Páhin 2
2
Ewánoonii ya eti Kunuu ka keenape ka ti kéeyinane ka
1Ta pahaaño pa piti Pentekos#2:1 Pentekos, ekina eyem hinoom ha eeha Pusuwif pa nkáhin ha teeho pahaaño pa piti kaamaañ ka. Néhineehin loho pahaaño pa piti Himuusu ha pitaakaa kunoom áwii ésupak niŋ ŋaasuwan (50). Efúlii 23:16; 34.22; Lewitik 23:15-21; Kakaman 16:9-12. mpútuuniye ta, kéeyinane ka ti Yéesu púlooŋ nkayeno nantoonool. 2Tokotoko pahampanane mpúfulii patiila samat nii pasapal hiyam heehiñe. Pahampanane empuu mpimeeŋan ekumpaan ya púlooŋ eyya nkayeniye ya teyyo. 3Ti oom káasiiŋuma, waah núufulii teyii weecuke nii kíleeluuf kiti seemak, nkihancaloolo nkinaŋo ti an óo an teyii. 4Poko púlooŋ nkameeŋ niŋ Kunuu ka keenape ka nkáyaañ káakup niŋ pikee pikaŋ samat nii fa Kunuu ka keenape ka nkuwufanii fa.
5Fiye, intaako toko Pusuwif kéefulii ti mah ma púlooŋ miti púlunta pa nkayeno Jerusalem. Nkayeno pákayiin keefeye Pútuun. 6Ta nkásiye ta pahampanane empuu, kayoŋ kenfakat nkuconcool. Innímii kamma an óo an teyii náasiye pinapana pa pakati Yéesu nkayeniye káakup ti híleeluufuyoo eeha náacuuwe ha. 7Nkaŋaŋo ínnimii nkacakan: “Fo keeyem ka fiye púlooŋ ti káakup pakati Galilee tom? 8Weyme uwune an óo an tuunaa púlooŋ náayemiyii ti hísiyu ti híleeluufuyoo eeha náacuuwe ha? 9Unaa kéefuliyaa ka Paat, Meti niŋ Elam; pakan kéefulii Mesopotami, Judaay niŋ Kapatos; pakan kéefulii Pont niŋ Asii, 10kéefulii Filiki niŋ Panfili, kéefulii Esipt niŋ misaatee ma miti Libiya meekole ma saatee ya eti Silen. Pakakee tuunaa nkáfulii Room, 11Kilet niŋ Arabiya, pakakee paka Pusuwif, pakakee paka lompo keeyesane eloŋ ya eteyii nkananf ti pítin pa piti Pusuwif pa. Pale unaa púlooŋ núusiyii ti káakup ti kíleeluuf unaa enka núucuuwaa ka ti kakaman waah wa wenfakat wa weemeeŋe wa ewwa Pútuun pa mpíhine wa!” 12Nkaliim meemak ínnimii, nkatowo ti ecakanoolo: “Eehe weyme níhiyisane?” 13Pale pakakee paka nkápalahool kéeyinane ka ti Yéesu nkalenkenii nkasok: “Payenkuu kákumanaakuman!”
Káyisan ka kiti Piyeer ayme ayem Yéesu
14Púful toko, Piyeer naasiiŋo niŋ pupoñapoñ pa ŋaasuwan niŋ oonool a. Ti hiceeku, náayaañ káakup niŋ kayoŋ ka apusok: “Aluu pakanam Pusuwif pa niŋ aluu púlooŋ keekine ka Jerusalem nísiitanam pinap, inci pikaman aluu heeyem ha ti pitaako. 15Pakan paka payenke kákumanut samat nii fa ínninunkoole fa, cicomaacomo. 16Haani! Pale eehe ayaamakoola ya Sowel náatuunane:
17 'Pútuun pa pusok: "Ti kunoom ka kikelan ka,
inci fawwufan kunuuwam an óo an.
Epuuk aluu pikampaani niŋ púmaacul efinkayaamakool ti caacawam,
uhiineen wa niŋ ñíhampaatiin ña pakataaluu éfinkayawut, nkacuk lompo waah pucuk fiye nii éyawut nkayaake.
18 Ee, háati pimiikan pa pakatoom, pákayiin paka niŋ pakaal paka,
inci fawwufanii kunuuwam ti kunoom enkuu,
efinkayaamakool ti caacawam.
19 Fáhin waah weecukantee nuucukee patiila,
ínhin hícump píyisan penfakat t’etaam.
Fataako hísim, seemak niŋ útiŋu uti háaputa.
20 Caanak ca éficinim,
hiim ha níhicunk nii hísim
le niŋ hinoom ha heemaka ha henfakat ha hiti Ateeteyo Pútuun pa éfihicolii.
21 Tempo an óo an eeluume
ti caacaw Ateeteyo Pútuun pa afaafakanee."' #
Sowel 3:1-5
22“Aluu pakati Israyel, nísiitan pinap eeha inci inkaakaay ha aluu hisoku: Yéesu ati Naasalet akina an aŋa innimeya nii Pútuun pa umpa neyoo kaatuko puwufanoowufan íhinu hátikin aluu waah wenfakat, hícump píyisan niŋ weecukantee samat nii fa innimeya wo fa aluu himuum aluu. 23Yéesu aŋe acokeecok naawufanee aluu samat nii fa Pútuun pa mpílafiye fa, pikina peemeya pa eehuu púlooŋ hítaakumo. Aluu nimukoo, ta inniwufanoo ta píhina heenaput ha kapipempeŋoo ti kuluwaa ya. 24Pale Pútuun pa mpúfulanoo ti kúnuul ka kiti eket ya, mpíñahaniyoo ti eloŋ ya, kaatuko eket ya etaakut sempe teyoo. 25Dawid naasok kiteyoo:
'Inci incukcuk Ateeteyo Pútuun pa hátikinam tan óo tan.
Kaatuko oopa niŋ inci,
ancuk etikikilan.
26 Ekina ewune yaanam neemon, inci oopa ti caacook niŋ pásuuma.
Háati eniinam lompo éfeewaayeen kamma inci ínhine cíki.
27 Kaatuko awe Pútuun aatikatam piyeno pati keekete ka,
aatikat enii amiikan a atii eenape ya epufut ti hiyaak.
28 Aáyisanaam-yísan ñítin ña ñeekaaye ña pati eloŋ ya,
aafameeŋanam niŋ pásuuma hátikini.' #
Kícimu 16:8-11
29“Aluu pakanam, inci púkup naaluu niŋ híyiinate kiti maamaa atuunaa amansa ya Dawid. Aketaaket naahokee, fo fíyooy hiyaak ha hiteyoo hoopuha le tuunaa. 30Pale Dawid ayenaayeno ayaamakoola, náameyi eeha Pútuun pa mpisintooliye ha teyoo nii éfipufulanii ti miin ma miteyoo amansa samat nii akina. 31Dawid naacuk eeha Pútuun pa mpikaakaay ha íhinu hátikin, náakup kiti pilito pa piti Eenucee ya ati Pútuun pa, ta naasoke ta nii akatutee pati keekete ka, eniinoo lompo efutut ti hiyaak ha. 32Yéesu aŋe Pútuun pa mpilitane ti eket ya, unii púlooŋ utantake ho. 33Naasilanee ti epees yáali eti Pútuun pa Paapaa ateyoo, mpuwufanoo Kunuu ka keenape ka samat nii fa mpusokoo fa. Aŋe inniyem ya fiye ti hicuku ínnisi ekina eyem kawun etempo enka mpíniisii ka toonii. 34Dawid himuumoo asiliit alacana pale naasok:
'Ateeteyo Pútuun pa púkupaakup niŋ Ateeteyo atoom ti hisoku:
"Kéy yeniyam epees yáali,
35 fo ta inci fatah ta pikamooli ti wooti ayyeno amansa ya ateyii."' #
Kícimu 110:1
36“Fiye aluu pakati Israyel púlooŋ niñaŋaa kameye eehe pánipani, Yéesu aŋe, aŋa innipempeŋe ya ti kuluwaa ya, Pútuun pa píhinoo apiyeno Ateeteyo niŋ lompo Eenucee ya.”
37Ta pakan paka nkásiye ta eehe, ínciitiyii meemak nkacakan Piyeer niŋ pakakee pupoñapoñ pa, “Aluu pakan unii, puume nuuñaŋe íhinu?” 38Piyeer naañahanii: “Níwunko umuuyen wa utaaluu, an óo an ti aluu náahinee pátise ti caacaw ca citi Yéesu Krista, ancuk umuuyen wa utaaluu nuuponketee, Pútuun pa mpuwun aluu Kunuu ka keenape ka. 39Kaatuko Pútuun pa píyinananaa-yínanan nii efipuwufan ko aluu niŋ epuuk aluu niŋ lompo keekine ka pílaaŋ, focaa payenka púlooŋ Ateeteyo Pútuun pa putuunaa mpikaakaay ka éyonkalii.”
40Piyeer naapenanii kunuu niŋ kikee kilim keemeeŋe, naaŋiiniyii ti hisoku: “Nifakan faŋ aluu ti ekaay eenaput eyye!” 41Keecoone ka hilim ha hiti Piyeer nkáhinee pátise, máamun pakan síwuli síhaaciil (3,000) nkananf ti oom hinoom kéeyinane ka.
Eloŋ ya éeyeeni ya eti kéeyinane ka
42Kéeyinane ka nkákipen ti káasiitan eeha pupoñapoñ pa nkakalaŋanii ha; nkákipen lompo ti pucokool piliit, ti káapaacinool kúmpuul#2:42 Kasalaasal hili nantoonool. Ti keemeya ka hilim ha hiti Pútuun pa, hícump níhimiilool nii, nkapayaa hili, nkafiitool kúmpuul nkápaacinool ko samat nii fa Yéesu náahine fa ti káciim ka kiteyoo kikelan ka enka naataake ka niŋ pinapana pa pakateyoo le niŋ paketaloo (22:7 – 23). niŋ ti kaluum. 43An óo an naameeŋ niŋ ewatate, kamma Pútuun pa mpíhine hícump píyisan niŋ weecukantee wéenapii ti pupoñapoñ pa. 44Kéeyinane ka púlooŋ nkacokool, nkápaacinool waah óo waah ewwa nkataake. 45Pikee pa, nkanooman pitaam pa piteyii niŋ hitaaku ha hiteyii, nkápaacinool mañ ma, nkawufan an óo an fa naasoolahe. 46Hinak óo hinak nkaconcool ti hank ha hiti ekumpaan ya enfakat ya eti Pútuun pa, nkápaacinool kúmpuul ti pukumpaan pa piteyii, nkali nantoonool niŋ pásuuma, an péemakiyanooliit. 47Nkanimpan Pútuun pa, pakan paka púlooŋ nkálafiyii. Hinak óo hinak Ateeteyo napenan ti kayoŋ ka kiteyii pakan keefakanee.
Kuloonaay © Wycliffe Bible Translators, Inc. 2026.