Rom 5

Deŋnesɔɔhna ne silɛɛ dɔe wa

1Taraken nɔ, ya yarada aa ɡela Korowii lɛ yaa kɛ nɛndɛɛɡa ya waa su o siwi nɔ, ya Dɔɔ Yeesu Kristo nɛɛ a che asɛ ya ne Korowii pɛ. 2Yaa yarada Yeesu dɛ kpɔ ya te tɛo la, a taa a che o ɡel Korowii ɛɛ na ya sum dɛɛ cha yaa ɡɛ waa dɛ cha yaa nɔ. Anomanta, ya sie lɛo, dɛkalkɛŋɔ ya jemɔ kɛŋɔ bela Korowii aa lole o waa dɔ jirima kohona la, ya ɡee do belaa. 3A ɡbo ta laa ya dɔ silɛɛ. Ya sie dɛ lɛ ya wahala yaa dɛ na nɔ ta, dɛkalkɛŋɔ ya jemɔ kɛŋɔ anee dɛɛ ba ɡela ya dɔ bambile.#Mat 5:11-12 4Bambile dɔe nɔ taa aa ba cheɡa, ásɛ dɛ Korowii daah yaa na naa, ya waa won dɔ kasinteŋ. Ya waa dɔ kasinteŋ Korowii be naa, an dɛɛ ba ɡela ya dɔ hwɛɡa. 5Hwɛɡa yaa dɔa nɔ, aa pɛɛ ɛ, dɛkalkɛŋɔ Korowii tɛ yaa o Domadɛɛɡe la ásɛ ya jemɛ o nyina waa dɛ nyin yaa kohona.

6Maa dɛ ŋɔ nɔ, ya fa toole ane bɛlbwa bini Korowii ŋwɛnɛdɛɛɡe la be pera. Dɛ ya fa aa Korowii ŋwɛnɛ ta teŋɛ. Kɛ tɔpere Korowii aa doa la aa tela la, Yeesu lɛ ya wechɔɡ-ɛɛra seo dɛ sewɛ. 7A kpeɡri kɛŋɔ nɛn lɛ nɛndɛɛɡe kwaraa seo dɛ́ sewɛ. Nɛn waa dɛ nyin nɛn la te, bɛl lole nomɛl ken ɛɛ wonoo lɔ bambile lɛ o seo dɛ́ sewɛ. 8Maa dɛ ŋɔ nɔ, hé na ɡɛ Korowii tea aa dɛ domɛ nɛwɛnyini nɛ. Gɛ saŋ ya taa ɛ wechɔɡ-ɛɛra la, a taa Yeesu Kristo lɛ ya seo sewɛ.#Jɔn 3:16; 1Jɔ 4:10

9Yeesu Kristo seo taa a che asɛ Korowii ɡel ya ɛ nɛndɛɛɡa ya waa su o siwi. Aah dɛ Korowii bwaawee baa ir nɛra nɛ aa, a te taa Yeesu Kristo aa wola won lɛ yaa aa? 10Dɛ ya ne Korowii fa dɔmɔ, asɛ o che o Bie Yeesu seo la ta dɛ ɡel ya ne o pɛ aa, ya ne Korowii aa pɛa taraken nɔ, a te ta kwaraa laa wɛɛ ba o Bie Yeesu seo ta ira, ne o le doe nɔ waa koeh dɛ́ lɛ yaa aa? 11A ɡbo laa. Ya sie lɛ Korowii nɛɛ kohona ya Dɔɔ Yeesu Kristo nomanta. O nɛɛ a che ya ne Korowii pɛ.

Adam ne Yeesu Kristo

12Nɛmbeŋkpoŋ nɛɛ a che wechɔɡa ba harɛ nɔ ta, asɛ a che o wechɔɡa ta seo ba harɛ ta. A waa seo bu nɛwɛnyini bwa la, dɛkalkɛŋɔ nɛwɛnyini bwa ɛ wechɔɡa. 13Korowii aa wola Mosis Mmara la ne balɛ mɔɔ la, dɛ wechɔɡa lole. Kɛ bela Mmara aa wola toole la, baa wechɔɡa nkontaa bu. 14Kɛ le Adam bere saŋ la ba le Mosis bere saŋ la, dɛ seo chɔ le tɛ nomɛlbwa. Hale nɛra ba fa aa wola Korowii nyoa vɛɛh kɛ Adam la bwaa fa dɛ serewe. Adam chaaree naate ba fa aa ŋɔa o dɛ ba bala la. Onee Yeesu Kristo.

15Kɛ Adam ne Yeesu waa ta beŋkpoŋ ɛɛ, dɛkalkɛŋɔ chae Korowii aa na ya sum dɛ cha yaa la, a ne Adam wechɔɡa ta beŋkpoŋ ɛɛ. A ɡwaala kohona. Nɛmbeŋkpoŋ wechɔɡa taa a che seo ba nomɛlbwa nɛ. Nɛmbeŋkpoŋ alaworomɛ ɡee nɛra bwa di. Onee Yeesu Kristo. O nɛɛ Korowii che dɛ sune nomɛlbwa nɛ, dɛ cha yaa kohona a ɡwaa Adam wechɔɡa la. 16A berɔ do kɛŋɔ chae Korowii aa cha yaa la ne waa aa le nɛmbeŋkpoŋ la wechɔɡa ta la ta beŋkpoŋ ɛɛ. Wechɔɡe beŋkpoŋ taa a che Korowii pa ya bwa bolchɔɡe. Asɛ wechɔɡa aa wara la, Korowii na ya bwa sum, dɛ cha yaa dɛ lɛ yaa kɛŋɔ nɛndɛɛɡa ya waa su o siwi. 17Nɛmbeŋkpoŋ wechɔɡa taa seo che dɛɛ di kora nɛwɛnyina bwa nɛ. Gɛɛ a che nɛmbeŋkpoŋ nɛɛ asɛ Korowii na nɛwɛnyina sum kohona kwaraa dɛ cha yaa ya won ɛ nɛndɛɛɡa ya waa su o siwi pɛɛpɛɛ dɛ di kora mkpa aa wola jaɡa dɔe la ta. Onee Yeesu Kristo.

18Gɛ Adam wechɔɡe beŋkpoŋ aa lɛ chɔɡre tɛ nɛwɛnyina bwa la, ɡɛɛ Yeesu Kristo wedɛɛɡe beŋkpoŋ waa ɛa ɡel Korowii lɛ yaa kɛŋɔ nɛndɛɛɡa ya waa su o siwi, asɛ nɛwɛnyina bwa won dɔ mkpa aa wola jaɡa dɔe bwa.#Aes 53:11 19Dɛkalkɛŋɔ ɡɛ nɛmbeŋkpoŋ deŋnekpeɡ aa ɡela nɛra bwa ɛ wechɔɡ-ɛɛra la, ɡɛɛ a che nɛmbeŋkpoŋ pwɛre waa doa ta, asɛ Korowii lɛ nɛra kɛrɛdɛ kɛ nɛndɛɛɡa ba waa su o siwi.

20Mmara balɔ dɛ ɡel wechɔɡa warɛ. Kɛ, wechɔɡa aa dɛ dawɛ la, a taa Korowii na nɛwɛnyina sum, dɛ cha yaa kohona. 21Gɛ wechɔɡa aa cheɡɛ seo nɛɛ dɛɛ di kpeɡri la, ɡɛɛ Korowii suna waa dɛ sune nɛwɛnyina nɛɛ la ɡe che ɡɛ Korowii aa ɛ yaa nɛndɛɛɡa ya waa su o siwi la ta dɛɛ di kpeɡri, asɛ ya won dɔ Korowii mkpa aa wola jaɡa dɔe bwa la, dɛkalkɛŋɔ ya Dɔɔ Yeesu Kristo ɡelɔ nɛra ɛ nɛndɛɛɡa ba waa su Korowii siwi.

Currently Selected:

Rom 5: mzw

Highlight

Copy