Wepila 7
7
Nɛra kaɡboŋa lafa fifraanaarɛ dɛ ba naarɛ baa le Israel
1Anɔ habɔɔ la, n na nyundua toroma banaarɛ baa cheɡɛ harɛ nyoo peu leebɔra anaarɛ dɛ lawɛ peu, ásɛ a bɛ harɛ ne mpo ne daa bɛlbwa ta ta. 2Asɛ n berɛ na nyundua torome bɛl o le wee leebɔr dɛɛ ba, dɛ kpoŋe kon Korowii waa lole saŋ bɛlbwa aa kpɔa dɛɛ do o kwaa nso la. O kpɔ takpeɡ ŋɔ nyundua toroma banaarɛ la baa tɛɛ ba kpeɡri kɛŋɔ bá chɔɡ harɛ ne mpo la be ŋɔ, 3“Hé ɡel harɛ ne mpo ne daa la chɔɡa ka tel kɛŋɔ, yaa do Korowii bonɔɔna ne toli nso ba tili ta tonɛ mɔɔ.”#Ɛse 9:4; Wep 9:4 4Ba baɡle nɛra baa do ba nso la nyoa n be. Ba lɔ kaɡboŋa lafa fifraanaarɛ dɛ banaarɛ. Israel deene fi dɛ anɛ la taa ba le.
5Banɔ la baa do ba nso Juda dea la lɔ kaɡboŋa fi dɛ banɛ.
Asɛ banɔ la waa do ba le Rubin dea la ɡe lɔ nɛra kaɡboŋa fi dɛ banɛ.
O do Gad dea nɛra ɡe kaɡboŋa fi dɛ banɛ nso,
6dɛ do Aasa dea nɛra kaɡboŋa fi dɛ banɛ.
Gɛɛ o do Naftale dea ɡe nɛra kaɡboŋa fi dɛ banɛ,
dɛ berɛ do Manasɛ dea nɛra kaɡboŋa fi dɛ banɛ.
7O do Simeon dea nɛra kaɡboŋa fi dɛ banɛ,
dɛ do Lewi dea nɛra kaɡboŋa fi dɛ banɛ,
dɛ do Isaaka dea nɛra kaɡboŋa fi dɛ banɛ.
8O do Sebulon dea nɛra kaɡboŋa fi dɛ banɛ,
dɛ do Josef dea nɛra kaɡboŋa fi dɛ banɛ,
asɛ Bɛnjamen dea ɡe, o do nɛra kaɡboŋa fi dɛ banɛ nso.
Nɛnlaa baa do batakaarepoŋa wa
9Anɔ la habɔɔ la, n nyiŋo dɛ na nɛnlaa nomɛlbwa aa wola won kur ba bela. Ba le wobol te bɛlbwa nɛra baa lɔ harɛ nɔ ta bobɛlbwa ta. Ba bwa do batakaarepoŋa, dɛ kpoŋe bambie daa a papooni do a ta, dɛ che kookara la ne Pebie la sie, 10dɛ kpɔ takpeɡ dɛɛ ŋɔ,
“N Naa Korowii waa soɡe
kookara ta la ne Pebie laanee lɛ yaa oo!”
11Asɛ nyundua toroma la che dɛ bar nomonome la ne hweera kwaa anaarɛ la ne kookara la, dɛ ɡuŋi dɛ kpɔ sie pi harɛ dɛ duu Korowii, 12dɛɛ ŋɔ,
“Aamen! Korowii chɛ kpɛɛra
ne jirima ne jam ne duure.
Onee dɔ wejema ne kpeɡri,
ne bokpeɡa saŋ bɛlbwa.
Aamen!”
13Asɛ nomonome la bɛl pɛɛ mɛ ŋɔ, “Nɛra nɔ baa do yapoŋa nɔ, umewaa yɔ? Leperaa ba leɔ?”#Sek 3:4
14Anee n ŋɔ, “N Dɔɔ, maa jemɛ. He ken jem ba.”
Asɛ o ŋɔ, “Banee fa lɔ wahala tenten la bini dɛ won le a nyoa la. Ba chɛɡɛ ba yale Pebie la chal la ta, a le dɛ to. 15Anomanta,
ba lɔ Korowii kookara la sie
dɛɛ tomɔ chɔɔ ne jwaana kɛŋɔ o Dea sɔfore,
asɛ o ɡbaɡba waa soɡe kookara la ta la ɛɛ tɔ ba nɛ.
16Lɔr ne nyɔɡre aa ban kpo kpa bwa.
Wee aa ba nɛɛ lɔ cheihcheih,
bɔr ɡe aa ba nɛɛ wɔrɔbe bambam.#Aes 49:10
17Dɛkalkɛŋɔ Pebie la waa lɔ
kookara la baah ta la dɛ ba
Peteɡre ɛɛ, dɛɛ nyiŋi ba nɛ,
wɛɛ teɡ baa kaa nee aa dɛ tɛ
mkpa aa wola jaɡa dɔe ta.#Yel 23:2
Asɛ Korowii fee ba sinii bwa ta.”#Aes 25:8
Currently Selected:
Wepila 7: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
