Yela 64
64
Nɔn kpɔe dɛ́ tɔ nɛn nɛɛ wesoŋa
Kooro Devid yel
1N Naa Korowii,
cheɡ deŋne no n wesoŋa
nɔ,
kpɔ nɔn tɔ n nɛ,
dɛ́ lɛɛ mɛ le ɔma
maa dɛ ɔmɛ n dɔma ta.
2Lɛɛ mɛ le nyubinikpeɡ tena
vɔrɔwa nyoa,
lɛɛ mɛ le wechɔɡ-ɛɛra
baa wara nɔn ta.
3Ba nyoa wobol nyɛɡre kɛŋɔ,
kere, dɛɛ yaɡɛ kɛŋɔ kpaah
yon ta hɛmchɔɡe la ken.
4Nyubinikpeɡ tena
baa wola ɔmɛ la,
ta hɛma wɔrɔbe nɛɛ le
ba sɔɔhbɔr,
dɛɛ yaɡɛ nɛra
ba wa aa toɡra.
5Ba dɛ do dɔŋa ɡbemba
ba wechɔɡa vɔrɔwa ta,
dɛɛ baɡle bela baa kpɔ
kwaa baa kpɔ haɡre
bela la sɔh.
Ba yon ŋɔ,
“Nomɛlbwa aa yaa na.”
6Ba dɛ vɔrɔwe wechɔɡa dɛ́ ŋɔ,
“Waa yaa vɔrɔwa nɔ
maɡrɔ kɛrɛdɛ!”
Kasinteŋ, nɛwɛnyini
tea bini aa jemɛ.
7Korowii ɛɛ tɛr ba deŋnee,
ba ne jara
dɛ ba choɡlo chɔ,
kɛŋɔ baa ta hɛma
yaɡ ba ken.
8Wɛɛ ɡeloo ba vɔrɔwa la
bwa ɡure ba nyu ta,
ásɛ nɛra na ba
dɛɛ viiɡi ba nyuune,
dɛɛ mam ba.
9Nɛwɛnyina bwa ɛɛ ɔmɔɔ,
dɛ́ na waa Korowii aa ɛa,
dɛ́ kpɔ do ba liire bini.#Jon 1:15-16
10Nɛra ba wa aa toɡra
bwa ɛɛ hɛɡroo,
dɛ́ chwa ka marɔ,
ásɛ nɛra ba bambile bini aa
toa kpɛɛro.
Currently Selected:
Yela 64: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
