ಆದ್ಯತ್‌ರ ಪುಸ್ತಕ 18
18
ಅಬ್ರಹಾಮಂಡ ಪಕ್ಕ ದೇವ ಸೋದೋಮ್ರ ವಿಶಯತ್‌ ತಕ್ಕ ಪರಂದತ್‌
1ಪಿಂಞ ಅಬ್ರಹಾಮ ಮಜ್ಜಣ ನೇರತ್‌ಲ್‌ ತಾಂಡ ಗುಡಾರತ್‌ರ ಪಡಿಲ್‌ ಅಳ್‌ತಿತ್‌ ಇಪ್ಪಕ, ಯೆಹೋವ ಮಮ್ರೆ ತೋಟತ್‌ರ ಪಕ್ಕತ್‌ ಅಂವೊಂಗ್ ಕಾಂಬ್‌ಚಿಟ್ಟತ್. 2ಅದ್‌ ಎನ್ನನೆ ಎಣ್ಣ್‌ಚೇಂಗಿ, ಅಬ್ರಹಾಮ ಕಣ್ಣೆಡ್‌ತಿತ್‌ ನೋಟ್‌ವಕ, ಮೂಂದ್‌ ಆಣಾಳ್‌ವ ಅಂವೊಂಡ ಪಕ್ಕತ್‌ಲ್‌ ನಿಂದಿತುಳ್ಳದ್‌ನ ಕಂಡತ್. ಅಂವೊ ಎದ್ದಿತ್‌ ಅಯಿಂಗಳ ಸ್ವೀಕಾರ ಮಾಡ್‌ವಕಾಯಿತ್‌ ಓಡಿಪೋಯಿತ್ ಅಯಿಂಗಡ ಮಿಂಞತ್‌ ಅಡ್ಡ ಬುದ್ದಿತ್: 3ಸ್ವಾಮಿ, ನೀಡ ಕಣ್ಣ್‌ಲ್, ನಾಕ್‍ ದಯೆ ಕ್‌ಟ್ಟ್‌ಚೇಂಗಿ ನಾಡ ಗುಡಾರಕ್‌ ಬಕ್ಕತೆ ಮಿಂಞಕ್‌ ಪೋಕತಿ. 4ಚೆನ್ನ ನೀರ್‌ ಎಡ್‌ತಂಡ್‌ ಬಪ್ಪಕ್‌ ಎಣ್ಣುವಿ, ನಿಂಗ ಕಾಲ್‌ನ ಕತ್ತಿತ್, ಈ ಮರತ್‌ರ ಅಡಿಲ್‌ ಆರಾಮ್‌ ಮಾಡಿಯೊಳಿ. 5ನಿಂಗ ಈ ಸೇವಕಂಡ ಪಕ್ಕ ಬಂದಂಗ್, ನಿಂಗ ತಿಂಬಕ್‌ ನಾನ್‌ ಚೆನ್ನ ಒಟ್ಟಿ ಎಡ್‌ತಂಡ್‌ ಬಪ್ಪಿ. ನಿಂಗ ಚೆನ್ನ ಸುದಾರಿಚಿಟ್ಟಂಡ್‌ ಮಿಂಞಕ್‌ ಪೋಯೀಂದ್‌ ಎಣ್ಣ್‌ವಕ, ಅಯಿಂಗ: ನೀನ್‌ ಎಣ್ಣ್‌ನನೆಕೆ ಮಾಡ್‍ೕಂದ್‌ ಎಣ್ಣ್‌ಚಿ.
6ಅಕ್ಕ ಅಬ್ರಹಾಮ ಬೆರಿಯ ಗುಡಾರಕ್‌ ಓಡಿಪೋಯಿತ್ ಸಾರಳಂಗ್: ನೀನ್‌ ಬೆರಿಯ ಮೂಂದ್‌ ಸೇರ್‌ ಚಾಯಿ ಉಳ್ಳ ಪೊಡಿನ ಎಡ್‌ತ್‌ ಕಲ್ಕಿತ್‌ ಒಟ್ಟಿ ತಯಾರ್‌ ಮಾಡ್‍ೕಂದ್‌ ಎಣ್ಣ್‌ಚಿ. 7ಅಲ್ಲಿಂಜ ಅಬ್ರಹಾಮ ಕೊಟ್ಟ್‌ಕ್‌ ಓಡಿಪೋಯಿತ್, ಓರ್‌ ನಲ್ಲ ಕಡ್‌ಚಿನ ಪುಡಿಚಿತ್‌ ತಾಂಡ ಆಳ್‌ಕ್‌ ಕೊಡ್‌ತತ್. ಅಂವೊ ಅದ್‌ನ ಬೆರಿಯ ಅಡಿಗೆ ತಯಾರ್‌ ಮಾಡ್‌ಚಿ. 8ಅಲ್ಲಿಂಜ ಅಬ್ರಹಾಮ ಪಾಲ್‌ ಮೋರ್‌ ಪಿಂಞ ಅಡಿಗೆ ತಯಾರ್‌ ಮಾಡ್‌ನ ಯರ್ಚಿ ಎಲ್ಲಾನ ಕೊಂಡ ಬಂದಿತ್ ಅಯಿಂಗಡ ಮಿಂಞತ್‌ ಬೆಚ್ಚತ್; ಅಯಿಂಗ ತಿಂಬಕ ಅಬ್ರಹಾಮ ಅಲ್ಲಿಯೇ ಮರತ್‌ರ ಅಡಿಲ್‌ ನಿಂದಂಡಿಂಜತ್. 9ಅಲ್ಲಿಂಜ ಅಯಿಂಗ ಅಂವೊಂಗ್: ನೀಡ ಪೊಣ್ಣ್‌ ಸಾರಳ ಎಲ್ಲಿಯಾಂದ್‌ ಕ್‍ೕಪಕ, ಅದಾ, ಗುಡಾರತ್‌ಲ್‌ ಉಂಡ್‍ೕಂದ್‌ ಎಣ್ಣ್‌ಚಿ. 10ಅಕ್ಕ ಅಯಿಂಗಡಲ್ಲಿ ಒಬ್ಬ: ನಾನ್‌ ಕಂಡಿತವಾಯಿತು ಬಪ್ಪ ಕಾಲ ಈ ಸಮಯತ್‌ಲ್‌ ನೀಡಲ್ಲಿಕ್‌ ಬಪ್ಪಿ; ಅಕ್ಕ ನೀಡ ಪೊಣ್ಣ್‌ ಸಾರಳಂಗ್ ಒರ್‌ ಮೋಂವೊ ಇಪ್ಪಾಂದ್‌ ಎಣ್ಣ್‌ಚಿ. ಸಾರಳ ಅಂವೊಂಡ ಬಯ್ಯತ್‌ ಗುಡಾರತ್‌ರ ಪಡಿರ ಬರಿಲ್‌ ನಿಂದಂಡ್‌ ಈ ತಕ್ಕ್‌ನ ಕ್‍ೕಟಡಿಂಜತ್. 11ಅಬ್ರಹಾಮ ಪಿಂಞ ಸಾರಳಂಗ್ ದುಂಬ ವಯಸ್ಸಾಯಿತ್‌ಂಜನಗುಂಡ್‌ ಅವಕ್‌ ಮಕ್ಕ ಆಪ ಕಾಲ ದಾಟಿ ಪೋಯಿತ್‌ಂಜತ್. 12ಅದ್‌ಂಗ್‌ ಸಾರಳ ಅವಡ ಮನಸ್ಸ್‌ರ ಒಳ್‌ಲ್‌ ತೆಳ್‌ಚಿತ್: ನಾನ್‌ ಮುದುಕಿಯು, ನಾಡ ವಡಿಯ ಪಣ್ಣ್‌ ಮುದುಕನು ಆಯಿತ್‌ಪ್ಪಕ ನಾಕೆಲ್ಲಿಂಜ ಆ ಸುಖಾಂದ್‌ ಎಣ್ಣ್‌ಚಿ. 13ಅಕ್ಕ ಯೆಹೋವ ಅಬ್ರಹಾಮನ ನೋಟಿತ್: ಎನ್ನಂಗ್‌ ಸಾರಳ ತೆಳ್‌ಚತ್, ತಾನ್‌ ಮುದುಕಿ, ನಾಕ್‍ ಕುಂಞಿನ ಪೆರುವಕ್‌ ಕಯ್ಯುವಾಂದ್‌ ಎಣ್ಣಿಯಂಡುಂಡ್‌ಂದ್‌ ಎಣ್ಣ್‌ಚಿ? 14ಯೆಹೋವಂಗ್‌ ಕಯ್ಯತ್ತದ್‌ ಎಂತದೇಂಗಿ ಉಂಡಾ? ನಾನ್‌ ಎಣ್ಣ್‌ನನೆಕೆ ಬಪ್ಪ ಕಾಲತ್‌ ಇದೇ ಸಮಯಕ್‌ ತಿರಿತ್‌ ಬಪ್ಪಿ; ಅಕ್ಕ ಸಾರಳಂಗ್ ಒರ್‌ ಮೋಂವೊ ಇಪ್ಪಾಂದ್‌ ಎಣ್ಣ್‌ಚಿ. 15ಸಾರಳಂಗ್ ಪೋಡಿಯಾಯಿತ್‌ ನಾನ್‌ ತೆಳ್‌ಚಿತ್‌ಲ್ಲೇಂದ್‌ ಎಣ್ಣ್‌ಚಿ. ಅದಂಗ್‌ ಅಂವೊ: ಅನ್ನನೆ ಅಲ್ಲ, ನೀನ್‌ ನೇರಾಯಿತು ತೆಳ್‌ಚಿಯಾಂದ್‌ ಎಣ್ಣ್‌ಚಿ.
ಅಬ್ರಹಾಮ ಸೋದೋಮ್‌ ಪಟ್ಟಣಕಾಯಿತ್‌ ಬೋಡ್‌ವದ್‌
16ಅಕ್ಕ ಆ ಆಣಾಳ್‌ವ ಎದ್ದಿತ್‌ ಸೋದೋಮ್‌ ಪಟ್ಟಣತ್‌ರ ಕಡೆಕ್‌ ನೋಟ್‌ಚಿ. ಅಯಿಂಗ ಪೋಪಕ ಅಯಿಂಗಡ ಕೂಡೆ ಅಬ್ರಹಾಮನು ಅಯಿಂಗಳ ಬುಟ್ಟಿತ್‌ ಬಪ್ಪಕ್‌ ಪೋಚಿ. 17-18ಅಕ್ಕ ಯೆಹೋವ: ಅಬ್ರಹಾಮ ಬಲ್ಯ ಶಕ್ತಿವಂತ ಜನಾಂಗಳಾಪನಗುಂಡ್, ಈ ಬೂಮಿಲ್‌ ಉಳ್ಳ ಎಲ್ಲಾ ಜನಾಂಗ ಅಂವೊಂಡ ಮೂಲಕ ಆಶೀರ್ವಾದ ಪೊಂದುವಗುಂಡ್, ನಾನ್‌ ಮಾಡುವಕುಳ್ಳದ್‌ನ ಅಬ್ರಹಾಮಡಿಂಜ ಮುಚ್ಚಿಬೆಕ್ಕಂಡುವಾ? 19ಯೆಹೋವ ಅಬ್ರಹಾಮಂಗ್‌ ಎಣ್ಣ್‌ನದ್‌ನ ನೆರವೇರಿಚಿಡುವಕಾಯಿತ್‌ ಅಂವೊ ತಾಂಡ ಮಕ್ಕಕು, ಅಂವೊಂಡ ಬಯ್ಯ ಬಪ್ಪ ಅಂವೊಂಡ ಮನೆಕಾರಕು ಇನ್ನನೆ ಎಣ್ಣುವಕ್‌ ಗೊತ್ತ್‌ಮಾಡಿಯೆ: ಅದ್‌ ಎನ್ನನೆ ಎಣ್ಣ್‌ಚೇಂಗಿ, ನಿಂಗ ನೀತಿರ ಪಿಂಞ ನ್ಯಾಯತ್‌ರ ಪ್ರಕಾರ ನಡ್‌ಕಂಡೂಂದ್‌ ಆಜ್ಞೆ ಮಾಡುವಾಂದ್‌ ನಾಕ್‍ ಗೊತ್ತುಂಡ್‍ೕಂದ್‌ ಎಣ್ಣ್‌ಚಿ. 20ಇದಲ್ಲತೆ ಯೆಹೋವ: ಸೊದೋಮ್‌ ಗೊಮೋರತ್‌ರ ಜನ ಬಾರೀ ಮೋಸವಾನಯಿಂಗಾಂದು, ಅಯಿಂಗಡ ಪಾಪ ಬಾರಿ ಕ್ರೂರವಾನದ್‍ೕಂದು ನಾಕ್‍ ಗೊತ್ತಾಚಿ. 21ಆನಗುಂಡ್, ನಾನ್‌ ಇಳ್‌ಂಜಿ ಪೋಯಿತ್‌ ನಾನ್‌ ಕ್‍ೕಟ ಕ್‌ಟ್ಟ ಸುದ್ದಿಯೆಲ್ಲ ನೇರಾಂದ್‌ ನೋಟಿತ್ ಬಪ್ಪಿ. ಅಕ್ಕ ನಾಕ್‍ ಸತ್ಯ ಗೊತ್ತಾಪಾಂದ್‌ ಎಣ್ಣ್‌ಚಿ. 22ಅಕ್ಕ ಆ ಆಣಾಳ್‌ವ ಸೊದೋಮ್ರ ಕಡೆಕ್‌ ಪೋಚಿ. ಆಚೇಂಗಿ, ಅಬ್ರಹಾಮ ಇಂಞು ಯೆಹೋವಂಡ ಮಿಂಞತ್‌ ನಿಂದಂಡಿಂಜತ್. 23ಅಕ್ಕ ಅಬ್ರಹಾಮ ಇಂಞು ಪಕ್ಕ ಬಂದಿತ್: ನೀನ್‌ ದುಷ್ಟಂಗಡ ಕೂಡೆ ನೀತಿವಂತಯಿಂಗಳ ಸಹ ನಾಶ ಮಾಡ್‌ವಿಯಾಂದ್‌ ಕ್‍ೕಟತ್. 24ಒರ್‌ ಸಮಯ ಆ ಪಟ್ಟಣತ್‌ಲ್‌ ಐಂಬದ್‌ ನೀತಿವಂತಯಿಂಗ ಉಂಡೇಂಗಿ, ನಾಶ ಮಾಡ್‌ವಿಯಾ? ನೀನ್‌ ಆ ಐಂಬದ್‌ ಜನಕಾಯಿತ್‌ ಕಾಪಾಡತೆ ಆ ಜಾಗತ್‌ನ ನಾಶ ಮಾಡ್‌ವಿಯಾ? 25ನೀನ್‌ ನೇರಾಯಿತು ದುಷ್ಟಂಗಡ ಕೂಡೆ ನೀತಿವಂತಯಿಂಗಳ ನಾಶ ಮಾಡುಲೆ. ನೀನ್‌ ಎನ್ನನೆ ದುಷ್ಟಂಗಳ ಪಿಂಞ ನೀತಿವಂತಯಿಂಗಳ ಒರೇ ಲೆಕ್ಕತ್‌ ನೋಟ್‌ವಕಯ್ಯು. ನೀನ್‌ ನೇರಾಯಿತು ಅನ್ನನೆ ಮಾಡುಲೆ! ಬೂಮಿರ ನ್ಯಾಯಾದಿಪತಿ ನ್ಯಾಯವಾನದ್‌ನೇ ಮಾಡುವಲ್ಲಾಂದ್‌ ಎಣ್ಣ್‌ಚಿ. 26ಅಕ್ಕ ಯೆಹೋವ: ನಾನ್‌ ಸೊದೋಮ್‌ಲ್‌ ಐಂಬದ್‌ ನೀತಿವಂತಯಿಂಗಳ ಕಂಡತೇಂಗಿ, ಅಯಿಂಗಕಾಯಿತ್‌ ಆ ಇಡೀ ಜಾಗತ್‌ನ ಕಾಪಾಡುವೀಂದ್‌ ಎಣ್ಣ್‌ಚಿ. 27ಅದ್‌ಂಗ್‌ ಅಬ್ರಹಾಮ: ನಾನ್‌ ಬರೀ ದೂಳು ಬೂದಿಯು ಆಯಿತ್‌ಂಜತೇಂಗಿಯು, ಯೆಹೋವಂಡ ಕೂಡೆ ತಕ್ಕ್‌ ಪರಿಯುವಕ್‌ ದೈರ್ಯ ಎಡ್‌ತಿತುಳ್ಳ. 28ಒರ್‌ ಸಮಯ ಬರೀ ನಾಪತಂಜಿ ನೀತಿವಂತಯಿಂಗ ಉಂಡೇಂಗಿ? ಆ ಅಂಜ್ ಜನ ಕಮ್ಮಿ ಆನಂಗ್‌ ಆ ಪಟ್ಟಣತ್‌ನ ನಾಶ ಮಾಡ್‌ವಿಯಾಂದ್‌ ಕ್‍ೕಟತ್. ಅದ್‌ಂಗ್‌ ಯೆಹೋವ: ನಾನ್‌ ನಾಪತಂಜಿ ನೀತಿವಂತಯಿಂಗಳ ಅಲ್ಲಿ ಕಂಡತೇಂಗಿ ಆ ಪಟ್ಟಣತ್‌ನ ನಾಶ ಮಾಡುಲೇಂದ್‌ ಎಣ್ಣ್‌ಚಿ. 29ಪುನಃ ಅಬ್ರಹಾಮ ತಾಂಡ ಕೋರಿಕೆನ ಇಟ್ಟಿತ್: ಒರ್‌ ಸಮಯ ಅಲ್ಲಿ ಬರೀ ನಾಪದ್‌ ನೀತಿವಂತಯಿಂಗ ಉಂಡೇಂಗೀಂದ್‌ ಕ್‍ೕಟತ್. ಅದ್‌ಂಗ್‌ ಯೆಹೋವ: ಆ ನಾಪದ್‌ ನೀತಿವಂತಯಿಂಗಕಾಯಿತ್‌ ನಾಶ ಮಾಡುಲೇಂದ್‌ ಎಣ್ಣ್‌ಚಿ. 30ಅಕ್ಕ ಅಬ್ರಹಾಮ: ಯೆಹೋವನೇ, ದಯಬೆಚ್ಚಿತ್‌ ಚೆಡಿಮಾಡಿಯೊತೆ; ಒರ್‌ ಸಮಯ ಅಲ್ಲಿ ಬರೀ ನುಪ್ಪದ್‌ ನೀತಿವಂತಯಿಂಗ ಉಂಡೇಂಗೀಂದ್‌ ಕ್‍ೕಟತ್. ಅದ್‌ಂಗ್‌ ಯೆಹೋವ: ನಾನ್‌ ನುಪ್ಪದ್‌ ನೀತಿವಂತಯಿಂಗಳ ಅಲ್ಲಿ ಕಂಡತೇಂಗಿ ಆ ಪಟ್ಟಣತ್‌ನ ನಾಶ ಮಾಡುಲೇಂದ್‌ ಎಣ್ಣ್‌ಚಿ. 31ಅದ್‌ಂಗ್‌ ಅಬ್ರಹಾಮ: ನಾನ್‌ ಯೆಹೋವಂಡ ಕೂಡೆ ತಕ್ಕ್‌ ಪರಿಯುವಕ್‌ ದೈರ್ಯ ಎಡ್‌ತಂಗ್‌ ತಕ್ಕ್‌ ಪರಿಯುವಿ. ಒರ್‌ ಸಮಯ ಅಲ್ಲಿ ಬರೀ ಇರ್ವದ್‌ ನೀತಿವಂತಯಿಂಗ ಉಂಡೇಂಗೀಂದ್‌ ಕ್‍ೕಟತ್. ಅದ್‌ಂಗ್‌ ಯೆಹೋವ: ಆ ಇರ್ವದ್‌ ನೀತಿವಂತಯಿಂಗಕಾಯಿತ್‌ ನಾಶ ಮಾಡುಲೇಂದ್‌ ಎಣ್ಣ್‌ಚಿ. 32ಅದ್‌ಂಗ್‌ ಅಬ್ರಹಾಮ: ಯೆಹೋವನೇ, ದಯಬೆಚ್ಚಿತ್‌ ಚೆಡಿಮಾಡಿಯೊತೆ. ಇಂಞು ಒರ್‌ ಕುರಿ ಮಾತ್‌ರ ನಾನ್‌ ತಕ್ಕ್‌ ಪರಿಯುವಿ. ಒರ್‌ ಸಮಯ ಅಲ್ಲಿ ಬರೀ ಪತ್ತ್‌ ನೀತಿವಂತಯಿಂಗ ಉಂಡೇಂಗೀಂದ್‌ ಕ್‍ೕಟತ್. ಅದ್‌ಂಗ್‌ ಯೆಹೋವ: ಆ ಪತ್ತ್‌ ನೀತಿವಂತಯಿಂಗಕಾಯಿತ್‌ ನಾಶ ಮಾಡುಲೇಂದ್‌ ಎಣ್ಣ್‌ಚಿ. 33ಅಬ್ರಹಾಮಂಡ ಕೂಡೆ ತಕ್ಕ್‌ ಪರ್‌ಂದ ಪಿಂಞ ಯೆಹೋವ ತಾಂಡ ಬಟ್ಟೆಲ್‌ ಪೋಚಿ. ಅಬ್ರಹಾಮನು ತಾಂಡ ಗುಡಾರಕ್‌ ತಿರಿತ್‌ ಬಾತ್.
Currently Selected:
ಆದ್ಯತ್‌ರ ಪುಸ್ತಕ 18: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
