Sawmus 141
141
Piriyepkawka aygete
1Kiyavwiye Uhokri, nah humakpi, ba ayta kibehtenwa parak abet nuhawkan! Timapnanuba ku aysaw nah kanumpi!
2Amavanaba nuviryepkawni kewa iyaygtibe. Inme nuwakuh tarak pimkanit kewa kakanhawkabe pit aygete.
3Kiyavwiye, uya ayava nah avuriw nuwnuh. Ka ba isaksa nah awnbetnema iwit ku pariye kane ik adahan nah awna.
4Ka ba isaksa nuyakni kinistasaw adahan kehne mbayka, ine kawnata isaksa nah wew gikakkis arewhavye adahan kehne ku pariye kane wadit payak gikakkis. Mpithan adahan nah ka pahaytima ataknek abetit gifetrakis.
5Ku pahavwi hiyeg waditye ayta himahun akak tuwatka, ka sam; nah amavin. heneme nah ka amavati mbayavye adahan igkis keh giwantikis nukakuh. Nah nudukwenewa piriyepkawnek gidahankis adahan igkis uti mbeyne.
6Ku aysaw gikivarakis padakavepkanek avitmintak tivebdi, nikwe hiyegviyenevwi hiyaknek ku nah awna inyewa.
7Ku samah tiketuka baka in puvehbetaki aritnanyuvwi, hene givitakis padekbetepkanek aranwa gimewkis.
8Heneme nah, Kiyavwiye, nuwohkiga, nah tiviknene kamaxwenene pivitit. Hawata ivegvenene adahan pis mpithamnihun. Ka ba isaksa nah miya.
9Uya amnih wiwhun ariw tey ku pariye neras mbayavye ahegbete adahan nukamaxwitni. Ariw giteynikis neras kehnevwi mbayka.
10Kehnaba neras mbayavye igkiswa tuguhe arikut giteynikis akiw, adahan nahme isahptawnek barewvit ariw hawata makniw ariw.
Currently Selected:
Sawmus 141: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
