1 Tesalonisenses 1

Usuh awahkis kabayka yimin

1 Nah Pol gikak kiyavwiye Sílas, gikak kiyavwiye Timotyu, usuh awahkis kabayka yimin yis Jesus gihiyegavu tesaloniyenevwi. Kibeyne, yis pahavwiwa gikak Wigwiy gikak Ukivarawiy Jesus Cristo. Ig Kiyavwiye Uhokri gabay yikaknek. Ig kariswehse yihiyekemninek.

2Usuh kabayha Kiyavwiye Uhokri yidahan avanenekwa. Usuh piriyepkewnenekwa yidahan.

3Ku aysaw usuh piriyepkaw git Wigwiy Kiyavwiye Uhokri, usuh kiye avanenekwa ku samah yikamaxwan keh yis kannivwiye gidahan Kiyavwiye Uhokri. Usuh kiye ku samah yis kannivwi gidahan akak madikte yibetki mmanawa yis batek gikak ka aynsima. Usuh kiye ku samah yis ka isahkis yikamaxwan aynesnima mmanawa yis ivegnenekwa givitit Ukivarawiy Jesus Cristo.

Wixwiy igyewa Uhokri gikanyanvu

Mt 12.50, 22.14; Jo 15.16; Ro 8.29; Ef 1.4; 2Tes 2.13; 2Tim 1.9; 1Ped 2.9

4Nukebyuvwi, usuh hiyakni ku ig Kiyavwiye Uhokri batek yikak ig kaniyvey adahan yis humaw gihiyegavu.

5Mmanawa minikwak ku aysaw usuh pitatye ekke Kiyavwiye Uhokri ginetni yit, in kawki he inetitnenwatma yit heneme in danuh yit akak Kiyavwiye Uhokri gidatni. Avim ini yis hiyakni ku inakni unetni ku in inyewa mmanawa ig Kiyavwiye Uhokri Gitip akki yit hene. Hawata yis hiyakni ku in inyewa mmanawa yis hiyap ku samah Kiyavwiye Uhokri wagese usuh. Usuh humaw ke abekteybe yit adahan ku samah Uhokri gihiyekemni mmanawa usuh batek yikak kiyesrad.

6Yis hiyapni hene, yis ikaw hawata ke usuhbe hawata ke Kiyavwiye Jesusbe. Yis amava Kiyavwiye Uhokri giwn akak ini batekka ku pariye Kiyavwiye Uhokri Gitip iki yivitit. Yis hiyapkiska mbeyne yit avatra ku samah yis amavin heneme in ka sam yit. Yis amavin akak batekka.

7Ayge nikwe yis humaw gikannuhtenkis nawenyevwi hiyeg Jesus gihiyegavu adahan igkisme ikaw hawata ke yisbe. Kibeyne, madikte Jesus gihiyegavu ayge avit Masedôniyamnaw hawata gihiyegavu ay avit Gresiyamnaw igkis hiyapni yikamaxwan hene, igkis kamaxwa givitit Kiyavwiye Jesus hawata ke yistabe.

8 Kibeyne, Kiyavwiye Uhokri giwn kuwis pes yiwntak muwapuw gitkis nawenyevwi hiyeg. Ka ininewatma ayge Masedôniyamnaw akak Gresiyamnaw heneme muwapuw. Muwapuw hiyeg timap yak ku samah yikamaxwan kabayntiwa givitit Kiyavwiye Uhokri. Ku kit usuh danuh hiyeg ayge igkitnes kinetihwa wotuh amin ini yikamaxwan.

9Igkiswa akka wotuh ku samah yis amava usuh kabaynawa. Igkiswa akka wotuh ku samah yis wages yihiyekemni ariw yiwohkiga ahehpakti batakkarad adahan yis wewne gikak igyewa Kiyavwiye Uhokri ku pariye ivegnene. Igkis akka wotuh ku samah yis kehne gibetkinen.

10Igkis akka wotuh ku samah yis wahepnenekwa Kiyavwiye Uhokri gikamkayh gidawnhan inuriktak. Ig Kiyavwiye Jesus ignewa Uhokri gikamkayh. Ignewa Kiyavwiye Uhokri kannikasevgi ariw miyaka adahan avanenekwa ig ka miya akiw. Ignewa ku pariye keh Kiyavwiye Uhokri hiyap wixwiy kewa kibeynevwibe giwtrik adahan aysawnemenek wixwiy ka ivukepkama hanpa arimkanit biyukwiki.

Currently Selected:

1 Tesalonisenses 1: pluPB

Highlight

Copy