ಇಬ್ರಿಯ 1
1
ದೇವಡ ಮೋಂವೊಂಡ ಮೂಲಕ ದೇವಡ ವಾಕ್ಯ
1ಪಂಡ್ ಕಾಲತ್‍ಲ್ ದೇವ ನಂಗಡ ಮುತ್ತಜ್ಜಂಗಡ ಕೂಡೆ ಪ್ರವಾದಿಯಂಗಡ ಮೂಲಕ ಬೋರೆ ಬೋರೆ ಸಮಯತ್‍ಲ್ ಬೋರೆ ಬೋರೆ ರೀತಿಲ್ ತಕ್ಕ್ ಪರ್ಂದಂಡಿಂಜತ್. 2ಆಚೇಂಗಿ, ಕಡೆ ಕಾಲವಾನ ಇಕ್ಕ, ಅಂವೊಂಡ ಮೋಂವೊಂಡ ಮೂಲಕ ನಂಗಡ ಕೂಡೆ ತಕ್ಕ್ ಪರ್‌ಂದಿತುಂಡ್. ಇಂವೊನ ಎಲ್ಲಾಂಗು ಹಕ್ಕ್‌ದಾರನಾಯಿತ್ ನೇಮಿಚಿಟ್ಟಿತ್, ಇಂವೊನಗುಂಡ್ ಇಡೀ ಲೋಕತ್‍ನ ಸೃಷ್ಟಿ ಮಾಡ್‍ಚಿ. 3ಇಂವೊ ದೇವಡ ಮಹಿಮೇರ ಬೊಳಿಯು, ಅಂವೊಂಡ ರೂಪತ್‍ರ ಪ್ರತಿಮೆಯುವಾಯಿತುಂಡ್. ಅದಲ್ಲತೆ, ಎಲ್ಲಾನ ಅಂವೊಂಡ ಶಕ್ತಿ ದುಂಬ್‍ನ ವಾಕ್ಯತ್‍ರಗುಂಡ್ ಪೊರ್‍ತಂಡ್ ಅಂವೊನಗುಂಡ್ ನಂಗಡ ಪಾಪತ್‍ನ ಕಳೆಯುವಕಾಯಿತ್ ಶುದ್ದ ಮಾಡ್‌ವ ಕ್ರಿಯೇನ ಮಾಡ್‍ಚಿ. ಪಿಂಞ ಪರಲೋಕತ್‍ಲ್ ಉಳ್ಳ ಮಹಿಮೆ ದುಂಬ್‍ನಂವೊಂಡ ಬಲ್‌ತೆ ಬರಿಲ್ ಅಳ್‌ತತ್.
ದೇವಡ ಮೋಂವೊ ದೇವದೂತಂಗಕಿಂಜ ಬಲ್ಯಂವೊ
4ಇಂವೊ, ದೇವದೂತಂಗಕು ಬಲ್ಯಂವೊನಾಯಿತ್ ಎಚ್ಚಕ್ ಪೆದ ಎಡ್‌ತಂಡತೋ, ಅಚ್ಚಕ್ ಬಲ್ಯದಾಯಿತ್ ಅಯಿಂಗಕಿಂಜ ಗನ ಪಟ್ಟಂವೊನಾಚಿ.
5ಎನ್ನನೆ ಎಣ್ಣ್‌ಚೇಂಗಿ:
ನೀನ್ ನಾಡ ಮೋಂವೊ,
ಇಂದ್ ನಾನ್ ನೀಡ ಅಪ್ಪನಾಯೇಂದ್ ಪಿಂಞ,
ನಾನ್ ನೀಡ ಅಪ್ಪನಾಯಿತಿಪ್ಪಿ,
ನೀನ್ ನಾಡ ಮೋಂವೊನಾಯಿತ್ ಇಪ್ಪಿಯಾಂದ್#1.5 ದೇವಡ ಪಾಟ್ 2.7; 2 ಸಮುವೇಲ 7.14; 1 ಕಾಲವರ್ತಮಾನ 17.13
ಅಂವೊ ಅಂವೊಂಡ ದೂತಂಗಡಲ್ಲಿ ದಾರ್ಕಾಚೇಂಗಿಯು ಎಕ್ಕಾಚೇಂಗಿಯು ಎಣ್ಣಿತುಂಡಾ?
6ಇಂಞು, ದೇವ ತಾಂಡ ಆದ್ಯ ಮೋಂವೊನ ಈ ಲೋಕತ್‍ಲ್ ಅಯಿಪಕ,
ದೇವದೂತಂಗ ಎಲ್ಲಾರು ಅಂವೊನ ಆರಾದನೆ ಮಾಡಂಡೂಂದ್#1.6 ದರ್ಮಶಾಸ್ತ್ರ 32.43 ಎಣ್ಣ್‌ಚಿ.
7ದೇವದೂತಂಗಡ ವಿಷಯತ್: ದೇವ ತಾಂಡ ದೂತಂಗಳ ಗಾಳಿಯಾಯಿತು,
ತಾಂಡ ಸೇವಕಂಗಳ ತಿತ್ತ್‌ರ ಜ್ವಾಲವಾಯಿತು ಮಾಡ್‍ಚೀಂದ್#1.7 ದೇವಡ ಪಾಟ್ 104.4 ಎಣ್ಣಿತುಂಡ್.
8ಆಚೇಂಗಿ ತಾಂಡ ಮೋಂವೊಂಡ ವಿಷಯತ್:
ಓ ದೇವಾ, ನೀಡ ಸಿಂಹಾಸನ ಕಾಲಕಾಲಕು ಇಪ್ಪ,
ನೀಡ ರಾಜ್ಯತ್‍ನ ನೀತಿರಗುಂಡ್ ಆಳುವಿಯ,
9ನೀನ್ ನೀತಿನ ಪ್ರೀತಿ ಮಾಡಿತ್, ದುಷ್ಟತನತ್‍ನ ದ್ವೇಶ ಮಾಡಿತುಳ್ಳಿಯ;
ಆನಗುಂಡ್, ಓ ದೇವ, ನೀಡ ಕೂಟ್‌ಕಾರಂಗಕಿಂಜ ದುಂಬ ಜಾಸ್ತಿಯಾಯಿತ್
ನೀಡ ದೇವ ನಿನ್ನ ಕುಶೀರ ತೈಲತ್‍ರಗುಂಡ್ ಅಬಿಷೇಕ ಮಾಡ್‍ಚಿ.#1.9 ದೇವಡ ಪಾಟ್ 45.6–7
10ಒಡೆಯನೇ, ನೀನ್ ಆದ್ಯವಾಯಿತ್ ಈ ಲೋಕಕ್ ಅಡಿಪಾಯ ಇಟ್ಟಿಯ,
ಬಾನತ್‍ನ ನೀಡ ಕೈಯಿಂಜ ಮಾಡಿಯಾಂದ್ ಸಹ ದೇವಡ ವಾಕ್ಯತ್‍ಲ್ ಎಣ್ಣಿತುಂಡ್;
11ಅದೆಲ್ಲಾ ನಾಶ ಆಯಿಪೋಪ; ಆಚೇಂಗಿ ನೀನ್ ನೆಲಗೊಂಡಿಪ್ಪಿಯ.
ಅದೆಲ್ಲಾ ಒರ್ ಬಟ್ಟೇರನೆಕೆ ಪಳೆಯದಾಪ;
12ಒರ್ ಮೇಲಂಗಿರನೆಕೆ ನೀನ್ ಅದ್‍ನ ಸುತ್ತುವಿಯ;
ಅದ್ ಇಲ್ಲತಾಯಿ ಪೋಪ; ಆಚೇಂಗಿ ನೀನ್ ಬದ್‍ಲಾಪುಲೆ;
ನೀಡ ಬದ್‍ಕ್‍ರ ಕಾಲ ಅಂತ್ಯ ಆಪುಲೇಂದ್#1.12 ದೇವಡ ಪಾಟ್ 102.25–27 ಸಹ ಎಣ್ಣಿತುಂಡ್.
13ಅದಲ್ಲತೆ, ನಾನ್ ನೀಡ ವಿರೋದಿಯಳ ನೀಡ ಕಾಲ್‍ರ ಅಡಿಕ್ ಇಡ್‍ವಕತ್ತನೆ,
ನೀನ್ ನಾಡ ಬಲ್‌ತೆ ಬರಿಲ್ ಅಳ್‌ತಾಂದ್#1.13 ದೇವಡ ಪಾಟ್ 110.1 ದೇವ ಅಂವೊಂಡ ದೂತಂಗಡಲ್ಲಿ ದಾರ್ಕಾಚೇಂಗಿಯು ಎಕ್ಕಾಚೇಂಗಿಯು ಎಣ್ಣಿತುಂಡಾ?
14ಆನಗುಂಡ್, ರಕ್ಷಣೆ ಕ್‍ಟ್ಟ್‌ವಯಿಂಗಕ್ ಸೇವೆ ಮಾಡ್‌ವಕಾಯಿತ್ ದೇವದೂತಂಗ ಎಲ್ಲಾರು, ದೇವ ಅಯಿಚ ಸೇವೇರ ಆತ್ಮವಾಯಿತುಂಡಲ್ಲಾ?
Currently Selected:
ಇಬ್ರಿಯ 1: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
