2 Korintyus 7
7
1Nukebyuvwi kibeynevwi, ku samah ig Uhokri ikakse madikte ini kabayka wotwiy, uyay tukuhwe ariw madikte patahwaki ku pariye pataha uvitwiy ku pariye pataha uhiyekemniwiy. Uyay kiyatha ignewa Uhokri. Uyay mpiksaw wew wadit avigkutavrik ku samah gimawkan.
Usuh batek yikak mpiynevevye
2 Usuh aya yit, nukebyuvwi kibeynevwi, ivegnabay uvitit akiw. Ka yi muwaka iki yitew gitkis neras ku pariye awnenevwi uminuh. Usuh kote taraksate gikak pahavwinema hiyeg. Usuh kote mbayhate pahavwinema gihiyekemni. Usuh kote kiniste pahavwinema.
3Nah ka awnenema inakni akakma nudagoni. Mmanawa ku samah nah kuwis awna, usuh batek yikak mpiynevevye. Ku yis muwaka yaymukwan amadga inin, usuh ahegbet adahan aymuhwa payak yikak. Ku yis muwaka umahkiswa, usuh ahegbet adahan umahkiswa payak yikak.
4Nah iveg yivitit. Nah hiyakni ku yis keh kabayntiwa yis tiviknene gikak Uhokri. Nah kibeyhene yiw muwapuw. Yis keh nuyakni karisaw. Yis keh nah batek mpiynevevye. Hiyawa usuh abet mbeyne, heneme yisnewa keh nah nudukwenewa bateke numinuh.
Ku samah yis iha nuwnuh in wagahkis nawaygi
5Henewa, nukebyuvwi kibeynevwi. Kuhwekwa ku samah usuh danuh avitit Masedôniyamnaw usuh ka mayakti ariw mbeyne. Ayge usuh hiyap arakembet mbayka. Awkin uvitiw usuh kiyimwihka, avitme uyakni aviska parak usuh.
6Heneme kibeyne, ig Uhokri ike wawaygi. Ig ku pariye avanenekwa ikene gawaygikis neras ku pariye barukiswenevwi, ig ike wawaygi ku samah ig patiptakse usuh gikak kiyavwiye Titu.
7Ka ininewatma awaku ku samah usuh patipteke gikak kiyavwiye Titu in ike nawaygi. Heneme inakni ginetni yimin, ku pariye wagahkise gawaygi, in wagahkise udahan wawaygi hawata. Ig ekke wotuh ku samah yis ka aynsima hiyepkerevun akiw, yis kayehe yitaraksan, yis ihpekere nuwnuh. Nah timapni hene, nah ka aynsima batekte akiw.
8Pitatye nah kabahte kiyimwihwate akak ku samah nah awahkise inere pitatye kagta yimin adahan kiyekisne yitaraksan yit. Mmanawa nah ka yimerekwetnima. Kurime nah ka kiyimwihwa nikak akiw. Hiyawa in marekevyi aynesa, 9heneme kuri nah bateke ku samah nah awahkiswin yimin. Nah ka batek awakuma ku samah yis marekevwema, heneme awaku ku samah yimaran keh yis wagese yihiyekemni. Yis marekevwe, mmanawa henewa Uhokri gimawkan. Nikwe inakni nuwnuh yit in ka pes adahan mbaykama yidahan. In pes adahan kabayka.
10Ku wis marekevwe ku samah Uhokri gimawkan, ku wis kiyimwihwa akak utaraksan, in keh wis utinek kabayka, ayge nikwe wis ka kiyimwihwa akiw. Heneme ku umaran ke hiyegbe amedgenevwi inin gimarankisbe ini keh wis utinek miyaka.
11In huwewe ku yis marekevwe avigkutavrik ku samah Uhokri gimawkan. Mmanawa pahaye adahan yis kayehe yitaraksan, yis tukuhwebdih niw. Yis marekevwe akak yitaraksan. Yis ka taraksekere akiw. Yis batukewnene adahan wew wadit. Yis mpiksaw niharit. Yis hiyak kibehtenwa gikakkis neras aygnenevwi yibet ku pariye kane wewkere wadit. Yis waditebdihe yihawkan kabayntiwa avigkutavrik ku samah Uhokri gimawkan.
12Nah awahkise inere pitatye kagta yimin ka adahanenwatma waditebdihpiyema gihawkankis hiyeg taraksavye, ine ka adahanenwatma waditebdihpiyema gihawkankis neras ku pariye taraksepka gikakkis. Heneme nah awahkisni hawata adahan ekkene yit giwtriknewa Uhokri ku nah ka miyehyi, nah kiyenay akak madikte nubetki, nah ka aynsima muwaka yis wew wadit.
13Ini ku samah yis ihe nuwnuh in ikene nawaygi. Usuh hawata iwe ka aynsima wawaygi giwntak kiyavwiye Titu ku samah ig ka aynsima batek yikak. Mmanawa yis kariswehse giyakni kabayntiwa.
14Avit ig tivik yimkat nah awna git ku yis kibeynevwi hiyeg. Kibeyne, inakni nuwnuh ka marakwan. Ku samah nah avanenekwa awnene iwit inyewatnene yit, hawata inakni nuwnuh git kiyavwiye Titu in kahayak ku in inyewatnene.
15Adukwenewa gibetki yikak ka aynsima ku aysaw ig kiye ku samah yis kiyatevgi, yis amevevgi kabayntiwa, yis ihe giwn.
16 Kibeyne, nah ka aynsima bateke numinuh ku samah ik adahan nah iveg yivitit ka aynsima.
Currently Selected:
2 Korintyus 7: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
