Sawmus 65
65
Kibeyne adahan ahiwka
1Kiyavwiye Uhokri, in wadit adahan pihiyegavu kabayhap ay avit waxri Siyawh hawata adahan igkis iki pit ku pariye gikaksankis,
2mmanawa pisnewa kaytwa piriyepkawka. Madikte hiyegviyenevwi aytanek pimkanit adahan amnihswene pit.
3Mmanawa usuh taraksavye hiyeg. Ini utaraksan sarayhe usuh, heneme, kibeyne, pis bayahmina usuh niw.
4Ka aynsima kabayka gidahankis neras ku pariye pikanyanvu, gidahankis neras ku pariye pis waxwa atan adahan igkis misakwa pimun ay pivinwa. Usuh bateke uminuh akak ini kibeyne ariknebdi ku pariye arikuya pivin, akak ini kabayka ariwntak pivin barewvitye.
5Kiyavwiye Uhokri, kibeyne pis kaytwa wownuh, pis keh usuh mataka uvetunyavu, hawata pis amnih usuh akak barewyevwi annut ku pariye pis kehe udahan. Madikte hiyegviyenevwi amadgaya inin hawkri payak gikakkis parahwokwenevwi piyawakadnene, madikte igkis iki gikamaxwankis pivitit.
6Akak pidatni, pis batahkise waxribdi nopsadminene amun niwetri, hene pis hiyapkis pidatni ku pis detye Uhokri.
7Pis keh parahwokwa tinwohaw. Pis keh paraw karisaw. Hiyeg hawata pis tinwohasigkis ariw gibimankis.
8Madikte hiyegviyenevwi wakymnibdi pimin ku aysaw igkis hiya pannu. Igkis hiyapni ini kabayka ku pariye pikehni, igkis kabayhap muwapuw amadga hawkri.
9Ku samah pis keh muwok wayk, pis akka ku pis avuriwnene waxri hawata pis kehnene in humaw igisye kibeyne adahan amutri. Kiyavwiye Uhokri, pis kivunsa warik akak un, ku samah pihiyekemni ayap pit, hene pis keh in waxri ka araymuhtrunisima amutri adahan axka.
10Pis awahkis muwok ka aynsima amadgat kariy, adahan inme mitibdi akak un. Pis keh waxri humaw mitibete, inneki keh amutribdi aymuhwa kabayntiwa.
11Pabay hiyankis ka aynsima amutribdi bareweyevwi. Ku kiw pis mpiya yuma muwekne, madikte ah kewyokwiye.
12Pamatkaviyene kivun akak ivigtivyene, inme waxribdi bereswavu akak arakambet ivuritivyene abewi.
13Amat pahakbote akak muwtohviyene. Inme waxri amakasa in kivun akak fahin. Madikte waxri kivun akak batekka. In pekne akak madikte nibetki.
Currently Selected:
Sawmus 65: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
