Sawmus 105
105
Uhokri ka gannusima avuriw gihiyegavu
1Kabayhanay Kiyavwiye Uhokri! Akkanay gikiytani hawata kinetihwanay amin ku pariye ig keh gidahankis hiyegviyenevwi!
2Paknay gidahan Kiyavwiye Uhokri! Paknay adahan kabeyhene giw. Kinetihwanay amin ariknebdi barewyevwi ku pariye gikehavan.
3Paksanay giw barewvitye. Madikte yis ku pariye kiyathenevwi Kiyavwiye Uhokri, bateknay yinaktin!
4Amnihswanay git Kiyavwiye Uhokri! Misakwanay avanenekwa ay gihumwa.
5-6Amawka wixwiy ku pariye Abraawh gihiwhivwi, Uhokri gibuk, wixwiy ku pariye Jakó gihiwhivwi, Uhokri gikanyan, amawka wixwiy kiyemina madikte annut ku pariye ig Kiyavwiye Uhokri kehe udahanwiy minikwak, ini barewyevwi annut ku kakak ig hiyapkise gitkis uvetunyavuwiy.
7 Kibeyne, ignewa Kiyavwiye Uhokri Dehetniye, ignewa uwohkigawiy. Gikumadukan ay amadga inin pahakte hawkri.
8Ku pariye gahegbetawni ig kiyeni adahan avanenekwa. Hiyawa mpiye ka aynsima miw kamukri, igme ka miyeh gikaksan, ig keh in humaw,
9ini gahegbetawni ku pariye gikehni gikak Abraawh hawata gikaksan ku pariye ig awna git Izaki.
10Ig Kiyavwiye Uhokri kehe pahat gahegbetawni gikakkis izhaewyenevwi adahan avanenekwa. Henewatbaki, pahat ahegbetawka gikak Jakó.
11Avim ini ig Kiyavwiye Uhokri awna git: “Nah ikenek yit inin waxri Kanaahmnaw. In humawnek yidahan adahan avanenekwa.”
12Kiyavwiye Uhokri gihiyegavu aynesnite avim ini hawkri, hawata igkis kewa nawwotunyevwibe avit ini waxri ikaksaki gitkis.
13Avim ini hawkri igkis wewnama muwapuw avitiw nawenyevwi hiyeg giwaxigkis. Igkis mpiya amuniw nawenyevwi hiyeg gikumadukankis.
14Heneme ig Kiyavwiye Uhokri ka isaksati pahavwinema hiyeg hiyapkis mbeyne gitkis. Hawata adahan gavuriwtenkis, ig ikavave ikivaratviyenevwi ginetnikis giminkis.
15Ig awna: “Ka ba yi daxta nubukvig ku pariye nukanyanvu. Ka ba yi hiyapkis mbeyne gitkis nuwatnivwi!”
16Ariwnteke ini, ig Kiyavwiye Uhokri isakse mihetniki biwh avitit ini waxri ikaksaki gitkis. Avim ini gihiyegavu misekwe yuma gimanakis.
17Heneme avit in danuh gitkis, ayipa ig awahkise pitatki gavitkis pahavwi awayg kewye José. Ig José ig kamaxwika, ig piyukwika adahan ibukti.
18Nikwe igkis waneke José gikugkavrik akak xen. Gibitamname igkis kawihkise akabdat sivari. Ayteke ig iwepka ta avitit Ejitumnaw.
19 Ig danuh atere, ig misekwe ariku parakseket kibite kamukri he ku aysaw gihawkanavrik danuh ku samah Uhokri awna git. Ayge ig Kiyavwiye Uhokri giwn kahayakse ku José ig waditye hiyeg.
20Igme Ejitumnaw akivara hiyapni hene ig isahkiswig. Henewatbaki. Ig ner nawwotunyevwi gikivarakis kane gidatnisima ig wiwhkiswig arikutak paraseket.
21Ayteke ig sarayhpig kewa gihumwayabe ka gikiytanisima abet gikumadukan, adahan igme kumadukene pahatte giwaxig.
22Ikepka git José kumadukaki adahan igme kawatnihne ikivaratviyenevwi keh ku pariye gimawkan. Hawata gidatni ikekpa git adahan ig kannuhne ikivarat gihumwayavwi.
23Ayteke ariwnteke ini igme gig, Jakó, tivik atere avitit Ejitumnaw akak madikte gidahanviyene. Ayge ig misekwe.
24Ig Kiyavwiye Uhokri kehe neras gihiyegavu kakamkayh ka aynsima ayge. Ig kehpigkis humaw datte giwkis givetunyavukis.
25Igkisme ejituyenevwi hiyapni hene, igkis pukuhhevwe gibohrikis, igkis kavusaw amiyhevgikis. Ayteke nikwe igkis hiyapkise mbeyne gitkis ignes izhaewyenevwi, ku pariye Kiyavwiye Uhokri gibukvig.
26Ayteke ariwnteke ini ig Kiyavwiye Uhokri awahkise gibuk Moís atere gikak Arawh, ku pariye ig kaniye.
27Igkisme danuh atere, igkis kehe ka aynsima annut ayge avit Ejitumnaw. Igkis wakaymnise ejituyenevwi payak gikakkis izhaewyenevwi.
28Avim ini Kiyavwiye Uhokri awahkise misanpiki ahawkri avitit Ejitumnaw, heneme igkisnewa ejituyenevwi ka ihpekere giwnkis.
29Pitatye ig wagese warik humaw migat. Ayge nikwe madikte im miyarap.
30Ayteke Ejitumnaw humaw pahatte akak tivuw. Faraó givin kawnata isahptaw ariw tivuw.
31Ayteke ig Kiyavwiye Uhokri isakse tagep akak yet hehe pahatte avit waxri.
32Awenyan muwok, ig awahkise muwok tipbetye payak akak ugugune ta avitit waxri.
33Hene ig dunihbete amutrivwi uvavu payak akak figuvu hawata ig higohkisave madikte ahpiyanovwi.
34Ayteke ig awastase Ejitumnaw akak tananviyene, igkis ka aynsima, keh ka ik adahan pukuhgikis.
35Ignes tananviyene axbete madikte amutribdi, madikte ejituyenevwi gahakavukis.
36Pisenwa, ig Kiyavwiye umahkisave madikte ejituyenevwi gikamkaykis eggutyevwi, ku pariye givigsankis.
37Ayteke nikwe ig Kiyavwiye Uhokri wiwhe izhaewyenevwi avititak Ejitumnaw. Igkisme tivik akak karukri seyno hawata akak wahano. Madikte igkis makniwbetave, ayhmadave garudikis.
38Igkisme Ejituyenevwi bateke ginaktinkis ku aysaw izhaewyenevwi tivikbetwikis, mmanawa igkis avise gibohrikis.
39 Ariwnteke ini, ayge amadga amatap, ig Kiyavwiye Uhokri ike pahat ukuhne givitminkis gihiyegavu hawata tiket adahan gihwitentenkis tiyegem.
40Igkis ayep inti, igme Kiyavwiye Uhokri awahkise pahabu kodorna giminkis, kuhivra ku pariye keno inambe suwigu guyesru, hawata ig ike bugut inuriktak ka aynsima adahan umehne mativwa.
41 Hawata ig ike un gitikis. Ig beke pohow tip. Un suke guwntak amatmadgew kewa pahatra warikbe.
42Mmanawa ig kiye gikaksan kiyatye ku pariye ig kehe gikak gibuk Abraawh ku gihiwhivwi diyuhenek ta avitit Kanaamnaw.
43Hene ig Kiyavwiye Uhokri wiwhe gihiyegavu gikanyanvu avititak Ejitumnaw. Igkisme pese ayteke akak madikte gibetkikis, pekempikis awaku (ba akak) batekka.
44 Metakwa igkis danuhe avitit Kanaamnaw. Ayge ig Uhokri ike giwakuritkis ini waxri ku pariye nawenyevwi hiyeg giwaxigkis payak akak giwasrakis.
45Kahadbe igkis msakwa ayge ihpene gikumadukan, igkis wewne avigku gihiyekemni. Kabayhanay Kiyavwiye Uhokri!
Currently Selected:
Sawmus 105: pluPB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
