Obadia 1
1
1Waa aa dɛ ba Edom harɛ ta chiɡa Nemenɛ Korowii kpɔ baɡle Obadia laanee nɔ.
Ya noɔ ɡɛ Korowii aa bol
Edom harɛ wa.
O tomɛ o torome bɛl harɛre
nɛra be ŋɔ,
“Hé ir, ya kpɔ ya te ka pu
Edom tena yo.”#Ɛse 25:12-14
2Korowii ŋɔ Edom tena be ŋɔ,
“Mɛɛ ɡeloo he ɡwɛɡre
harɛre nɛra bwa bini,
ásɛ ba hah heya,
dɛɛ nyiŋi he nyubaahna.
3He mbarafo neɡre heya.
He soɡe bɔɔne bini bwejena
dor, dɛ yon ŋɔ,
‘Umee dɛ́ won ba
n ne harɛ nɔ?’#Jer 49:16
4A lole kɛ he soŋnibɔr lɔ
nyundua,
kɛŋɔ kee yon ka sɔh
o kɔr nyundujaɡla la,
kɛ mɛɛ ɡeloo he le bela
ba harɛ.
Men Korowiirii bola.
5Ŋwɛɛra dɛ ba jwaana aa,
anɔ la baa dɛ nyin ɡboo
baa kpɔ.
Nɛra dɛ pa daa nɔna aa,
ba dɛ ɡel beŋkpoŋa ane.
Kɛ he Edom tena te,
he dɔma kpoo he bwa.
6He Esɔ naanar,#1:6 Esɔ naanaree Edom tena. he dɔma pa
he kondɔɔh haa kpɔa
sɔh bwa kaa.
7Nɛra he ne baa fɔwɛ fɔo
ɛɛ le he ne he harɛ taa.
Baa neɡre heyaa,
dɛ́ pɔ he nɛ.
Daamanar he ne baa pɛ nɔn
di kwaa ɛɛ harɛ
heyaa belii
haa wola jemɛ.”
8Korowii ŋɔ,
“Awola tɔpere la,
mɛɛ tɛr Edom wejerema
deŋnee, nɛra baa dɛ no
waa mun dɛ so
bwejaŋa dor bwaa
mɛɛ ba chɔɡa.
9Bwɛjen Teman laa tena bwa
ɛɛ ɔmɔɔ kohona.
Baa kpoo ba bwaa
Edom harɛ la taa.
10Edom tena, haa cheɡɛ
ŋwɛnɛchɔɡe ta kpoo
he lolanar
baa ɛ Jekɔb naanar
nomanta,
chɔɡaa hɛɛ ba chɔɡa,
dɛ́ di ncho saŋ bɛlbwa
dɛɛ la.
11Awola Jekɔb naanar dɔma
aa lɔa ka tɔ Jerusalam tena
nɛɛ la, he Edom tena
cheɡɔ nyiŋi
ba pa ba kondɔɔh bɔne dɔŋa.
He ɡe ɛ nɛnchɔɡa kɛ ban.#2Ko 25:8-11
12A fe ta chɛɛ kɛ he sie lɛ
he lolanar baa lɔ Juda harɛ
wenaale wa.
A ta chɛɛ kɛ he hɛɡre
ba chɔɡa wa,
kɛɛ dɛ mam ba ba sibeɡra
tɔpere wee.#Wii 1:11
13A ta chɛ kɛ he jo n nɛra be
bwɛjen la ta
he sie lɛ ba wenaale wa,
dɛ́ kpɔ kpeɡri pa ba kondɔɔh
kaa ba chɔɡa tɔpere wee.
14A ta chɛɛ kɛŋɔ he ka che
ŋwɛnɛ chɛchɛre ta lawɛ
banɔ la baa dɔ bɔr chwa le
dɛɛ kaa la.
A ta chɛ kɛ he kpɔ ba ka
do ba dɔma nɔn ta ba
sibeɡra tɔpere wee.
15Tɔpere men Korowii aa kpɔ
bol harɛre ta nɛra bwa waa
dɛ́ pa bole la telo tonɛ.
Gɛ haa ɛa nɔɔ mɛɛ ba kpɔa ɛ
he Edom tena ɡe,
he we-ɛɛla bwa ɛɛ ɡure
he nyu taa.
16N ɡelɔ n nɛra nyɔ
n danana nee Saayɔn Bwejen
waa do ɡoroŋ ta.
Kɛ harɛre aa bara cheme
nɔ nɛra ɡe ɛɛ nyɔ danana nee
á ɡwaa a nɔ ka tel
saŋ baa serewe.
17Kɛ Jekɔb dea bii bane ɛɛ
dɔ ba nyuu Saayɔn Bwejen
la ta,
ásɛ o ɛ bɔr waa do ɡoroŋ,
bá berɛ dɔ harɛ waa ɛ
ba kapɛrɛ kon wubwa la.
18Jekɔb ne Josef nɛra ɛɛ doo
kɛŋɔ nii,
dɛ́ chɔɡ Esɔ dea bii ɡɛ nii
yon dɛɛ fuh haahra la.
Esɔ naanar bini bɛlbwa
aa kae ba.
Men Korowiirii bola.
19Nɛra baa soɡa bɛne Nɛɡɛv
pua hɛŋle ɡbo harɛ ta
ɛɛ ba so Edom harɛ
bwejaŋa doree,
ásɛ banɔ la baa le
deŋɡarere lɔɡre
ba lɛ Filisti tena harɛ so.
Israel tena ɛɛ ba so Efrem
ne Samaria harɛre taa,
ásɛ Bɛnjamen dea bii ɡe
ba lɛ Gelead harɛ so.
20Israel laa tena baa chwaa
ka so Keenan harɛ
ɛɛ berɔɔ ba lɛ
Foniisia harɛ,
dɛ́ kpoŋe ka le Sarefat,
dɛ́ so o ta,
ásɛ banɔ la ɡe baa
le Jerusalam dɛ do
Sɛfarad la ka lɛ bwɛɛre
aa lɔ Nɛɡɛv, dɛ́ so a ta.
21Jerusalam baala baa yoa
dɛ le la ɛɛ ka yo
Edom tenaa,
dɛ́ kpɔ harɛ la dɛɛ nyiŋi
o ta.
Asɛ Korowii ɡbabir ɛ
ba kooro.”
Currently Selected:
Obadia 1: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
