Efesyus 5

1Wixwiy Kiyavwiye Uhokri gikamkayuvwi gibetkivu. Ku samah ukamkayh gibetki ig ahehpaw, hawata amawka ku wixwiy ahehpa Kiyavwiye Uhokri.

2Amawka wixwiy wew akak wamnihra hawata ku samah Cristo ka gamnihrasima ukakwiy. Ig umahkiswe udukwenavrikwiy adahan katiwnihpiye utaraksanwiy. Ini gamnihra keh Kiyavwiye Uhokri bateke ginaktin ke wotbe ig ayhpiyebe imihgi.

Ka yi muwaka daxtasaw arit patahwaki

1Ko 5.9, 10.20; 2Ko 6.14; 2Tim 2.4; 2Ped 2.11; Tiy 4.4; 1Jo 1.6, 2.15

3Yis Kiyavwiye Uhokri gihiyegavu barewvityevwi. Nikwe ka yi muwaka daxtasaw arit aynesnima patahwaki. Ka yi muwaka daxtasaw arit mahayakemniki ine arit miyahawka. Ine ka yi muwaka kinetihwa pawtak nimin aynesnima.

4Ka yi muwaka awna mbeyevyema iwit, ine iwit puwvuki, ine yisamanawni mbeyevyema. Ka kis adahan wixwiy Kiyavwiye Uhokri gihiyegavu awna hene. Pi kabayte wixwiy awna kabaykanen, wixwiy kibeyhene Kiyavwiye Uhokri takunipti.

5Yis kuwis hiyakni kabayntiwa ku hiyeg powkemnavye, patahwavye ignes ka kawih Uhokri gikumadukan. Igkis ka kawih Cristo gikumadukan. Ine hiyeg miyarhawatruvye ignes kawnata kawih Uhokri gikumadukan awaku igkis pi batekte akak ariknebdi mpiya giw Kiyavwiye Uhokri.

6Ka yi muwaka kinikiswa gitkis hiyeg ku pariye awna ku ini patahwaki ka sam. Ka ba yis hiyap ku inakni giwnkis waditnevyenen? Ig Kiyavwiye Uhokri ka batek akak ini patahwaki. Ig ivukenek hiyeg patahwavye hanpa arimkanit biyukwiki mmanawa ignes ka ihpatrunema giwn.

7Ka yi muwaka darihwak gikakkis hiyeg ku pariye kehnevwi hene.

Uhiyakemniwiy ke wotbe in kabutennebe

Jo 1.4, 3.19, 8.12, 12.35; Ro 13.12; Ef 5.8; 1Tes 5.5; 1Jo 1.5

8 Amawka wixwiy ka amava patahwaki abetit uhiyekemniwiy mmanawa kabutniki ka amava amisnavye nibetit. Minikwak wixwiy ke wotbe uhiyekemniwiy ay abet amisnavyenen. Kurime in ke wotbe uhiyekemniwiy ay abet kabutnikibe awaku ku samah wixwiy pahavwiwa gikak Ukivarawiy. Nikwe wewnay akak kibeyne hiyakemniki akak yihiyekemni ke wotbe kabutennebe.

9Hiyeg ku pariye gihiyekemnikis kabutenne igkis ka gabaykisima. Igkis wadityevwi. Igkis awna hiyakemniki ku pariye inyewatnene. Mmanawa kabutniki ka waditnevyenenma.

10Ku yis wew akak yihiyekemni kabutenne hene, amun ini nikwe yis keh Kiyavwiye Uhokri gibetki takunipti.

11Heneme ku pariye hiyeg misanap gihiyekemnikis, ignes gikehnikis waditnevyenen. Yuma kabayka abet gihiyekemnikis. Yisme ka yi muwaka amava ini gihiyekemnikis waditnevyenen. Heneme kehnay igkis hiyaka gitaraksankis akak yihiyekemni kibeynewa.

12Mmanawa ini gihiyekemnikis ku pariye ignes keh ayamaw in ka aynsima mbayka nibet. Wis marenpi kinetihwa nimin.

13Heneme ku kabutniki uguh arikna, ayge nikwe ini arikna kahayak huwewe. Hawata ku hiyeg taraksavye hiyavyi yis wew akak kibeyne hiyakemniki, ayge nikwe igkis hiyeke ku gidahankis gihiyekemnikis mbeyevye. Nawenetke ini yibutni wages gihiyekemnikis adahan igkis hawata gihiyekemnikis kabutenne.

14Inneki keh ig Kiyavwiye Uhokri awna:

— Pihiyekemni ke wotbe in himaknabe. Wadisniba. Pihiyekemni ke wotbe in miyarevyebe. Kannikasanaba pihiyekemni adahan in aymuhwa akiw. Nikwe ig Cristo uguhni.

Ka yi muwaka biyuksa hawkri gidahan Uhokri

1Ko 7.25; Kol 4.5; 2Tim 4.2

15Avuriwnabay yihiyekemni ba in kabayntiwatma. Ka yi muwaka wew akak hiyakemniki puwvuki. Heneme wewnay akak kibeyne hiyakemniki.

16Ku avim inin wixwiy abet kiyimwiki. Nikwe amawka ku wixwiy keh kibeyne annivwit gidahan Kiyavwiye Uhokri takunipti. Ka yi muwaka biyuksa pahaynema hawkri gidahan.

17Ka yi muwaka ikaw kema hiyegma ku pariye kane hiyak hawkri. Aharitnay adahan yis hiyak ku pariye Kiyavwiye Uhokri gimawkan yit.

Wewnay gitiphaw Uhokri

Kol 3.16

18Ka ba yi uwkihwa akak higapka adahan in kumaduka yihiyekemni. Mmanawa in hiyapkis ka aynsima mbeyne wot. Heneme wewnay takunipti gitiphaw Kiyavwiye Uhokri adahan ignewa kumaduka yihiyekemni.

19Kinetihwanay pawtak akak avat gidahan Kiyavwiye Uhokri. Paknay avat kiyathene Kiyavwiye Uhokri. Paknay akak Kiyavwiye Uhokri Gitip. Paknay, agighanay git Ukivarawiy avititakwa yiyakni.

20Kabayhanay Wigwiy Kiyavwiye Uhokri giwavrik Ukivarawiy Jesus Cristo. Avanenekwa kabayhig adahan madikte ku pariye danuh yit.

21Ihpaknay pawtak awaku ku samah yis kiyatha Cristo.

Ihpanay yigihgi giwn

1Ko 7.4, 11.3; Kol 3.18; 1Ped 3.1

22Yis tinogben, ihpanay yigihgi giwn kabayntiwa hawata ku samah yis ihpa Kiyavwiye Uhokri giwn.

23Mmanawa awaykemni kumaduka gihayokis hawata ku samah Cristo kumaduka wixwiy gihiyegavu. Ig ke wotbe ig utewiybe. Wixwiyme ke wotbe wixwiy givitbe. Ig wamnihtenwiy.

24Nikwe amawka ku tinogben ihpa gugihgikis giwnkis kabayntiwa hawata ku samah Cristo gihiyegavu ihpa Cristo giwn.

Amnihnay yihayo

Kol 3.19; 1Tim 5.8; 1Ped 3.7

25Yis awaykemni, amnihnay yihayo kabayntiwa hawata ku samah Cristo amnihwiy wixwiy gihiyegavu. Ig amnihpewiy he ig umahkiswe udahanwiy.

26Ig umahkiswe udahanwiy marihwa wixwiy humaw gihiyegavu barewvityevwi. Ku samah pahavwi sukuhptaw akak un adahan barewvithene givit, ig hawata ig barewvithewiy wixwiy ku pariye kene givitbe. Heneme ig ka kawih un. Ig kawih Kiyavwiye Uhokri gannasan. Ku aysaw wixwiy ihpa inakni giwn, in barewbetha uhiyekemniwiy.

27Gimawkan gihiyegavu humaw kewa givitbe kane nibereswansima git. Gimawkan ini givit yuma nivathawni, yuma nimebyemni, yuma patawvitnema aynesnima. Gimawkan in barewvitye avigkutavrik ku samah gibetki.

28Amawka awaykemni amnih gihayokis hawata ku samah igkis amnih givitkis. Ku pahavwi amnih gihayo, amun ini in ke wotbe ig amnih givitwatbe.

29Yuma pahavwinema waytakwiy ku pariye ka batekma akak givit. Heneme ig avuriw givit kabayntiwa. Ig nikepten. Hawata ke Cristobe ku samah ig avuriw gihiyegavu.

30Mmanawa wixwiy ayvekuye givit Cristo.

31In Uhokri gannasan awna:

— Ku aysaw pahavwi awayg maripkaw, ig tivik giw gig gukak ginag. Ig hamah gukak gihayo. Amun ini nikwe egkis piyamate humaw ke wotbe egkis pahavwiwatbe guvitkis.

32Inakni kibeyne hiyakemniki ku pariye hiyeg minikweknene kane pukuhpa. In kibeynewa. Ke nuthube in arakak adahan ku samah Cristo pahavwiwa givit gikakkis gihiyegavu.

33Heneme in hawata arakak udahanwiy. Amawka mpuse awayg amnih gihayo hawata ku samah ig amnih givit. Egme gihayo amawka eg kiyatha gugihgi.

Currently Selected:

Efesyus 5: pluPB

Highlight

Copy