Judas 1

Nah Judas awahkis kabayka yimin

1 Nah Judas, ku pariye gibuk Jesus Cristo, nah ku pariye gisamwi kiyavwiye Tiyagu, nah awahkis kabayka yimin yis ku pariye Uhokri gikanyanvu adahan yis humaw gihiyegavu. Kibeyne, yis Wigwiy Kiyavwiye Uhokri gibetkivu yis avuriwka gavit Jesus Cristo.

2Kiyavwiye Uhokri gamnihra yikaknek. Ig kariswehse yiyakninek. Ig kivunsa yiyakninek akak batekakka pawtak.

Kinisekevutnevwi awna ku ka sam wixwiy mahayakemnihwa

Ro 2.4; 2Ped 2.1

3Nukebyuvwi kibeynevwi, nah kuhwekwa ahegbet adahan nah awahkis inetit yimin adahan ku samah Kiyavwiye Jesus amnihwiy keh wixwiy isahptaw ariw uvathawniwiy adahan wixwiy danuhne git Kiyavwiye Uhokri. Heneme kuri numawkan nah awahkis nawenyewa inetit yimin. Numawkan nah ikene yawaygi kahadbe yis mpiksaw mpitha neras ku pariye matekbetevye yikamaxwan ayge. Pahayewvi kuwis Kiyavwiye Uhokri akki gihiyekemni wotwiy gihiyegavu adahan ku samah amawka wixwiy wew gikak. Ig ka muwaka wixwiy wages uhiyekemniwiy ariw ini gihiyekemni.

4Kuwis kinisekevutnevwi danuh atere yit mownye adahan wageswiye yihiyekemni warikwihewnen. Igkis gibetkikis awna: “Kiyavwiye Uhokri ka gamnihrasima. Ka sam wixwiy mahayakemnihwa. Ig bayahminawiy ariw umahyakemniwiy.” Igkis ka inyewatma wewkere gikak Kiyavwiye Uhokri. Igkis ka ihpekere giwn Jesus Cristo ku pariye ignewa Ukivarawiy ukannuhtenwiy. Igkis gikebikis neras ku kamin Uhokri gannasan kinetihwa ku igkis ikaksaka adahan biyukwiki.

Hiyawa wis awna ku wis Uhokriyan, heneme ku wis mahayakemnihwenene wis biyukenek

Mt 7.21; 2Ped 2.1; 1Jo 3.6

5 Hiyawa wis awna ku wis Jesus gihiyega, heneme ku wis mahayakemnihwenene, wis biyukenek. Kiyeminanabay giminkis neras amekenegben izhaewyenevwi. Yis kuwis hiyak ku pariye mbayka danuh gitkis. Ig Kiyavwiye Uhokri wiwhkiswigkis giwakutakis hiyeg ejituyenevwi. Igkis isahptew. Heneme ayteke ariwnteke ini ig umahave madikte neras ku pariye kane inyewatma kamaxwa givitit. Ku yis hiyap ig ka bayahmina neras amekenegben, wixwiykata akiw? Ig kawnata bayahminawiynek.

6Hawata akiw kiyeminanabay giminkis neras ahj ku pariye ka kumadukasewkere git Kiyavwiye Uhokri minikwak, igkis ikise ini giwetrikis ay gimun Kiyavwiye Uhokri. Avatra ini igkis wanekwika akak xen aynte warikwi abet amisnavye ahawkri. Igkis ka hiya givesnikis nibetitak. Ayge ig Kiyavwiye Uhokri ikiswigkis he ku aysaw gihawkanavgikkis danuh adahan igkis katiwnivwe avatra gitaraksankis. Ku yis hiyap ig ka bayahmina ahj, wixwiykata akiw? Wixwiy hawata katiwnivwenek.

7Hawata akiw kiyeminanabay giminkis neras hiyeg mahayakemnavye ku pariye misekwenevwi aynte avit ini paytwempu Sodoma akak Gomoha akak madikte paytwempu nanwew. Igkis ikaw ke neras ahjbe ku pariye kane kumadukasewkere git Kiyavwiye Uhokri. Igkisweke powkemnihwa, igkisweke meksak. Avatra ini ig Kiyavwiye Uhokri hiyapkise mbeyne gitkis akak tiket. Igkis madikte wohap. Igkis ka uti bisiket niw. Igkis humaw kibeyne abektey adahan ku samah Kiyavwiye Uhokri katiwnisa hiyeg gimahyakemnikis gitkis akak tiket ahawkri.

Kinisekevutnevwi ka kiyatha ariknawnema

2Ped 2.10

8Neras kinisekevutnevwi igkis ikaw hawata ke neras paytwempuyenevwibe. Igkis pataha givitkis akak garisunkisnen. Igkis mahivwih gikivarakis, he igkis mahivwih wavityempu gikivarakis.

9Igme ner ahj detye kewye Migew ku pariye gaytakis neras ahj ku pariye avitminene, igwa ka kiboka mahivwih wavitye. Minikwak igkis iniyekbet gikak ner wavitye gikivarakis amin amekene Moís givit. Ig mpithe amekene Moís givit giw wavitye, heneme ig tuwatasew gitivut adahan ig ka miyatig. Ig he awna git:

— Kiyavwiye Uhokri hiyak pikaknek.

10Nerasme kinisekevutnevwi igkis mahivwih ku pariye igkis kane pukuhpa. Igkis kewa puwiknebe ka hiyak hawkri. Igkis wew akak puwikne gihiyekemnikis hene igkis umahavepka hawata ke puwiknebe.

11 Henewa, nukebyuvwi. Aysawnemenek igkis hiyapkiska mbeynegitkis ka aynsimanek. Mmanawa igkis wew akak amekene Kayih gihiyekemni. Ig amekene Kayih, ig keh ku pariye mbayka tuguh abet gihiyekemni. Igkis hiyeg hawata akiw. Igkis tarakse hawata ke amekene Balawhbe. Git amekene Balawh ku ik adahan ig dax karukri, nikwe ka sam git ku ig tarakse Uhokri gihiyekemni. Igkis hiyeg hawata akiw. Igkis biyukenek ke amekene Korebe. Ig amekene Kore ka kumadukasewkere gitkis neras ku pariye Kiyavwiye Uhokri iki gitkis gihiyegavu adahan gikivarakis. Igkis hiyeg hawata akiw. Ayge nikwe igkis umahavepkanek hawata ke nerbe awaygbe.

Kinisekevutnevwi hiyeg waditnevyenen

2Ped 2.13

12Ku aysaw yis Jesus gihiyegavu pahadguvu adahan amnihekne pawtak, igkis danuh atere hawata ke wotbe igkis Jesus gihiyegavube. Heneme igkis he mbeyhenenen yihiyekemni. Igkis ka hiyak ku pariye maraki. Igkis ax ka kiyatha pahavwi. Igkis kiye he givitkisnen. Igkis kewa tipbe dig ahakwa un wis ka hiyak ku aysaw wis sigihwe guvitit. Mmanawa wixwiy ka hiyak ku aysaw wixwiy ikaw hawata ke igkisbe. Gihiyekemnikis waditnevyenen yuma kabayka nibet. Ini gihiyekemnikis kewa ukuhnebe ku pariye yumanene mwok nibet. In atekekbetwiye ke ukuhnebe warebdi abet mayg. Igkis hiyeg waditnevyenen ke amutribe ku pariye kane kew. Kawa, igkis mbayte akiw. Igkis yumahwatbaki gidahankis dehetniki. Igkis kewa pahakti ah akatbe ku pariye warekwika pahatte payak akak guhanpabet.

13 Hawata akiw igkis kewa parawbe eg ayta akak ka aynsima guhawna heneme ku aysaw eg mpiya, eg ikis he ahawyunen misekwe. Igkisme ku kiw igkis mpiya igkis ikis he marakinenwa misekwe. Hawata akiw igkis kewa warukma tuguhpiyebe. Ka ik adahan wis huwithasaw gitkis. Aysawnemenek ikaksaka giwetrikis aynte abet amisnavye mitibnene. Ayteke igkis ka hiya givesnikis nibetitak.

Kinisekevutnevwi katiwnivwenek avatra gitaraksankis

Mt 13.41; Lk 13.3; Ro 2.1, 3.5; Ap 20.11

14Minikwak amekene Enoki kinetihwa amin ku pariye danuhnek gitkis neras hiyeg. Ig amekene Enoki ig amekene Adão gihiwhi giwenketekis ntewnehkevye gihiwhivwi. Ig kennesa ariwntak akavuska hawkri heneme kuwis ig kinetihwa giminkis, giwn:

“Aysawnemenek Ukivarawiy danuhnek akak ka aynsima gihiyegavu pahabunene ayta gihapti.

15Ig ayta adahan madikte hiyeg katiwnihpiye gitaraksankis git. Avim ini ig hiyapkis gitkisnek madikte neras ku pariye kane wewkere gikak. Ig hiyakkis gitkis madikte gitaraksankisnek. Mmanawa igkis mbeyevye gihiyekemnikis. Igkis keh mbeye mbayka ku pariye ka giwntakma Kiyavwiye Uhokri. Igkis awna mbeyevye iwit gimin Kiyavwiye Uhokri.”

Kinisekevutnevwi mbeyevye gihiyekemnikis

2Tim 4.1; 2Tim 3.1; 1Ped 3.3

16Igkis kinisekevutnevwi igkis avanenekwa awnptaw amin madikte ku pariye ka tuguh ku samah gimawkankis. Igkis wew akak ku samah gihiyekemnikis aya gitkis. Igkis avanenekwa kawantivye. Igkis kinista hiyeg akak kabayhaki kahadbe igkis dax gikakurakis.

17Nukebyuvwi kibeynevwi, kiyeminanabay amin Ukivarawiy Jesus Cristo giwatnivwi giwnkis.

18Igkis awna wotwiy:

— Aysawnemenek amaksemni hawkri hiyeg mahivwihkevutnevwi kahayaknek. Igkis wew akak ku samah gihiyekemnikis aya gitkis heneme ini gihiyekemnikis ka giwntakma Kiyavwiye Uhokri.

Henewatbaki igkis giwatnivwi awna.

19Igkisme kinisekevutnevwi igkis matekbetevye Jesus gihiyegavu gihiyekemnikis. Igkis wew akak hiyakemniki mbeyevye ku pariye hiyeg kane Uhokriyanvuma batek nikak. Igkis yuma Kiyavwiye Uhokri Gitip ay givitkis.

Misakwanay aymuhwenene akak Uhokri gihiyekemni

2Ped 3.17

20Yisme nukebyuvwi kibeynevwi, misakwanabay aymuhwenene akak Uhokri gihiyekemni ku pariye barewbetye ay yivit. Misakwanabay piriyepkewnene gikak Kiyavwiye Uhokri Gitip.

21Misakwanabay bateknene gikak Kiyavwiye Uhokri ku samah yis wahepnenete Ukivarawiy Jesus Cristo danuh adahan ig amnihwiy adahan ig keh wixwiy aymuhwa gimun Kiyavwiye Uhokri adahan avanenekwa.

Amnihnabay hiyeg ku pariye kinikiswevye

Mt 18.15; Gal 6.1; Tiy 5.19

22Yaytak ka hiyak kabayntiwatma ku samah ig Uhokri gihiyekemni. Igkis kaba ihpa giwnkis neras kinisekevutnevwi. Uyabakay amnihgikis.

23 Igkis kewa pahavwibe tuguhpiyebe ariwtrikut tiket. Kahnigkisbay ariw ini mbayka. Hawata akiw neras ku pariye kuwisnene ihpe giwnkis neras kinisekevutnevwi. Amnihnigkisbay hawata. Heneme pukuhpawnabay abohri givathawnikis adahan in ka manukwima yivitit. Asannabay givathawnikis ke pahavwibe ig padekwiye pahak kamis asenewkevye.

Uhokri detye adahan iki wawaygiy

Ro 5.3; 1Ko 1.8, 10.13; Tiy 4.6; 1Ped 2.9

24 Kibeyne gidahan Kiyavwiye Uhokri. Ig detye adahan iki wawaygiy adahan wixwiy ka taraksa. Ig detye adahan ig keh wixwiy danuh akak ka aynsima batekka givetunat Kiyavwiye Uhokri akak madikte gikiytani, wixwiy yuma utaraksanwiy aynesnima.

Kibeyne gidahan Uhokri

Ro 16.25; Ef 3.20; 2Tim 1.17; Eb 13.20; 1Ped 5.11

25Kibeyne gidahan Kiyavwiye Uhokri. Yuma pahavwinema kema igma. Ignewa wamnihtenwiy givitimpi Ukivarawiy Jesus Cristo. Ignewa ka gikiytanisima. Ignewa ka gidatnisima. Ignewa ka gawaygisima. Ignewa kumaduka madikte. Henewatbaki ig ku samah humawkariwka kuviknene akak inin. Henewatbaki ig gidukwenewa adahan avanenekwa avanenekwa. Ameh.

Currently Selected:

Judas 1: pluPB

Highlight

Copy

Compare