Attus 20
20
Pol danuhpene muwapuw avit Masedôniyamnaw
1Ayteke ariwnteke ini dakuhwaki, ig Pol watihe Jesus gihiyegavu ayta git. Igkis danuh atere, ig kinetihwe gikakkis, ig ikene gawaygikis. Ayteke ig ekkew, ig tivik avitit Masedôniyamnaw.
2Ig danuh atere, ig mpiya awvre waxriw, ig ekkene Uhokri gihiyekemni gitkis ka aynsima hiyeg. Ig wagahkisne gawaygikis. Ayteke metakwa ig danuh atere Gresiyamnawit.
3Ig misekwe ayge adahan mpana kayg. Ayteke ig ahegbetewviye adahan ig diyuhpiye avitit Siriyamnaw amadgew nawiy. Heneme ig time gakkis judeyenevwi ku igkis ahegbete ginetnikis gitivut adahan igkis giwmepten. Ig hiyapni hene, ig awna:
— Nikwe nah diyuh atere waxriw, Masedôniyamnew akiw.
4Ka aynsima Jesus gihiyegavu tivik gihapti Pol. Pahavwi kiyavwiye Pihu gikamkayh giw Sópatru bereyayene ig tivik gihapti. Hawata piyana gikebikis tesalôniyenevwi tivik gihapti. Giwkis Aristarku, Segundu. Pahavwi akiw Gayu derbeyene, tivik gihapti. Hawata ig Timotyu tivik gihapti. Hawata piyana gikebikis asiyamnawyenevwi Tikiku gikak Trófimu.
5Igkiskit tivik wowhu adahan wohpetni aynte paytwempu Trôadi.
6 Nahme Luwkas gikak Pol usuh misekwe aynewa avit ini paytwempu Filivus adahan mpiyasene ini fet adahan axne bugut miyegbiye. Pisenwa fet usuh tarekwe ayteke. Usuh mpiyase pohowku hawkri amadga nawiy, usuh danuh atere Trôadi. Ayge usuh patipteke gikakkis neras wohpetnivwi. Usuh misekwe ayge adahan pahay paka.
Pahavwi takweye tuguhe inutak
7Paka abet usuh pahadguhwe adahan usuh axne adahan kiyene ku samah Kiyavwiye Jesus umahkiswe udahanwiy. Ayge ig Pol ekkene Uhokri gihiyekemni gitkis. Ig ekkene kiyabawkad iwit mmanawa hewkenek ig tivikwiye. Ig awnene he danuhe pakwa mitipka.
8Ayge usuh kabubuknene ariku payt avahnap inuteknene. In uguhka avit ka aynsima abukri.
9Pahavwi takweye kewye Ewtiku ig betnene ayge anumeku lapot aynte inut. Ku samah Pol awnene inakni iwit kiyabawkad, ig Ewtiku isevwe ig himeke ig davidviswe. Pahaye adahan ig hakuhe ig tuguhe ayta inutak avinumekutak ini payt alapota ayge amamnabun avahnap. Igkis hiyeg hiyapni hene, igkis muhuke gimin. Igkis kidiswig. Ayipa kuwis gimiremni.
10Ig Pol hiyapni hene, ig muhuke atere ig tuguhkiswe givitminat. Ig ugiswig ig awna:
— Ka yi muwaka dunih yiyakni. Ig ivegnete akiw.
11Ayteke nikwe ig Pol diyuhe wagehe akiw. Ig ax ukakuh adahan kiyene ku samah Kiyavwiye Jesus umahkiswe udahanwiy. Pisenwa ig kinetihwa ukakuh ayivwad akiw he kabeyweke. Ayteke pisenwa ig tivik.
12Igme ner takweye ig iwepka givinwat ig wewvarihte. Madikte hiyeg bateke giminkis ku samah ig iveg akiw.
Pol tivik amadgew nawiy
13 Avit gitepkemni ig Pol awna gitkis:
— Yis atere avitit paytwempu Asôs navitkiy amadgew nawiy. Nahme atak waxriw. Ayge Asôs nah hawata nah kataptaw yimadgatnet. Uyay wahapnan ayge.
Usuh timapni hene, usuh ihe giwn. Usuh tivik amadgew nawiy.
14Igme patiptake usuh ayge Asôs. Usuhme amevevgi amadgat nawiy. Ayteke usuh tivik avitit paytwempu Mitilene. Usuh danuh atere.
15Usuh tarekwe ayteke akiw. Hewke akiw usuh mpiye avakniw kewgihri kewye Kiyosamnaw. Hewke akiw usuh danuh avitit Samosamnaw. Hewke akiw usuh danuh avitit paytwempu Miletu.
16Usuh mpiye paytwempu Efesu wadite avitit Miletu awaku ig Pol ka kahawkan minahwa atere avitit Efesu. Ig awna:
— Nah ka ayivwihwekere ay Asiyamnaw. Nah mpiya akak nuwawni kahadbe nah danuh atere Jerusalém pakeku akak ini fet kewye “Pentekostis”.
Pol ekkewviye gitkis Jesus gihiyegavu giwewkistenkis
17Ig danuh atere Miletu, ig wasavanew giminkis Jesus gihiyegavu efesuyenevwi adahan giwewkistenkis patiptakig atere.
18Igkisme danuh atere gimkat, ig awna gitkis:
— Ku samah akavuska nudawnhan atan Asiyamnawit yis hiyak ku samah nuwewni takunipti ay yibet.
19Nah kannivwiye gidahan Ukivarawiy, nah ka ikaw kiyatnema. Nah ikaw tuwatevye gidahan. Nukebyuvwi, nah suka nukantak nah tih awaku hiyeg gihiyekemnikis. Hawata nah kiyimwihka ka aynsima gavitkis neras judeyenevwi ku samah igkis ahegbete ginetnikis adahan igkis nuwmepten.
20Henneme ku samah nah hiya asamanak adahan yayavetni nah ayavay. Nuwnuh ka matiswa yit. Nah yikannuhten ku aysaw yis pahadguvu lammesya. Nah hawata yikannuhten ku aysaw yis ay yivineku.
21Nah ikenene yihiyekemni akak madikte nudatni yit hiyeg judeyenevwi, yit hiyeg ku pariye kane judeyenevwima. Adahan yis wages yihiyekemni ariw yitaraksan gidahan Kiyavwiye Uhokri. Adahan yis kamaxwa givitit Ukivarawiy Jesus Cristo.
22Kuri nah me tivikmet tahan avitit Jerusalém ku samah Kiyavwiye Uhokri Gitip awahkisun. Nah ka hiyak ku pariye danuh nutuh aygenek.
23Henneme ku kit nah danuh kuwis, ayge Kiyavwiye Uhokri Gitip akki nutuh ku nah hiyap mbeyne ka aynsimanek, ku nah kawih parakseketnek.
24Ka sam. Nah ka kavigsa nuvituh. Ininewa numawkan adahan nah pisenwa akak nannivwi ku pariye Kiyavwiye Jesus ike nuwakuwit. Ini nannivwi adahan nah ekkene inakni kibeyne inetit adahan Kiyavwiye Uhokri gabay.
25 Nah kuwis misakwa kibite kamukri ay yibet kuwis, nah kinetihwene yit amin Uhokri gikumadukan. Kuri nah hiyakni ku ka takunima yis ivegava nuhepka akiw ay amadga inin.
26Nah awna yit kuri akak madikte nuwakemni. Ku ay hiyeg biyukwiye in ka nuhawkanavrikma. Igkis biyuke gihawkanavrikkiswa.
27Mmanawa nah kuwis ekke yit madikte ku pariye Uhokri gihiyekemni. Nah ka ayam pahatnema iwit yiw.
Pol ikene gihiyekemnikis Jesus gihiyegavu giwewkistenkis
28— Nukebyuvwi, avuriwnabay yihiyekemni ba in kabayntiwatma. Hawata avuriwnabay gihiyekemnikis madikte hiyeg ku pariye Kiyavwiye Uhokri Gitip gavuriwkisni yit. Avuriwnigkis kewa muwtohvutnebe ku samah ignes avuriw givigkis kabayntiwa. Ikapnigkisba akak Kiyavwiye Uhokri giwn. Igkis Kiyavwiye Uhokri gihiyegavu. Ig Kiyavwiye Uhokri kuwis katiwnih adahan igkis humaw gidahan. Ig katiwnih akak gikamkayhwa gimig mmanawa ig umahkiswe gidukwenavrikkis.
29Nah hiyakni ku aysawnemenek ariwntak nutepkemninek hiyeg kiniseknevwi danuh atan yiyegbitnek. Igkis wasaymaw yitnek kahadbe yis biyukse yikamaxwan givititak Kiyavwiye Jesus. Igkis kewa axtigibe ku pariye danuh giyegbikis muwtoh adahan gaxwitnikis. Igkis arewhe gitkis yihiyegavunek.
30Hawata yaytaknek yiswa kavusanek akak hiyakemniki ku pariye nawenyewa ariw Uhokri gihiyekemni kahadbe hiyeg wages gihiyekemnikis yimkat.
31Avuriwnabay nikwe. Kiyeminahnabay ku samah adahan mpanabu kamukri nah ikene yihiyekemni akak nukanuh yit madikte. Nah ikene yihiyekemni mataytak he pabuskak mitipka.
32Kuri nukebyuvwi, Kiyavwiye Uhokri avuriwyinek. Ihpanabay giwn adahan gabay. Inakni giwn wagahkis yawayginek in utipkis yit madikte ini kabayka ku pariye ig Kiyavwiye Uhokri kuwis bayehe gidahankis gihiyegavu gikanyanvu.
33 Nukebyuvwi, ku samah nah aynete yibet nah ka aharitnema yikakura. Nah ka uti nukawihni yiduhyamadga. Nahwa kannivwi adahan nuvituh.
34Yiswa hiyap ku samah nah kannivwiye adahan nuvituh payak akak gidahankis nuhaptiyevwi.
35Akak madikte ini nannivwi nah kuwis humaw yikannuhten adahan ku samah amawka wixwiy mpiksaw hene adahan wixwiy amnihne neras hiyeg ku pariye kane hiya gikannivwinkis. Kiyeminahnabay amin Kiyavwiye Jesus giwn. Ig awna: “Ku wis kakanhaw git pahavwi in ka aynsima kabayte ariw ku wis kakanhawka wot.”
36Ayteke pisenwa gawnan inakni iwit ig Pol paberetusew ig piriyepkew gikakkis madikte.
37Ayge igkis madikte tihenekuye giharit. Igkis ugisgi. Igkis ayhbokig adahan ekkewviye git.
38Igkis wakaymnite adahan ku samah ig Pol awna inakni iwit amin: “Yis ka takunima yis ivegava nuhepka akiw amadga inin.”
Hene igkis tivik gihapti giwaxwepten tahan amadgat nawiy.
Currently Selected:
Attus 20: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
