2 Tesalonisenses 2
2
Jesus ka pisenwa akak inin hawkri kurinewa
1Nukebyuvwi, kuwis usuh ekke yit adahan ku samah Ukivarawiy Jesus Cristo gaytni atan adahan uvahdukawniwiy gimkanit. Nikwe usuh aya yit, 2ka yi muwaka iha giwnkis neras hiyeg ku pariye awna yit ku Ukivarawiy Jesus Cristo ku ig nehmnik kurinewa adahan pisenwevye akak inin hawkri. Ka yi muwaka iha giwnkis ignes ku pariye awna ku Kiyavwiye Uhokri Gitip akkin gitkis inakni. Ine kawnata yi muwaka iha giwnkis ignes ku pariye ikiy ku usuhnewa awna inakni hene. Usuh ka awna inakni. Ka yi muwaka iha giwnkis ignes ku pariye awna ku usuh tamak inakni amadga kagta. Ka yi muwaka kiyimwih yiyakni adahan ini. Ine ka yi muwaka biyuksa yihiyekemni.
Amawka awayg atiwkekne taraksaki amawka ig danuh
Iz 14.4; Dan 7.8, 8.9; 1Jo 2.18; Ap 6.2, 13.1, 17.7
3Ka yi muwaka kinikiswa arit nawenyewatma iwit akiw. Kote ikte adahan Kiyavwiye Jesus danuh atan adahan pisenwevye akak inin hawkri. Amawka avit ig keh hene, amawka ayipa gihiyegavu gitepkemnikis aytakihan. Ayteke ariwntak ini pahavwi awayg kahayaknek. Ig atiwkekne taraksaki. Ig ikaksaka adahanikwa biyukwiki.
4Avim ini ig kavetunsa madikte hiyeg giwohkigakis. Ig kavetunsa madikte ku pariye hiyeg kiyatha. Ig ikaw ke wotbe ig kabayte giwkis madikte. Ayge nikwe ig parak arikut Kiyavwiye Uhokri Givin, ig bat atere ke wotbe ig Uhokribe. Ayge ig ikawvari ku ignewa Uhokri.
5 Nukebyuvwi, mmah yis ka kiye inakni nuwnuh? Ku samah nah ayge yibet amakohnokwa, nah nubetki akki inakni yit.
6Ig ner awayg atiwkekne taraksaki ig kote kahayakte awaku pahavwi ay mpithanig. Yis kuwis hiyak ku pariye mpithanig. Heneme ig ner kahayaknek ku aysaw gihawkanavrik danuh.
7Taraksaki gavitkiya kuwis ay amadga inin, heneme ig kote kahayaksawte awaku ner pahavwi ku pariye ay kuri ig mpithanig. Heneme ku aysawnemenek ner pahavwi yuma ay akiw, nikwe ig ka mpithaka akiw.
8Ayge nikwe ig ner awayg atiwkekne taraksaki ig kahayaksawnek. Heneme ariwnteke ini ig Kiyavwiye Jesus danuh atan, ig umehpig akak gimaygbinenwa, ig pisenwe gihawkan akak gibutni.
9Ner awayg atiwkekne taraksaki ku aysaw ig kahayaksawnek, ig ayta akak Satanas gannu ay givit. Ig ka gannusima. Ig keh arakembet annut adahan kinisne hiyeg marihwa ignes ikiy ku ignewa Kiyavwiye Uhokri. Ig keh annut ku pariye keh hiyeg wakaymni ku ig Kiyavwiye Uhokri. Bawa giwasemni.
Hiyeg biyukavye kinikiswa git awayg atiwkekne taraksaki
1Ko 3.21; Ap 13.4
10Ig ner keh arakembet mbaykanek. Akak ini mbayka ig kinise hiyeg biyukavye. Ig kiniswigkis mmanawa igkis ka amevekere inakni Kiyavwiye Uhokri giwn ku pariye inyewatnene. Igkis ka batek akak inakni giwn. Igkis ka isahkiskere givathawnikis.
11Inneki keh ig Kiyavwiye Uhokri ikakse gidahankis adahan igkis kinikiswa avititak giyaknikis arit hiyakemniki ku pariye he wasaymkanen.
12Ayteke nikwe aysawnemenek igkis biyuknek avatra ku samah igkis ka iha giwn inyewatnene mmanawa igkis batekte akak givathawnikis mpiya inakni giwn.
Yisme danuh git Uhokri
13Yisme nukebyuvwi, yis Kiyavwiye Uhokri batek yikak. Amawka usuh kabayhig avanenekwa mmanawa avit hawkri humaw, ig Kiyavwiye Uhokri kaniyvey adahan yis isahptaw ariw yivathawni adahan yis danuhne git Kiyavwiye Uhokri. Yis isahptaw mmanawa Gitip ay yivit igi barewbetha yihiyekemni. Yis isahptaw mmanawa yis kamaxwene avitit Kiyavwiye Uhokri giwn inyewatnene.
14Adahanikwa ini isahptawka, ig Kiyavwiye Uhokri humakkiswey gimkanit akak ku samah usuh ekke yit inakni kibeyne inetit gidahan. Gimawkan wixwiy humaw kiyatyevwi akak Ukivarawiy Jesus Cristo gikiytani.
15Nikwe nukebyuvwi, misakwanay akak ini hiyakemniki ku pariye amin usuh kuwis kannuhpey. Ka yi muwaka isahkis inakni ku pariye usuh awahkis yimin amadga kagta. Ka yi muwaka isahkis inakni ku pariye yis kuwis timap ubiyaptakwa.
16 Kibeyne, Ukivarawiy Jesus Cristo gikak Wigwiy Kiyavwiye Uhokri igkis ka gamnihrakisima ukakwiy. Igkis kuwis ike wotwiy wawaygiy yuma amaksemni. Igkis keh wixwiy iveg gimkatkis ku aysawnemenek igkis utipkis wotwiy kibeyne kabayka akiw akak gabaykis.
17Igkis iki yawayginek ku avim inin adahan yis kamax gihiyekemni kabayntiwa kahadbe yis keh kabaykanen, yis awna kabaykanen.
Currently Selected:
2 Tesalonisenses 2: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
