Sawmus 112
112
Gibetki pahavwi kamaxwene givitit Uhokri
1Kabayhanay Kiyavwiye Uhokri! Ka aynsima kabayka gidahan pahavwi ku pariye ihpene Kiyavwiye Uhokri giwn, ku pariye mpiksewne wew avigkutavrik gikumadukan.
2Gikamkayuvwi ner hiyeg igkis barewyevwi gaymahwankisnek ay avit waxri ku pariye Uhokri gikan. Hawata gihiwhivwikis Uhokri ikinenekwa kabayka gitkis akiw.
3Igi hiyeg kivun akak igiskanek ay giveneku, yuma ariknawnama muweknenek git, hawata ig ka miyehkantinek adahan kabayka ku pariye gikehni.
4Ku aysaw ig aynte abet amisnavyenek, igme Kiyavwiye Uhokri uguhnek gihina atere. Inneki keh ig ka gabaysima, ig batek ayava giyakivwi hiyeg hawata ig avanenekwa keh ku pariye waditnene.
5Ka aynsima kabayka gidahan, mmanawa ig kayah avititakwa giyakni adahan ayavene giyakivwi hiyeg, ig wewkis gannivwi akak madikte waditka.
6Ig ka mpiyasatinek mahikoki abet gaymahwan hawata madikte hiyeg kiyeginek awaku ig kibeyne hiyeg.
7Ku aysaw ig timapnek mbeyevye inetit danuh git, ig ka avisnek nibohri, mmanawa gikamaxwan wadit givitit Kiyavwiye Uhokri, hawata awaku ig hiyak ku samah gaymahwan.
8Ig ka wakaymnihwanek adahan givit, ine ig kawnata avisnek, mmanawa ig hiyakni ku Kiyavwiye Uhokri ahegbet adahan parekne abet gihawkan gitivutkis givetunyavu.
9Ig ka mpukaw gitkis hiyeg madiptavye. Ini gabay avanenekwa keh hiyeg kiyegi.
10Igkisme hiyeg mbayavye gihiyekemnikis, igkis ka aynsima dagawnebdinek git. Igkis ivegnek akak madikte gamiyhankis, ayteke nikwe igkis tivik biyukvi. Yuma ariknawnama giwhpankisnek adahan igkis uti kabayka.
Currently Selected:
Sawmus 112: pluPB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
