Sawmus 148

148

Kabayhanay Kiyavwiye Uhokri, pahakte hawkri

1Kabayhanay Kiyavwiye Uhokri! Yis inurikyenevwi, kabayhanay Kiyavwiye Uhokri ayge inurik!

2Kabayhanay Kiyavwiye, madikte yis giwatnivwi ahj, madikte yis gisuwtatavu inurikyenevwi.

3Kamuw akak kayg, kabayhanay Kiyavwiye! Madikte yis warukmebdi kabutniyevwi, kabayhanigbay hawata.

4Amawka inurik ku pariye pi inutenene kabayhig hawata akak madikte un ku pariye aygenene.

5Amawka madikte kabeyhenekuye Kiyavwiye giw, mmanawa ignewa humawasevgikis madikte akak giwnnenwa.

6Ig ibekhevgikis amun mpuse giwetrikis adahan igkisme misakwa avanenekwa ayge; ka ik adahan igkis ayguhwa ariwntak ini giwetrikis akiw.

7Yis amadgayavu wayk, kabayhanay Kiyavwiye Uhokri ay amadga inin: yis impiyenevwi nopsadminene ahakwayavu un payak gikakkis madikte ku pariye aygenevwi amihawni parahwokwa.

8Kabayhanay Kiyavwiye, ugugune akak muwok tiphawnene, huweg akak ukuhne hawata akak kamaygviye, madikte yis ariknebdi ku pariye ihpenevwi giwn!

9Kabayhanay Kiyavwiye, yis waxribdi akak waxri imuwadnene, ahavwi akak ahakubdi ku pariye kewyovwi!

10Kabayhanay Kiyavwiye, madikte yis puwiknebdi huwivrenevwi akak kahayotnavye. Kabayhanay Kiyavwiye, yis kuhivraviyene ku pariye amarapnene akak yis puwiknebdi ku pariye kawapnene!

11Kabayhanay Kiyavwiye Uhokri, yis ikivaratviyenevwi hawata madikte hiyegviyenevwi, kumaduknevwi yikak yis madikte ku pariye wewikisnevwi ihiyegat.

12Kabayhanay Kiyavwiye, yis takwaviye gukakkis himanoviyo, kiyavwiyegben payak gikakkis bakimnayh!

13Amawka madikte kabeyhenekuye Kiyavwiye giw, mmanawa ignewa pi kiyatte giwkis madikte nawenyevwi uhokrivyene! Gikiytani in avitmin madikte ku pariye ay amadga inin hawkri hawata aynte inurik.

14Ignewa wagahkis gidahan gihiyegavu gikiytanikis kahadbe igkisme kabayhig. Kibeyne, wixwiy gihiyegavu izhaewyenevwi, wixwiy ka uvigawiysima git. Kabayhanay Kiyavwiye Uhokri!

Currently Selected:

Sawmus 148: pluPB

Highlight

Copy