1 Korintyus 6

Ka ba yi kamiyavak git pahavwi kane Uhokriyanma

1 Nah hawata kuwis time yak ku yis ku aysaw yis tarakse pawtak, yis tahan kamiyavak git hiyaptigi. Mmahki yis keh hene? Ig hiyaptigi ig ka Uhokriyanma. Mmahki yis ka wadithebdih yihawkan yisweknema ayge?

2Wixwiy Jesus gihiyegavu aysawnemenek wixwiynewa hiyekne akak inin hawkri madikte. Mmah nikwe yis ka ik adahan wadithebdih ini arikna nopsesnene?

3Aysawnemenek wixwiynewa hawata hiyekne gikakkis ahj inurikyene. Nikwe ku avim inin kiskama yis wadithebdihnene yikehni ay amadga inin.

4Yisme ku aysaw yis muwaka wadithebdih yitaraksan nopsesnene, yis atak kamiyavak tahan git pahavwi ku pariye kane Uhokriyanma. Mmahki yis atak gimkanit?

5Kiskama yis mara akak yikehni. Mmah yuma pahavwinema yaytak ayge hiyakemniye adahan wadithebdihne yitaraksan?

6Yisme kawa ivegvawa yaytak. Yis isaksa pahavwi Jesus gihiyega kamiye giyaki Jesus gihiyega ta git pahavwi ku pariye kane Jesus gihiyegama.

7Yis kamiyavak kahadbe pahavwi mataka pahavwi. Heneme ku yis kamiyavak hene, nutuh amun ini yis madikte kuwis biyuk. Wake yis amavinbe ku samah pahavwi tarakse yikak, in kabaytekama ariw ku yis kamiyavak git pahavwi ku pariye kane Jesus gihiyegama. Henewatbaki, wake yis amavinbe ku samah pahavwi arewha yit, in kabaytekama.

8Heneme yis ka amava. Yisweke taraksak pawtak. Yis arewhak pawtak yisweke Jesus gihiyegavu.

Hiyeg patahwavye ka kawih Uhokri gikumadukan

Gal 5.21; Ef 5.5; Ap 21.8, 22.15

9Ka ba yis hiyapknima ku hiyeg kane kibeynevwima ku ignes ka kawih Uhokri gikumadukan? Ka yi kinikiswa gitkis. Henewatbaki igkis ka kawihti. Ine hiyeg mahayakamnavye. Ine hiyeg ku pariye kiyathenevwi ahehpakti batakkarad. Ine hiyeg ku pariye powkemnavye. Ine hiyeg ku pariye amin giyak awayg.

10Ine hiyeg amevwavye. Ine hiyeg kowtyakuvye. Ine hiyeg ba gibetkikis uwkihwa. Ine hiyeg ku pariye gibetkikis pataha hiyeg giwkis. Ine hiyeg arewhavye. Akebi neras hiyeg ka kawihti Uhokri gikumadukan.

11Minikwak wixwiy akebite neras hiyeg. Heneme kibeyne, kuri wixwiy kuwis sagahptew ariw uvathawniwiy. Kuri wixwiy barewvityevwi gidahan Uhokri. Wixwiy kibeynevwi giwtrik. Mmanawa wixwiy kuwis pahavwihwe gikak Ukivarawiy Jesus Cristo, igme Uhokri Gitip kawihpewiy.

Ka yi muwaka powkemnihwa

Mt 5.27; Ro 13.13; Ef 5.3; Kol 3.5; Jud 1.4

12 Nawenetke pahavwi yaytak ayge, ig awna: “Ik adahan nah keh madikte ku pariye nuhiyekemni aya.” Nahme awna pit, henewa, ik adahan wis keh madikte. Heneme ka madiktema kabay udahan. Ik adahan nahwa awna: “Ik adahan nah keh madikte ku pariye nuhiyekemni tuguh.” Heneme nah ka kehkere ariknawnema mbayka ku pariye ik adahan kumaduka nuvituh.

13Nawenetke pahavwi awna: “Utun humaw adahanikwa axka. Ka sam wis ax. Inme uvit humaw nidahanikwa. Nikwe kawnata sam wis keh ubetki nikak.” Nahme awna pit, henewa utun humaw adahanikwa im. Inme im humaw adahanikwa utun. Heneme aysawnemenek ig Uhokri pisenwanek akak utun payak akak im madikte. Inme uvit ka humaw adahan mahayakemnihwenema. In humaw gidahanikwa Kiyavwiye Jesus. Ignewa kawihni.

14Ku samah ig Uhokri kuwis kannikase Kiyavwiye Jesus givit, nikwe aysawnemenek ig kannikasa udahanwiy uvitwiy hawata akak inwata gidatni.

15Ka ba yis hiyapknima ku uvitwiy pahavwiwa gikak Cristo? Uvitwiy ke wotbe in givitwatbe. Nikwe ka hiya wisma daykis Cristo givit gukak pahavu tino powkemnivyo. Ka hiya wisma keh hene.

16Ka ba yis hiyapknima ku pahavwi ku ig hamah gukak pahavu tino powkemnivyo, nikwe ayge amun inere ig pahavwihwe gukak? Mmanawa Uhokri gannasan awna:

— Ku piyana hiyeg hamah pawtak, amun ini nikwe egkis piyamate humaw ke wotbe egkis pahavwiwatbe guvitkis.

17Heneme ku pahavwi pahavwihwe gikak Kiyavwiye Jesus amun ini nikwe igkis pahavwiwa pawtak. Ka ininewatma givitkis, heneme hawata gihiyekemnikis.

18Nikwe ka yi muwaka powkemnihwa. Tukuhwepnabay niw. Madikte utaraksan nawenyewa in ka mahivwih uvit. Heneme ku wis powkemnihwa, amun ini wis mahivwihne uvit.

19 Amawka wixwiy ka kehni hene, mmanawa uvitwiy in Uhokri Gitip givin. Ig Uhokri kuwis kawihkise Gitip uvititwiy. Ig ay uvitwiy. Kuri nikwe uvitwiy ka udahanwiywatma akiw. Uvitwiy gidahanikwa Uhokri.

20Wixwiy katiwnihka gavit Uhokri akak kibeyne itiwnit adahan wixwiy humaw gidahanen. Nikwe uyay kawih uvitwiy adahanikwa kibeyhene Ukivarawiy Uhokri.

Currently Selected:

1 Korintyus 6: pluPB

Highlight

Copy