Kolosenses 4

1Yisme ikivaratpiyene, amawka ku yis keh kabayntiwa gikakkis yihiyegavu, yis avuriwgikis kabayntiwa. Mmanawa aynte inurik yis kakivaranata gikakkis yihiyegavu.

Piriyepkawnay takunipti

Mt 7.7; Lk 11.8, 18.1; Ef 6.18; 1Tes 5.17; 2Tim 2.1

2 Nukebyuvwi, nah aya yit, ikatuswanay avanenekwa arit piriyepkawka. Ka yi muwaka ehwa nikak. Kabayhanabay Kiyavwiye Uhokri abet ini yiviryepkawni.

3Uyay piriyepkaw udahan hawata, adahan Kiyavwiye Uhokri woka ahin udahan adahan usuh ka mpithaka adahan usuh ekkene giwn. Kahadbe usuh ik adahan ekkene inakni inetit gimin Cristo ku pariye minikwak hiyeg kotenene hiyakte. Mmanawa ku avim inin nah ay ariku parakseket awaku ku samah nah ekkene inakni inetit.

4Piriyepkawnabay nudahan adahan nah akkamnihni huwewehe ku samah Kiyavwiye Uhokri gimawkan nah keh.

Kinetihwanabay gimin Jesus takunipti

Ef 5.15; 2Tim 4.2; 1Ped 3.15

5Wewnabay hiyakemun gikakkis hiyeg ku pariye kane Uhokriyanvuma. Ka yi muwaka biyuksa pahaynema hawkri adahan yis kinetihwa gitkis hiyeg gimin Cristo.

6Kinetihwanabay huwipegevye kabayntiwa gikakkis akak maguye iwit. Ayge nikwe yis hiyak ku samah yis kaytwa madikte hiyeg gayapnikis akak kibeyne hiyakemniki.

Nah awahkiste Tikiku gikak Onesimu yimin

7Kuri nah awahkis kiyavwiye Tikiku yimin. Ig ukebyi kibeyne. Ig kabivwiye kannivwi gidahan Ukivarawiy payak nukakuh. Ku aysaw ig danuh atere, ig akki yit madikte ku samah nuwskawni ay.

8Adahanikwa ini nah awahkisgi atere. Hawata numawkan ig iwasene ku samah yiwskawni ayge, ig ikene yawaygi.

9Hawata nah awahkis igi kiyavwiye Onesimu gihapti. Ig ukebyi kibeyne kabivwiye. Ig yaytak yis kolosiyenevwi. Ig gikak kiyavwiye Tikiku igkis akki yitnek madikte ku pariye danuh ay.

Usuh awahkis kabayka yimin

10Ig kiyavwiye Aristarku ku pariye ay ariku parakseket payak nukakuh ig awahkis kabayka yimin. Kiyavwiye Barnabe giwaygyi kiyavwiye Markus ig hawata awahkis kabayka yimin. Ku kiyavwiye ig Markus danuh aterenek, amavanigbay kabayntiwa ku samah nah kuwis awna yit.

11Ig Kiyavwiye Jesus Justus hawata awahkis kabayka yimin. Igkis mpanmawa judeyenevwi ku pariye kannivwiye adahan Uhokri gikumadukan ay nukakuh. Igkis ikenes nawaygi ka aynsima.

12Ig kiyavwiye Epafras hawata awahkis kabayka yimin. Ig hawata kabivwiye kannivwiye gidahan Cristo Jesus. Ig hawata yaytak. Ig piriyepkewnene yidahan avanenekwa akak madikte giwakemni. Ig piriyepkaw adahan yis kamaxwa givitit Kiyavwiye Uhokri kabayntiwa. Adahan yis kamax madikte ku pariye Kiyavwiye Uhokri ikiswanaw yidahan. Adahan yis avigkutavrik ku samah Kiyavwiye Uhokri gimawkan.

13Henewa ig mpiksaw ka aynsima yidahan. Hawata ig mpiksaw ka aynsima gidahankis hiyeg ku pariye aynte avit paytwempu Lawdiseya akak aynte avit paytwempu Hiyerapolis.

14Ig ner kibeyne iveytivutne, kiyavwiye Luwkas, ig hawata awahkis kabayka yimin payak gikak kiyavwiye Demas.

15Wani ukebyuvwiy Jesus gihiyegavu ku pariye aynte avit paytwempu Lawdiseya kabay nudahan. Wani kiyavuno Ninfa kabay nudahan payak gikakkis neras Jesus gihiyegavu ku pariye lammesya ay guvineku.

16 Nukebyuvwi, ku aysaw yis pisenwa yivegbohan inin ukagtan, uyay akkin gitkis Jesus gihiyegavu ku pariye aynte avit paytwempu Lawdiseya ku aysaw igkis pahadguvu lammesya. Igkisme akki yit gikagtankis ku pariye kuwis nah awahkise giminkis.

17Wani kiyavwiye Arkippu iki gitew arit Kiyavwiye Uhokri gannivwi, adahan ig keh madikte ku pariye Kiyavwiye Uhokri gayapni git.

18Kuri nahwa Pol anniri inin iwit buttitnene akakwa nuwakuh. Nenneve ka anniri inin: Kiyenanubay ku samah nah ay ariku parakseket. Kiyavwiye Uhokri gabay yikaknek.

Currently Selected:

Kolosenses 4: pluPB

Highlight

Copy