Apokalipsi 7
7
144.000 hiyeg amevenekuye Uhokri gitamka adahan gibekteykis
1Ayteke ariwnteke ini nah hiyap paxnika gikebikis ahj tabirbetnekis amadga inin. Pahavwi ayge mekavriktak, pahavwime wahamaravriktak, pahavwime tiwrikavriktak, pahavwime uvitkiyavriktak. Ayge igkis kamax neras paxniknene mayg amadgaya inin kahadbe mayg ka mpiya avitiw waxri ine ahakwewma parahwokwa ine avewiwma ah.
2Ayteke nah hiyap pahavwi ahj akiw ig danuh wahamaravriktak. Ig sumuh gitamka gibektey Uhokri dehetniye ay giwaku. Ig kabiman akak gihawna gitkis neras paxniknene ahj ku pariye Uhokri ike gidatnikis adahan igkis hiyapkisnes mbeyne arit waxri, arit parahwokwa.
3Ig awna gitkis:
— Ka yi muwaka hiyapkis mbeyne kurinewatma arit waxri, ine arit parahwokwa, ine arit ah. Wahapnayte usuh tameknete Uhokri gibukvig akak Uhokri gitamka gidevaritkis kahadbe igkis hiyakan ku igkisnewa gidahan Uhokri.
4Ayteke ekkepka nutuh aysaw gikebikis hiyeg tamakkavu akak Uhokri gitamka adahan gibekteykis. Igkis ka aynsima hiyeg. Igkis pukuhka madikawku madikwa mil gikebikis gikakkis paxnika madikwa mil gawnakis gikakkis paxnika mil gawnakis akiw (144.000). Igkis giwntakkis mpuse hiyegviyene judeyenevwi. Igkis amevenekuye Uhokri gitamka adahan gibekteykis.
5Ayge madikawku mil hiyeg akak piyana mil gawnakis gikebikis (12.000) gaytakkis amekene Juda gihiwhivwi.
Hawata akiw ayge madikawku mil hiyeg akak piyana mil gawnakis gikebikis (12.000) gaytakkis amekene Ruwbeh gihiwhivwi.
Hawata akiw ayge madikawku mil hiyeg akak piyana mil gawnakis gikebikis (12.000) gaytakkis amekene Gadi gihiwhivwi.
6Hawata akiw ayge madikawku mil hiyeg akak piyana mil gawnakis gikebikis (12.000) gaytakkis amekene Azer gihiwhivwi.
Hawata akiw ayge madikawku mil hiyeg akak piyana mil gawnakis gikebikis (12.000) gaytakkis amekene Naftali gihiwhivwi.
Hawata akiw ayge madikawku mil hiyeg akak piyana mil gawnakis gikebikis (12.000) gaytakkis amekene Manasses gihiwhivwi.
7Hawata akiw ayge madikawku mil hiyeg akak piyana mil gawnakis gikebikis (12.000) gaytakkis amekene Simeawh gihiwhivwi.
Hawata akiw ayge madikawku mil hiyeg akak piyana mil gawnakis gikebikis (12.000) gaytakkis amekene Levi gihiwhivwi.
Hawata akiw ayge madikawku mil hiyeg akak piyana mil gawnakis gikebikis (12.000) gaytakkis amekene Issakar gihiwhivwi.
8Hawata akiw ayge madikawku mil hiyeg akak piyana mil gawnakis gikebikis (12.000) gaytakkis amekene Zebuloh gihiwhivwi.
Hawata akiw ayge madikawku mil hiyeg akak piyana mil gawnakis gikebikis (12.000) gaytakkis amekene José gihiwhivwi.
Hawata akiw ayge madikawku mil hiyeg akak piyana mil gawnakis gikebikis (12.000) gaytakkis amekene Benjamih gihiwhivwi.
Igkis madikte amevenekuye Uhokri gitamka adahan gibekteykis.
Uhokri gihiyegavu kabayhignek kabubuk
Ap 4.8, 5.9, 11.16, 14.2, 15.3, 19.1
9Ayteke ariwnteke ini nah sarayh nuvegi, nah hiyap ka aynsima hiyeg kabubuk. Igkis ka aynsima gikebikis. Yuma hiyeg hiya givuhkakkis. Igkis ariwntak madikte waxri, giwntakkis madikte hiyegiviyenevwi, pahabunenevwi, arakembetnene gihivakkis hawata arakembetnene giwnkis. Nah hiyap igkis tabirbet ayge avetun Uhokri gevwi kiyatyo ayge givetun ner Muwtohyan. Igkis kasimsavuwave akak gikawihnikis seyne. Igkis hiyuhmine akak ahamna ke kariktimnabe avan ay giwakukis adahan igkis sesehne givetunat Uhokri adahan ekkenes gibetkikis gikak.
10Igkis awna akak madikte giwakemnikis. Giwnkis:
— Kibeyne. Ignewa Uhokri ku pariye betnene amadga gevwi, ignewa wamnihtenwiy. Hawata ignewa Muwtohyan wamnihtenwiy.
Henewatbaki igkis awna.
11Ayge madikte igkis ahj tabirbet aranwa Uhokri gevwi, ganwakis neras kiyavwiyegben, ganwakis neras paxniknene hiyeg dehetniyevwi. Avim ini igkis tuguhkiswebdi mabuw givetunat Uhokri ku kiney ig ayge amadga gevwi. Igkis kabayhig atere.
12Igkis awna:
— Ameh. Kiyavwiye, pisnewa ka pabayisima, pisnewa ka pamuwyisima, pisnewa ka pihiyekemnisima, pisnewa ka pamnihrasima, pisnewa ka pikiytanisima, pisnewa ka pidatnisima, pisnewa ka pannusima. Kibeyne, pisnewa Uwohkiga adahan avanenekwa. Ameh.
13Ayteke pahavwi gaytakkis neras kiyavwiyegben ayavun. Giwn:
— Pariyeneki neras hiyeg kasimsavuwapnene seyne? Kitak igkis ayta?
14Nahme kaytwa giwn:
— Nah ka hiyak, Kiyavwiye. Piski hiyak.
Igme awna nutuh:
— Nerasneki hiyeg ku pariye peswiye abetitak ka aynsima mbeyne. Gihiyekemnikis kuri barewbet awaku ku samah igkis kamaxwe kabayntiwa givitit Kiyavwiye Jesus abetnewa ini mbeyne. In ke wotbe igkis sukuhbetevyebe gikawihnikis ahakwat Muwtohyan gimig. Inneki keh kuri in gikawihnikis wageswa seyne. 15Awaku ini igkis hawata kuri tabirbet ay givetun Uhokri ku kiney ig betnene amadga gevwi. Igkis kehnekuye gibetki takunipti avanenekwa ay givineku. Igme ku pariye betnene amadga gevwi, ig avuriwgikisnek ay gimun. 16Igkisme ka mativwanek akiw. Igkis kawnata arabiyunek akiw. Kamuw ka bukahgikis akiw. Yuma awahka hiya gibukakkis akiw. 17Mmanawa ner Muwtohyan ku pariye ay givetun Uhokri, ig avuriwgikisnek kewa pahavwi muwtohvutnebe. Ig huwithigkisnek arimkat un ariwtyak ku pariye keh igkis aymuhwanek adahan avanenekwa. Ayge ig Uhokri manwotigkisnek ariw madikte gikantakkis.
Henewatbaki ig pahavwi awna nutuh.
Currently Selected:
Apokalipsi 7: pluPB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
