Maeka 1
1
1Baa bɛl sɔne Maeka dɛ le Mɔresɛt. Korowii pili waane aa dɛ ba bwɛjena Samaria ne Jerusalam chiɡa baɡlo. Dɛ ɡɛ saŋee Juda koranar bane baa dɛ yer ba Jotam#2Ko 15:32-38 ne Ahas#2Ko 16:1-20 dɛ Hɛsɛkea#2Ko 18—20 di kora teŋɛ dɔŋa nɛɛ Juda harɛ ta.
2Hé no, nɛra haa lɔ
harɛ nɔ ta bwa,
ne komɛlbwa waa lɔ harɛ nɔ ta.
Nemenɛ Korowii le o Dea
waa do ɡoroŋ nyundua
dɛɛ ba dɛ́ ba bol
waa bɔ heya.
Korowii bol Samaria ne Jerusalam chɔɡa wa
3Hé na! Korowii le o dobɔr
waa do ɡoroŋ,
dɛ tu baa valɛ bwejena dor.
4Asɛ bwejena bwa mwɛɛ
o lɔɡa,
kɛŋɔ tohkel aa chɔŋɛ nii ta,
dɛ palɛ dɛɛ jo
fɛlembɔjena bini
kɛŋɔ bɔchuubu ken.
5Israel tena baa ɛ Jekɔb naanar
wechɔɡa baa ɛ Korowii
waa a bwa ba ɡɛ.
Bamewaa ɡela Israel tena
ɛ deŋnekpeɡ ɔ?
Samaria koobwɛɛ nɛra
laa aa?
Bamewaa dɛ́ di bolchɔɡe
voɡa baa dɛ tomɛ
Juda harɛ ta waɔ?
Jerusalam tenaa.
6Anomanta, Korowii ŋɔ,
“Mɛɛ ɡeloo Samaria
berɛ dimɡbia,
baa parɛ ɡrepo daa koonii,
dɛ́ kpɔ a nɔna dɛɛ ɛ
sen bela,
dɛ́ taɡɛ o danjwɛɛ bwea
bwa ka do fɛlembɔjen ta,
ásɛ o mumpar bwea
bwa chɔ baŋ.
7Samaria tena voɡa
bwa ɛɛ paɡroo burbur ken,
ásɛ nii fuh saraha kwaa
bwa aa lɔ bela.
Mɛɛ chɔɡ ba voɡa bwaa.
Baa lɛ kwaa haahna aa
bɔ jwamane dɛ dɔ,
dɛ boa a nyoa nomanta,
ba dɔma ɛɛ paa ka tɛ
jwamane tena bane
ɡe bobɛl.”
Wii ne suna dii
8Men Maeka ŋɔ,
“Anɔ nomanta mɛɛ wiu
dɛɛ dooɡe lɔŋɔre,
á baɡle kɛ n dɛ di suna.
Mɛɛ valɛ nakpapɛɛ
ne mumɡbalee,
dɛ́ si kɛŋɔ kalampoŋa,
dɛɛ si kɛŋɔ kwiu ken.#Aes 20:2-4
9Baa do Samaria tena bolaa
baa wola won chah,
Juda tena ɡe dɛ ba
a dɔŋa nae.
A tel bwɛjen Jerusalam
doonyojen tenten bela
n nɛra aa soɡa.”
10He bɛ a waa bol baɡle
ya dɔma Gat tena,
hé bɛ wi kwaraa ɡe.
Hé ɡbili bomboɡ ta Bɛt Ofra,#1:10 Bɛt Ofra munii bomboɡ dem.
á baɡle kɛ
he bambile chɔɡɔ.
11Safir tena, hé valɛ ba kaa
bojaŋ harɛ ta mumɡbal
ne sihiih ne.
Bwɛjen Saanan tena ɡe,
hé bɛ lii ŋɔ hɛɛ le o taa.
He baa no kɛŋɔ Bɛt Ɛsɛl tena
dɛ wi aa,
he jemɛ kɛŋɔ he ta sɔɔhbɔr
ba be bela dɔe.
12Marɔt tena, he lɔ bonyɛɡa ta,
dɛɛ kpa kɛŋɔ
he dɔ bosɔɔhna,
dɛkalkɛŋɔ Korowii kpɔ
chɔɡa ba ta he nɛ,
hale a tel bwɛjen Jerusalam
doonyojen tonɛ.
13Lakes tena ɡe, hé vɔrɔwe
kwaa aa do kɛŋɔ
torɔɡore pɛl jaɡre.
He chaa Israel tena
wechɔɡa baa ɛa,
a che a ta Jerusalam tena
ɡe ɛ wechɔɡa.
14Juda harɛ tena, hé kal
Mɔresɛt Gat tena
dɛ́ le bwɛɛ la ta,
Israel koranar aa chae
bɛlbwaa dɔ le
Aksib tena be.
15Mɛɛ ɡeloo dɔm ba yo
he nɛra haa lɔ Maresa,
dɛ́ pɔ he nɛ.
Ásɛ Israel nomonome
chwa ka sɔh Adulam
bwebɔɔ bini.
16Juda tena, hé fonɛ
he nyuune,
á baɡle kɛ he dɛ di suna,
dɛ́ wi tɛ he bii
haa dɛ nyin ba la.
Hé paa he nyuune, á do kɛŋɔ
kɔkɔsaki nyu,
dɛkalkɛŋɔ baa laɡ baa
le he be
kaa bojaŋ harɛfale ta.
Currently Selected:
Maeka 1: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
