ਰਸੂਲਾਂ ਦੇ ਕੰਮ 26

ਪੌਲੁਸ ਦਾ ਰਾਜਾ ਅਗ੍ਰਿੱਪਾ ਸਾਹਮਣੇ ਆਪਣੀ ਸਫ਼ਾਈ ਪੇਸ਼ ਕਰਨਾ

1ਰਾਜਾ ਅਗ੍ਰਿੱਪਾ ਨੇ ਪੌਲੁਸ ਨੂੰ ਕਿਹਾ, “ਤੈਨੂੰ ਆਪਣੀ ਸਫ਼ਾਈ ਪੇਸ਼ ਕਰਨ ਦੀ ਆਗਿਆ ਹੈ ।” ਤਦ ਪੌਲੁਸ ਨੇ ਆਪਣੇ ਹੱਥ ਨਾਲ ਇਸ਼ਾਰਾ ਕਰਦੇ ਹੋਏ ਆਪਣੀ ਸਫ਼ਾਈ ਵਿੱਚ ਕਹਿਣਾ ਸ਼ੁਰੂ ਕੀਤਾ,

2“ਹੇ ਰਾਜਾ ਅਗ੍ਰਿੱਪਾ, ਮੈਂ ਆਪਣੇ ਆਪ ਨੂੰ ਭਾਗਸ਼ਾਲੀ ਸਮਝਦਾ ਹਾਂ ਕਿ ਅੱਜ ਮੈਨੂੰ ਤੁਹਾਡੇ ਸਾਹਮਣੇ ਉਹਨਾਂ ਗੱਲਾਂ ਦੀ ਸਫ਼ਾਈ ਵਿੱਚ ਕੁਝ ਕਹਿਣ ਦਾ ਮੌਕਾ ਮਿਲਿਆ ਹੈ ਜਿਹਨਾਂ ਦਾ ਦੋਸ਼ ਯਹੂਦੀ ਮੇਰੇ ਉੱਤੇ ਲਾਉਂਦੇ ਹਨ । 3ਕਿਉਂਕਿ ਤੁਸੀਂ ਯਹੂਦੀਆਂ ਦੀਆਂ ਸਾਰੀਆਂ ਰਸਮਾਂ ਅਤੇ ਵਿਵਾਦਾਂ ਤੋਂ ਜਾਣੂ ਹੋ ਇਸ ਲਈ ਮੇਰੀ ਬੇਨਤੀ ਹੈ ਕਿ ਮੇਰੀ ਗੱਲ ਧੀਰਜ ਨਾਲ ਸੁਣਨ ਦੀ ਕਿਰਪਾ ਕਰਨਾ ।

4“ਜਦੋਂ ਤੋਂ ਮੈਂ ਹੋਸ਼ ਸੰਭਾਲੀ ਹੈ, ਮੇਰਾ ਜੀਵਨ ਯਰੂਸ਼ਲਮ ਵਿੱਚ ਮੇਰੇ ਆਪਣੇ ਲੋਕਾਂ ਦੇ ਵਿਚਕਾਰ ਹੀ ਬੀਤਿਆ ਹੈ । 5#ਰਸੂਲਾਂ 23:6, ਫ਼ਿਲਿ 3:5ਇਹ ਸਾਰੇ ਯਹੂਦੀ ਜਾਣਦੇ ਹਨ, ਜੇਕਰ ਇਹ ਚਾਹੁਣ ਤਾਂ ਗਵਾਹੀ ਦੇ ਸਕਦੇ ਹਨ ਕਿ ਮੈਂ ਆਪਣੇ ਧਰਮ ਦੇ ਸਾਰਿਆਂ ਤੋਂ ਕੱਟੜ ਫ਼ਰੀਸੀ ਮੱਤ ਦੇ ਅਨੁਸਾਰ ਠੀਕ ਜੀਵਨ ਬਿਤਾਇਆ ਹੈ । 6ਹੁਣ ਮੈਂ ਇੱਥੇ ਅਦਾਲਤ ਵਿੱਚ ਇਸ ਲਈ ਖੜ੍ਹਾ ਹਾਂ ਕਿਉਂਕਿ ਮੈਨੂੰ ਉਸ ਵਾਅਦੇ ਦੀ ਆਸ ਹੈ ਜਿਹੜਾ ਪਰਮੇਸ਼ਰ ਨੇ ਸਾਡੇ ਪੁਰਖਿਆਂ ਨਾਲ ਕੀਤਾ ਸੀ । 7ਇਸ ਆਸ ਦੇ ਪੂਰੇ ਹੋਣ ਲਈ ਸਾਡੇ ਬਾਰ੍ਹਾਂ ਕਬੀਲੇ ਦਿਨ ਰਾਤ ਪਰਮੇਸ਼ਰ ਦੀ ਭਗਤੀ ਕਰਦੇ ਹਨ । ਹੇ ਰਾਜਾ, ਇਸੇ ਆਸ ਦੇ ਕਾਰਨ ਯਹੂਦੀ ਮੇਰੇ ਉੱਤੇ ਦੋਸ਼ ਲਾਉਂਦੇ ਹਨ । 8ਫਿਰ ਤੁਹਾਨੂੰ ਕਿਸੇ ਨੂੰ ਵੀ ਇਹ ਗੱਲ ਅਨਹੋਣੀ ਕਿਉਂ ਲੱਗਦੀ ਹੈ ਕਿ ਪਰਮੇਸ਼ਰ ਮੁਰਦਿਆਂ ਨੂੰ ਜਿਊਂਦਾ ਕਰਦੇ ਹਨ ?

9 # ਰਸੂਲਾਂ 8:3, 22:4-5 “ਮੈਂ ਆਪ ਸੋਚਦਾ ਸੀ ਕਿ ਨਾਸਰਤ ਦੇ ਰਹਿਣ ਵਾਲੇ ਯਿਸੂ ਦੇ ਨਾਮ ਦੇ ਵਿਰੁੱਧ ਮੈਨੂੰ ਬਹੁਤ ਕੁਝ ਕਰਨਾ ਚਾਹੀਦਾ ਹੈ । 10ਮੈਂ ਯਰੂਸ਼ਲਮ ਵਿੱਚ ਇਸ ਤਰ੍ਹਾਂ ਕੀਤਾ ਵੀ । ਮੈਂ ਮਹਾਂ-ਪੁਰੋਹਿਤਾਂ ਤੋਂ ਅਧਿਕਾਰ ਪੱਤਰ ਲੈ ਕੇ ਬਹੁਤ ਸਾਰੇ ਭਗਤਾਂ ਨੂੰ ਕੈਦ ਵਿੱਚ ਬੰਦ ਕਰ ਦਿੱਤਾ ਅਤੇ ਜਦੋਂ ਉਹਨਾਂ ਨੂੰ ਕਤਲ ਕੀਤਾ ਗਿਆ ਤਾਂ ਮੈਂ ਇਸ ਨਾਲ ਸਹਿਮਤ ਸੀ । 11ਮੈਂ ਬਹੁਤ ਵਾਰੀ ਉਹਨਾਂ ਨੂੰ ਪ੍ਰਾਰਥਨਾ ਘਰਾਂ ਵਿੱਚ ਸਜ਼ਾ ਦੇ ਦੇ ਕੇ ਮਜਬੂਰ ਕੀਤਾ ਕਿ ਉਹ ਯਿਸੂ ਦਾ ਇਨਕਾਰ ਕਰਨ । ਮੈਂ ਕ੍ਰੋਧ ਵਿੱਚ ਇੰਨਾਂ ਪਾਗਲ ਹੋ ਗਿਆ ਸੀ ਕਿ ਮੈਂ ਉਹਨਾਂ ਉੱਤੇ ਅੱਤਿਆਚਾਰ ਕਰਨ ਦੇ ਲਈ ਵਿਦੇਸ਼ਾਂ ਦੇ ਸ਼ਹਿਰਾਂ ਵਿੱਚ ਵੀ ਗਿਆ ।

ਪੌਲੁਸ ਆਪਣਾ ਦਿਲ ਬਦਲਣ ਦੇ ਬਾਰੇ ਦੱਸਦਾ ਹੈ

(ਰਸੂਲਾਂ ਦੇ ਕੰਮ 9:1-19, 22:6-16)

12“ਇਸੇ ਕੰਮ ਲਈ ਮੈਂ ਮਹਾਂ-ਪੁਰੋਹਿਤਾਂ ਦੇ ਅਧਿਕਾਰ ਅਤੇ ਆਗਿਆ ਨਾਲ ਦਮਿਸ਼ਕ ਸ਼ਹਿਰ ਨੂੰ ਜਾ ਰਿਹਾ ਸੀ । 13ਤਦ ਹੇ ਰਾਜਾ, ਦੁਪਹਿਰ ਦੇ ਸਮੇਂ ਰਾਹ ਵਿੱਚ ਅਕਾਸ਼ ਤੋਂ ਇੱਕ ਚਾਨਣ ਜਿਹੜਾ ਸੂਰਜ ਤੋਂ ਵੀ ਜ਼ਿਆਦਾ ਚਮਕਦਾਰ ਸੀ, ਮੈਨੂੰ ਅਤੇ ਮੇਰੇ ਨਾਲ ਦੇ ਯਾਤਰੀਆਂ ਨੂੰ ਚਾਰੇ ਪਾਸੇ ਚਮਕਦਾ ਦਿਖਾਈ ਦਿੱਤਾ । 14ਫਿਰ ਜਦੋਂ ਅਸੀਂ ਸਾਰੇ ਜ਼ਮੀਨ ਉੱਤੇ ਡਿੱਗ ਪਏ ਤਾਂ ਮੈਂ ਇੱਕ ਆਵਾਜ਼ ਇਬਰਾਨੀ ਭਾਸ਼ਾ ਵਿੱਚ ਇਹ ਕਹਿੰਦੀ ਸੁਣੀ, ‘ਸੌਲੁਸ ! ਸੌਲੁਸ ! ਤੂੰ ਮੈਨੂੰ ਕਿਉਂ ਸਤਾਉਂਦਾ ਹੈਂ ? ਪ੍ਰੈਣ#26:14 ਮੂਲ ਭਾਸ਼ਾ ਵਿੱਚ ‘ਪ੍ਰੈਣ’ ਇੱਕ ਤਿੱਖੇ ਸਿਰ ਵਾਲੀ ਸੋਟੀ ਹੈ । ਨੂੰ ਠੋਕਰ ਮਾਰਨ ਨਾਲ ਤੈਨੂੰ ਆਪ ਹੀ ਸੱਟ ਲੱਗੇਗੀ’ । 15ਮੈਂ ਪੁੱਛਿਆ, ‘ਪ੍ਰਭੂ ਜੀ, ਤੁਸੀਂ ਕੌਣ ਹੋ ?’ ਪ੍ਰਭੂ ਨੇ ਕਿਹਾ ‘ਮੈਂ ਯਿਸੂ ਹਾਂ ਜਿਸ ਨੂੰ ਤੂੰ ਸਤਾ ਰਿਹਾ ਹੈਂ । 16ਪਰ ਉੱਠ ਅਤੇ ਆਪਣੇ ਪੈਰਾਂ ਉੱਤੇ ਖੜ੍ਹਾ ਹੋ ਕਿਉਂਕਿ ਮੈਂ ਤੈਨੂੰ ਇਸ ਲਈ ਦਰਸ਼ਨ ਦਿੱਤਾ ਹੈ ਕਿ ਜੋ ਕੁਝ ਤੂੰ ਅੱਜ ਦੇਖਿਆ ਹੈ ਅਤੇ ਜੋ ਕੁਝ ਮੈਂ ਤੈਨੂੰ ਅੱਗੇ ਦਿਖਾਵਾਂਗਾ, ਉਸ ਸਭ ਦੇ ਲਈ ਤੈਨੂੰ ਆਪਣਾ ਸੇਵਕ ਅਤੇ ਗਵਾਹ ਨਿਯੁਕਤ ਕਰਾਂ । 17ਮੈਂ ਇਹਨਾਂ ਲੋਕਾਂ ਤੋਂ ਤੇਰੀ ਰੱਖਿਆ ਕਰਾਂਗਾ ਅਤੇ ਉਹਨਾਂ ਪਰਾਈਆਂ ਕੌਮਾਂ ਤੋਂ ਵੀ ਜਿਹਨਾਂ ਦੇ ਕੋਲ ਮੈਂ ਤੈਨੂੰ ਭੇਜ ਰਿਹਾ ਹਾਂ । 18ਤਾਂ ਜੋ ਤੂੰ ਉਹਨਾਂ ਦੀਆਂ ਅੱਖਾਂ ਖੋਲ੍ਹੇਂ ਅਤੇ ਉਹਨਾਂ ਨੂੰ ਹਨੇਰੇ ਤੋਂ ਚਾਨਣ ਵੱਲ ਅਤੇ ਸ਼ੈਤਾਨ ਦੇ ਅਧਿਕਾਰ ਹੇਠੋਂ ਪਰਮੇਸ਼ਰ ਵੱਲ ਮੋੜੇਂ ਕਿ ਉਹ ਮੇਰੇ ਵਿੱਚ ਵਿਸ਼ਵਾਸ ਦੁਆਰਾ ਆਪਣੇ ਪਾਪਾਂ ਤੋਂ ਮਾਫ਼ੀ ਪ੍ਰਾਪਤ ਕਰਨ ਅਤੇ ਉਹਨਾਂ ਲੋਕਾਂ ਵਿੱਚ ਆਪਣੀ ਥਾਂ ਪ੍ਰਾਪਤ ਕਰਨ ਜਿਹੜੇ ਮੇਰੇ ਵਿੱਚ ਵਿਸ਼ਵਾਸ ਕਰਨ ਦੁਆਰਾ ਪਵਿੱਤਰ ਹੋਏ ਹਨ ।’”

ਪੌਲੁਸ ਦਾ ਆਪਣੇ ਕੰਮਾਂ ਬਾਰੇ ਦੱਸਣਾ

19“ਇਸ ਲਈ ਹੇ ਰਾਜਾ ਅਗ੍ਰਿੱਪਾ, ਮੈਂ ਇਸ ਸਵਰਗੀ ਦਰਸ਼ਨ ਦੀ ਉਲੰਘਣਾ ਨਾ ਕੀਤੀ । 20#ਰਸੂਲਾਂ 9:20, 9:28-29ਮੈਂ ਪਹਿਲਾਂ ਦਮਿਸ਼ਕ ਅਤੇ ਯਰੂਸ਼ਲਮ ਵਿੱਚ ਪ੍ਰਚਾਰ ਕੀਤਾ । ਇਸ ਦੇ ਬਾਅਦ ਸਾਰੇ ਯਹੂਦਿਯਾ ਦੇਸ਼ ਵਿੱਚ ਅਤੇ ਪਰਾਈਆਂ ਕੌਮਾਂ ਵਿੱਚ ਪ੍ਰਚਾਰ ਕੀਤਾ ਕਿ ਤੋਬਾ ਦੇ ਯੋਗ ਕੰਮ ਕਰੋ । 21ਇਹ ਹੀ ਕਾਰਨ ਹੈ ਕਿ ਯਹੂਦੀਆਂ ਨੇ ਹੈਕਲ ਵਿੱਚ ਮੈਨੂੰ ਫੜਿਆ ਅਤੇ ਮਾਰਨ ਦੀ ਕੋਸ਼ਿਸ਼ ਕੀਤੀ । 22ਪਰ ਪਰਮੇਸ਼ਰ ਦੀ ਮਦਦ ਨਾਲ ਮੈਂ ਅਜੇ ਵੀ ਇੱਥੇ ਖੜ੍ਹਾ ਹਾਂ ਅਤੇ ਛੋਟੇ-ਵੱਡੇ ਸਾਰਿਆਂ ਦੇ ਸਾਹਮਣੇ ਗਵਾਹੀ ਦੇ ਰਿਹਾ ਹਾਂ । ਜਿਹਨਾਂ ਗੱਲਾਂ ਦੇ ਹੋਣ ਬਾਰੇ ਨਬੀਆਂ ਅਤੇ ਮੂਸਾ ਨੇ ਭਵਿੱਖਬਾਣੀ ਕੀਤੀ ਸੀ, ਉਹਨਾਂ ਤੋਂ ਸਿਵਾਏ ਮੈਂ ਕੁਝ ਨਹੀਂ ਕਹਿੰਦਾ । 23#ਯਸਾ 42:6, 49:6, 1 ਕੁਰਿ 15:20ਮਸੀਹ ਦਾ ਦੁੱਖ ਸਹਿਣਾ ਜ਼ਰੂਰੀ ਸੀ ਤਾਂ ਜੋ ਉਹ ਸਾਰਿਆਂ ਤੋਂ ਪਹਿਲਾਂ ਮੁਰਦਿਆਂ ਵਿੱਚੋਂ ਜਿਊਂਦਾ ਹੋ ਕੇ ਆਪਣੇ ਲੋਕਾਂ ਅਤੇ ਪਰਾਈਆਂ ਕੌਮਾਂ ਨੂੰ ਚਾਨਣ ਦਾ ਸੰਦੇਸ਼ ਦੇਣ ।” 24ਜਦੋਂ ਪੌਲੁਸ ਇਸ ਤਰ੍ਹਾਂ ਸਫ਼ਾਈ ਪੇਸ਼ ਕਰ ਰਿਹਾ ਸੀ ਤਾਂ ਫ਼ੇਸਤੁਸ ਨੇ ਉੱਚੀ ਆਵਾਜ਼ ਨਾਲ ਕਿਹਾ, “ਪੌਲੁਸ, ਤੂੰ ਪਾਗਲ ਹੈਂ ! ਤੇਰਾ ਜ਼ਿਆਦਾ ਗਿਆਨ ਹੀ ਤੈਨੂੰ ਪਾਗਲ ਕਰਦਾ ਜਾ ਰਿਹਾ ਹੈ !” 25ਪੌਲੁਸ ਨੇ ਉੱਤਰ ਦਿੱਤਾ, “ਮਾਨਯੋਗ ਫ਼ੇਸਤੁਸ, ਮੈਂ ਪਾਗਲ ਨਹੀਂ ਹਾਂ ! ਮੇਰੇ ਸ਼ਬਦ ਸੱਚੇ ਅਤੇ ਸੂਝ ਵਾਲੇ ਹਨ । 26ਮਹਾਰਾਜ ਇਸ ਵਿਸ਼ੇ ਨੂੰ ਜਾਣਦੇ ਹਨ, ਉਹਨਾਂ ਦੇ ਸਾਹਮਣੇ ਹੀ ਮੈਂ ਬੇਧੜਕ ਹੋ ਕੇ ਕਹਿ ਰਿਹਾ ਹਾਂ । ਮੈਨੂੰ ਵਿਸ਼ਵਾਸ ਹੈ ਕਿ ਉਹਨਾਂ ਤੋਂ ਕੋਈ ਗੱਲ ਲੁਕੀ ਹੋਈ ਨਹੀਂ ਹੈ ਕਿਉਂਕਿ ਇਹ ਘਟਨਾ ਕਿਸੇ ਗੁਪਤ ਥਾਂ ਉੱਤੇ ਨਹੀਂ ਵਾਪਰੀ । 27ਹੇ ਰਾਜਾ ਅਗ੍ਰਿੱਪਾ, ਕੀ ਤੁਸੀਂ ਨਬੀਆਂ ਵਿੱਚ ਵਿਸ਼ਵਾਸ ਰੱਖਦੇ ਹੋ ? ਮੈਂ ਜਾਣਦਾ ਹਾਂ, ਤੁਸੀਂ ਵਿਸ਼ਵਾਸ ਰੱਖਦੇ ਹੋ !” 28ਤਦ ਅਗ੍ਰਿੱਪਾ ਨੇ ਪੌਲੁਸ ਨੂੰ ਕਿਹਾ, “ਕੀ ਤੂੰ ਇਸ ਥੋੜ੍ਹੇ ਸਮੇਂ ਵਿੱਚ ਹੀ ਮੈਨੂੰ ਮਸੀਹੀ ਬਣਾਉਣਾ ਚਾਹੁੰਦਾ ਹੈਂ ?” 29ਪੌਲੁਸ ਨੇ ਉੱਤਰ ਦਿੱਤਾ, “ਥੋੜ੍ਹਾ ਸਮਾਂ ਹੋਵੇ ਜਾਂ ਬਹੁਤਾ, ਮੈਂ ਪਰਮੇਸ਼ਰ ਅੱਗੇ ਪ੍ਰਾਰਥਨਾ ਕਰਦਾ ਹਾਂ ਕਿ ਨਾ ਕੇਵਲ ਤੁਸੀਂ ਸਗੋਂ ਇਹ ਸਾਰੇ ਜਿਹੜੇ ਅੱਜ ਮੇਰਾ ਵਚਨ ਸੁਣ ਰਹੇ ਹਨ, ਮੇਰੇ ਵਰਗੇ ਹੋ ਜਾਣ ਪਰ ਬਗ਼ੈਰ ਇਹਨਾਂ ਬੇੜੀਆਂ ਦੇ ।”

30ਤਦ ਰਾਜਾ, ਰਾਜਪਾਲ, ਬਰਨੀਕੇ ਅਤੇ ਉਹਨਾਂ ਦੇ ਨਾਲ ਬੈਠੇ ਹੋਏ ਲੋਕ ਖੜ੍ਹੇ ਹੋ ਗਏ । 31ਉਹ ਵੱਖਰੇ ਹੋ ਕੇ ਇੱਕ ਦੂਜੇ ਨਾਲ ਗੱਲਾਂ ਕਰਨ ਲੱਗੇ, “ਇਸ ਆਦਮੀ ਨੇ ਮੌਤ ਦੀ ਸਜ਼ਾ ਜਾਂ ਕੈਦ ਦੇ ਯੋਗ ਕੋਈ ਕੰਮ ਨਹੀਂ ਕੀਤਾ ਹੈ ।” 32ਅਗ੍ਰਿੱਪਾ ਨੇ ਫ਼ੇਸਤੁਸ ਨੂੰ ਕਿਹਾ, “ਜੇਕਰ ਇਸ ਆਦਮੀ ਨੇ ਸਮਰਾਟ ਅੱਗੇ ਅਪੀਲ ਨਾ ਕੀਤੀ ਹੁੰਦੀ ਤਾਂ ਉਸ ਨੂੰ ਰਿਹਾ ਕੀਤਾ ਜਾ ਸਕਦਾ ਸੀ ।”

Currently Selected:

ਰਸੂਲਾਂ ਦੇ ਕੰਮ 26: CL-NA

Highlight

Copy