YouVersion Logo
Search Icon

Sawmus 145

145
Kabayhanay Kiyavwiye Uhokri takunipti
1Nuwohkiga, nukivara, nah kinetihwanek amin pikiytani adahan avanenekwa. Nah kabayhapnek takunipti.
2Mpuse hewkevye nah kabayhapnek hawata nah kibenhapnek adahan avanenekwa.
3Ig Kiyavwiye Uhokri ka gikiytanisima. Ig kis adahan ig kabayhaka kihaw. Pariyeki hiyeg ik adahan pukuhpa ku samah ini gikiytani?
4Kiyavwiye, mpuse igti kinetihwanek amin pabay gitkis gikamkayuvwikis. Madikte hiyeg kabayhapnek amin ku samah pis ka pannusima.
5Igkis awnanek amin ku samah piw ka nikiytanisima. Nahme ivegminenekwa nuhiyekemni amin ini pannivwi kane nibewisima ku pariye pikehavn.
6Igkis awnanek amin pikehni akak pidatni, nahme kaytwanek giwnkis: “Henewa, ig ka gikiytanisima.”
7Igkis awnanek amin ku samah pis ka pabaysima. Igkis paksapnek akak avat amin ku samah pisnewa kibeyne.
8 Henewatbaki! Ig Kiyavwiye Uhokri ignewa kibeyne, ig ka gamnihrasima; ig ka dagawnaw pahayenema adahan, ig ahegbetnenekwa adahan wamnihten.
9Ig Kiyavwiye kibeyne gikakkis madikte hiyeg. Ig avuriw akak gavigsaki madikte ku pariye gikehavanviyene.
10Kiyavwiye Uhokri, madikte ku pariye pikehavanviyene kabayhapnek. Igkis pihiyegavu kamaxwenvwi pivitit igkis kabayhapnek takunipti.
11Igkis madikte kinetihwanek amin ku samah pikumadukan ka nikiytanisima. Igkis akkanek gitkis hiyeg ku samah pis ka pidatnisima.
12Kahadbe madikte hiyegviyenevwi hiyaknek ini pannu kane nidatnisima mmanawa pis kumadukigkis kabayntiwa akak madikte pikiytani.
13Pikumadukan in yuma akavuska, yumahwata amaksemni. In dahwa adahan avanenekwa. In ka matiswati. Pis ukivara adahan avanenekwa. Ig Kiyavwiye Uhokri avanenekwa keh ku pariye gikaksan wot. Ig ka gamnihrasima gikakkis madikte ku pariye gikehavanvu.
14Ig amnih gihiyegavu ku pariye abet matekbetka. Ig diyuhkis gawaygikis neras ku pariye tuguhavye gihiyekemnikis.
15Madikte ku pariye ivegnenevwi amadga hawkri ivegbet givitit. Igme iki gimanakis ahawkanavriknawa gimawkankis.
16Akak madikte gabay ig woka giwak ig keh ku samah umawkanwiy wixwiy ku pariye aynenevwi amadga hawkri.
17Madikte ku pariye ig Kiyavwiye Uhokri keh in wadit. Ig ka gabaysima.
18Ig kennesa gihumwakis madikte ku pariye amnihswenevwi git, neras ku pariye amnihswenevwi git avititakwa giyaknikis.
19Gitkis madikte ku pariye ihpenevwi giwn ig iki ku pariye gimawkankis. Ig timap gamnihswankis hawata ig amnihgikis.
20Ig Kiyavwiye Uhokri avuriw madikte ku pariye batekyevwi gikak. Heneme ig pisenwanek gihawkankis madikte hiyeg mbayavye.
21Nah avanenekwa kabayhanek Kiyavwiye. Numawkan madikte hiyeg kabayhanek Kiyavwiye Uhokri Barewvitye adahan avanenekwa!

Currently Selected:

Sawmus 145: pluPB

Highlight

Share

Copy

None

Want to have your highlights saved across all your devices? Sign up or sign in