Sawmus 135
135
Avat adahan kabayhaki
1Kabayhanay Kiyavwiye Uhokri! Kabayhanay giw, yis Kiyavwiye Uhokri gibukvigyenevwi,
2yis ku pariye kehnevwi gibetki ay givineku, ay ariku uwohkigawiy givin.
3Kabayhanay Kiyavwiye Uhokri awaku ig kibeyne. Paknay adahan kabeyhene giw awaku ig ka gabaysima.
4Mmanawa ig kaniye amekene Jakó adahan ig humaw gidahan. Ig kaniye madikte izhaewyenevwi adahan igkis humaw gidahan gihiyegavu.
5Nah hiyakni ku Kiyavwiye Uhokri ig ka gikiytanisima. Ig avitmin madikte ku karit hiyeg kawohkigahaw.
6Ig Kiyavwiye Uhokri ka gidatnisima adahan ig keh ku pariye ig kehkere, aynte inurik hawata ay amadga wayk, aynte parahwokwa hawata ay awenumavrik.
7Ig kannikasa ukuhne aytontak aranwatak amaksemni waxri. Ig keh ugugune uguhwa adahan muwok wayk. Ig kannikasa kamaygviye ariwntak nikankewkeg.
8Minikwak ig umahkisave madikte egutyevwi ikamkaytivyene aynte avit Ejitumnaw, hiyeg gikamkayhkis payak akak puwikne akamkayuvwi.
9Ayge ig kehe barewyevwi annut adahan hiyapkisne git Faraó payak gikakkis gihiyegavu.
10Ayteke ig pisenwe gikakkis ka aynsima hiyegviyenevwi payak gikakkis ikivaratviyenevwi detyevwi.
11Ig umahkise amekene Seoh, ku pariye amohewyenevwi gikivarakis. Ig umahkise amekene Ogi, ku pariye kumadukene aynte Basahmnaw. Hawata ig umahkisave madikte ikivaratviyenevwi ku pariye misekwenevwi avit Kanaahmnaw.
12Ig ike neras ikivaratviyenevwi giwaxigkis ta gitkis gihiyegavu izhaewyenevwi adahan in humaw giwaxigkis.
13Kiyavwiye, madikte hiyeg hiyakpinek ku pisnewa Kiyavwiye Uhokri adahan avanenekwa. Madikte usuh kiyepinek adahan avanenekwa, usuh gikakkis ukamkayuvwi payak gikakkis ukamkayuvwi gihiwhivwikis akiw.
14Kiyavwiye Uhokri, pis kaviksa pihiyegavu. Pis amnihgikisnek akak madikte pabay.
15Igkisme giwohkigavukis nawenyevwi hiyegviyene igkis kehka akak karukri seyno hawata akak karukri wahano, igkis kehka gavitkis awaykemni.
16Kadahan gibiykis, heneme igkis ka awna; kadahan giwtyakkis, heneme igkis ka hiyap.
17Kadahan gitaybikis, heneme igkis ka timap; igkis kawnata ik adahan kahikanaw.
18Neras ku pariye gibetketnikis hawata ku pariye gikiytetnikis, igkis misekwebdinek hawata kewa ignesbe ahehpakti bataka ka hiyak ariknawnama.
19Kabayhanay Kiyavwiye Uhokri, yis gihiyegavu izhaewyenevwi. Yis Uhokri gimuwvegavu, kabayhanay Kiyavwiye Uhokri.
20Yis gayavetnivwi muwvegviyenevwi, kabayhanay Kiyavwiye Uhokri. Madikte yis ku pariye ihpenevwi giwn, kabayhanigbay.
21Kabayhanay Kiyavwiye Uhokri avit giwaxig Siyawh, avit paytwempu Jerusalém, ku kiney ig misakwa. Kabayhanay Kiyavwiye Uhokri!
Currently Selected:
Sawmus 135: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
