Sawmus 66
66
Avatman adahan kabeyhene Uhokri
1Amawka madikte hiyegviyenevwi paksenekuye Kiyavwiye Uhokri akak kabimanka hawata akak batekka.
2Paknay avat adahan kabeyhene giw. Kabayhanay gikiytani akak avatman.
3Kabayhanig han:
“Kiyavwiye, madikte pannivwi in keh wis wakaymni! Pis ka aynsima pidatni. Pidatni keh pivetunyavu avis pibohri, igkis mabukwa pivetunat.
4Madikte hiyegviyenevwi amadgaya inin kiyathap. Igkis paksap. Henewatbaki, igkis madikte pak avat adahan kabeyhene piw.
5 Nukebyuvwi, ba yi ayta iwasa ku pariye Kiyavwiye Uhokri gikehavan. Hiyapnay akak madikte yiwakemni ini barewyevwi annut ku pariye gikehni gidahankis amedgenevwi inin.
6Ig wagese parahwokwa humaw waxri makaravye, igkisme wahawkrivwi manuke warik akak gikugkukisnenwa. Avim ini hawkri batekkanenwa gidahankis uhiyegavu ku samah Uhokri manuksevgikis.
7Akak gidatni ig kumaduka adahan avanenekwa. Givegime avuriwnenekwa madikte hiyegviyenevwi. Nikwe amawka yuma pahavwinema kavetunsene Kiyavwiye Uhokri!
8Amawka madikte hiyegviyenevwi kabayha uwohkigawiy! Amawka igkis gabayhig akak madikte giwegewnikis.
9Ignewa mpithamnihwiy ariw miyaka. Ig kawnata isaksati wixwiy tuguh.
10Kiyavwiye Uhokri, pis kuwis hikeke usuh. Ku samah karukri wahano asis bukahka ariwtrik tiket, hene pis hikeke usuh.
11Pis isakse usuh tuguhe arikut tey. Pis sarayhe uduhyamadgat uhiyhan kane awinisima.
12Pis isakse uvetunyavu sibuhe usuh. Usuh mpiye abetiw tiket hawata ahakwew un, heneme kuri pis waxwe usuh atan arit inin pahayku iwetrit nopsadnene.
13Nikwe nah ewknek kakanhawka pivinekut ku pariye amawka bukahkanek pahavwite. Nah ikinek ku pariye nukaksan pit.
14Ku pariye nukaksan pit, abetnewa nuwakemni, innewa nah ikepninek pit.
15Nah kakanhawnek pit muwtoh adahan igkisme bukahkanek avitmin kakanhewket. Nah kakanhawnek pit pak ayhmadapnene garudikis payak akak kabrit. Inme asaryan wagahnek ta inurikut.
16Madikte yis ku pariye kiyathenevwi giw Kiyavwiye Uhokri, ba yi ayta timapun, nahme kinetihwa yit amin ku pariye gikehni nudahan.
17Nah amnihswe git adahan ig parak abet nuhawkan. Ayteke nah kabeyhevgi akak avatman.
18Heneme, wake nah bayehpiyebe mbeyevye hiyakemniki avit nuyakni, ig Kiyavwiye Uhokri ka timavunkama.
19Heneme, kibeyne, ig Kiyavwiye Uhokri timevun inuriktak, ig kaytwe nuviryepkawni.
20Nah kabayha Kiyavwiye Uhokri awaku avanenekwa ig timap nuviryepkawni, ka pahaynatima ig ka akkama gamnihra nutuh.
Currently Selected:
Sawmus 66: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
