Yela 72
72
Korowii soŋa dɛ́ tɛ kooro
1N Naa Korowii,
baɡle kooro ɡɛ waa bol wa,
dɛɛ pa bole aŋwɛnɛ ta,
ɡɛ he wa aa toɡra.
Baɡlo o do ɡɛ haa doa la,#1We 22:12#1Ko 3:9
2ásɛ dɛ bol he nɛra waa
dɛɛ pa bole aŋwɛnɛ ta,
dɛ́ nyiŋi he nɛra baa dɛ
fiɡ ba la nɛɛ kasinteŋ ne.
3Gel kondikwaa ba
ya harɛ ta kohona,
toɡra he nɛra wa aa
toɡra la wa.
4Gel kooro bol nyaara waa
dɛɛ tɛɛ ba aŋwɛnɛ ta,
dɛɛ cha ba bii, dɛ́ pɔ
nɛra baa dɛ fiɡ ba la nɛ.
5Gɛ wee ne korobie
aa dɛ chaah saŋ bɛlbwa nɔ,
ɡɛɛ he naanar baa ka ba
ɡe, ɛɛ ba he toma
saŋ bɛlbwa dɛɛ la.
6Gel kooro do kɛŋɔ
bwaala waa ɡela
koo kwa ɛɛ do wer,
dɛ́ do kɛŋɔ bwaala nee
aa ɡela harɛ sɔɔh,
dɛɛ do wer la ken.
7N Naa Korowii, ɡel waa
aa wera dɛ toɡre la do
harɛ nɔ ta, o kora dii ta
saŋ bɛlbwa,
ásɛ nɛra baa soɡe harɛ nɔ
ta
dɔ deŋnesɔɔhna ka tel kɛŋɔ,
korobie aa ɡel chaahna.
8Wɛɛ di koraa le
mpo bɛl ta ba kaa bɛl ta,
dɛ le Yufretis Moo ta
ba kaa harɛ jaɡa.#Sek 9:10#1Ko 4:21
9Nɛra baa lɔ pua hɛŋle ɡbo
harɛ ta
ɛɛ ba ɡuŋi o siee,
ásɛ o dɔma chole chɔ
bomboɡ ta.
10Taases harɛ koranar,
ne nɛra baa soɡe
mpo nyoa bojaŋa ɛɛ
kpɔ ba harɛre kwaa ba tɛo.
Seeba ne Seba koranar
ɡee kpɔ koŋkɛɛlaa ba tɛo.
11Koranar bwa ɛɛ ba ɡuŋuu,
ásɛ harɛre nɛra bwa tomɔ.
12Kooro la ɛɛ lɛ nyaara
baa wia dɛɛ noo,
ne nɛŋɡwɛɡra baa wola
nɛra dɔe bá cha ba laanee.
13Wɛɛ na nyaara
ne nɛŋɡwɛɡra sumii,
dɛ́ lɛɛ ba le seo nyoa.
14Wɛɛ lɛɛ ba le fiiɡa
ne nɛnchɔɡa nɔn taa,
dɛkalkɛŋɔ ba mkpa
dɔe waa hiaoh.
15N Naa Korowii
tɛ kooro mkpajaŋ!
Gel nɛra le Seeba harɛ ta
dɛ́ kpɔ suuɡaswɛm ba
tɛo.
Gel nɛra sweero
andɛɛɡa saŋ bɛlbwa,
dɛ́ soŋe dɛɛ tɛo tɔpere
bɛlbwa ɡe.
16Gel boyu perɛ harɛ nɔ ta,
ásɛ mea ɡe bu
deŋɡarere bwa dor.
Gel a ɛ kɛrɛdɛ kɛŋɔ anɔ la
aa lɔ Lɛbanɔn harɛ
bwejena dor,
ásɛ nɛra ɡe su bwɛjena la
ta, kɛŋɔ kpɔɡa
aa lɔ koo ta ken.
17Gel kooro sɔn do le
saŋ bɛlbwa dɛɛ la kɛŋɔ,
wee aa lole dɛɛ lɔ
saŋ bɛlbwa nɔ.
Harɛre nɛra bwa ɛɛ
che o nɛɛ dɔ andɛɛɡa
ásɛ dɛ na kɛŋɔ Korowii
sweero andɛɛɡa.
18Hé kpɛɛ Korowii
Israel tena aa dɛ tomɔ!
O ɡboo dɛɛ ɛ
nyokpowe-ɛɛla.
19Hé kpɛɛ o sɔn waa dɔ
jirima saŋ bɛlbwa dɛɛ la.
Hé ɡel o jirima su
harɛ nɔ ta bwa.
Aamen.
20Jese bibaa Kooro Devid
wesoŋa la jaɡaa nɔ.
Currently Selected:
Yela 72: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
