Sɛɡla 3
3
Bonɔɔna ne toli jae waa ja
1N bie, bɛ waa maa baɡle nɔ soh, ɡel he liire do waa
maa ŋɔa hɛɛ ɛ ta,
2aa ɡeloo he dɔ mkpajaŋ,
dɛ́ berɛ ɡel he soɡa bini
do wer.
3Bɛ ɡel Korowii nyina
ne nɛnnyin dɛ kasinteŋ paŋɛ.
Kpɔa ɛ kɛŋɔ baŋa kon,
ɡel a ɛ he bambile wa.
4He ɛ ɡɛ naa, hɛɛ dɔ sɔndɛɛɡee
Korowii ne nɛra bwa be.
5Bɛ he te kpɔ dawɛ
anɔ la haa jema ta,
kpɔ he hwɛɡa bwa
do Korowii nɛ.#Jer 9:23-24
6Wobɛlbwa haa dɛ ɛ la,
lii Korowii wa,
ásɛ o baɡle ŋwɛnɛdɛɛɡe
hé kpɔ o ta.
7Bɛ he te wejereme kohona
dɛɛ lii,
ɔmɛ Korowii,
dɛ ke he te wechɔɡa ta.
8Dɛ he teŋɛ a ta naa,
aa ɛo kɛŋɔ tɛɛɡa,
dɛ́ do he bwara bini
dɛɛ chaeh.
9Kpɔ he kondɔɔh,
ne he koo kondikonloɡla
tɛ Korowii,
dɛ́ kpɔ duuru.#Mma 26:2; Mal 3:10
10Anee dɛɛ ba ɡela he dɔ
mea kohona he dɔndɔŋ su,
ásɛ dɛ berɛ dɔ senfala
kohona,
haa wola won dɔ
kwaa dɛ́ do a bwa.
11N bie, dɛ Korowii
dɛ tɛr he deŋne aa,
bɛ an wesale lii.
Dɛ o dɛ toɡre naa,
bɛ ɡel a hwah he bwara.#Hib 12:5
12Nɛn Korowii aa dɛ nyin la,
onee wɛɛ kah,
kɛŋɔ mɛɛ yon dɛɛ
toɡre o binyini la.
13Nomɛlbwa waa dɔ
wejema la, o na som.
Nɛn waa dɛ no waa mun
la,
14a dɔ tɔnɔ dɛ ɡwaa suuɡapoŋ,
a ɛ kondɔɔh ɡwaa
suuɡaswɛm.
15Wejema yoɡ kpeɡri,
dɛ ɡwaa kwaa baa
kpɔ suuɡaswɛm ɛa,
he konnyini bɛlbwa toole
he won kpɔ maɡɔ.
16O dɛ tɛ mkpajaŋ,
dɛ berɛ dɛɛ tɛ
kondɔɔh ne jirima.
17O ɡelɔ he soɡa bini ɛɛ do
wer, dɛ́ berɛ ɡel
hɛɛ dɔ bosɔɔhna.
18Nɛra baa dɔ wejema la,
ba na som,
o dɛ tɛ mkpa kohona.
19Wejema nee Korowii ta harɛ,
waa mun noe taa o che,
dɛ ta nyundua ɡe.
20O wejema taa o che,
dɛ ta neerare aa palɛ,
dɛ berɛ ta baama
aa ɛ bwaala dɛɛ nɛ.
21N bie, lawɛ he wejema
ne waa mun noe bini,
bɛ ɡel a paŋɛ.
22Aa tɛɛ mkpaa,
dɛ́ ɡel he soɡa bini do wer.
23Anee dɛɛ ba ɡela he valɛ
wobɛlbwa ta sɔnɔnɔɔ,
haa wola nachɔɡee lɔ.
24He chɔɔ waa haa ɔmɛ,
dɛ́ chɔ domsoma.
25Haa wekpeɡa aa
dɛ piɡri nɛn waa lii,
kɛɛ wenaale aa dɛ ba
wechɔɡ-ɛɛra nɛɛ laanee
ɔmɛ.
26Korowii ɛɛ kpɔ nɔnee tɔ he
nɛ, waa ɡel he jo waa ta.
27Gɛ haa dɛ ba wona ɛ tɛ nɛra
aa hiah ba la ɛ,
dɛ he dɔ a kpeɡri aa.#Gal 6:10
28Dɛ he dɔ komɛl
dɛ́ tɛ he dɔŋ aa tɛo,
bɛ ŋɔ ó kaa kere dɛ́ ba.
29Bɛ wechɔɡa lii tɛ he dɔŋ
waa dɔ hwɛɡa he nɛɛ
dɛ so bɛne.
30Bɛ waa kpɔ dawɛ
he dɔŋ nɛɛ pɛɛpɛɛ,
dɛ o ta hen waane ɛɛ.
31Bɛ ɡel he sie beɡre nɛn
waa dɛ nyin yoi kwaa ta,
bɛ waa waa dɛ ɛ la ane ɛ.
32Korowii kii nɛn
o ŋwɛnɛre aa ɡola,
o dɔ hwɛɡa tɛ nɛn
o wa aa toɡra,
dɛɛ bol o waa o be.
33Korowii nyotaahna
lɔ wechɔɡ-ɛɛ dem,
kɛ nɛn o wa aa toɡra
dem te,
o swee andɛɛɡa dɛɛ tɛo.
34Korowii dɛ mamɛ
mbarafo tena
baa dɛ mamɛ ba bala,
dɛɛ sune nɛra baa
dɛ pwɛr ba te la nɛ.#Jem 4:6; 1Pi 5:5
35Wejeremaa dɛɛ dɔ jirima,
ɡɛna ɡee dɛɛ so sihiih ta.
Currently Selected:
Sɛɡla 3: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.