Yelsom 1
1
1Kooro Solomɔn yela bini yelsomee nɔ.#1Ko 4:32
Yel loɡle
Hanfale waa dɛ pɛlɛ o jaa nɛɛ ne o daamanar wa
2Baɡle nyina kohona haa dɔa
tɛ mɛ,
he nyina dɔ pɛla kohona dɛ
ɡwaa sen.#1:2 Gɛ nɛn nyɔ sen dɛ yon dɛɛ la, ɡɛɛ haah la nyina la do.
3He nosɔɔhsoma sɔɔh som,
he sɔn do kɛŋɔ baa fuɡe
nosɔɔhsoma ta.
A waa ɡela bitoli bwa ɛɛ
nyin he wa.
4Laɡ mɛ kaa warane,
n dɛ nyin kɛ n kooro
laɡ mɛ
kaa o dem warane!
Daamanar la
Yá hɛɡre, dɛ́ ɡel ya sie
lɛ kohona,
yaa kpɛɛ he nyina haa dɔa
laanee ɡwaa kɛ ya nyɔ sen.
Hanfale la
A waa ɡela bitoli bwa
ɛɛ nyin he waa kɛrɛdɛ la!
5Jerusalam bitoli,
n biro dɛ do wer,
n biro kɛŋɔ tɛnte deene
aa lɔ Keda pua hɛŋle ɡbo
harɛ ta,
kɛ dɛ berɛ do wer kɛŋɔ,
Kooro Solomɔn koodem
pateesanre.
6Bɛ men ɡɛɛh, n bira maa bira
wa, weeree ɡela n bir.
N nimanar baah di n nɛ
dɛ ɡel n kaa ɛ daa koo bini
toma,
n ta bɔr dɔe dɛ nyiŋi n daa
koo ta.#1:6 N daa koo la ken cheɡɔ tɛ haah la ɡbabir, kɛɛ o wer ne o nyina waa dɔa.
7N sɛno maa dɛ nyini kohona,
baɡ mɛ bela he peera
aa dɛ di,
ne bela aa ba dɛ onɛ
webaŋa.
Ɛrɛɛ chɛ kɛ ń kpɔ sie sɔh yal
bini,
kɛŋɔ haah waa dɛ teŋɛ
peteɡra
bane ne ba peera nɛɔ?
Daamanar la
8Haah haa wera haahna bwa
bini,
haa jemɛ kɛ he teŋɛ peera
luɡri ta,
dɛ kpɔ he bombiire a kaa di
peteɡra la kukujeɡre jwɛh.
Sɛno baa la
9N sɛnodɛɛɡe, n kpɔe
dɛɛ maɡɛ
Ijipt kooro jaaɡɔnee
baa vɔwɔ pɛl torɔɡo ta
ken.
10Na ɡɛ he siebɔr ne deŋna kwa
aa wera,
he baŋa ne suuɡaswɛm
baŋa kwaa ɡe do wer.
11Yaa ɛ suuɡaswɛm deŋna
kwaa tɛɛ,
dɛ́ kpɔ suuɡapoŋ kwaa o
bwara.
Hanfale la
12N kooro taa chɔ o kara ta la,
n nosɔɔhsoma sɔɔh lɛ bɔr
bwa.
13N sɛno maa dɛ nyinu
sɔɔh som kɛŋɔ korobo,
dɛ do n ela baah.
14N sɛno do kɛŋɔ kpɔɡa aa fea,
dɛ do daa kooni aa lɔ
Ɛn Gedi harɛ ta ken.
Sɛno baa la
15N sɛnodɛɛɡe, na ɡɛ
haa do wer,
he wer tolo ɡa!
He sibie wer kɛŋɔ
borɔnoma sibie.
Hanfale la
16Na ɡɛ haa do pwɛre,
n sɛnodɛɛɡe,
he waa dɛ lɛ n sie kohona.
Kpɔɡlwɛɛ ɛ ya chɔɔbɔr.
Sɛno baa la
17Peleme dolii ba kpɔ chiɡri
ya dea,
asɛ dadɛɛɡa bwa soo siwi
ɡee ba kpɔ ɡoo.
Currently Selected:
Yelsom 1: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
