ਰੋਮ 14

ਦੂਜਿਆਂ ਉੱਤੇ ਦੋਸ਼ ਨਾ ਲਾਓ

1 # ਕੁਲੁ 2:16 ਤੁਸੀਂ ਕਮਜ਼ੋਰ ਵਿਸ਼ਵਾਸ ਵਾਲੇ ਨੂੰ ਸਵੀਕਾਰ ਕਰੋ ਪਰ ਉਸ ਦੇ ਨਾਲ ਉਸ ਦੇ ਨਿੱਜੀ ਵਿਚਾਰਾਂ ਬਾਰੇ ਬਹਿਸ ਨਾ ਕਰੋ । 2ਇੱਕ ਮਨੁੱਖ ਜਿਹੜਾ ਵਿਸ਼ਵਾਸ ਕਰਦਾ ਹੈ ਕਿ ਉਹ ਸਭ ਕੁਝ ਖਾ ਸਕਦਾ ਹੈ ਪਰ ਦੂਜਾ ਮਨੁੱਖ, ਆਪਣੇ ਕਮਜ਼ੋਰ ਵਿਸ਼ਵਾਸ ਦੇ ਕਾਰਨ ਕੇਵਲ ਸਾਗ-ਸਬਜ਼ੀ ਹੀ ਖਾਂਦਾ ਹੈ । 3ਉਹ ਮਨੁੱਖ ਜਿਹੜਾ ਸਭ ਕੁਝ ਖਾ ਸਕਦਾ ਹੈ, ਉਸ ਨੂੰ ਤੁੱਛ ਨਾ ਜਾਣੇ ਜਿਹੜਾ ਹਰ ਇੱਕ ਚੀਜ਼ ਨਹੀਂ ਖਾ ਸਕਦਾ । ਇਸੇ ਤਰ੍ਹਾਂ ਉਹ ਜਿਹੜਾ ਸਾਗ-ਸਬਜ਼ੀ ਹੀ ਖਾਂਦਾ ਹੈ, ਉਸ ਉੱਤੇ ਦੋਸ਼ ਨਾ ਲਾਵੇ ਜਿਹੜਾ ਸਭ ਕੁਝ ਖਾਂਦਾ ਹੈ ਕਿਉਂਕਿ ਪਰਮੇਸ਼ਰ ਨੇ ਉਸ ਨੂੰ ਸਵੀਕਾਰ ਕੀਤਾ ਹੈ । 4ਤੂੰ ਕਿਸੇ ਦੂਜੇ ਦੇ ਸੇਵਕ ਉੱਤੇ ਦੋਸ਼ ਲਾਉਣ ਵਾਲਾ ਕੌਣ ਹੁੰਦਾ ਹੈਂ ? ਇਹ ਉਸ ਸੇਵਕ ਦੇ ਮਾਲਕ ਦਾ ਕੰਮ ਹੈ ਕਿ ਉਹ ਦੇਖੇ ਕਿ ਉਹ ਸੇਵਕ ਠੀਕ ਕੰਮ ਕਰਦਾ ਹੈ ਜਾਂ ਗ਼ਲਤ । ਉਹ ਠੀਕ ਹੀ ਕੰਮ ਕਰੇਗਾ ਕਿਉਂਕਿ ਪ੍ਰਭੂ ਉਸ ਨੂੰ ਇਸ ਯੋਗ ਕਰ ਸਕਦੇ ਹਨ ।

5ਕੋਈ ਮਨੁੱਖ ਸਮਝਦਾ ਹੈ ਕਿ ਕੋਈ ਇੱਕ ਦਿਨ ਦੂਜੇ ਦਿਨਾਂ ਨਾਲੋਂ ਜ਼ਿਆਦਾ ਮਹੱਤਵਪੂਰਨ ਹੈ ਪਰ ਦੂਜਾ ਮਨੁੱਖ ਸਾਰੇ ਦਿਨਾਂ ਨੂੰ ਇੱਕੋ ਜਿਹਾ ਸਮਝਦਾ ਹੈ । ਹਰ ਇੱਕ ਨੂੰ ਆਪਣੇ ਮਨ ਦੇ ਵਿਚਾਰਾਂ ਉੱਤੇ ਪੱਕਾ ਭਰੋਸਾ ਹੋਣਾ ਚਾਹੀਦਾ ਹੈ । 6ਉਹ ਜਿਹੜਾ ਕਿਸੇ ਦਿਨ ਨੂੰ ਮਹੱਤਵਪੂਰਨ ਸਮਝਦਾ ਹੈ, ਉਹ ਪ੍ਰਭੂ ਦੇ ਲਈ ਹੀ ਸਮਝਦਾ ਹੈ । ਇਸੇ ਤਰ੍ਹਾਂ ਉਹ ਜਿਹੜਾ ਜੋ ਕੁਝ ਵੀ ਖਾਂਦਾ ਹੈ, ਉਹ ਪ੍ਰਭੂ ਦੇ ਲਈ ਖਾਂਦਾ ਹੈ ਕਿਉਂਕਿ ਉਹ ਇਸ ਦੇ ਲਈ ਪਰਮੇਸ਼ਰ ਨੂੰ ਧੰਨਵਾਦ ਦਿੰਦਾ ਹੈ ਪਰ ਜਿਹੜਾ ਕੁਝ ਚੀਜ਼ਾਂ ਨਹੀਂ ਖਾਂਦਾ, ਉਹ ਵੀ ਪ੍ਰਭੂ ਦੇ ਲਈ ਹੀ ਨਹੀਂ ਖਾਂਦਾ ਕਿਉਂਕਿ ਉਹ ਪਰਮੇਸ਼ਰ ਦਾ ਧੰਨਵਾਦ ਕਰਦਾ ਹੈ । 7ਸਾਡੇ ਵਿੱਚੋਂ ਕੋਈ ਵੀ ਕੇਵਲ ਆਪਣੇ ਲਈ ਨਹੀਂ ਜਿਊਂਦਾ ਹੈ ਅਤੇ ਨਾ ਹੀ ਕੇਵਲ ਆਪਣੇ ਲਈ ਮਰਦਾ ਹੈ । 8ਜੇਕਰ ਅਸੀਂ ਜਿਊਂਦੇ ਹਾਂ ਤਾਂ ਪ੍ਰਭੂ ਦੇ ਲਈ ਜਿਊਂਦੇ ਹਾਂ ਅਤੇ ਜੇਕਰ ਮਰਦੇ ਹਾਂ ਤਾਂ ਪ੍ਰਭੂ ਦੇ ਲਈ ਮਰਦੇ ਹਾਂ । ਇਸ ਲਈ ਭਾਵੇਂ ਅਸੀਂ ਜਿਊਂਦੇ ਰਹੀਏ ਜਾਂ ਮਰੀਏ, ਦੋਨਾਂ ਹਾਲਤਾਂ ਵਿੱਚ ਅਸੀਂ ਪ੍ਰਭੂ ਦੇ ਹੀ ਹਾਂ । 9ਕਿਉਂਕਿ ਮਸੀਹ ਇਸੇ ਲਈ ਮਰੇ ਅਤੇ ਜੀਅ ਉੱਠੇ ਕਿ ਉਹ ਜਿਊਂਦੇ ਅਤੇ ਮੁਰਦਿਆਂ ਦੋਨਾਂ ਦੇ ਪ੍ਰਭੂ ਹੋਣ । 10#2 ਕੁਰਿ 5:10ਜੇਕਰ ਇਹ ਗੱਲ ਹੈ ਤਾਂ ਤੂੰ ਆਪਣੇ ਭਰਾ ਉੱਤੇ ਦੋਸ਼ ਕਿਉਂ ਲਾਉਂਦਾ ਹੈਂ ? ਜਾਂ ਤੂੰ ਉਸ ਨੂੰ ਤੁੱਛ ਕਿਉਂ ਸਮਝਦਾ ਹੈਂ ? ਕਿਉਂਕਿ ਅਸੀਂ ਸਾਰੇ ਪਰਮੇਸ਼ਰ ਦੇ ਨਿਆਂ ਵਾਲੇ ਸਿੰਘਾਸਣ ਦੇ ਸਾਹਮਣੇ ਖੜ੍ਹੇ ਹੋਵਾਂਗੇ । 11#ਯਸਾ 45:23ਜਿਸ ਤਰ੍ਹਾਂ ਪਵਿੱਤਰ-ਗ੍ਰੰਥ ਕਹਿੰਦਾ ਹੈ,

“ਪ੍ਰਭੂ ਦਾ ਵਚਨ ਹੈ, ‘ਮੈਨੂੰ ਆਪਣੇ ਜੀਵਨ ਦੀ ਸੌਂਹ ਕਿ

ਮੇਰੇ ਸਾਹਮਣੇ ਹਰ ਕੋਈ ਗੋਡਾ ਟੇਕੇਗਾ,

ਅਤੇ ਹਰ ਕੋਈ ਮੈਨੂੰ ਆਪਣਾ ਪਰਮੇਸ਼ਰ ਸਵੀਕਾਰ ਕਰੇਗਾ ।’”

12ਇਸ ਤਰ੍ਹਾਂ ਸਾਡੇ ਵਿੱਚੋਂ ਹਰ ਕੋਈ ਆਪਣਾ ਆਪਣਾ ਲੇਖਾ ਪਰਮੇਸ਼ਰ ਨੂੰ ਦੇਵੇਗਾ ।

ਕਿਸੇ ਦੇ ਲਈ ਠੋਕਰ ਦਾ ਕਾਰਨ ਨਾ ਬਣੋ

13ਇਸ ਲਈ ਆਓ, ਅਸੀਂ ਹੁਣ ਤੋਂ ਇੱਕ ਦੂਜੇ ਉੱਤੇ ਦੋਸ਼ ਲਾਉਣਾ ਛੱਡ ਦੇਈਏ ਸਗੋਂ ਤੁਸੀਂ ਇਹ ਫ਼ੈਸਲਾ ਕਰ ਲਵੋ ਕਿ ਆਪਣੇ ਭਰਾ ਦੇ ਰਾਹ ਵਿੱਚ ਰੁਕਾਵਟ ਜਾਂ ਠੋਕਰ ਵਾਲੀ ਚੀਜ਼ ਨਹੀਂ ਰੱਖੋਗੇ । 14ਪ੍ਰਭੂ ਯਿਸੂ ਵਿੱਚ ਹੁੰਦੇ ਹੋਏ ਮੇਰਾ ਇਹ ਪੂਰਾ ਵਿਸ਼ਵਾਸ ਹੈ ਕਿ ਕੋਈ ਵੀ ਭੋਜਨ ਆਪਣੇ ਆਪ ਵਿੱਚ ਅਸ਼ੁੱਧ ਨਹੀਂ ਹੈ । ਇਹ ਕੇਵਲ ਉਸੇ ਲਈ ਅਸ਼ੁੱਧ ਹੈ ਜਿਹੜਾ ਉਸ ਨੂੰ ਅਸ਼ੁੱਧ ਸਮਝਦਾ ਹੈ । 15ਜੇਕਰ ਤੇਰਾ ਕੁਝ ਖਾਣਾ ਤੇਰੇ ਭਰਾ ਦੇ ਲਈ ਠੋਕਰ ਦਾ ਕਾਰਨ ਬਣਦਾ ਹੈ ਤਾਂ ਤੂੰ ਪਿਆਰ ਦੇ ਵਿਰੁੱਧ ਚੱਲਦਾ ਹੈਂ । ਉਸ ਦਾ ਨਾਸ਼ ਆਪਣੇ ਭੋਜਨ ਦੇ ਰਾਹੀਂ ਨਾ ਕਰੋ ਜਿਸ ਦੇ ਲਈ ਮਸੀਹ ਨੇ ਆਪਣੀ ਜਾਨ ਦਿੱਤੀ ਹੈ । 16ਜਿਸ ਚੀਜ਼ ਨੂੰ ਤੁਸੀਂ ਚੰਗਾ ਸਮਝਦੇ ਹੋ, ਉਸ ਨੂੰ ਨਿੰਦਾ ਦਾ ਵਿਸ਼ਾ ਨਾ ਬਣਨ ਦੇਵੋ । 17ਕਿਉਂਕਿ ਪਰਮੇਸ਼ਰ ਦਾ ਰਾਜ ਖਾਣ-ਪੀਣ ਵਿੱਚ ਨਹੀਂ ਹੈ ਸਗੋਂ ਨੇਕੀ, ਸ਼ਾਂਤੀ ਅਤੇ ਅਨੰਦ ਵਿੱਚ ਹੈ ਜਿਹੜੇ ਪਵਿੱਤਰ ਆਤਮਾ ਦੇ ਦੁਆਰਾ ਮਿਲਦੇ ਹਨ । 18ਜਿਹੜਾ ਇਸ ਤਰ੍ਹਾਂ ਮਸੀਹ ਦੀ ਸੇਵਾ ਕਰਦਾ ਹੈ, ਉਹ ਪਰਮੇਸ਼ਰ ਨੂੰ ਖ਼ੁਸ਼ ਕਰਦਾ ਹੈ ਅਤੇ ਦੂਜਿਆਂ ਦੀਆਂ ਨਜ਼ਰਾਂ ਵਿੱਚ ਪਰਵਾਨ ਹੁੰਦਾ ਹੈ ।

19ਇਸ ਲਈ ਸਾਨੂੰ ਹਮੇਸ਼ਾ ਅਜਿਹੇ ਕੰਮ ਕਰਨੇ ਚਾਹੀਦੇ ਹਨ ਜਿਹਨਾਂ ਦੁਆਰਾ ਸ਼ਾਂਤੀ ਸਥਾਪਿਤ ਹੋਵੇ ਅਤੇ ਇੱਕ ਦੂਜੇ ਦਾ ਭਲਾ ਹੋਵੇ । 20ਭੋਜਨ ਦੇ ਕਾਰਨ ਪਰਮੇਸ਼ਰ ਦੇ ਕੰਮ ਨੂੰ ਨਾਸ਼ ਨਾ ਕਰੋ । ਸਭ ਤਰ੍ਹਾਂ ਦੇ ਭੋਜਨ ਸ਼ੁੱਧ ਹਨ ਪਰ ਉਹ ਚੀਜ਼ ਖਾਣੀ ਬੁਰੀ ਹੈ ਜਿਹੜੀ ਕਿਸੇ ਦੇ ਲਈ ਠੋਕਰ ਦਾ ਕਾਰਨ ਬਣੇ । 21ਚੰਗਾ ਤਾਂ ਇਹ ਹੈ ਕਿ ਮਾਸ ਜਾਂ ਮੈਅ ਜਾਂ ਕੋਈ ਅਜਿਹੀ ਚੀਜ਼ ਜਿਸ ਤੋਂ ਤੇਰਾ ਭਰਾ ਪਾਪ ਵਿੱਚ ਡਿੱਗ ਸਕਦਾ ਹੈ, ਨਾ ਵਰਤੋ । 22ਇਸ ਬਾਰੇ ਜੋ ਤੁਹਾਡਾ ਵਿਸ਼ਵਾਸ ਹੈ, ਉਸ ਨੂੰ ਆਪਣੇ ਅਤੇ ਪਰਮੇਸ਼ਰ ਤੱਕ ਸੀਮਿਤ ਰੱਖੋ । ਧੰਨ ਉਹ ਮਨੁੱਖ ਹੈ ਜਿਹੜਾ ਆਪਣੇ ਠੀਕ ਕੀਤੇ ਕੰਮ ਉੱਤੇ ਆਪਣੇ ਆਪ ਨੂੰ ਦੋਸ਼ੀ ਨਹੀਂ ਸਮਝਦਾ ! 23ਪਰ ਜੇਕਰ ਉਹ ਜੋ ਕੁਝ ਖਾਂਦਾ ਹੈ ਉਸ ਉੱਤੇ ਸ਼ੱਕ ਕਰਦਾ ਹੈ ਤਾਂ ਉਹ ਦੋਸ਼ੀ ਠਹਿਰਦਾ ਹੈ ਕਿਉਂਕਿ ਉਸ ਦਾ ਖਾਣਾ ਵਿਸ਼ਵਾਸ ਉੱਤੇ ਆਧਾਰਿਤ ਨਹੀਂ ਹੈ । ਜੋ ਕੁਝ ਵਿਸ਼ਵਾਸ ਉੱਤੇ ਆਧਾਰਿਤ ਨਹੀਂ ਹੈ, ਉਹ ਪਾਪ ਹੈ ।

Currently Selected:

ਰੋਮ 14: CL-NA

Highlight

Copy