್ ಆತ್ಮತ್‌ನ ಮರಣತ್ಂಜ ಕಾಪಾಡಿತ್, ಆ ಪಾಪಿರ ದುಂಬ ಪಾಪತ್‍ನ ಮುಚ್ಚಿರ್‌ವಾಂದ್ ಗೊತ್ತಿರಡ್.
Currently Selected:
ಯಾಕೋಬ 5: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
