Yela 71
71
Banjena bɛl wesoŋa
1N Naa Korowii,
henee n chwa baa marɛ,
bɛ ɡel sihiih kpo mɛ.
2Che toɡra he wa aa toɡra ta,
dɛ́ cheɡ deŋne no n be,
dɛ́ lɛɛ mɛ.
3He do kɛŋɔ Bwetal maa
chwaa baa marɛ saŋ bɛlbwa,
che he waa haa bola la ta,
dɛ́ lɛɛ mɛ.
Henee n Bwetal,
ne n danjwɛkpeɡ.
4N Naa Korowii maa dɛ tomɛ,
lɛɛ mɛ le nyubinikpeɡ tena,
ne wechɔɡ-ɛɛra nɔn ta.
5Dɛkalkɛ Nemenɛ Korowii,
he nɛɛ mɛɛ hwɛɡɛ,
n kpɔ n te dawɛ he nɛ,
dɛ le n bechale saŋ bwa.#2Ti 1:5-6
6N soɡa bini bwaa n le,
dɛ kpɔ n te dawɛ he nɛ,
baa lol mɛ bwaa he le,
dɛ kpɔ nɔn tɔ n nɛ.
Mɛɛ kpɛɛree saŋ bɛlbwa.
7Nɛra ɡalɡa hweli n we-ɛɛla,
dɛ kpɔ dɛɛ ɛ wa,
dɛkalkɛ henee cheɡɛ n habɔɔ.
8Tɔpebir bwaa mɛɛ kpɛɛre,
dɛɛ baɡle ɡɛ he jirima aa
doa.
9Bɛ men ta n hwɛɛhra bini,
bɛ men vɛh n ɡwɛɡra saŋ.
10N dɔma dɛ nyin mɛ dɛ́ kpo,
ba dɛ vɔrɔwe n vɔrɔwa.
11Ba dɛ bol ŋɔ,
“Korowii vɛoh,
hé ɡel ya tiu dɛ́ lawɔ,
nomɛlbwa toole dɛ́ lɛo.”
12N Naa Korowii,
bɛ ɡel n ne he baah do
jaŋne,
ba warane dɛ́ ba cha mɛ.
13Gel sihiih kpo nɛra
baa cheɡɛ n nɛ,
nɛra baa dɛ nyin
n ne wechɔɡa la,
ɡel ba di ncho kohona.
14Kɛ n te, mɛɛ kpɔ
n hwɛɡaa do he nɛɛ
saŋ bɛlbwa,
maa he kpɛɛraa ɡel bwa.
15Mɛɛ bol he wedɛɛɡa
ɛɛ waa, dɛ́ bol lɛɛ haa
dɛ lɛ nɛra tɔpebir bwa wa,
a lole kɛ a ɡwaa n liire ta
kɛ ń won jemɛ.
16Nemenɛ Korowii, mɛɛ bol
he wejena haa ɛa waa,
mɛɛ bol toɡra he wa
aa toɡra waa,
he ɡbosoo waa toɡra.
17N bechale saŋ bwaa he le
baɡ mɛ he nyokpowe-ɛɛla
wa, n ta ɛɛ
bola dɛ ba le fini.
18Hale n hwɛɛhrɔ n nyumpona
to kwaraa naa,
N Naa Korowii, bɛ men ta.#Aes 46:4
Ja n nɛ, ásɛ n bol he kpeɡri
ne he kan haa doa waa
baɡle n naanar baa ka ba
bwa.
19N Naa Korowii, toɡra he
wa aa toɡra kan kohona,
he we-ɛɛla ɡe kan kohona.
He habɔɔ, nomɛlbwa
toole.#Luk 1:49
20A lole kɛŋɔ he ɡelɔ n na
wahala kohona te,
kɛ hɛɛ berɔ ɡel n dɔ
bokpeɡa ja,
hɛɛ laɡ mɛɛ le seo nyoa,
dɛ́ tɛ mɛ mkpa.
21Hɛɛ ɡeloo ń ɛ nɛnjen kohona,
dɛ́ berɛ kwaa larawe n
bwara ja.
22Mɛɛ lɔ janjelaa kpɛɛre,
N Naa Korowii maa dɛ
tomɛ,
mɛɛ kpɛɛree he kasinteŋ
haa dɔa la wa.
Mɛɛ kpɔ n janjelaa lɔ yela
kpɛɛ hen Israel Nɛŋɡoroŋ
la.#1Sa 16:23
23Mɛɛ do lɔŋɔre silɛɛ nee,
mɛɛ ɡo yelaa kpɛɛre,
he lɛɛ haa lɛɛ mɛ la wa.
24Mɛɛ bol he toɡra
haa toɡra waa tɔpebir
bwaa,
dɛkalkɛ nɛra ba fe
aa dɛ nyin n ne wechɔɡa la,
sihiih kpo ba, ba wili.
Currently Selected:
Yela 71: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
