Sawmus 104
104
Kiyavwiye Uhokri ig uhumtenwiy ukavriwtenwiy
Jen 1
1Kiyavwiye Uhokri, nah kabayhap avititak nuyakni!
Kiyavwiye nuwohkiga, aynsikata piyesri hene! Pis kakawihnivu akak pikiytani hawata akak pidatni.
2Hawata pis awasvit akak pibutni. Pis kannikasa en kewa paha paytbe.
3Hawata piwskeki ayntehan avitmin un inurikyene. Pis kawih ukuhne kewa pihmunbe adahan piwewten. Hawata pis amara abetvi kamaygviye.
4Pis keh kamaygviye humaw inetitkekne pidahan. Inme ugugune humaw pibukvig.
5Pis sarayhe waxri kabayntiwa avitmin akamaxtenvig, hene in ka mukusatinek.
6Pis awasvite waxri akak parahwokwa, ke akak kamisbe. Inme un misekwe avitminvi waxribdi imuwadminene.
7Heneme, abetnewa pis himehe un, in ayguhwe. Ku aysaw in timep pikuvimna adahan kumadukaki, in ayguhwe in sigise.
8Ini un ayguhwe ariw waxribdi imuwadminene, in muhuke arimkanit asababan adahan tivikwiye arimkanit iwetrit ku kiney pis ahegbete nidahan.
9Ayge pis kawetuhe un kahadbe in ka mpiya adahan awastene waxri akiw.
10Pis keh warik atiwrik humaw amadgatak asababan. Hawata pis keh warik ariwnravig sigis ayegbiw waxribdi imuwadminene.
11Ariwntak ini un madikte puwiknebdi ahavwikunevwi higap. Akak ini un kaway ahavwikunevwi umah garabyunkis.
12Akigbimna warik, kuhivraviyonovwi keh gubkis. Hawata egkis awna avewitak ah atawnibdi.
13Inuriktak pis waykis muwok avitit waxribdi imuwadminene. Inme waxri misakwa kivun akak pabay.
14Pis keh pamatka aymuhwa gidahankis pak. Hawata ahakuvwi akak amutribdi adahan hiyeg gaxnikis. Avititak waxri igkis taris gimanakis.
15Pis keh waxri iki win ku pariye keh wis batek; hawata iyti ku pariye aydha uhiyekemni, hawata bugut ku pariye iki udatni.
16Ka aynsima muwok wayk avewi Kiyavwiye Uhokri gamutravwi, guvewikis magawga ayntenano avit Libano, ku pariye ig mutuhe.
17Ayge kuhivraviyonovwi keh gubkis, hawata waratnaviyenevwi keh givinkis avewi ah.
18Igkisme kabrit ahavwikune misakwa avit waxribdi imuwadminene. Igkisme lapeh ahavwikune ayamwa abet tivebdi.
19Pis kehe kayg adahan areketni fet ahawkanavrik. Kamuw hiyak ku aysaw danuh gihawkanavrik adahan ig pituk.
20Pis kehe tiyegemka. Ku aysaw misanpi madikte puwikne ahavwikune pes adahan kanikne.
21Kawokwine hihihwa ku aysaw igkis kaniknes, ivegvene gimanakis ku pariye Kiyavwiye Uhokri gikan adahan gaxnikis.
22Heneme, ku aysaw kamuw pes, igkis diyuhe. Igkis atak dukugis arikut miyokwiye.
23Nikwe igkisme hiyegviyenevwi atak abetit gannivwikis. Igkis kannivwi danuhte aygete.
24Kiyavwiye, pis kehe ka aynsima ariknebdi. Pis kehpin akak pannu. Inin waxri in kivun akak paymuhnivwi.
25Ayge misakwa parahwokwa pugubwadnene, nopsadnene, ku kiney misakwa puwiknebdi nopsadminene akak nopsanyuvwi, igkis ka aynsima, ka ik adahan pukuhgikis.
26Nawiy mpiya awvre amadgew parahwokwa. Ayge Leviatah arehwa ahakwa, ig ner im ahawkri nopsadnene ku pariye pis aymuhe.
27Madikte igkis, puwikne akak hiyeg, wahap piwntak adahan pis iki gimanakis ahawkanavriknawa.
28Pis iki axka. Igkisme ahiwni. Igkis ax kabihribdave.
29Ku aysaw pis ka avuriwgikis, igkis madikte avis. Ku pis wiwhe gitipkis, igkis miyarap. Igkis wageswa wayk atabdabni akiw.
30Heneme, ku pis kawihkis pitip givititkis, nikwe igkis wayvuka akiw, hene pis nukunehkis gaymahwankis akiw amadga inin.
31Kiyavwiye Uhokri, numawkan pikiytani dahwa adahan avanenekwa, kahadbe pisme bateknek ka aynsima akak ku pariye pikehavan.
32Ig Kiyavwiye he ivegviyenenwa arimkanit waxri, inme sagka. Ig he daxnenwa waxribdi imuwadminene, sariyanme pes nivititak.
33Nahme paknek adahan kabeyhene Kiyavwiye ku samah nayivwi ay amadga inin. Nah paknek git nuwohkiga abet madikte naymuhwan.
34Numawkan ig bateknek akak nuvanuh, mmanawa nubetki in ayta giwntak Kiyavwiye.
35Nerasme mbayavye ku pariye kane timepkere Kiyavwiye gihiyekemni, amawka igkis wiwhavepkanek amadgatak wayk. Neras patahwavye, amawka igkis miyarap amadgatak inin hawkri. Nahme, amawka nah kabayhapnek avititak nuyakni, Kiyavwiye! Kabayhanay Kiyavwiye Uhokri!
Currently Selected:
Sawmus 104: pluPB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
