Rom 10
10
1Yabala, Korowii fe lɛ Israel tena aa, a fe som n be noo! N soŋe Korowii dɛɛ tɛɛ ba ɡa. 2Kasinteŋ, n wono bol ba waa kɛŋɔ ba Korowii toma swɛɛ ba siwi te, kɛ baa on tomɛ aŋwɛnɛ ta. 3Baa ɡɛ Korowii aa ɛa dɛɛ lɛ nɛra kɛ nɛndɛɛɡa ba wa ɛɛ su o siwi jemɛ, anomanta, ba ɡbaɡba ŋwɛnɛɛ baa kpɔ, dɛ vɛh Korowii ŋwɛnɛ waa cheɡɛ o ta dɛ ɡel nɛra wa ɛɛ su o siwi la ta teŋa. 4Yeesu Kristo bala la teŋe Mosis Mmara ta teŋa ta kɛŋɔ a taa nɛn che Korowii lɛo kɛ nɛndɛɛɡe o waa su o siwi la. Taraken nomɛlbwa waa yarada Yeesu Kristo waa la, Korowii ɛɛ lɛo kɛ nɛndɛɛɡee ásɛ o waa su o siwi.
5Kenii Mosis bol nɛra baa dɛ nyin ba che Mmara ta teŋa ta ásɛ ba waa su Korowii siwi la wa. O ŋɔ, “Nomɛlbwa waa dɛ teŋɛ waa aa lɔ Mmara la bwa ta la, wɛɛ dɔ mkpaa le Mmara la ta teŋa ta.” 6Kenii Korowii Tɔn baɡle nɛra baa che yarada ta, ásɛ ba waa su o siwi ɡe wa, “Bɛ he nyu bini lii ŋɔ, ‘Umee dɛ́ la nyundua?’ dɛ́ kpɔ Yeesu Kristo tu harɛ,#Mma 30:11-14 7‘kɛɛ dɛ tu bɔluŋ bini dɛ ka nyinu ba nɔ?’ dɛ ka nyinu le lala bini ba.” 8Waa Korowii Tɔn aa dɛ bol laanee kɛŋɔ, “Korowii waa la pu heyaa tonɛ a lɔ he nyoo ne he bambili ta kwara.” Yeesu Kristo yaradae waa yaa dɛ bol he be laanee Korowii waa nɔ. 9Dɛ he nɛn kpɔ nyoa ŋɔ komɛlbwa Dɔɔree Yeesu, dɛ yarada he bambile bini kɛŋɔ Korowii iru seo ta naa, Korowii ɛɛ lɛɛ, 10dɛkalkɛŋɔ Yeesu Kristo waa la yaradae bambile bwa ne taa a che Korowii ɛɛ lɛ nɛwɛnyina kɛ nɛndɛɛɡa ba wa ɛɛ su o siwi, asɛ a bola nyoa ne dɔŋa be taa a che Korowii ɛɛ lɛ yaa. 11Korowii Tɔn baɡlɔ ŋɔ, “Nomɛlbwa waa yaradao la, sihiih aa o kpoe ba.” 12Juu tena ne nɛra baa wola Juu tena ɛɛ la, ba bwa kɛrɛdɛ Korowii be. Komɛlbwa Dɔɔree Korowii. Nomɛlbwa waa wia dɛɛ yerɔ la, o dɛ chao kohona. 13Anee Korowii Tɔn bol la, “Nomɛlbwa waa wi yerɛ ya Dɔɔ la, wɛɛ lɛo.”
14Aah dɛ nɛn ta on yaradae dɛ kpɔ o te tɛo waa, ɛrɛɛ wɛɛ ba ɛɛ dɛ́ won yerɛ o sɔn ó lɛo wɔ? Dɛ nɛn ta o waa noɛ yaa, ɛrɛɛ wɛɛ ba ɛɛ dɛ́ won yaradao dɛ́ kpɔ o te tɛo wɔ? Dɛ nɛn ta o waa la bolɛ nɛn be naa, ɛrɛɛ wɛɛ ba ɛɛ ó noɔ? 15Dɛ Korowii ta nɛn tomaa, ɛrɛɛ wɛɛ ba ɛɛ dɛ bol o waa laɔ? Anee kɛŋɔ Korowii Tɔn aa ŋɔa la. O bolɔ ŋɔ, “Hé na ɡɛ toroma baa kpoŋe Amanesoma dɛɛ valɛ la, hé no ba bala wa aa, he bambile ɛɛ sɔɔh heyaa taeh!”#Aes 52:7
16Amanesoma la balɔ, kɛ Israel tena bwa laa sɛh a ta teŋa. Korowii keame Aesaya ɡbaɡba fa bolɔ ŋɔ, “N Naa Korowii, umee yarada waa yaa bol ba be laɔ?”#Aes 53:1 17He nyiŋo na naa, Yeesu Kristo waa la noe taa a che nɛra ɛɛ yaradaa, asɛ a bola ɡe taa a che nɛra ɛɛ noa.
18Mɛɛ bɔɔ heyaa webeŋkpoŋii. Kpelaa kɛŋɔ ba ta noɛ yaa? Ba noɔ, dɛkalkɛŋɔ Korowii Tɔn bolɔ ŋɔ,
“Ba waa baa dɛ bol la la harɛ ta
bobɛlbwa nɛra aa lole, a tel harɛ jaɡa bwa.”#Yel 19:4
19N berɔ dɛɛ bɔɔ ja. Israel tena fa ta noɛ yaa? Mosis tɔ sie chwerɛ waa Korowii aa bola, dɛ ŋɔ,
“Mɛɛ ɡeloo he dɔ bɔweela
nɛra baa wola ban kure
dɛɛ ja n nɛra nɛɛ la nɛ,
dɛ́ ɡel he bwaawee ir harɛ
o nɛra aa ɡɛna nɛ.”
20Korowii keame Aesaya te kwaraa chwerɛ Korowii wobol ane a ɡwaa ɡɛ. O chwerɔ ŋɔ,
“Nɛra ba fa aa wola n bɔr ɡaaɡe la, ban na mɛ,
banɔ la ba fa aa wola n waa bɔɔ la,
banee n kpɔ n te chaɡle.”#Aes 65:1-2
21Kenii o baɡle ɡɛ Korowii aa bol Israel tena ɡe wa,
“Saŋ bɛlbwaa n paɡri n nɔɔra kɛŋɔ ń lɛ n nɛra
kɛ baa men yarada. Ba deŋne kpeɡri, baa waa ɡe no.”
Currently Selected:
Rom 10: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
