1 Tesalonisenses 4
4
Ka ba yi daxtasaw arit powkemniki
Ro 12.9, 13.13; 1Ko 6.12; Gal 5.19; Ef 5.3; Kol 3.5; Jud 1.4
1Nukebyuvwi, usuh kuwis akki yit adahan ku samah amawka wixwiy wew kehnenekwa Kiyavwiye Uhokri gibetki. Kibeyne, nukebyuvwi, yis kuwis wewne hene. Heneme kuri usuh aya yit giwavrik Kiyavwiye Jesus adahan yis wewne ka aynsima kabayte akiw.
2Mmanawa yis hiyak inakni Kiyavwiye Jesus gikumadukan ku pariye usuh kuwis akki yit.
3 Usuh akki yit ku ig Kiyavwiye Uhokri muwaka yis misakwa barewvitye. Ig ka muwaka yis daxtasaw arit powkemniki.
4Ig muwaka madikte awayg kamax gidahankiswa gihayokis akak gihiyekemnikis barewbetye. Ig muwaka igkis kiyatigkis kabayntiwa.
5Ig ka muwaka igkis arewatigkis kema nerasma hiyeg ku pariye kane ikaw git Kiyavwiye Uhokri.
6Amawka yuma pahavwinema awayg kamax gikebyi gihayo. Ku ig miyatig hene, in humaw mbeyevye taraksaki. Ig Kiyavwiye Uhokri diyuhkisnek neras ku pariye kehnevwi akebi ini mbayka. Usuh kuwis akki yit inakni akak madikte wawaygi.
7Mmanawa ig Kiyavwiye Uhokri ka humakwi adahanma patahwakima heneme ig humakwi adahanikwa barewvitka.
8Nikwe ku pahavwi suguh inakni nuwnuh, amun ini nikwe ig ka suguhnema giwnma hiyeg amadgayama inin, heneme ig suguhne Kiyavwiye Uhokri giwn ku pariye iki Gitip barewvitye uvititwiy.
Batekaknay pawtak
Mt 22.39; Jo 13.34, 15.12; Gal 5.14; 1Ped 1.22; 1Jo 3.11, 4.7; Tiy 2.8
9 Kuri nah kinetihwekere amadgatak inin kagta adahan ku samah amawka Kiyavwiye Uhokri gihiyegavu batekak pawtak. Kibeyne, yis ka muwaka adahan nah akki yit amin inakni mmanawa igwa Kiyavwiye Uhokri kuwis kannuhyi adahan yis batekak pawtak ke wotbe yisweke pakebyeknebe guwntak pahavuwa inagti.
10Henewa yis batek gikakkis madikte ukebyuvwiy muwapuw avit waxri Masedôniyamnaw. Heneme usuh aya yit umawkan yis ka aynsima batekakte akiw.
Kannivwinay adahan yivit
At 20.35; 1Ko 4.12; Ef 4.28; 2Tes 3.6
11Battukawnabay adahan yivit adahan yis kannuhwa kariswavu adahan yis ka matekbeta nawenyevwi hiyeg gihawkankis. Kannivwinay adahan yivit akak madikte yimaviswan ku samah usuh kuwis akki yit.
12Ayge nikwe hiyeg ku pariye kane Uhokriyanvuma ignes hiyapni hene, igkis kiyathay. Ayge yis kawnata misakwa giduhyamadgama pahavwi hiyeg.
Ka aynsima kabayka ay gidahankis ukebyuvwi miyaravye
1Ko 15.51; 2Ko 5.4
13Kuri nukebyuvwi, usuh ikene yinetni kahadbe yis hiyak ku pariye danuhnek gitkis neras Jesus gihiyegavu ku pariye kuwisnene miyarap. Usuh ikene yinetni kahadbe yis ka barukiswepma. Hiyeg kane Uhokriyanvuma ignes barukiswa ka aynsima mmanawa gitkis yuma kabayka akiw gidahankis gikebyuvwi miyaravye. Wixwiyme ka henema.
14Wixwiy hiyakni ku Kiyavwiye Jesus miyap heneme ig kannikaw ariw gimiremni. Nikwe ik adahan wixwiy hiyakni ku Kiyavwiye Uhokri kannikasa neras kamaxwenevwi givitit Kiyavwiye Jesus neras ku pariye kuwisnene miyarap. Ig kannikasigkis awaku ku samah igkis pahavwiwa gikak Kiyavwiye Jesus.
Jesus ayta adahan iweviye gihiyegavu
Mt 24.30; Eb 9.28; Ap 1.7
15Kuri usuh akkamnihte yit ku pariye igwa Ukivarawiy akki wotuh adahan ku pariye nehmnikuhpiye. Neras hiyeg aynenevwi avim ini ku aysaw ig Kiyavwiye Jesus danuh, ku pariye kotenene miyate, igkis ka wagah gimkanit igkiskitnema giwkis neras ku pariye kuwisnene miyarap.
16Mmanawa avim ini hawkri igwa Ukivarawiy muhuk inuriktak. Ig kabiman akak gihawna, akak kabimanka ke ahjbe detyebe. Ayge tohompet agighaka adahan uvanduketniwiy gimkat. Aynewa neras kamaxwenevwi givitit Cristo ku pariye kuwisnene miyarap igkitnes kannikew.
17Ayteke neras aynenevwi ku pariye kotenene miyate, ignes iwepka inut payak gikakkis neras ku pariye kuwisnene miyarap. Igkis wagehe abetimpi ukuhne. Ayge abet mayg wixwiy patiptak gikak Ukivarawiy. Ayteke nikwe wixwiy misakwa gimun adahan avanenekwa.
18 Nukebyuvwi, aydhaknay pawtak akak inakni iwit.
Currently Selected:
1 Tesalonisenses 4: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
